La recuperación de Joe Biden

 

L’aportar del presidente Biden a la Casa Blanca ye ensin dulda una de les más sopelexantes que recuerda la historia de la xoven república norteamericana. Una perriñía engarradiella eleutoral col cafiante presidente en cargu, Donald Trump, y los resultaos nun aceutaos por ésti, dieron pie pa que milenta siguidores del mal perdedor, con mayoría de supremacistes de tipu estremáu ente ellos, asaltara la sacrosanta see de la democracia estadounidense, el Congresu de Washington. Ún de los díes más escuros d’esa gran democracia y, pol momentu, líder mundial.

Los primeros meses de la so presidencia viéronse aborronaos pola mala xestión de la retirada d’Afganistán, desastre nel que cooperaron, caún al so nivel, la mayoría de naciones implicaes naquella desgraciada operación, incluyida la de nueso. Les imáxes del aeropuertu de Kabul paecían destinaes a formar parte de les desgracies gráfiques del gran país, xunto a les Torres xemeles  y el propiu Congresu. Yera l’anunciu, pa munchos analistes, d’una presidencia probablemente fallida. Güei la imaxe del presidente Biden paez otra.

La xestión de la crisis d’Ucrania, agora yá invasión, paez que foi más que aceutablemente llevada por él, a lo menos pol momentu. Per primer vegada la intelixencia yanqui foi desvelando les informaciones sobro lo que faría’l rusu Putin con dellos díes d’avance, daqué novedosu por cuantu la teoría previen de facelo pol peligru que supón pa les fuentes. Nun-y importó un res a Biden, qu’al facelo tamién arriesgaba la so credibilidá nel casu que los rusos nun atacaren. La invasión permitió-y tornar énte los sos conciudadanos y socios n’Occidente como daquien que sabe perfeutamente lo que lleva ente les manes.

La posición de Biden llégamos como una amuesa de prudencia y enerxía al mesmu tiempu, poniendo n’evidencia la deriva de Putin, que recuerda peligrosamente a la actitú de Hitler nos periodos previos al estallíu de la Segunda Guerra mundial. Les sanciones económiques, con caráuter nidiamente progresives, y qu’anguaño  anunció dende Washington dexando pa meyor ocasión la espulsión rusa del sistema SWIFT, ye probable que nun supongan efeutos inmediatos, sinon a mediu y llargu plazu pero, los socios de la OTAN, a los que se tien referío Biden repeties vegades mientres la so conferencia de prensa, ye seguro que se van sentir reconfortaos al apreciar que esiste un líder n’occidente que ta dispuestu a responder en tiempu y forma a los abusos y desprecios a les más elementales normes de convivencia internacional que Putin ta llevando a cabu y ello con independencia de que dalgunos quisieren ver a la OTAN entrando nel oeste d’Ucrania.

Nun podemos, desgraciadamente, esperar nada de NNXX col bloquéu del so Conseyu de Seguridá y la so historia d’inoperancia cada vegada qu’una de les grandes potencies ta implicada nel problema y, mientes Bruseles fai cábales, quédamos l’alegría de ver que Biden, qu’achacó la limitación nes sanciones a los socios europeos, ta de vuelta y ye lo único a lo que podemos agarranos agora. Aunque nun seya muncho.

Raúl Suevos

A 24 díes vencíos de febreru de 2022

Torna en castellán en repdiv.blogspot.com

La respuesta ta en Finlandia

 

Debería tar estos díes la atención nacional centrada na “faida” interna del Partíu Popular; asina ye como nomen n’Italia a les guerres ente families mafioses; pero l’autócrata qu’habita nel palaciu del Kremlin decidió col so reconocimientu de la independencia de la ucraniana rexón del Dombas, y la posterior entrada de les tropes ruses na rexón, que los españoles tengamos el “corazón partío” ente les coses de Madrid y la posible llegada de les bombes a Kiev, la capital d’Ucrania.

El primer movimientu de Putin cabe dicir que, como asocede a vegaes colos valores bursátiles, yá taba escontao pola mayor parte de los intevinientes direutos ya indireutos. Daqué tenía que facer tres semeyante y avalumbáu espliegue de menacies y medios militares, máxime cuando la respuesta de OTAN y USA fo la esperable, un nidiu niet a les sos pretensiones sobro compromisos d’Ucrania y OTAN absolutamente inaceutables. Tamién yera previsible l’aplicadura de midies sancionadores por parte d’unos y otros que, éstes tamién, tienen resultao moderades, como si los aplicantes se reservaren pa mayores disgustos y respuestes nel futuru.

D’alcuerdo col xuegu diplomáticu deberíemos entrar agora nuna fase nueva que se superaría si Putin llanzara les sos tropes más allá de la llínea de confrontación ente Ucrania y los separatistes del Dombas, la llínea asumida nos Acuerdos de Minsk de 2015 y agora despreciaos cola so acición por Moscú. Esta fase va tener de sometese en tiempu a les necesidaes de los asentamientos nuevos de les fuercies ruses y tamién al desarrollu de la intelixencia militar necesaria pal casu se decidiere dar el saltu al interior d’Ucrania. Ye un procesu necesario pa les unidaes agora esplegaes en posiciones nueves y conducente pa los diplomáticos.

Toos n’Occidente paecen tener yá preparaos los paquetes sucesivos de sanciones en función de los pasos que Putin vaya executando pero llámame l’atención que nun se contemple lo que me paez que podría ser el mayor guelpe políticu a les ambiciones ruses en rellación cola entrada d’Ucrania na OTAN; y pa ello namái hai que güeyar haza’l norte, haza Finlandia.

Finlandia, parte de Suecia demientres la mayor parte de la so historia, convirtióse en gran ducao dependiente de Rusia nel sieglu XIX, p’algamar la independencia tres la Primera Guerra Mundial aprovechando el drechu d’autodeterminación promovíu pol presidente Wilson de los EEXX. Depués caltuvo una dura contienda cola Rusia de Stalin que-y costaría parte del so territoriu pero non la so independencia. Dende entós desarrolla, tanto colo que fo l’antigua URSS como agora con Rusia, una rellación de ambigüedá que la lleva a entrar na Xunión Europea pero non na OTAN, magar repeties manifestaciones de la so llibertá pa solicitar el so ingresu cuando lo estime oportuno. ¿Habrá aportáu’l momento de solicitar l’ingresu y dar una respuesta verdaderamente contundente a Putin?

Raúl Suevos

A 23 díes vencíos de febreru de 2022

Torna en castellán en repdiv.blogspot.com

Watergate a la española

 

Esi complexu hoteleru de Washington da nome dende va dellos años a les operaciones polítiques encubiertes, xeneralmente delictives o al filu de, empobinaes a escomer la imaxe o les aiciones de los alversarios. Saltó a la primer páxina de los medios cuando unos elementos del partiu republicanu foron escubiertos, metanes la campaña eleutoral, y demientres la nueche, espiando nes oficines del cuartel xeneral de los demócrates pa beneficiu del presidente en cargu, Richard Nixon, quien, a partir d’esi momentu, pon pies en paré hasta que l’amontar del escándalu, animáu poles filtraciones internes, acaba cola so dimisión de la presidencia.

Ellí nació tamién la denominación de “fontaneros” pa too esa clas de personaxes qu’actúen na clandestinidá, o simplemente fuera de la primer plana, pa pente medies tou tipu de martingales o maniobres pocu ortodoxes, beneficiar al partíu o dirixente pal que se trabaya. Y d’eso equí tenemos tamién abondos elementos, anque non siempres se lleguen a conocer les sos actividaes. Un d’ellos, el señor Carromero, tornó ayeri, como un mal suañu, dende la hestoria de les chapuces polítiques del pasáu recien.

En 2012 aportaron un par de mozos a l’Habana; un nórdicu altu y roxu; y notru vuelu, un pequenín, gordosu y alopécicu espécimen hispanu. Formaben un asonsañu estrañu del gordu y el flacu que nun podía pasar desapercibíu pa la policia secreta cubana, siempres atenta y con antenes n’aeropuertu y albergues. Tres alquilar un vehículu y aloxase nun hotel del centru de la ciudá contacten con Oswaldo Payá, el más notoriu disidente políticu de Cuba naquel momentu, y ponense en marcha haza Santiago de Cuba pa alcontrar y contactar otros disidentes del réxime naquella ciudá. Viaxen de nueche y al riscar, tres delles hores de conducción nochirniega del menos espigáu y en contra de los conseyos más prudentes, l’asfaltao cambia incamentablemente a tierra –coses de la desapaición repentina de los rusos que dexó munches obras inacabaes- y el respigu fai perder el control al conductor; el coche salse de la vía y golpea llateralmente escontra l’únicu árbol presente en tola zona, precisamente na parte au viaxa Payá que pierde la vida, y tamién l’otru disidente que los acompaña. Esti ye’l cuadru que describe la policía de carreteres nel so atestáu y qu’una investigación de la embaxada española corrobora. Lo demás son hestories.

El tipu pequeñín yera Carromero, entós xefe de les mocedaes populares madrilanes, comunidá autónoma entós presidida por Esperanza Aguirre, y que tamién yera “colega” d’un al tiempu emerxente y futurible Pablo Casado. El so historial na Direición xeneral de tráficu nun lu facía’l más adaptáu pa una misión de conductor nun país como Cuba, pero tantu daba. Del so viaxe “naide” sabía un res, nin en Madrid nin na embaxada habanera, los fontaneros siempres actúen pola so cuenta, dicen, y, n’estricta aplicadura de la lle cubana, al deplorable conductor y aprendiz de políticu cayeron-y dellos años de cárcel que, en pocos meses, pasaríen a cumplise en Madrid, primero nuna prisión y depués en llibertá vixilada, too siguiendo estrictamente la legalidad vixente. Güei tornó Carromero.

Tornó a apaecer nes noticias, pa rápidamente pasar a dimitir del so cargu de coordinador xeneral nel ayuntamientu de Madrid y tres citase el so nome na trama de supuesta corrupción d’un llau, y espionaxe internu del otru, como presuntu espía de les actividaes de la presidenta rexonal Ayuso y los sos familiares. Un asuntu que menacia con llevase per delantre a les figures más notories del Partíu Popular anguaño, y con elles les previsiones optimistes que nun va nin una selmana, tres les eleiciones en Castilla y Lleón, facíense los militantes y siguidores del partíu. Nun ye mui probable qu’esta operación de fontanería política vaya a salir gratis, los alversarios yá tán siguiendo’l filón tratando de sacar provechu d’esta amuesa de debilidá desendolcada polos propios populares, y na que namái paecen distanciase quienes-yos disputen los votos nel campu conservador, que pueden permitise mantenese nun honrosu, elegante, y ensin dulda granible silenciu.

Qué grandes fontaneros podríen llegar a ser; una pena que nun-yos exsplicaran que estos esfuercios ye meyor dedicalos al alversariu y nun a la familia. Supongo qu’ello ye por tratase d’un Watergate a la española.    

Raúl Suevos

A 18 díes vencíos de febreru de 2022

Torna en castellán en repdiv.blogspot.com

Na Porta Nigra de Tréveris

 

Va dellos años tevi la oportunidá de pasar un fin de selmana na monumental ciudá alemana de Tréveris. Enllena de curiosos restos históricos que van dende la imponente basílica de Constantino, posiblemente l’edificiu de ladrillu más vieyu entá n’usu anguaño nel mundiu, hasta’l más recien y humildosu muséu de la casa natal de Carlos Marx, onde ye posible entretenese viendo les carauterísticas de los variaos especímenes del xéneru humanu qu’a él acuden en reverente procesión.

Hai munchos más elementos d’interés na ciudá, y tamién ye posible complacese, aquellos aquellos que seyan a escaecer el diañu del colesterol, col potente codillu o la rumbosa chucrut. Pero a min lo que más m’impresionó fo la Porta Nigra, quiciabes la más grandona y ablucante de toles construiyíes pol Imperiu romanu y aínda güei toa ella en casi perfeutu estáu. Nun yera pa menos, ellí taba l´última llende xermánica y había que defendela a tou trance.

Construyeronla, dicen, nel añu 180, cuando entá quedaben unos cuantos pal esbarrumbe final, y cuando yá facía tiempu que los romanos emplegaben a xentes de los pueblos sometíos como tropes ausiliares, como los astures, pero aínda nun entamaron cola contratación de pueblos enteros de bárbaros pa que-yos ficieren el trabayu. Eso aportó cuando los romanos se ficieron mantegones y ociosos, escayentes, cuando morrer por Roma yá nun yera interesante. Ehí emtamó la cayida.

Esta selmana va celebrase una cume ente Europa y la Xunión africana en Bruseles pa tratar de ver cómo enríar los problemes de seguridá na rexón. A ella nun van ser invitaos cuatro países sahelianos de recien subvertíos pente medies guelpe militar. Tampocu va acudir Rusia, que col grupu Wagner, empresa global de mercenarios, vase estendiendo pol territoriu; nin vamos ver representación china, el gran inversor económicu na zona, con contratos draconianos que van acabar d’hipotecar el futuru d’esos países; nin muncho menos los grupos yihadistes qu’afaren cada día estayes más grandes de la rexón. Van dir los de siempres, y vamos tratar d’igualo como siempres, con perres pa los oligarques y misiones d’instrucción y adiestramientu de los exércitos de la zona.

Yá nun tenemos Portes nigres, nin lexones que les vixilen, o cabría dicir, voluntá de emplegales, y ca día, como asocediera va dellos sieglos a los romanos, vemos cómo, de una forma u otra, el Limes faise más porosu y por el lleguen grupos de desheredaos que la so imaxe alloñase de la d’aquellos bárbaros pero que nun son más que l’heraldu de la cayida del Imperiu européu, acosáu como entós, non polos enemigos esteriores sinon pola propia escayencia. Ye lo que hai.

Raúl Suevos

A 14 díes vencíos de febreru de 2022

Torna en castellán en repdiv.blogspot.com

A contracorriente n'Ucrania

 

Nes operaciones militares, tamién, oviamente, nel nivel estratéxicu, como ye’l casu anguaño en tolo rellacionao con Ucrania, son la xente del servicio d’información los responsables d’apurrir la intelixencia sobro’l alversariu, l’oponente, l’enemigu. Ensin esa información previa ye difícil, aventurao, por nun dicir alloriáu, llanzase a cualquier tipu d’operación.

El personal que trabaya nesi dominiu, con independencia del nivel en que se desendolque, desarrollen ensin esceición una tendencia pesimista nidia. Siempres güeyen la situación con tintes negativos. Siempres l’enemigu suel ser peligrosu y con posibilidá de ponemos en dificultaes; y esto ye natural. Curense en salú pues induciendo, coles sos previsiones, a preparase pa lo peor, ye posible qu’incentiven l’alerta y preparación de lo propio. A lo cabeo, si se enquivoquen siempres vamos poder alegranos de que les coses foron meyor de lo esperao.

Les democracies modernes de cutiu son previsibles nes sos decisiones, inclusive les más decisives, como son les qu’atañen a la guerra. Nelles, qu’amás de representatives son tamién consultives, pues nel procesu decisoriu participen indireutamente milenta actores con voz nes sos sociedaes, puese predicir dalgunes decisiones grandes pol método simple de calcular el costu, en términos sociales, económicos y electorales, de les mesmes.

En Rusia les coses nun son asina. Putin ye un modelu perfeutu de cesarismu democráticu; esto ye, un sistema con instituciones democrátiques aparentes que simplemente operen a la orden de lo que marca l’autócrata que dirixe y controla los destinos de la nación. Eso fai que’l trabayu de los analistes se complique y faiga-yos mui complicao deducir, adivinar, qué pasa pela tiesta del inquilín del Kremlin. Ye lo que hai.

Aínda con eso, voi atréveme a pensar que, nel casu ucranianu, son tantos los factores diplomáticos y económicos que desaconseyen una operación ofensiva nesi país que me paez altamente improbable que’l señor Putin ordene al so ministru de defensa atacar. El tener como sociu y valedor a China nun debería da-y confianza excesiva, y nun creo que lo faiga nesti casu. Xuégase muncho.

Per otra parte, les alertes de conflictu inminente vienenmos dende Washington; el mesmo poder qu’inventó un ataque del Vietcong pa xustificar la so intervención masiva en Vietnam, y el que tamién mos aseguró que Saddam Hussein tenía’l país enllén d’armes químiques de destrucción masiva. Esto ye, qu’hai que garrar con pinces les sos alertes.

Putin quier meter mieu a Occidente, o si prefieren a la OTAN, pa que nun avance más haza l’este, y de pasu que se escaezan de Crimea, la de Catalina la Grande, que ye rusa. Pero nun va atacar Ucrania.

Raúl Suevos

A 12 díes vencíos de febreru de 2022

Torna en castellán en repdiv.blogspot.com