L'Asturies de la defensa

Foi la pasada una bona selmana no tocantes col mundu llaboral y la Defensa puesto que se confirmó’l contratu de fabricación del nuevu Vehículu de Combate del Exércitu español, el VC 8X8, que vien a sustituyir al vieyu BMR 6x6, Blindáu Mediu a Ruedes, que tien tresportao y protexío a los soldaos de nueso dende 1980, tanto n’España como nes operaciones esteriores nes qu’intervieno, Bosnia, Kosovo, Iraq o Afganistán, y les que van venir.

El Sistema d’armes nuevu, muncho más robustu y conducente que l’anterior –pasaron yá 40 años- va ser construyío en parte nes instalaciones que Santa Bárbara Sistemas caltien en Trubia, la vieya Fábrica d’armes, au se va fabricar la barcaza del mesmu dando con ello trabayu pa ente siete y diez años a un bon númberu d’especialistes, parte de los cualos yá trabayen nel Ajax pal Exércitu británicu o’l Vehículu de zapadores español. 

La rellación con Asturies nun se va acabar cola construcción d’esa parte del VC 8X8 puesto que los soldaos del Reximientu del Príncipe nº3, l’antiguu Terciu Vieyu de Milán, van ser los sos usuarios cuando, como lleven faciendo nos años caberos, seyan apellidaos a esplegar nes estremaes operaciones esteriores nes que los compromisos internacionales del nuesu país los faigan necesarios; como nel Llíbanu na última ocasión. Son los mesmos soldaos del acuartelamientu Cabo Noval que montaron l’hospital de campaña nel HUCA cuando’l covid campaba a los sos doleres nel mes de marzu pasao. Los soldaos de nueso. 

Esi Reximientu yá cuenta con oficiales mozos formaos n’Academia Xeneral de Zaragoza nel plan d’estudios nuevu nel que, amás de la formación militar, cursen estudios de grau n’Inxeniería d’organización industrial; los mesmos estudios qu’esti añu s’entamen a impartir na Escuela Politéunica de Xixón n’onde, según me cuenten, yá hai dellos mozos asturianos matriculaos pensando na so formación militar futura. Tamos, pues, énte una particular y afortunada combinación de circunstancies que deberíen reforciar aínda más los llazos d’Asturies cola Defensa; entendiendo ésta como daqué más qu’un ministeriu, contemplándola como l’elementu que da seguridá al trescurrir d’una nación.

Nestos tiempos d’afogón, de la mano del covid-19, Asturies caltiense pel momentu a distancia del azote más duru de la pandemia, magar too, paez que tamién el Princpáu va pidir la collaboración de parte d’esos 2000 rastrexadores militares formaos pol ministeriu, lo que vien a refrendar, una vegada más, esa rellación d’Asturies col Exércitu. Que siga asina. 

Raúl Suevos 

En Xixón a 29 díes vencíos d’agostu de 2020 

Torna en castellán en repdiv.blogspot.com

La culpa fo del Cha cha cha

El títulu d’esta tribuna coincide col d’un canciu mui esitosu de Gabinete Galigari, un de los grupos qu’afaraben con too na música española va yá dellos años. Cuenta’l cantar la historia d’un chornizu ligue, nun queda nidio si branizu anque sí la so fugacidá, nel que’l culpable de too paez ser el Cha cha cha. La so lletra, con evidentes connotaciones taurines, faría que güei, tiempu más dao a la cultura bovina amparada poles sacrosantes redes, fuere condergada al fracasu dende los primeros acordes del guitarrista, inclusive enantes de que Jaime Urrutia abriere la boca.

A min viénome’l canciu al entrar esta mañana al coche y atopame, desafortunadamente, con una sintonía enquivocada na radio que, en llugar del habitual rock and roll, púnxome en direuto al doctor Sánchez, el nuesu presidente de gobiernu. Taba’l solista, como’l Urrutia d’entoncenes, xustificándose nos dimes y diretes del señor Simón, el voceru del virus, de tal mou y forma que, en namái un minutu, llegó a mentalu cuatro vegaes. Diríase que tolo pasao, y lo que pueda pasar, col dichosu bichu seya debio, en cierta forma, a lo que diz el mentáu voceru.

Depués d’esti entamu preventivu entró’l presidente del gobiernu na fase de repartu de responsabilidaes, centrando l’atención nes capacidaes del nuesu estáu semifederal y, polo tanto, nes competencies de los xefes de gobiernu autonómicu y la so posibilidá de declarar l’estáu d’alarma; cosa que si nun faen ye, obviamente, porque nun-yos da la gana. La que vien ye cosa d’ellos, que lo sepan.

Pa templar un poco les gaites, espresión que pue remembrar l’usu de lavatives p’alliviu intestinal o simplemente contemplaciones con terceros pa evitar contrarialos, el nuesu falacieru –cuando quier- dirixente, ofreció’l consuelu de 2000 rastrexadores formaos por y dientro del Exércitu y que tarán a disposición de les Comunidaes autónomes –habrá que ver quién los solicita- col fin d’ayudalos nes sos responsabilidaes tocantes el covid-19.

 

A min, que me pue’l mi pasáu, esto de repartir les culpes, o les responsabilidaes, como ustedes prefieran, produzme grima no físico y fonderu refugu no moral pues enseñaronme que la responsabilidá del mandu nun se comparte, anque agora, con estes modernidaes, pue qu’acabe siendo cosa de crowdfunding, pallabru inglés mui de moda y que sirve pa espresar el  repartu de los costes ente munchos, vamos, igualín que’l covid, que los sos costes y consecuencies vamos repartilos ente toos, nun lo dulden.  

Raúl Suevos

En Xijón a 25 díes vencíos d’agostu de 2020

Torna en castellán en repdiv.blogspot.com

 

El sindios español

 

Sindios ye una pallabra que, dicen, la Real Academia de la Llingua estudia pa la so posible inclusión nel diccionariu como rellativu a daqué que ye alloriao o ensin sentíu, y estos díes, viendo lo qu’asocede nel nuesu país vienme a la tiesta de manera recurrente. Tamién la imaxe del infiernu español, nome d’un chiste bien castizu y de fundamentos escatolóxicos que me torguen reflexalu por escrito. El casu ye que, cuando la nación s’atopa metanes una crisis que supera toles que, los qu’anguaño somos adultos, vivimos personalmente, encontramonos con una situación qu’acoyona, dicho esto na doble aceición de la RAE, qu’acobarda y que dexa varáu.

El gobiernu ta de baxa, o de vacaciones, nun se sabe mui bien. Dexó-y el pastel a les Autonomíes, que facen, o facen como que facen, mientes se palpen la ropa y recen pa que la cosa nun vaya a más y los sos hospitales nun entren en ruta de colapsu. Too ello ensin entrar nel espectáculu perpenosu del regresu a les aules que tien a los pás responsables tremando, y a los que namái quieren que dalguien se faiga cargu de los sos fíos tamién. Corren los díes y septiembre y la seronda entamen a vese como presaxu d’una nueva folada de terror.

Da cuenta la prensa del interés del gobiernu, daquien debió quedar pa falar nel so nome, en qu’Europa adelante caudales d’aquellos famosos 140M d’euros ensin los cualos la situación va convertise en dramática, daqué fácil d’entender a estes altures, pero ye difícil qu’esto asoceda pos ellí, n’Europa, los asuntos del dineru van reglaos y nun se contemplen exceiciones. Sabenlo en Madrid y too suena como al entamu d’una campaña pa que la opinión pública se vaya preparando pa la traxedia. Esta vegada, amás d’hospitalaria, será económica, y tarrecible.

En Madrid un xuez diz que nun se pue prohibir fumar pola cai, notra rexón otru xuez sanciona que nun se pue piesllar les discoteques, o los bares de copes; en cada rexón, agora a cargu de la xestión de la crisis sanitaria, interpretense les aiciones de los gobiernos autonómicos a guelpe de decretu xudicial, y ta bien que seya asina nun estáu de drechu, pero cabe entrugase si yera esto lo que queríemos cuando votamos la Constitución y el so títulu VIII. Nun sé si España da pa tanto.

Les vieyes Reales Ordenances de les Fuercies Armaes, yá non vixentes, definíen la Patria como “el quefacer común de los españoles d’ayeri, de güei, y de mañana, que s’afirma na voluntá manifiesta de toos”, yera un testu de los d’enantes, de los que poníen los puntos sobro les íes.

Raúl Suevos

En Xijón a 21 díes vencíos d’agostu de 2020

Torna en castellán en repdiv.blogspot.com

 

Lord Jim y la tempestá

 

Pa los cinéfilos Lord Jim ye’l títulu d’una película de metanes los 60 que protagoniza Peter O’toole, yá de sonadía pol so Lawrence d’Arabia. La cinta basabase nuna gran novela de Joseph Conrad, el de Nostromo y sobre too, el de En el corazón de les tiniebles, el rellatu perduru qu’inspira la tenebrosa y tarrecible parte final d’Apocalipsis Now, el famosísimu trabayu de Francis Coppola.

Lord Jim cuenta la historia d’un oficial de la marina mercante que, metanes una tempestá y con una vía d’augua, abandona, xunto cola tripulación, el barcu y el pasaxe de pelegrinos a la Meca que teníen baxo la so responsabilidá. Eso asocede al entamu la historia y el restu ye too un camín de remordimientos y esfuerciu por reparar la culpa mediante una vida d’entrega a los demás. 

 

A min viénome Lord Jim a la memoria porque, metanes la tempestá fondera na que mos atopamos, un huracán de tipu mediu que pala seronda menacia con superar la categoría máxima de Saffir-Simpson, el nuesu capitán y la tripulación colaron de vacaciones. Nun hai naide en Madrid, nel puente de mandu, nin gobiernu nin oposición; toos a una, como Fuente Ovexuna, marcharon de vacaciones, ensin güeyar p’atrás, ensin una frase de alliviu o d’esperanza pa los aflixíos que se queden nos camarotes y bodegues.    

Col fin del estáu d’alarma la responsabilidá trespasóse a los goberninos autonómicos lo que sirvió pa poner n’evidencia, si entá facía falta, que l’ausencia del enseñamientu de la historia patria nel nuesu –¿nuesos?- sistema educativu llévanos a repetir ensin dala contención aquel estáu de taifes que tan mal resultáu-y diera a la España musulmana. Vemos, llamativamente, qu’aquellos que más reclamu faen a les sos peculiaridaes históriques, vieya corona d’Aragón, vieyu reinu de Navarra y Provincies vascongaes, lleven a tola nación a recibir la tarxeta d’apestaos nel restu d’Europa. 

La tripulación del Patna, asina se llamaba’l barcu de Lord Jim, acaba enxuiciada y castigada, pero nel nuesu casu’l asuntu nun paez tan nidio. A Trump llévenlu a xuiciu en payares los sos eleitores pero n’España nun hai tala previsión pol momentu lo que fai que, previsiblemente y gracies al tamién desapaecíu cuartu poder, pa cuando aporte’l momentu de talu supuestu xuiciu otros elementos más actuales van facer que los muertos y el desastre económicu nun seyan tan importantes.

Mentanto’l consumu de les families contraese a pasos aceleraos, cola mesma velocidá que crez l’aforru, lo que da cuenta inmediata del sentir de la ciudadanía. Vien una mui gorda y los del puente marcharon con Lord Jim.

Raúl Suevos

En Xixón a 15 díes vencíos d’agostu de 2020

Torna en castellán en repdiv.blogspot.com

Europa, España, y los corticoles

 

Enantes de qu’acabe’l periodu vacacional por escelencia de los españoles, lo que n’Italia nomen ferragostu, apuertanos dende va yá abondo d’años el preavisu de que depués va llegar el tiempu de tornar a la escuela. Una alerta que s’avera de la mano de una potente campaña publicitaria d’una gran cadena de distribución comercial y que, nel añu del coronavirus, tampocu quiso faltar a la cita, anque fízolo de forma tan agresiva que tevo que dar marcha atrás na so campaña ¿Érru de bultu o estudiao?

Que seya l’ámbitu comercial quien mos recuerde la proximidá del regresu a les aules diz abondo de la importancia que n’España-y damos al asuntu, y ello magar que la educación ye’l principiu pente medies el cualu una comunidá conserva y tresmite la so peculiaridá física y espiritual. Ye llícito pensar que si nun hai preocupación pola Educación, y la señora ministra del ramu nin ta nin se la espera, quier dicir que non esiste especial interés pola trescendencia de la propia sociedá a la que pertenecemos ¿Aínda esiste esa sociedá?

La Constitución otorgó-y la competencia educativa a les Comunidaes autónomes. Esto y la desdexación de responsabilidá tocantes a l’Alta inspección del Estáu dio como resultáu un potaxe que sirve pa dir tirando pero que la so sustanza y condimentos tán fuera de control a nivel nacional -anque nun seya asina pa dalgunos intereses implosionistes-, situación que’l covid-19 vieno a poner en descarnada evidencia. A la nación nun-y importa y a les sos rexones vien-yos grande.

La estructura de cualquiera sociedá sofitase y construyese sobro les lleis y normes escrites y non escrites que xunen a los sos miembros formando un tou, y si la educación ye la correa de tresmisión de los valores inherentes d’una sociedá, el preséu para formar persones meyores a la par que se caltienen les señes d’identidá d’esa cultura, entós ye posible que la fallida campaña publicitaria nun seya más qu’otru avisu de que, n’España, tamos faciendolo mui mal.

Diz el nomáu Tratáu constitucional européu nel primer párrafu del so preámbulu que s’inspira nel “heriedu cultural, relixosu y humanista d’Europa, a partir del cualu se desendolcaron los valires universales de los drechos inviolables de la persona humana…” y, desgraciadamente, los españoles nun paecemos mui preocupaos na tresmisión d’esos valires y acerbu cultural a los nuesos fíos lo que ensin dulda va facelos menos llibres, más sometios a los cuentos y enredos de bruxos y embulladores. Ye lo qu’hai.

Raúl Suevos

En Xijón a 12 díes vencíos d’agostu de 2020

Torna en castellán en repdivblogspot.com

Virus y cancios de chigre

 

Son los cancios de chigre, o cantares si se prefier, una de lEs tradiciones que, demientres xeneraciones, meyor representaron la cultura asturiana. Anguaño, desgraciadamente, falamos de daqué que s’atopa en trance de desapaición por más que a los asturianos mos preste presumir de lo de nueso; les sidreríes, en plena puxanza nestos años, como la propia sidra, son los testigos ruidosos d’esa lenta y, pol momentu, agonía de daqué que va non demasiaos años yera distintivu de la nuesa rexón.

Nos Estaos Xuníos au, magar les continues babayaes del so presidente, siguen investigando los estremaos aspeutos del malditu virus, llegaron yá a la conclusión de que’l virus propágase, principalmente, cola espulsión de microgotes cuando tosemos; non tanto al traviés de les superficies onde pudo quedar depositáu, pero, sobremanera, tamién y con igual peligrosidá que la tos, colos gritos y cantares; con estes dos caberes aiciones proyeutamos el nuesu alientu a gran distancia. Tos, gritos y cantares, equí tán, según esos estudios, les nueses aiciones y vectores más peligrosos.

N’Asturies, les cifres asina lo atestigüen, paez que nun tamos faciendo mal les coses pel momentu pero, nel restu del país, vemos como la epidemia paez querer viltar, y ye que, los investigadores yanquis, dieronmos de plenu. Si resalvamos la tos, que nun reconoz races nin cultures, coles otres dos aiciones peligroses tenemoslo mui difícil, hai que reconocelo. Somos gritones, mui gritones, y eso, anguaño, tien consecuencies mui dañibles,  máxime si lo facemos n’estrecha compañía de munchos.

La nueche, que’l so empresariao quéxase de maltratu de parte de la alministración y los horarios qu’en munchos sitios se-yos tán imponiendo, ye un ambiente nel cualu ye imposible desempeñase ensin espresase a gritos. Más cuantu más se estiende la nueche y l’efeutu de les bébores  alcohólique se fai sentir. Los gritos, y con ellos les microgotes, son la forma de comunicación más avezada. Pero en casa asocede lo mesmo cuando nos axuntamos pal cumpleaños de la güela, o de los neños; toos acabamos alzando la voz pa falar cola prima que tá nel esquinal de la mesa o pa pidir al güelu que pase la salsa romescu. Ye la nuesa cultura, qu’agora mos lleva al desastre.

 

A min prestaríame que, cuando esto pase, les sidreríes ficieren dalgo pa recuperar los cancios de chigre, que nun quedare namái neses xornaes nes que la tercera edá xijonesa o d’otres poblaciones s’aconceya, casi emocionada, na Plaza del ayuntamientu coles letres na mano a recordar los cantares d’enantes. Mentanto, paez qu’esti branu libramonos d’esa forma de tresmisión.

Raúl Suevos

En Xixón a 10 díes vencíos d’agostu de 2020

Torna en castellán en repdiv.blogspot.com