Va dellos años tevi la fortuna de pasar un par de meses en
Tánger, una ciudá maraviosa que dende el so estremu, nel cabu Malabata, paez
tocase España con namái estender la mano. Podría escribir docenes de páxines
sobro esi llugar increíble pero arriesgaríame a facer el risible teniendo en
cuenta los munchos y bonos escritores que yá lo ficieran nel pasáu. Atreveréme,
sicasí, a recordar dalgún detalle que güei vien al casu.
La mio estancia tenía como xustificación facer un cursu d’árabe.
Toles tardes desplazábame en taxi compartíu a un barriu del interior au yo yera
l’únicu escolino que nun llevaba chilaba, lo que, xunío al fechu de que nun
acudiera nel descansu de la tarde, coincidente col rezu, a la casi anexa
mezquita, facía que’l restu d’estudiantes me güeyara cuanto menos con estrañedá.
Ente los mio collacios, bien pocos, tenía a un fubolista
francés d’orixe antillanu, de raza negra y recién retiráu; conversu recien tamién
y que la so muyer acudía a les clases de la mañana embutida nun niqab que nun
ocultaba la figura escultural que correspuende a la moza d’un fubolista que se
precie. Tamién, na mesa delantre, y medio tapándome la pizarra col so gran
volume, sentábase un galu rubicundu de veintipocos años que facía gala, el que
más, d’un fervor islámicu peracrisoláu que, aparentemente, tresmitiera tamién a
su mocina muyer; una francesa menudina ñeta d’un republicanu español que paecía
encoyese cuando’l so home falaba. Yera un cuadru aquella clas y l’espectáculu a
la salida aínda más.
El casu ye que dalgunes mañanes acudía al mercáu de la
Medina, na parte alta de la cuidá. Una maraviella de colores nos sos puestos de
verdures, especies o aceitunes; y tamién na espléndida y gran pescadería, que
el so muestrariu y precios facíenme casi llorar recordando la vieya pescadería
municipal de Xijón, cuando se mercaben los oricios a un duru la palada. Qué
tiempos.
En toles salíes del mercáu hai un puestu de pan. Un pan, el
marroquí, que se presenta en forma de rodela planina, dos centímetros de gruesu
y como un palmu y medio de diámetru, con una consistencia mórbida y sele que lu
fai simplemente espectacular, y amás ye la base alimenticia de la mayor parte
de la población que, amás de comelu, úsalu como utensiliu de mesa. Ye’l pan la
clave de la paz social nel norte d’África, y nel restu del continente tamién.
Notros llugares africanos prepárase como tortines de masa
fina que se pega a les paredes del forniellu cilíndrico hasta que, segundos más
tarde, tán llistes pa sacar. Notros son tortines más pequeñes que se faen sobro
la plancha metálica sometía al fueu; notros, entá más humildosos, ye la brasa
de la foguera la encarregada de preparar el sacrosantu pan. En tolos requexos ye’l
pan la base alimenticia.
El pan africanu ye quiciabes l’elementu políticu por
excelencia. Ellí siempres hai probetería, y nun vamos entrar a resolver de
quien ye la responsabilidá actual, o la histórica, que nun correspuende a esta
tribuna, pero’l casu ye que cuando’l pan sube, amonta tamién, n’igual o mayor
proporción, la inestabilidá política del gobiernu de turnu, con independencia
de si ésti ye un país islámicu, cristianu o animista. Sube’l pan y aporta’l
peligru.
Haza’l 2008 ficieronse célebres les conocíes como Revueltes
del pan que dieron llugar nalgunos países a lo que se llamó la Primavera árabe.
Un espeyismu pronto reconducíu poles élites de casi toos ellos, pero que metió’l
mieu nel cuerpu a los sos dirixentes, que güei, na mayoría de les naciones
cuiden con tol percuru posible’l suministru de pan, o de farina, a precios
sosidiaos que caltengan la tranquilidá de les sos poblaciones. Pero Ucrania pue
camudalo too.
De les oriellas del mar Negru, ucranianes y ruses, procede
una gran parte de los suministros mundiales de trigu, maíz y xirasol. Unes
producciones que la Invasión va a cortar, tien secao yá, en gran parte; y el
preciu d’estes materies, que’l so mercáu ta en manes de multinacionales como Cargill,
Dreyfuss o Glencore, tien aniciao una subida que supera na so pendiente, de
forma nidia, a la del petróleu y el gas, muncho más siguíos pola prensa por
afeutar direutamente a les nueses calefacciones, vehículos y bolsos, ensin dase
cuenta de que’l pan va acabar tamién por impactanos, anque tarde un tiempu y
los sos consecuencies lleguen en patera.
Sube’l pan cuando nel Cuernu d’África se sufre una de les
mayores seques históriques, anque pocu se fale d’ello. Sube’l pan cuando n’Oriente
medio, amás del Estáu islámicu, qu’ehí sigue, el cambiu climáticu produz unes
tormentes d’arena d’intensidá y frecuencia dignes de plaga bíblica, y qu’a nós
mos lleguen en forma de calimes y llovíos de barru. Sube’l pan cuando’l
yihadismu fai estragos en tol cinturón sahelianu provocando’l pavor, la
hambruna y la muerte nes poblaciones más desfavorecíes del continente. Sube’l
pan cuando en munchos países del golfu de Guinea s’averen eleiciones, elementu
xenerador d’inestabilidá por excelencia nesos países. Sube’l pan. Demasiao.
Nes directives nacionales de seguridá de los países europeos
y na Brúxula Estratéxica de la UE pue atopase referencies a les migraciones
masives descontrolaes, de les que va dellos años tuvimos una amuesa nes costes
turques y griegues a les que aportaben en masa los refuxiaos sirios. Unos
fechos que daríen llugar a la creación en tiempos percurtios d’una axencia
europea nueva, Frontex, encarregada de velar pola integridá y seguridá de les
fronteres de nueso, y que nun acaba d’entrar n’eficacia, por cierto.
Sube’l pan n’España, pero como too sube ye posible que’l
fenómenu pase más desapercibíu de lo qu’eso supón n’África. Sube’l pan pero n’Asturies
importa más el preciu de la sidra, o de la ración de gambes en Huelva, o la
ración de pulpu en Galicia. Sube’l pan y entamen los problemes.
Raúl Suevos
A 4 díes vencíos de mayu de 2022
No comments:
Post a Comment