Los rangers de Texas

 

Uvalde ye un pueblu allugáu en dala parte de la descomanda Texas. Anque como asocede cola mayoría de llugares au se produz una masacre de neños ye más que posible que pase, dende yá, a formar parte del imaxinariu de toos nós. Desgraciadamente.

Uvalde ta al oeste de San Antonio, sitiu del memorial del Álamo; pa muchos la alcordanza d’una gran película yanqui, que como casi siempres, axustábase pocu o casi nada a la realidá histórica, puestu que Texas, alzada ensin xustificación escontra’l so gobiernu lexítimu mexicanu, como’l Dombás ucranianu, yera namái un de los bocaos primeros que los Estaos Xuníos diben dar a la gran nación.

Cerca d’esti pueblu pasa’l riu Nueces, de dramáticu  recuerdu na historia mexicana, conocíu de los amantes del western pero non tanto como’l riu Bravo, escenariu de les galopiaes de John Wayne y nel que desemboca más al sur, cerca de Laredo, una gran ciudá fronteriza, que tolos díes brega colos problemes que representen droga y emigración illegal; anque’l nuesu protagonista, Uvalde, dedícase principalmente a la agricultura y la ganadería.

A min, superada la conmoción anicial, vánseme los güeyos a esos axentes de la llei, altos, enormes, roxos de piel pálida, camisa blanca con corbata, y descomanaos sombreros claros d’ala ancha, como aquellos qu’usaba’l inolvidable malváu JR de Dallas. Supongo que son parte de los famosos Rangers de Texas, suxetos tamién de noveles y películes; y nun puedo evitar constatar el contraste enorme que la so presencia fai colos familiares de los neños masacraos, toos ellos, o la mayoría, de piel escura, posiblemente trabayadores de baxa cualificación ya ingresos escarsos, como delata la gordura, casi mórbida, de la que munchos faen gala, y que múltiples estudios achaquen a la comida barata, rica en grases parcialmente hidroxenaes, que suel atopase detrás de la mayoría de eses obesidaes.

Les mio perceiciones son, con muncha probabilidá, poco empíriques, pero la traxedia y la redolada tráenme con fuercia la alcordanza de los Tigres del Norte, reis del Corríu mexicanu, de nombradía los años caberos por una variante conocida como’l narcocorrríu, y que cuenten ente los sos grandes éxitos con un cancio “Somos más americanos” na que dan cuenta de la perda de gran parte de la nación mexicana a manes del gringu pa convertise anguaño, los mexicanos, “indios de dos continentes entemecíos con español”  en ciudadanos de segunda categoría na so propia tierra.

¿Van ser hispanes les víctimes de la matanza viniente? ¿O van ser gringos? Pocu importa, ye seguro que les va haber, porque l’imperiu de les armes nos Estaos Xuníos ye lo abondo potente como pa que, pasaos unos díes, nada camude. Ye lo que hai.      

https://youtu.be/0ue-YP-wvsY

Raúl Suevos

A 27 díes vencíos de mayu de 2022

Torna en castellán en repdiv.blogspot.com

Los muertos rusos tienen los güeyos rasgaos

 

Nel entamu de la invasión d’Ucrania, unu que ye interesáu y tien un pocu de deformación profesional, intrigábame’l fechu de que los soldaos que marchaben subíos sobro los carros y tresportes blindaos rusos tuvieren, na so mayoría, los güeyos rasgaos; anque, confiésolo, nun-y di mayor importancia nel so momentu.

Güei apórtame un mapa interactivu d’una fonte de telegram, que la so fiabilidá desconozo, pechalbeda200, na que s’amuesa l’orixe rexonal o provincial de los muertos na campaña ucraniana pel llau rusu, y el coloríu cuadru paez tener un bon sofitu na lóxica del país y de les sos fuercies armaes.

L’Exércitu rusu anguaño, enantes coloráu, depués soviéticu, nútrese de dos tipos de reclutes. Los de reemplazu obligatoriu, la nuesa mili tradicional, que como asocedía n’España nos años caberos de la so esistencia, saca la mayoría de los sos mozos soldaos del mediu rural, con poblaciones pequeñes onde les parabanes pa evitar el serviciu tienen mala prensa y el nivel d’estudios, qu’alimenta les prórrogues, ye inferior al de les grandes ciudaes.

L’otru tipu de soldáu ye profesional, pente medies de contratos de tipu estremáu y que tamién recluta la mayoría nes provincies llonxanes d’oriente por motivos similares a los del serviciu obligatoriu, a los que cabría amestar que la escasa renta económica de eses rexones lleva a que los sos mozos, como tien asocedío siempres a lo llargo de la historia y en toes les partes del mundu, seyan más gustantes a güetar una meyora social gracies a la carriera de les armes. Ye lo qu’hai.

El resultáu ye esi mapa d’espresivos colores nel que resulta especialmente llamativa la situación de les provincies de Moscú y San Petersburgo, les dos grandes capitales ruses, con la menor tasa de baxes de combate na invasión d’Ucrania magar ser les rexones nes que, ye un suponer, la presión de los medios de comunicación, y de la propia clas política, sedría más potente y, poro, supuestamente más conducente.

De lo anterior cabe deducir qu’en Rusia tol que tien medios económicos o informativos procura escaquease del Exércitu; una organización que siempres tevo mala fama en rellación col maltratu de los reclutas pero que güei, superando en tres meses les baxes de combate del Exércitu soviéticu en nueve años d’espliegue sangrientu n’Afganistán, tiénse convertío na meyor razón pa que los mozos que tengan posibilidá emigren de Rusia.

Putin ye un gran problema pa Occidente pero yelo aínda mayor pa la so xente.

Raúl Suevos

A 24 díes vencíos de mayu de 2022

Torna en castellán en repdiv.blogspot.com

La Rusia de Putin

 

Esta mañana pude ver una encuesta d’un pariente rusu del nuesu CIS que da muncho que pensar. Al paecer, el sofitu a la “operación especial”, esto ye, la invasión d’Ucrania, crez na población rusa conforme amonta’l so nivel d’ingresos, y asina atopamos qu’aquellos que tienen dificultá pa mercar comida sostienen la invasión al 39%;  seguiríen-los los que tienen problemes p’alquirir ropa, que lo faen al 47%; hasta aportar, finalmente, a los que pueden comprase lo que quieran, esto ye, más o menos los nuesos simpáticos compradores de viviendes nes costes mediterránees, que sofiten la decisión de Vladimir al 67%. Nun fai falta esclariar que los porcentaxes de desafección van a la inversa.

Detrás d’estes cifres escuendese una sociedà que tien llevao’l sistema capitalista,amparáu nun cesarismu democráticu radical, a estremos inimaxinables n’occidente; ente otres coses, porque, gracies a Dios, entá mos funciona mínimamente’l sistema d’información pública y, de xaciu, un sistema de garantíes polítiques que, coles sos deficiencies, ye infinitamente superior al qu’esfruten los rusos. El resultáu de too esto ye una sociedá con dos estándares de vida diferenciaos; d’un llau les grandes ciudaes ruses y del otru les lloxanes y abandonaes provincies; y aínda asina, nes capitales ruses tamién atopamos una pauperización de la clas trabayadora que pon el sistema n’equilibriu inestable permanente.

Las rentes del trabayu son tan miserables que la industria de microcréditos tien crecío de forma desaforada, endeudando a les families a niveles desconocíos nel país y provocando’l crecimientu espeluznante de la cifra de suicidios que se xustifica na incapacidá pa pagar les deldes y, previamente, el consumu de vodka de preciu baxu pa afogar les penes. Nel llau esperanzador, pa dellos individuos, atopámonos la fuga de mozos universitarios haza l’esterior; fuxida incrementada desorbitadamente dende que s’anició la invasión d’Ucrania y el personal con accesu a información fidedigna tomó conciencia de la situación que-yos vien encima, seya’l que seya’l resultáu sobro’l campu de batalla.

La decisión cabera de los xerarcas del Exércitu rusu fo la d’abrir les files a mayores de 40 años, xustificándolo na necesidá de personal preparáu pa la utilización de les nueves y más sofistices armes anguaño n’usu nel campu de batalla, pero lo cierto ye que tres d’ello escuendese una incapacidá manifiesta p’alistar personal col que recuperar les unidaes diezmaes nel frente ucranianu. Esperen que dalgún padre de familia abrumáu pol pesu de les deldaes se decida a incorporase a la carnicería. Ye lo qu’hai.

Raúl Suevos

A 23 díes vencíos de mayu de 2022

Torna en castellán en repdiv.blogspot.com

Festival gay-oleru

 

Llega la noticia d’Italia sobro’l primer casu de viruela de los monos; una enfermedá contaxosa que paez tar estendiéndose per Europa ente determinaos grupos de población, con especial incidencia nel país de nueso, en que la so capital l’autoridá vien de piesllar una “sauna”, y tamién nel Reinu Xuníu. Nun sedría una situación especialmente preocupante en cuantu que les consecuencies nun presenten un cuadro mortal, nin muncho menos, y, amás, la simple alministración de la vieya vacuna escontra la viruela sedría un muru abondo fuerte escontra esta plaga nueva.

A min, más que la enfermedá, llámame l’atención la otra peste que representa la represión social al respective del usu de la llingua; un azote qu’algama anguaño a tol occidente y que fai que na noticia italiana se recurra al artificiu d’usar l’acrónimu MSM, maschi chi fanno sexo con maschi, pa evitar falar d’homosexuales; o como n’España au anteanueche un locutor tiraba de circunloquiu para tornar de metese en tarrenos peligrosos según les normes nueves de llinguax inclusivu y non sexista, o simplemente l’imperativu de la correición llingüística acordies los censores nuevos disfrazaos de ultraizquierda progresista.

El nuesu comunicador español falaba de contactos sexuales estrechos ente homes ¿Qué ye eso? ¿El mariconeo de tola vida? ¿Simples contactos homosexuales? ¿Rellaciones gay pa los viaxaos? Tamos una vegada más énte una espresión de la tiranía de lo políticamente correuto que, por más que queramos engañanos, nun dexa de ser una llende simple a les llibertaes más básiques; nesti casu la llibertá d’espresión.

El mozu italianu venía de participar, al paecer, nun festival del arguyu gay nes islles Canaries, focu emisor posible anque nun se sepa d’ónde venía’l visitante iniciador,  y a min vienme aina l’axetivu asturianu “gayoleru” p’aplicalu al casu yá que cuenta con varies aceiciones, casi toes adaptaes a la situación pues mos da 1.-Que-y gusta la fiesta 2.-Allegre, que tien allegría 3.-Folgazán, que nun-y gusta trabayar 4.-Que fai tolo posible por namorar, por gustar a daquien 5.-Col deseyu sexual altu.  Ye una solución, la de la llingua asturiana, con raíz que recuerda al neoloxismu anglosaxón, que resalvaría los arrodeos asombrosos y ridículos que dan la mayoría de comunicadores para evitar el riesgu de vese acosaos pola opresión doble de la ultraizquierda y los grupos de presión homosexual o LGTBI, qu’habelos haylos. O dicho de otru mou, ye lo que hay.

Raúl Suevos

A 19 díes vencíos de mayu de 2022

Torna en castellán en abellugunelcamin.blogspot.com

La dignidá de los vencíos

 

Los medios de comunicación bombardeenmos tan intensamente con imáxes –símil obligao dada la circunstancia ucraniana- qu’en pocu tiempu esmorecense énte’l pesu de les qu’aporten en díes vienentes. La d’ayeri, pa min, taba nesa columna d’homes y muyeres –equí sí que me paez imprescindible y obligao usar el llinguax inclusivu- qu’avanzaban per una llarga, amplia y desolada avenida pa entregase a los soldaos rusos. Yeren los defensores de l’acería d’Azovstal, en Mariupol. Los héroes más vultables, ente otros munchos, d’esta carnicería en que se tien convertío la invasión rusa d’Ucrania.

La guerra ye en sí mesma un de los aspeutos más tarrecibles de la condición humana; y na antigüedá, énte la falta de comunicación pública, yera difícil tener noticia de lo que asocedía. Magar too ello, la historia traxonos el rellatu de dellos episodios particularmente bederres, especialmente cuando se trataba d’asedios, como fo’l casu de la cayída de Xerusalén a manes de los cruzaos, o Constantinopla baxo la cimitarra otomana.  

Nos tiempos modernos, pienso nel sieglu XX, los oyentes entamaron a tener noticia puntual, más o menos manipulada, de lo qu’asocedía y, por exemplu nel nuesu casu, l’asediu al Santuariu de la Virxen de la Cabeza, defendíu por fuercies de la Guardia Civil, o la defensa feroz del bastión del Mazucu, n’Asturies, polos combatientes republicanos foron oxetu de siguimientu continuau y dieron cuenta de la grandor de los defensores de dambes posiciones. Suelen ser los defensores, supuestamente n’inferioridá, los que ganen el favor de la opinión pública en casi toles situaciones.

En Mariupol, gracies quiciabes al Starlink d’Elon Musk, pudimos contemplar les condiciones espantoses en que se desenvolvíen defensores y families. Imposible nun tomar partíu por ellos, por más que dalgunos quisieeran presentanos a los heroicos miembros del batallón Azov como filonazis, y a min, personalmente, tienenme paecío la meyor espresión d’amor a la patria qu’Ucrania podía atopar.

Ayeri, siguiendo órdenes del mandu, entregaron les armes y rindiéronse. Desfilaron ordenadamente pa ser cacheaos y conducíos al cautiveriu; y nun se me escapa que, en tiempos pasaos, lo ficieren desfilando con bandieres esplegaes, al toque de tambor y portando les sos armes. yeren tiempos en que la guerra, esa espresión tarrecible de les rellaciones polítiques, conducíase con honor.

Dicen agora los rusos que va convertir Mariupol nuna ciudá de vacaciones, daqué asina como un Port Aventura a lo rusu, que nun sé exactamente a qué se pue paecer; anque mirando a Viborg, la antigua y perrica segunda ciudá de Finlandia, puertu con muncho puxu del Bálticu hasta que los soviéticos s’apoderaron d’ella, podemos facenos una idea, puestu que entá se pueden visitar les ruines, nunca recuperaes, de la guerra; y anguaño sobrevive principalmente del turismu finlandés qu’aínda llora pola perdida Carelia. Ye lo qu’hai.   

Raúl Suevos

A 19 díes vencíos de mayu de 2022

Torna en castellán en repdiv.blogspot.com

El Gamonéu, una alegoría d'Asturies

 

Ye’l quesu una de les grandes bayures culturales y gastronómiques d’Asturies. Nin siquier na arguyosa fromagerie francesa ye posible alcontrar una tala asgaya de quesos concentrada nuna rexón tan minúscula como Asturies; tampocu n’Italia. El Principáu yelo tamién nesti aspeutu, un paraísu natural.

A min gustenme casi toos, y anque’l Cabrales se lleva’l primao en cuantu a conocimientu esterior, ye obligao citar al Casín pola so potencia y antigüedá, ensin escaecer a una xoya como l’Afuegalpitu nes sos estremaes versiones. Podríemos enllenar esta tribuna rellacionando los diferentes quesos asturianos pero, na mio opinión, hai un que sobresal ente toos poles sos cualidaes organoléptiques; ye’l quesu Gamonéu, nes sos dos versiones, el del valle y el de los puertos. Una autentica esquisitez esti caberu que, con un blanquín de Cangues, podría tener inspirao a Gian Lorenzo Bernini pal so Extasis de Santa Teresa.

Ye’l Gamonéu de los puertos una rareza mundial, tan espectacular como lo ye la zona au se produz, la Montaña de Cuadonga. Aquelles altes mayaes que vieron correr a los moros tres la so derrota a manes de Pelayu. Los mesmos pacionales per onde anduviera’l marqués de Villaviciosa a la caza del rebecu enantes de llanzase a la conquista del Naranxo de Bulnes, l’Urriellu. Los peñascales y angostures qu’esconden les cueves au madura’l quesu y qu’anguaño formen parte d’un Parque Nacional que va camín d’acabar col Gamonéu de los puertos y que la so creación, primera n’España, fomentó don Pedro Pidal ensin saber que llegaría un tiempu nel que la so intuición diba suponer la muerte de la forma de vida d’aquellos que, posiblemente, elixeron Princeps a Pelayu nun conceyu abiertu.

Ye nesta forma de muérganu de decisión política, heriedu maraviosu de tiempos preteritos na que toos tienen voz y votu, na qu’aconceyaron la selmana cabera en Cangues d’Onís los pastores y productores de Gamonéu del puertu; un manxar que rique de a lo menos de dos lleches ensin pasteurizar de les tres que se producen n’estensivu nos pastos d’altura, ovín, caprín y bovín, y que depués va madurar nalguna de les cueves bodega de la redolada.

Del aconceyamientu salió la constatación de que la presión alministrativa del Parque, que pon toa mena de torgues al desendolcu normal de l’actividá; la imposibilidá de construyir o rehabilitar cabanes pa usu de pastores y productores; la práuticamente impune actividá del llobu, que va dir n’aumentu cola normativa nueva en rellación cola so proteición; y, finalmente, el desaniciu demográficu de la zona y de la propia Asturies, narcotizada tres más de cuarenta años de gobiernu ensin alternancia, apunten, como si d’un pelotón de fusilamientu se tratara, a la desapaición segura del Gamonéu del Puertu. Ye lo qu’hai.

Raúl Suevos

A 17 díes vencíos de mayu de 2022

Torna en castellán en repdiv.blogspot.com

Golor a cadavre

 

Demientres la seronda de 1995 atopábame en Bosnia, y, anque nun cayía direutamente na mio responsabilidá, allá una vegada acompañé a una de les unidaes de nueso pa dar seguridá a la policía encarregada d’allevantar un cadávre descubiertu nuna zona alloñada de la nuesa área de responsabilidá. Interesaba conocer el tarrén, daqué que sí entraba nes mio competencies.

A midida que mos averábemos al puntu au reposaben los restos el golor diba en amontando. Penetraba pelos nuesos furos nasales de forma imparable, picante, potente, cheirientu. Paecía invitanos a alloñanos d’ellí, y ello ye que namái’l sentíu del deber mos caltenía tres el paisanu conocedor del llugar exactu, hasta llegar xunto a lo que quedaba d’aquel probe desgraciáu, tres ser pastu d’estremaos carroñeros, de pelu y pluma.

Años depués supe que en la universidad de Lovaina habían hecho un estudio y descubierto que los cadáveres humanos desprenden hasta cuatrocientas y pico substancias volátiles, más que ningún mamífero, y es la cadaverina, que suele tener forma líquida, la más olorosa y desagradable de todas ellas. Es la principal responsable de que, instintivamente nos alejemos de los cadáveres y, al tiempo, la señal de llamada de los carroñeros. Ye lo que hay.

No formando parte del Congreso de diputados, ni tampoco invitado a sus sesiones, me quedo con la incertidumbre sobre el olor de nuestra cámara, es decir, que no sé si huele a cadáver; aunque otros signos visuales me alertan de que puede que alguien esté entrando en un periodo de descomposición orgánica, aunque no sea aún consciente de la situación, o, aún peor, no quiera darse por enterado.

Observo que los congéneres de nuestro presidente parecen tomar distancia, política se sobreentiende puesto que no dudo que se ducha todos los días, y, por otra parte, los carroñeros de nuestra clase política, léase aquí independentistas y ultraizquierdistas de toda laya, o aquellos interesados en la erosión, ya que no alcanzan para destrucción, del estado, parecen lanzarse sobre la agotada figura del doctor Sánchez como si hubiesen detectado la llamada de la cadaverina. Es una situación que ya experimentó el señor Casado de forma súbita y casi relampagueante; es el viejo “de árbol caído todos hacen leña” que una y otra vez se repite en el mundo de la política, en la que siempre hubo devoradores de carroña.

Sánchez parece convertirse en una carga para algunos y podremos medir la intensidad del mal olor en los próximos días con las esporádicas, mínimas, apariciones de nuestro presidente en la campaña para las andaluzas, en las que es más que dudoso que el pretendiente socialista, señor Espadas, tenga interés en verse asociado a alguien que trae olor a cadáver, y poco valor añadido puede aportar a su campaña.

Raúl Suevos

A 13 de mayo de 2022

Torna en castellán en repdiv.blogspot.com

La baldadura de la patria

 

Confieso que me dolió. Esperaba que la señora Robles, al cabu de toa una vida de servicios al estáu, taría a l’altor de les circunstancies y defendería, a costa de lo que fuere, a otra servidora de la nación, a la direutora del CNI. Pero nun foi asina; entregó la su tiesta, porque asina la solicitaben los enemigos declaraos d’España, ensín malapenes pestañear. Y a mí dexóme afaráu. Y yá nun tengo edá pa emigrar.

La traxicomedia de la intervención de los teléfonos de dalgunos independentistes, cola bendición del xuez residente del Tribunal Supremu, convien nun lo escaecer, nun se sostien baxo dalu puntu de vista, sacantes el del caltenimientu, al coste de lo que seya, del titular de la presidencia del gobiernu d’España nel so despachu del palaciu de la Moncloa. Ye un sacrificiu, el de la direutora del CNI, que va trayer cola en cuantu qu’exemplifica el valor que tien la entrega al serviciu pa quienes dirixen los destinos de la nación, ya invita, a los que vienen detrás, a midir el nivel d’implicación y comunión col gobiernu de turnu. Demoledor.

Ye quiciabes la divisa que relumbra na puerta de los cuarteles de la Guardia Civil y del Exércitu, esi “too pola patria”, la meyor y más sintética forma de declarar lo que supón el serviciu a España, a lo menos yo nun conozo otra meyor. Y quiero pensar que la saliente direutora del CNI, toa una vida de serviciu nesa institución, asina lo entendiera siempres, inclusive agora, nestos momentos perdificiles de la so vida profesional. Tamién creo que la señora Casteleiro, sucesora de so y funcionaria tamién de la Casa, tien crecío nos mesmos parámetros de serviciu qu’ella; pero, ye imposible dexar de llau la perceición que toos tenemos de que se ta entregando la tiesta del Bautista al caprichu malintencionáu d’una baillarina que nun contrataríen nun cabaret de tercera categoría. Ye lo qu’hai.

El mensaxe subyacente de toa esta historieta ye que too val col envís de caltener el poder. Toos tamos al serviciu, non de la patria, sinon de los intereses del individuu que llega a ocupar el palaciu monclovita; nin siquier del partíu que lu sofita, cada vegada menos xenerador de doctrines sociales y más simple apoyu del políticu de turnu. Ye una situación deplorable qu’ensin dulda va tener consecuencies morales fonderes pal colectivu que se llama España. Precisamente cuando nes llanures ucranianes vemos cada día el significáu del conceutu de nación.

El “conformarse con facer lo xusto del so deber, ensin que la so propia voluntá adelante cosa dalguna” paez una opción bona pal funcionariu anguaño, pero con ello, cada día que pasa, avanzamos na baldadura de la patria.

Raúl Suevos

A 10 díes vencíos de mayu de 2022

Torna en castellán en repdiv.blogspot.com

Los enseños de Fidel Castro

 

Amuesense los analistes deceicionaos tres el discursu de Putin na Plaza Roxa. Nun declaró la movilización xeneral nin tampocu anunció la finalización de la Operación especial n’Ucrania, lo que-yos lleva al erru de calificalu como insustancial. Crasu erru; erru de bultu, desliz monumental. Tan monumental como’l anunciu fechu por Vladimir nesi aparente espiche insustancial.

La proclama del inquilín del Kremlin ye que la patria ta en peligru porque ta baxo asediu de la OTAN y Occidente, que quieren acabar con una Rusia que tien que facer frente ella sola a los nazistes nuevos que s’amuesen con descaru n’Ucrania pero que tamién confabulen escontra ellos dende los gobiernos otanianos. Nada más y nada menos.

Con una premisa similar, l’afortunadamente desapaecíu Fidel Castro, logró caltener un estáu de semiesclavitú na so finca cubana, esto ye, toa la islla caribeña, mientres más de sesenta años. Una encomienda continuada pol so hermanu Raúl cuando les meninxes de Fidel entamaron a fallar y qu’anguaño, con 91 años, tien como vicariu a un desvaídu Díaz Canel, encargáu de facer como que dirixe’l país.

Con esa menacia d’invasión yanqui, que nin ellos mesmos se creen, los Castro tienen llograo piesllar la islla como una cárcel acuática de la que s’escapen los que pueden, xeneralmente los más valientes y preparaos; y na que queden los sos adoctrinaos partidarios sobreviviendo ente escaseces y fame mientes son lobotomizaos por una permanente y opresiva comunicación d’estáu, y calteníos a distancia d’internet mediante controles téunicos y precios abusivos.

Ye un pocu lo que pretende Vladimir pa la so querida Rusia, na que yá anteriormente denunció la esistencia d’enemigos internos, como los gusanos de Fidel, y na que tamién, dende que s’escomencipió la invasión d’Ucrania, son millones los rusos, especialmente mozos con bones destreces formatives, los que tienen manifestao la so opinión al respeutu tomando’l camín del autoexiliu; una constante rusa dende los tiempos de los Romanov.

Va venir, yá tán nello, el control refechu de los medios de comunicación, sobro cualquier soporte, de forma que’l rusu d’a pie viva col imaxinariu que’l réxime autocráticu de Putin quiera que tenga; con un estándar de vida cada vegada más míseru, tantu nos medios de vida como no moral. Na mesma forma como los Castro tienen abrasao la vida de los sos conciudadanos, y, de la mesma manera que los imitadores de Fidel, Maduro en Venezuela, u Ortega en Nicaragua, caltienen na opresión y la miseria a los sos propios pueblos.

Eso mos tien contao güei Vladimir Putin.  

Raúl Suevos

A 9 díes vencíos de mayu de 2022

Torna en castellán en repdiv.blogspot.com

El mediu ballestrinque

 

Nel Cursu militar de montaña, en Xaca, cuando llegaba la fase d’escalada escomenzipiabemos col enseñu de nuos, nun tantos como nel mediu marítimu, pero igualmente vitales. El más simple de toos ellos yera’l mediu ballestrinque, un llazu pequeñu que debía pasase pol mosquetón de seguridá y que yera la clave de tolo que vendría a dempués, la téunica d’escalada. Col mediu ballestrinque aseguraríemos al collaciu na paré y faríamos qu’esa actividá, siempres peligrosa, pasara a contar con daqué paecío a un colchón salvavides en casu de cayida.

L’asuntu trayíaseles, y los profesores, acostumaos a ver les cares de plasmu y escepticismu de los escolinos, teníen preparada un sesión práutica nel conocíu como Puente del rusu, a un kilometru per baxo de Candanchú. Ellí, llanzaben al vacíu una rueda de tractor descomanda atada a la cuerda d’escalada y que toos nós debíemos suxetar cola presión simple de los nuesos temblosos índice y pulgar, y, l’incomparable y máxicu mediu ballestrinque.

El colofón de la sesión de práutiques yera qu’había que confiar na téunica y nos materiales pa poder escalar ensin reparos nin temores; y tenía un efeuto inmediatu que mos permitía avanzar ensin mieu nesa actividá siempres venturera.

La nación moderna cuenta con un mediu ballestrinque pa poder avanzar en medio de les agues preligroses que siempres supón el xuegu de la política, la interna y la esterna. Esi nudu que mos protexe conozse en tolos países como Axencia nacional de seguridá, y nel nuesu tamién como CNI, Centro Nacional d’Intelixencia. Ye l’artefactu pente medies el cualu el gobiernu de nueso, el d’un estáu hipergarantista y democráticu, procura precavese énte les menacies internas y esternes que puedan menaciar la nuesa seguridá; y fai-lo espiando nel esterior, y vixilando nel interior, conceutos que pueden paecer similares pero qu’entrañen una diferencia fondera.

Los axentes del CNI procedentes de las Fuercies armaes, cada vegada menos al paecer, tienen xurao defender “la unidá ya integridá territorial, así como l’ordenamientu constitucional”, y supongo que los procedentes del mundiu civil farán dalgún tipu similar de pronunciamientu. Too ello fai que los acontecimientos de la semana cabera, en rellación cola aplicación Pegasus, baillaren ente’l vodevil y l’astracanada; en dalu casu nel ámbitu de la seriedá que merez l’asuntu, y quiciabes fuere la intervención parllamentaria de la que güei yá ye morra de llista d’un partíu nes eleiciones andaluces la que más aprobamientu concitare entre los que siguen estos asuntos del gobiernu de la nación, cada vegada más penosu.

El CNI, magar quien-y pese, ye’l nuesu mediu ballestrinque, y hai que confiar n’él y nos xueces que controlen  les sos intervenciones. Namái dende l’interés partidariu, o aínda peor, dende l’odiu a la nación española puede ponese torgues a la so actuación nesti asuntu. Ye lo que hay.

Raúl Suevos

A 7 díes vencíos de mayu de 2022 

Torna en castellán en repdiv.blogspot.com 

Sube'l pan

 

Va dellos años tevi la fortuna de pasar un par de meses en Tánger, una ciudá maraviosa que dende el so estremu, nel cabu Malabata, paez tocase España con namái estender la mano. Podría escribir docenes de páxines sobro esi llugar increíble pero arriesgaríame a facer el risible teniendo en cuenta los munchos y bonos escritores que yá lo ficieran nel pasáu. Atreveréme, sicasí, a recordar dalgún detalle que güei vien al casu.

La mio estancia tenía como xustificación facer un cursu d’árabe. Toles tardes desplazábame en taxi compartíu a un barriu del interior au yo yera l’únicu escolino que nun llevaba chilaba, lo que, xunío al fechu de que nun acudiera nel descansu de la tarde, coincidente col rezu, a la casi anexa mezquita, facía que’l restu d’estudiantes me güeyara cuanto menos con estrañedá.

Ente los mio collacios, bien pocos, tenía a un fubolista francés d’orixe antillanu, de raza negra y recién retiráu; conversu recien tamién y que la so muyer acudía a les clases de la mañana embutida nun niqab que nun ocultaba la figura escultural que correspuende a la moza d’un fubolista que se precie. Tamién, na mesa delantre, y medio tapándome la pizarra col so gran volume, sentábase un galu rubicundu de veintipocos años que facía gala, el que más, d’un fervor islámicu peracrisoláu que, aparentemente, tresmitiera tamién a su mocina muyer; una francesa menudina ñeta d’un republicanu español que paecía encoyese cuando’l so home falaba. Yera un cuadru aquella clas y l’espectáculu a la salida aínda más.

El casu ye que dalgunes mañanes acudía al mercáu de la Medina, na parte alta de la cuidá. Una maraviella de colores nos sos puestos de verdures, especies o aceitunes; y tamién na espléndida y gran pescadería, que el so muestrariu y precios facíenme casi llorar recordando la vieya pescadería municipal de Xijón, cuando se mercaben los oricios a un duru la palada. Qué tiempos.

En toles salíes del mercáu hai un puestu de pan. Un pan, el marroquí, que se presenta en forma de rodela planina, dos centímetros de gruesu y como un palmu y medio de diámetru, con una consistencia mórbida y sele que lu fai simplemente espectacular, y amás ye la base alimenticia de la mayor parte de la población que, amás de comelu, úsalu como utensiliu de mesa. Ye’l pan la clave de la paz social nel norte d’África, y nel restu del continente tamién.

Notros llugares africanos prepárase como tortines de masa fina que se pega a les paredes del forniellu cilíndrico hasta que, segundos más tarde, tán llistes pa sacar. Notros son tortines más pequeñes que se faen sobro la plancha metálica sometía al fueu; notros, entá más humildosos, ye la brasa de la foguera la encarregada de preparar el sacrosantu pan. En tolos requexos ye’l pan la base alimenticia.

El pan africanu ye quiciabes l’elementu políticu por excelencia. Ellí siempres hai probetería, y nun vamos entrar a resolver de quien ye la responsabilidá actual, o la histórica, que nun correspuende a esta tribuna, pero’l casu ye que cuando’l pan sube, amonta tamién, n’igual o mayor proporción, la inestabilidá política del gobiernu de turnu, con independencia de si ésti ye un país islámicu, cristianu o animista. Sube’l pan y aporta’l peligru.

Haza’l 2008 ficieronse célebres les conocíes como Revueltes del pan que dieron llugar nalgunos países a lo que se llamó la Primavera árabe. Un espeyismu pronto reconducíu poles élites de casi toos ellos, pero que metió’l mieu nel cuerpu a los sos dirixentes, que güei, na mayoría de les naciones cuiden con tol percuru posible’l suministru de pan, o de farina, a precios sosidiaos que caltengan la tranquilidá de les sos poblaciones. Pero Ucrania pue camudalo too.

De les oriellas del mar Negru, ucranianes y ruses, procede una gran parte de los suministros mundiales de trigu, maíz y xirasol. Unes producciones que la Invasión va a cortar, tien secao yá, en gran parte; y el preciu d’estes materies, que’l so mercáu ta en manes de multinacionales como Cargill, Dreyfuss o Glencore, tien aniciao una subida que supera na so pendiente, de forma nidia, a la del petróleu y el gas, muncho más siguíos pola prensa por afeutar direutamente a les nueses calefacciones, vehículos y bolsos, ensin dase cuenta de que’l pan va acabar tamién por impactanos, anque tarde un tiempu y los sos consecuencies lleguen en patera.

Sube’l pan cuando nel Cuernu d’África se sufre una de les mayores seques históriques, anque pocu se fale d’ello. Sube’l pan cuando n’Oriente medio, amás del Estáu islámicu, qu’ehí sigue, el cambiu climáticu produz unes tormentes d’arena d’intensidá y frecuencia dignes de plaga bíblica, y qu’a nós mos lleguen en forma de calimes y llovíos de barru. Sube’l pan cuando’l yihadismu fai estragos en tol cinturón sahelianu provocando’l pavor, la hambruna y la muerte nes poblaciones más desfavorecíes del continente. Sube’l pan cuando en munchos países del golfu de Guinea s’averen eleiciones, elementu xenerador d’inestabilidá por excelencia nesos países. Sube’l pan. Demasiao.

Nes directives nacionales de seguridá de los países europeos y na Brúxula Estratéxica de la UE pue atopase referencies a les migraciones masives descontrolaes, de les que va dellos años tuvimos una amuesa nes costes turques y griegues a les que aportaben en masa los refuxiaos sirios. Unos fechos que daríen llugar a la creación en tiempos percurtios d’una axencia europea nueva, Frontex, encarregada de velar pola integridá y seguridá de les fronteres de nueso, y que nun acaba d’entrar n’eficacia, por cierto.

Sube’l pan n’España, pero como too sube ye posible que’l fenómenu pase más desapercibíu de lo qu’eso supón n’África. Sube’l pan pero n’Asturies importa más el preciu de la sidra, o de la ración de gambes en Huelva, o la ración de pulpu en Galicia. Sube’l pan y entamen los problemes.

Raúl Suevos

A 4 díes vencíos de mayu de 2022

Torna en castellán en abellugunelcamin.blogspot.com