La Frontera

 

Falaben de fronteres anueche nes telenoticies, n’Asturies. Confieso el mio desasosiegu magar que la nuesa tierra carauterizase precisamente por teneles mui definíes nel aspeutu xeográficu. De les que se falaba yeren clásiques y poro dos tales periodistes  esplicaben en direuto dende Bustio y Figueras cómo, probablemente, diben llantase controles pa pasar a Santander y Galicia. Esmolecedor.

El coronavirus tórnamos a una situación desapaecida sieglos atrás, cuando España tenía fronteres y aduanes interiores. Sedría cola llegada de los Borbones cuando se intentó avanzar haza la modernidá de la mano de la Illustración. Felipe V tráxose a Giulio Alberoni dend’Italia pa que tomase la referencia de lo que yá se facía en Francia, y ésti rodióse de los primeros illustraos, ente ellos Patiño n’Hacienda.

En 1717 cayeron les aduanes interiores qu’enzacaben el comerciu, resistiendo entá per dalgún tiempu les de Navarra y les Provincies Vascongaes; anque los portazgos, aínda se caltuvieron llargu tiempu en munchos llugares nos que se cobraba por atravesar una ponte, o cruciar una determinada demarcación protexida por dalgún drechu señorial vieyu. Depués construiríense carreteres con drechos de portazgu, daqué qu’aportó hasta nós colos peaxes d’autopistes modernos. Pero les fronteres interiores yá nun tornaron; hasta agora.

El coronavirus ta camudándomos la vida, enfrentanos a la precariedá de les nueses vides y, no político, ta poniendo n’evidencia les insuficiencies y escualidez del sistema políticu de nueso; nesti casu l’estáu autonómicu que nun paez ser a retrucar a la situación, especialmente cuando la polarización política a nivel nacional algama cotes nunca enantes contemplaes. Fronteres pa contener un virus que se tresmite pol aire.

El coronavirus tamién pue crear, de forma entá más sibilina, otres fronteres de mayor algame que les físiques; fronteres sociales sutiles pero de consecuencies ciertamente dañibles. Como les qu’entamen, yá tán equí, ente los alministrados, los ciudadanos, y los alministradores, les élites de tou tipu.

Antieri otorgabense los premios anuales de una gran cabecera periodística en Madrid. Ellí taben altos representantes de los gobiernos nacional, autonómicu y llocal; tamién había representantes del empresariao nacional; toos ellos nun llugar cerrao, dalgunos con mázcara, los más ensin ella, posiblemente con una pcr recién fecha, pero dando una imaxe tarrecible de tar pencima de les normes que pa toos se promulguen y qu’a ellos nun paecen afeutar.

La situación del país va dexar una cuenta horrorosa de persones que s’habrán dio enantes de la fecha que, en condiciones naturales, yos correspondiere pero, más allá d’eses feríes, creo que se ta produciendo un alloñamientu fonderu de la ciudadanía col sistema políticu que mos traxo hasta equí y que ye’l caldu nutriente nel que se tienen desendolcao los políticos, les élites que güei mos dirixen. Una frontera peligrosa.

Raúl Suevos

En Xixón a 28 díes vencíos d’ochobre de 2020

Torna en castellán en repdiv.blogspot.com

El bastiazu

 

Tuviemos ayeri n’Asturies un sábadu gloriosu de seronda. Ventipocos graos de temperatura, sol y ausencia de vientu, tiempu ideal pa esfrutar d’esos campos municipales de golf que construyó y caltien l’ayuntamientu de Xixón pa desmontar el dichu de que ye un deporte elitista.

Ye’l tiempu, enantes de la gastronomía, el futbol y la política, l’elementu principal nes parolaes que salen a lo llargo d’esti entretenimientu deportivu tan popular na villa de Xovellanos. Y ye qu’equí, ente’l Cantábricu y los Picos d’Europa, tenemos un paraísu particular pa meteorólogos.  Al respective de l’augua , equí entamamos col orpín, esa humedá casi imposible de decatar que se tresforma en gotes d’augua na punta del pelo y que mos lleva a salir de casa con “chaquetina” en delles nueches de branu; a esti sigui-y l’orbayu, augua supermenuda que notres partes nomen calabobos y qu’equí, amás d’amugar la tierra, sirve pa moldiar el calter de los asturianos; depués vendría’l goterar, eses gotes tontes que nun acaban de decidise y que dexen de cayer en cuantu qu’abres el paragües; a éstes sigue-y’l llovíu, esto ye, el llover clásicu de siempres, pero qu’equí ye cadenciosu y persistente, n’ocasiones mientres díes; y, yá pa rematar, aportamos al bastiazu, esi repentín y sópitu golpiar del augua, con fuercia rompedora a vegaes, acompañáu de raches de vientu otres, y de curtia duración afortunadamente, como los d’esta mañana dominguera tres el sol d’ayeri.

Esa debió ser la sensación del señor Abascal va un par de díes nel Congresu cuando el so antiguu collaciu y amigu de les Nueves Xeneraciones del PP, y anguaño mandamás del partíu, lu atacó de forma súbita, sorpresiva ya inmisericorde nel so turnu de pallabra. Tanto que, per primera vegada, vióse al líder conservador afectáu hasta na espresión corporal. Nel otru llau, el del señor Casado, la reaición aprecióse nos nutríos aplausos que la so tropa-y otorgó, aplausos que llueu se vieron empañaos poles allabancies d’Iglesias y Lastra. Ay, esos afalagamientos, ye probable que, pa desgracia de Casado, resuenen muncho más que los aplausos propios.

Too, creo, ye tacticismu. Casado necesita, casi a toa costa, distanciase de la “ultra” drecha qu’en toa Europa foi demonizada pol discursu socialdemócrata, güei ensin ideoloxía propia, y que sirve pa encasillar a los alversarios como fascistes, recuerden el trifachito. Agora, si sabe facelo, debería tar en situación de reprochar a socialistes les compañíes coles que caminen, comunistes estalinistes, filoetarres y separatistes de toa miente.

Un apueste fuerte, que nun asegura recuperar votos pela drecha y, si Arrimadas lo fai bien, con poca collecha pela manzorga. El tiempu dirá si mereció la pena atacar personalmente a Abascal.

Raúl Suevos

En Xixón a 25 díes vencíos d’octubre de 2020

Torna al castellán en repdiv.blogspot.com

Nin arábes nin separatismu

 

Nel añu 2004 fíximi cargu del mandu del batallón multinacional del Eurocuerpu, una esperiencia inolvidable.  Allugáu na histórica  ya imperial ciudá alsaciana d’Estrasburgu, el cuartel taba pela rodiada, nel barriu de Neuhof, nun edificiu maraviosu que construyeran los prusianos allá pel lloxanu 1870, tres ganar la guerra y el territoriu a Napoleón III.

El mio antecesor, un teniente coronel francés, díome enantes de despidise delles conseñes de seguridá pal día a día. El cuartel taba rodiáu d’edificios ocupaos por emigrantes de mayoría magrebí, o bosníacos en dalgún casu y, pa Navidá, había que mover tol parque móvil haza’l patiu d’armes central para enzancar que dende la cai dalgún coctel molotov algamase dalgun de los nuesos vehículos. Naquel barriu inventarase’l vezu de la quema de coches pa Navidá.

Anque namái había 800 metros hasta’l Cuartel Xeneral del Eurocuerpu los coches oficiales teníen prohibido cruciar el barriu, pa evitar problemes, y nel so llugar tomábase una ruta de dos kilómetros. El barriu tamién yera’l mayor centru de menudéu de droga de la rexón, pero too yera compatible con un alzáu gastu social per parte d’ayuntamientu, rexón y estáu francés. L’aportar del tranvía eléctricu daquella foi un intentu ulterior de dinamizar la zona; anque pocu depués díose ellí un pasu más nos fuegos de nadal cuando llograron encerrar nuna cai un coche de bomberos que viniera a apagar un coche cebu que-yos punxeran, y también-y prendieron fueu.

A min chocábame qu’a toos los llamaren arábes cuando nel nomáu diccionariu Grenville persistía la definición de maure, moru, pero daquien m’esplicó qu’esa pallabra yera políticamente incorreuta y en desusu en Francia. El casu ye que tres los mios dos años de mandu colé d’ellí col convencimientu de que daqué nun diba na república francesa, sobremanera cuando les celebraciones de los triunfos futbolísticos de la so seleición consistíen en desordenes múltiples coloriaos por toles banderes del norte d’África y ensin malapenes llucir la francesa.

Cola cabera y recien decapitación, la d’un enseñante qu’amaba la llibertá d’espresión, Francia entera quedó noquiada, amoriada, sonámbula. El presidente Macron, como respuesta, fala de llanzar una campaña escontra’l separatismu; sí, escontra’l separatismu. Paez como si utilizar la pallabra islamismu, radical si se quier, fuere tan incorreutu como la de moru y tengo mieu que Francia, una vegada más, enquivocase con esti asuntu, pal que creo que nun hai soluciones políticamente correutes, namái queda una reaición radical escontra quienes ataquen la República güei, mañana Europa, y esa reaición escomencipia por llamar les coses pol so nome.

Nel Grenville tamién se pue atopar el verbu se demerder, de significáu obviu, y más val que toos entamemos a ponelo en práutica en rellación col islamismu radical y too aquello qu’ataca los valires occidentales.

Raúl Suevos

En Xixón a 19 díes vencíos d'ochobre de 2020

Torna en castellán en repdiv.blogspot.com

A Somao, pasando per Caibarién

 

Ayeri tuvieron les SSMM en Somao, pueblu exemplar d’Asturies 2020, acompañaos de pocu públicu, por aquello del covid19, y quiciabes poro paecióme apreciar mui poca cobertura d’esi llugar extraordinariu y los sos rexos visitantes nos medios de comunicación social.

P’averase a Somao, capital  anguaño casi de los indianos asturianos, hai que visitar enantes Caibarién, una villa pequeña que s’alluga metanes la mariña norte cubana. Ellí, tres l’arenao del puertín que daba salida al zucre de la zona, decidióse construyir una villa y puertu nuevos haza la fin del primer cuartu del sieglu XIX. Una población de urbanismu reticular con arbolees formoses nel interior de les manzanes y porches nel esterior pa cubrise del sol y los bastíos tropicales. Una formosa población, güei ruinosa tres más de 60 años de revolución, a la qu’ignoren los milenta turistes que, tres aterrizar nel averáu aeropuertu de Santa Clara, se dirixen nos sos autobuses al Piedraplén –una vía en terraplén de más de 30 km al traviés de les cayeríes que corta la circulación del augua-  que xune la islla colos renomaos cayos Ensenacho y Santa Maria, xoyes del turismu cubán.

En Somao hebo un primer valiente que sacó pasaxe pa Cuba, José Menéndez Viña; pues daquella yera más fácil viaxar a Cuba dende Xixón que cruciar la cordillera camín de la capital d’España. Y, anque nun consta, ye posible que los sos pás vieren pasar el vapor camín d’América dende les fasteres au s’alluga’l pueblu,  perriba de la rasa llitoral y con vistes espectaculares sobro la ría de Pravia y el Cantábricu. Yera per aquel tiempu daqué rellativamente habitual porque munchos d’aquellos llabradores nun yeren propietarios y el caseríu nun daba pa sacar alantre una familia numberosa. Había qu’emigrar.

Menéndez acabó en Caibarién, au’l zucre daba ales al comerciu de tou tipu, y rápido progresó hasta facese un capital. El so ésitu llamaría a otros parientes y vecinos del so pueblu natal, creándose asina una especie de fluxu d’emigrantes haza aquel llugar caribeñu, onde atopaben una cierta red na que sofitase dende la so llegada; daqué mui semeyante, a muncha mayor escala, colo qu’asocede anguaño colos emigrantes chinos nel país de nueso o colos magrebíes en toa Europa, toos con enclín a viaxar allá u cuenten con familiares o amigos.

Col pasu del tiempu, los asturianos, al so regreso yá indianos, foron tornando a Somao, con bonos capitales y ganes de construyise una villa, reflexu del so ésitu personal, y tamién con inversiones n’obres públiques, como escueles, alumbrao, fuentes y llavaderos, etc. lo que llevó, adulces, a convertir el so pueblín n’aglomeración afortunada d’arquitectura y urbanismu que güei podemos alcontrar, y que los sos vecinos supieron caltener y meyorar como pa facelos merecedores del galardón de pueblu exemplar d’Asturies.   

Raúl Suevos

En Xixón a 18 díes vencíos d’ochobre de 2020

http://ambiorviajerum.blogspot.com/2012/07/las-casonas-de-indianos-de-somao.html

Torna en castellán en repdiv.blogspot.com

La Vara jaquesa

 

A Xaca conocenla como la Perla del Pirinéu. Ye una población magnifica allugada na cabecera del riu Aragón que cuenta con una historia perrica y resclavos espectaculares de la mesma. La Ciudadela militar ye ensin dala dulda impresionante, pero quiciabes la xoya seya la so catedral románica, de  la fin del S. XI, anque a min prestame más el prerrománicu astur porque naz col primer reinu d’España y tien, amás, el preciosismu de les coses pequeñes.

Nel llateral del Pórticu sur de la Catedral puese güeyar un huecograbáu que correspuende al patrón oficial d’una vara jaquesa, daqué asina como tres cuartos de metru d’agora o dos codos de los daquella; una unidá de midida qu’algamó a ser mui usada en tol reinu d’Aragón mientres el Medievu. Cuando un cliente denunciaba a un  mercader comprobábase el llargor na puerta de la catedral y en casu de nun coincidir acababa na torre de la prisión, otru de los monumentos medievales de la ciudá qu’entá aguanten.

D’aquellos tiempos vien la espresión rellativa a les “diferentes vares de midir” puesto que los alcaldes, responsables tamién d’impartir xusticia, usaben una vara como símbolu y patrón de midida, y poro a los ciudadanos siempres nos tien preocupao, y muncho, con qué vara diríen a midinos llegáu’l casu.

La nuesa Constitución paecía tener nidio que la vara debería ser única y manexada por unos xueces que, na so mayoría, sedríen elexíos pal Conseyu Xeneral por ellos mesmos, pa asina evitar la tentación de que daquien, el poder executivu, pudiere quita-y la venda de los güeyos a la xusticia. Pero la situación duró malpenes unos diez años.

En 1986, Alfonso Guerra, entós mano drecha de Felipe González, camuda la situación pa que los 12 miembros correspondientes a la xudicatura seyan escoyíos pol Congresu por mayoría de 3/5, lo que facía que la balanza de la xusticia escomencipiare a perder un pocoñín del so equilibriu. Dende entoncenes acostumbramonos a lleer y oyer comentarios sobro l’enclín haza un llau o l’otru del espectru políticu d’ésti o d’aquel xuez, tamién a la entrada y salida en puestos políticos de dalgunos d’ellos ensin que naide paeciere escandalizase.  Quiciabes seya un indicador de la nuesa poca sensibilidá democrática.

Na actualidá otra vegada asistimos a un intentu de cambéu de la vara de midir ensin que los aguaciles reaccionen. El gobiernu quier convertir la mayoría cualificada pa la eleición de los vocales del Conseyu en simple, lo que supunxo, por más que lo refuguen, un avisu inmediatu de Bruseles, pero más peligrosa aínda ye la intención de quitar a los xueces d’instrucción la iniciativa pa dá-yla a los fiscales, ensin enantes separtar el nomamientu y dependencia del Fiscal Xeneral del poder executivu, lo que pue suponer el control definitivu sobro la Xusticia, con mayúscules.

Cómo la política ye un baille con danzantes estremaos, pa sorpresa d’aquellos que lu tachen d’anticonstitucional, el partíu VOX propón nel Congresu tornar a la llínea de salida, esto ye, que los xueces escoyan a los sos representantes; y el antiguu partíu de gobiernu, el PP, va proponer que seya’l Congresu pero sobro una llista seleccionada polos xueces. Mentanto, el ciudadanu namái quier xusticia, imparcial, y conducente.

Raúl Suevos

En Xijón a 17 díes vencíos d’ochobre de 2020

Torna en castellán en repdiv.blogspot.com