Fo salir la sentencia de la manada y la xente tiróse a la cai, xente de toa mena pero sobro manera muyeres. Y nun yera pa menos, la sentencia, que nun ye firme, dexó en pasmu a tol país. Yo toi tamién ente los pasmaos y esto ye porque pensaba que les coses taben pernídies. Al paecer les coses nun taben tan clares, a lo menos pa los xueces que ye a los que-yos pertenez xulgar.
L'asuntu, pa los que somos legos nes coses de les lleis y la so aplicadura, paez que tán nel fechu de si hebo violencia o non. Yo téngolo perclaro, cinco paisanos nun rincón al rodiu una neña, menuda y con unes copes nel cuerpu, ye violencia per definición y el que nun lo quiera ver ye porque nun-y da la gana. Pero'l problema vien cuando tenemos de dir a lo que la llei defín como violencia y, al paecer, ye ellí aú ta'l problema. Los xueces nun vieron esa violencia y ún d'ellos hasta vio divertimientu.
Agora tenemos a mediu país pidiendo la tiesta los xueces, sobre too la del divertimientu. Tenemos una petición en Change org, con munches firmes y creciendo, que piden l'inhabilitamientu de los maxistraos. Munchos gritos y munches pancartes. La imaxe recuérdame'l "casu Malinkof", aquella neña qu'apaeció muerta contra la so casa y que toles culpes-y cayeron enriba a l'antigua novia de la so madre. Cada vegada que la movien la Guardia Civil tenía qu'emplegase a fondo pa que nun la mataren. Cayeron-y una montonada d'años de condena pero unos años más tarde, gracies al adn, garraron al responsable verdaderu qu'anguaño pena condena na cárcel.
La xusticia ye ciega, xulga en base a los fechos, y nun ye infalible, como bien amuesa'l "casu Malinkof". Poro, nos Estaos de drechu, como'l nuesu, les sentencies son recurribles, como va pasar col casu de la manada. La xente tien tol drechu a indignase, y tamién, poques gracies, a salir a grítalo a la calle pero, cuando s'empecipia a gritar escontra los xueces, que nun faen otra qu'aplicar la llei según el so criteriu, el criteriu de xuez, corremos el riesgu de convertinos en xauría, la versión urbana de la manada. Xauríes yeren les que quemaben xudíos nos progromos, xauríes yeren les que acosaben, rapaben y pegaben a les muyeres franceses que tuvieran rellaciones con soldaos alemanes mientres la ocupación alemana, xauríes somos toos cuando esquecemos qu'España ye un Estáu democráticu y de drechu y que hai que dexar que les coses sigan el so camín acordies colo establecío nes lleis.
El casu ye que siempres hai daquíen qu'encerriza la xauría. A dalgunos políticos, nesti casu, faltó-yos tiempu pa salir a la cai con declaraciones que van escontra los xueces, esqueciendo que los xueces nun faen otra q'aplicar les leyes qu'ellos, poder llexislativu, aprueben nes Cortes, y que si les lleis nun algamen a cubrir tolos aspeutos de los sucesos a xulgar sedrá qu'ellos nun les ficieron tolo completes que les debíen de facer. Estes salíes de tonu per parte de los políticos ye lo más obscenu d'esta hestoria. La xente tien más sentimientu que conocimientu pero de los políticos esperábase más conocimientu y tamién más comportamientu.
Hai otros políticos, xeneralmente los que tán nel gobiernu, que cuando pasen estes coses falta-yos tiempu pa prometer cambeos nel Códigu Penal, y nun ye qu'esto tea mal, más val tarde que nunca, diz el refrán, pero un país modernu ya conducente nun pue tar siempres esperando de la reaición del gobiernu de turnu, amás, de pocu va servir si cuando camuda'l gobiernu los nuevos van camudar tamién les lleis. Toles lleis son importantes pero les qu'afeuten a la integridá física de les persones paez que tendríen de ser consensuaes pola mayoría de los partíos políticos.
Vien agora'l puente del Primeru Mayu y tol personal cola pel puente, pa cuando tornen ya vamos tener otru asuntu nos periódicos y lo de la manada yá nun va ser primera plana, tendremos otres coses de les que mos ocupar y pa cuando lleguen les eleiciones van ser mui pocos los que se preocupen de güeyar que ye lo que ponen los partios políticos en rellación cola xusticia. Hasta qu'aporte otra manada u otra Malinkof. Ye lo qu'hai.
27 d'abril de 2018
No comments:
Post a Comment