El quesu, potenciardor de la líbido

Préstame muncho’l quesu, sobremanera’l gamonéu, pero n’ocasiones preparo un mouse o crema a base de Cabrales, la Peral y Azul de fueyes que fai furor nes comides familiares. Esi ye’l casu en Navidá y Nuechevieya, y pa ello averéme a los grandes almacenes, los de tola vida, p’aperiame colo necesario.

Facia un día pa combate épicu de los Tercios en Flandes, una borrina trupa, temperatura de cero grados y sensación de menos tres. Una masacre meteorológica qu’invitaba a tomar un fervidín –vinu blancu con zucre fervíu al vapor de la cafetera- y lleer el periódicu del día, en llugar d’analayar peles cais, por otra parte abondo atarraquitaes.

Nos almacenes comprobé que yera l’únicu en llevar la mazcara puesta, magar l’alarma d’estos díes con gripe y covid, y lo atestao del llugar. Ye lo qu’hai. Yá na zona de quesos y viendo que’l mío turnu daba pa un ratu, llantemé nuna esquina y dispúnxeme a güeyar, y, de camín, a lleer nel teléfonu una recien y aplaudida tribuna de Javier Cercas, que me presta y anima hasta que remata finalmente con una declaración de la so intención de votar en blancu nel futuri. Pues sí que tamos bien.

Delantre mío, una pareya bien afiatada, superaos la setentena dambos, carguen abondosamente’l carru con amueses variaes del plantel de quesos nacional, tres lo que abandonen la zona. Yo sigo a lo mío, pensando yá na tarde que m’espera colos mio tres quesos, la sidra, l’aceite, la música de rock que pongo na cocina pa estornar a la muyer, y les prebes sucesives del asuntu, amén de culines de sidra. Un bon plan.

Yá na zona de caxes decátome que delantre mio tengo a la pareya d’enantes, que chuchurien ente ellos mientes alluguen les so compres na cinta. El paisanu fala pero, al tiempu, llanza güeyaes rápides y furtives a manzorga, a la otra caxa, ya, intrigáu, tamién yo me pongo a controlar, pa topame con un traseru –fondoschiena-y dicen n’Italia, muncho más finos ellos- espectacular, que la so propietaria, embuchada nunos pantalones de puntu peraxustaos, conxuntaos con un tamién apretáu top, afánase en llantar les so compres nuna bolsa. Atrevencia tremenda col fríu que fae. Habrá aportao en coche, pienso.

Delantre, la dama, decatándose de la libido desatada de la so pareya, solmena-y una coldada al tiempu que tira d’él pa la salida. A min, que namái tengo qu’allugar los tres quesos humildosos, dáme aínda tiempu pa ver que la cara que preside’l cuerpu pertenez a una morena guapa de piel escura y pelu azabache, ensin dulda exemplar sobeyosu de la raza hispanoamericana.

Yá na cai torno a topar la pareya nel semáforu, con ella xesticulando enraxonada y él en silenciu aspru. A lo menos va caminar caliente na nublina, pienso.

Raúl Suevos

A 29 díes vencíos d’avientu de 2023

Torna en castellán en repdiv.blogspot.com

Milán navidiegu

 

Ta Milán impresionante, como siempres, y especialmente nestes feches navidiegues. Ye toa ella una lluminaria, y dicen que ye la que más rellume dende’l balcón estraordinariu de la Estación orbital. Ye como una obligación pa la ciudá, muncho más allá que los leds de ricu nuevu del alcalde Caballero. Una devoción al llume que vien de la so vitola de capital económica d’Italia dende va yá muncho tiempu; enantes del Risorximientu inclusive.

A min, que la visita me toca pela parte familiar, pídeme’l cuerpu averame a les siempres concurríes, casi tumultuoses, galeríes de Vittorio Emmanuele, pegadines a la Piazza del Duomo, y que, pa estes feches, llanten nel cruce de les mesmes un abetu navidiegu descomanáu, cada añu más llamativu, y cabría djcir que suntuosu.

Los años caberos fo la conocida firma Swarovski la responsable d’afatar, o diseñar si prefieren, los ornamentos del navidiegu abetu. Y fo un ésitu enorme en cuantu a públicu, a comentarios, ya, induldablemente, en cuantu a proyección publicitaria de la firma, dalgo que llevó esti añu a dar un saltu cualitativu, o debiera dicise crematísticu, a la operación de rellaciones públiques.

El blincu, más que saltu, vieno de la mano de Gucci que diseñó un abetu con baules, maletes, maletines y bolsos de la firma pernomada que, dicen, supunxo en conxuntu’l desembolsu d’un millón d’euros. Sí, un millón, ye lo que se comenta. Y too pa nada, o, a lo menos, pa refugu verbal de los milaneses, y visitantes ente los que m’incluyo, que opinen, opinamos, que’l resultáu ye un adefexu qu’atenta a la tradición, y da un saltu más na carrera mercantil na que se tien camudao lo qu’enantes yera familia, tradición y relixón. Ye lo qu’hai, y a min, amás, recuérdame’l nuesu xixonés árbol de sidra.

Lo mercantil va tan lloñe que n’Italia, tamién estos díes, namái se fala del millón d’euros de multa que-y solmenaron a la más famosa de les influencers italianes, Chiara Ferragni, quien l’añu pasáu llanzó una campaña de panettone, supuestamente benéfica, pola que se tendría embolsao esi millón de la multa, y unviao 35 mil modestos euros pa beneficencia. Toa una bullshit, n’inglés pa torgar la mala olor n’asturianu, que menacia l’imperiu publicitariu que la señora montara en redol a la so persona y la del so home, un raperu italianu pernomáu. Coses.

Polo demás, la tarrecible señora Meloni, peor pa dalgunos que’l propiu Duce, paez que lleva bien al país, con meyora en casi tolos parámetros, especialmente nel apreciu de los italianos, según encuestes.   

Feliz Navidá.

Raúl Suevos

A 22 díes vencíos d’avientu de 2023

Torna en castellán en repdiv.blogspot.com

Ucrania, el choque de civilizaciones

 

El títulu de la tribuna remembra un llibro de Samuel Huntington, un cientista políticu norteamericanu, o sociólogu, que dambos, en función del productu, comparten DNA. Una obra que supunxo una conmoción a nivel mundial por cuantu pronosticaba un mundiu en tensión y conflictu constantes, particularmente nes zones fronterices de la cultura islámica, a la que axudicaba un afán universalista y belixerante, y, poro, xeneradora de choques colos sos vecinos.

Nin que dicir tien que a don Samuel partieron-y la cara, dialécticamente falando, en munchos foros internacionales, siendo particularmente duros los apóstoles de lo políticamente correuto, del buenismu; y eso qu’entós entá nun se desendolcara la filosofía “woke”, tamién nomada wokismu. El casu ye que, a tamañu desatín hobessianu, llueu-y salió una respuesta que, asorái-vos, vieno de la mano de la nuesa particular llumbrera política nacional, el señor Zapatero, quien, n’asociación con un paladín de la democracia, entendida ésta a la su manera personal, como ye’l señor Erdogán, presidente turcu que va pasar a la historia como enterrador de Kemal Ataturk, montó –diba escribir creó pero paecióme escesivu- el tingláu conocíu como Alianza de civilizaciones.

El negociu malapenes tien dao de sí, más allá d’unes cuantes axuntances y viaxes a cuenta del presupuestu nacional que foron cubiertes puntualmente pola prensa afín, pero poco más. El choque, una y otra vegada, paez superar en cuantu a aiciones manifiestes a l’alianza, y los terroristes de Hamás, el 7 d’ochobre pasáu, encargáronse de recordámoslo convenientemente. Ye lo qu’hai.

N’Ucrania nun paez dase esi choque, o sí. Dambos contendentes, un invasor y un invadíu, son cristianos ortodoxos, pero, si güeyamos de cierca, guipamos qu’un, magar les sos faltes y contradicciones. Ucrania, lleva años trabayando pa formar parte, como igual, del club de les democracies occidentales, dalgo que’l so perrecien nomamientu como aspirante a l’adhesión a la XE atestigua; l’otru, Rusia, ye una democracia illiberal, axetivu compasivu nesti casu, que tien al gruesu de la so población, cola esceición de Moscú y San Petersburgu, nun estáu d’atrasu social que fae que los sos soldaos, en cuantu tienen oportunidá, roben toa llavadora o frigoríficu que se pon al algame de los sos camiones pa facelos llegar a les sos cases, en munchos casos ensin augua corriente y letrinas nel esterior de les mesmes.

Ye’l choque de Putin pa enzancar que los so conciudadanos se decaten de que n’Ucrania, magar la guerra entamada por Moscú dende 2014, vívese muncho meyor qu’en Rusia. Dalgo que diba acabar con Putin y la cleptocracia que lu sofita. Un choque de civilizaciones.

Raúl Suevos

A 18 díes vencíos d’avientu de 2023

Torna en castellán en repdiv.blogspot.com

De boda n'Habana

 

Nun sé si va salir nes páxines del papel couché, o del corazón, tamién nomáu asina, pero, sicasí, lo cierto ye que va dellos díes hebo n’Habana una boda de les d’enantes, de cuando la xente bien diba de llargu, y n’iviernu, iviernu cubán,  llantábense estoles de visón pa dir a les cenes nes cases postineres del barriu del Vedado.

Güei nel barriu antaño de clas alta nun queda un res, quitando’l Muséu de les artes decoratives, vieya casa de la marquesa de Revilla, propietaria tamién de la Manzana de Gómez, un centru comercial magníficu xunto al Parque Central de principios del sieglu XX, y  demientres dellos años auguriu inmobiliariu decrépitu. Una promesa decadente camudada en gran hotel de cinco estrelles malapenes va cinco años, rexentada pela cadena Kempiski, y agospiu suntuosu de los invitaos d’esta boda pretendidamente lluxosa.

A la marquesa espropiaron-ylo too, allá per mediaos de los sesenta del sieglu pasáu, hasta la cacía de plata, emparedada convenientemente pol caberu en salir, fo requisada, y anguaño exhíbese nel coqueru muséu xunto con fotografíes de visitantes illustres de la casa, como los condes de Barcelona o la duquesa d’Alba. A lo menos la so condición de muséu sálvalu del abandonu inherente a la condición d’habaneru. Ye lo qu’hai.

El bodorriu, del fiu del amu de Vima, una distribuidora alimenticia d’orixe gallegu qu’espliega en casi tolos países caribeños, sedría, cola so exhibición de lluxu casi ilimitáu, una mocada a los cubanos d’a pie, si nun fuera porque yá tienen los carriellos insensibles -y lo que-yos queda hasta que Raúl tenga’l detalle de morise-, pero la realidá ye qu’ellí pocos se tienen enterao.

Boda na catedral, preboda nel hotel Kempiski, el cabaret Tropicana pieslláu pa los invitaos. Tou un espliegue del que namái dalgunos cubanos, los pasiantes ocasionales, y xerifaltes escoyíos del réxime, tuvieron noticia. Una pena si tenemos en cuenta que la firma, Vima, nació y creció na Islla bonita, casi siempres baxo l’amparu de Fidel y dempués de Raúl, si bien na patria, nin siquier la gallega, tengan mui nidio quién ye y cómo algamó tan impresionante desendolcu empresarial.

Lo cierto ye que, tengo l’alcordanza de cuando ellí vivía, la calidá de los sos productos ye ínfima, non apta pa consumidores patrios, y los so precios, comparativamente, resultaben disparataos, pero l’ausencia de competencia camudábalos, nel llendáu mercáu cubán, en refinaos.

L’espliegue lleváu a cabu n’Habana tien sabores snobistes d’última xeneración, y resulta pornográficu metanes la miseria qu’atenacia a la población de la islla.

Raúl Suevos

A 16 díes vencíos d’avientu de 2023

Torna en castellán en repdiv.blogspot.com

Si gana Rusia pierde Europa

 

Llueu van cumplise dos años de la invasión d’Ucrania llevada a cabu poles tropes de Vladimir Putin. Dos años nos que los europeos escubrimos al pueblu ucranianu; a la so intrallable voluntá de vencer; a la so intención inquebrantable de prevalecer como nación con identidá propia y diferenciada de los rusos. Una leición de patriotismu y resiliencia que debería ayudar a fortalecer la propia personalidá de la Xunión.

Tán siendo años esprecetadamente llargos, nos qu’Europa, como conxuntu, supo reaccionar énte lo que s’atalanta, más allá de la imposición de la fuercia percima de la resolución pacífica de conflictos, como un peligru futuru nidiu pa la propia esistencia de la Xunión; dalgo que los países vecinos a Rusia conocen bien y supieron tresmitir al restu d’Europa. Agora, cola cansedá d’unos y los intereses inconfesables d’otros, paez que les coses entamen a camudar.

Rusia pierde la guerra nos frentes de batalla gracies al valir insuperable de los homes y muyeres d’Ucrania, pero ta escomencipiando a ganar la guerra pente medies la compra de voluntaes polítiques, como la del populista nacionalista que dirixe Hungría, o los republicanos siguidores de Trump, dispuestos a too con tal de desallugar al presidente Biden de la Casa blanca. Les so operaciones d’información, o sicolóxiques, funcionan muncho meyor que los so medios y unidaes de combate, y amenorguen la voluntá de dalgunos pa siguir sofitando a Ucrania. Nun podemos, nin debemos, baxar la guardia.

La Política d’Apaciguamiento fo una “actitu” política de los países europeos, encabezada pol premier inglés, Neville Chamberlain, na década de los 30 del sieglu pasáu, que, como los fechos posteriores amosaron, namái sirvió pa envalentonar a un Adolph Hitler que, primeramente, nun les tenía toes consigo. La Segunda Guerra Mundial fo’l resultáu que dalgunos anunciaron.

Anguaño atopamonos nun momentu que recuerda al Apaciguamientu. Tenemos a un autócrata lliderando una democracia illiberal en Rusia con intenciones imperialistes pernidies, que la invasión d’Ucrania  punxeron de manifiestu pa los que nun quisieron enterase de l’anexión de Crimea, y que, si nun ye frenáu, tres un periodu de recuperación, va llanzase, ensin dala dulda, a la recuperación del vieyu territoriu soviéticu. Ye lo qu’hai.

Los que n’Europa entamen a falar de soluciones diplomátiques, como nos tiempos de Chamberlain, suponen una quinta columna europea que namái tien como salida la destrucción d’Ucrania y el so pueblu, nun primer pasu, y llueu’l sometimientu de la propia Xunión Europea, que tendrá demostrao la so incapacidá pa dexar de ser un nanu político, lo que la va llevar a perder también la so potencia económica, y ello ensin dexar de ser un viérbene militar.

La victoria d’Ucrania ye la de nueso.   

Raúl Suevos

A 16 díes vencíos d’avientu de 2023

Traducción en castellán en repdiv.blogspot.com

España nun merez un gobiernu que-y mienta

 

Esa afirmación rotunda nun me pertenez. Munchos vanla recordar en boca d’Alfredo Pérez Rubalcaba, al tiempu man drecha d’un Zapatero, secretariu xeneral de los socialistes y aspirante al sillón de presidente de gobiernu nes eleiciones que debíen celebrase tres díes dempués d’esta salida del, mefistofélicu más que maquiavélicu, Rubalcaba.

L’afirmación llapidaria sofitábase en que’l gobiernu Aznar, veinticuatro hores dempués del atentáu d’Atocha, entá axudicaba la responsabilidá a ETA en llugar de al terrorismu islámicu, dalgo que, pa entoncenes, Rubalcaba, que caltenía los sos peones nel Ministeriu del interior, sabía perfeutamente. Tarrecible érru de comunicación institucional en viésperes eleutorales y que diba acabar costando-yos les eleiciones a los populares, y retrasando l’aportar de Rajoy per casi ocho años.

Al día viniente produxose una manifestación multitudinaria na que’l gobierno, más que los terroristes, paecía’l responsable del atentáu, y nes consiguientes eleiciones l’home del talante, Zapatero, faríase col poder, entamando’l fin de la Transición y escomencipiando una sienda de polarización política y social qu’anguaño, col doctor Sánchez al mandu, ye’l caldu nel que los españoles fervimos, yá non a fueu floxu, ca día.

Les mentires de güei nun van bañaes en sangre, o sí, anque sangre vieya, casi seca, y a la que se trata de tapar con un mantu d’escaecimientu. Ye la sangre de los asesinatos ensin resolver que los socios del PSOE pretenden facenos esquecer. Pero’l gruesu son bilurdies en forma de promeses incumplíes, en cascada, con “cambeos d’opinión” sobreveníos pol bien d’España pero que dexen al votante estremecíu énte la realidá de la so propia insignificancia énte’l poder de los gobernantes d’anguaño; énte’l so papu y la so falta de mínima decencia. En cualquier casu mentires son, pero ensin eleiciones a la vista bilurdies impunes.

Nel 2005 la madre de Pagazaurtundúa, socialista asesináu por ETA, escribía-y al anguaño voceru socialista nel Congresu: “Pachi, vas dicor y facer munches más coses que me van xelar el sangre”, y por lo que vamos viendo nestos díes caberos namái tamos na fase entamadora de lo qu’un doctor Sánchez, al frente del gobiernu español más minoritario que tengamos conocío, ta dispuestu a facer con tal de caltenese nel sillón de la presidencia del gobiernu.

Dambos, Rubalcaba y Pilar Ruiz, teníen razón, y les sos pallabres son plenamente vixentes; desgraciadamente, el principiu de bona fe, o el llatín “pacta sunt servanda”, nun paecen tener fuercia, nin siquier moral, na política d’agora, y, llamentablemente, el votante, debiera tomar la so decisión baxo esta premisa. Ye lo qu’hai.

Raúl Suevos

A 15 díes vencíos d’avientu de 2023

Torna en castellán en repdiv.blogspot.com

Lo que pintamos n'Europa

 

Les redes avisénme que’l mio nome apaez en dellos periódicos europeos, dengún español, rellacionáu con otros cientos de roblantes d’una carta abierta al presidente Biden, pidiendo-y que dé’l vistu bonu al emplegu del armamentu USA más allá de les fronteres ucranianes; una midida que podría significar la supervivencia de la propia Ucrania nunos momentos nos que’l bloquéu republicanu nel Congresu de Washington menacia con arronciar l’ayuda norteamericana. Ye lo qu’hai.

El casu ye que yo mesmo maraviyome de la singularidá del mio nome en tan amplia llista europea. Una rellación na qu’apaecen nomes de tolos estamentos de la sociedá europea y de cuasi tolos países de la Xunión. Una llista que, nel mio casu, naz del mio periodu como direutor de comunicación del Eurocuerpu, n’Estrasburgu. Una ciudá, perrica, que cuenta cola segunda see del Parllamentu européud, au s’aconceyen una selmana cada mes del periodu de sesiones; un Conseyu d’Europa, la desconocida, vieya y perimportante institución europea; el Tribunal de drechos humanos européu; y la Farmacopea europea; toa una riestra d’instituciones que lleven apareyao’l que na ciudá esistan más de cuarenta embaxaes de tol mundiu. Un negociu rondu.

Vien esto a cuentu de la importancia que’l gobiernu, y la propia interesada, y-tienen dao al nomamientu de la señora Calviño pa un puestu de dirección nuna institución europea, el Bancu d’inversiones. Un nomamientu que nun tien servío pa poner n’evidencia, a lo menos yo nun lo percibí nos medios de comunicación, la indixencia absoluta que caltien España en cuantu a sees d’instituciones europees, o mundiales, que tamién les hai. La nuesa institución internacional principal, a lo menos pol interés amosáu, paez ser el sol mediterráneu, y esi, según va’l clima, paez tener tamién un percorríu perecederu.

L’Eurocuerpu, la institución a la que pertenecí temporalmente, cuenta con una plantilla de más de 700  persones; toes ellas, quitando los franceses, un 30% más o menos, cuenten con sueldos internacionales, esto ye, bastante apetecibles, que gasten principalmente en vivir na ciudá, pagar los colexos de los fios, viaxar pola redolada, too ello pa contentu del texíu económicu de l’Alsacia. Como facen el restu de miembros de les otres instituciones yá citaes. Un negociu codiciable.

La carta de la que soi firmante, y el nomamientu de la señora Calviño, son, siendo fundamentalmente diversables, amueses iguales de la falta de visión de la aición exterior de nueso a tolos niveles, dalgo de lo que’l gobiernu anguaño nun ye más que heriede y continuador d’una política yá, desgraciadamente, asentada ente nós.

Nun son los puestos, son les sees ¡mazcayos¡

Raúl Suevos

A 13 díes vencíos d’avientu de 2023

Torna en castellán en repdiv.blogspot.com

El quilombu hispanoamericanu

 

Esti domingu 10 d’avientu ye un día de gloria n’Arxentina. Más allá de la personalidá del presidente ñuevu, que va dar, probablemente, p’abrir munches páxines primeres nel futuru, lo que queda y se celebra ye que los arxentinos decidieron dar un volantazu a los destinos de la nación.

La pallabra quilombu, mui usada en Chile y Arxentina, tien una aceición como lupanar, prostíbulu, o burdel; y una segunda como caos, desordre o barullu, que también tien ganao una importancia rellativa y usu n’España; y ye esti significáu segundu’l que paez que describe lo asocedío n’Arxentina, au la situación política tien llegao a talu nivel de deterioru que los arxentinos, polo que se ve, decidieron votar, non pa escoyer al señor Milei, que tamién, sinon pa deshacese del Kirchnerismu, o lo que ye lo mesmo, el peronismu na so versión más decadente.  

Un pocu de quilombu tamién podemos atopalu nel sequitu del rei d’España –a ver si lluéu puede poner en lista de revista a la princesa Leonor pa que lu sostituya nestos viaxes- que, quiciabes pol refugu manifestao pol doctor Sánchez, namái tien merecío ser acompañáu por un secretariu d’estáu, tan válidu como un ministru a los efeutos de refrendar los actos del xefe del estáu, pero que tien servío pa avivar la llaparada, nunca apagada, de les renedielles de la política nacional. Ye lo qu’hai.

El quilombu políticu arxentín tiene difícil solución, pero paez obligao da-y un marxe de confianza al presidente ñuevu, que dempués de meses, años inclusive, predicando barbaridaes, agora va tener que dar, intentalo a lo menos, trigo. Y namái tenemos que güeyar al casu italianu, con una Georgia Meloni, de la que s’esperaba poco menos que’l fundimientu del so país, y qu’anguaño, malapenes un añu dempués, rexunta l’almiración d’Europa, y el favor, según encuestes, de la mayoría de los sos conciudadanos.

Arxentina, sicasí, va poder camudar les sos opciones en eleiciones ventures, pues trátase d’una democracia plena y efeutiva, na que l’alternancia nel poder produzse ensin dalu problema, como amuesa la so historia recien. Un espeyu nel que podríen güeyar les so vecines Venezuela, Nicaragua, o Cuba; países nos que, tres l’apariencia d’eleiciones, un paripé realmente, los sos dictadores perpetúense nel poder, a costa de la llibertá de los sos conciudadanos.

El quilombu venezuelanu, ca día más arrequexáu, agora, y dempués d’abandonar demientres dellos años les so xustes reclamaciones, espliega tropes na so frontiera con Guyana y reclama la cuenca del riu Esequibu, nuna fuxida haza alantre que puede acabar baillando un xoropu de sangre.  

Raúl Suevos

A 9 díes vencíos d’avientu de 2023

Torna en castellán en repdiv.blogspot.com

La dependencia israelí de nueso

 

Recién mos dexó Henry Kissinger, un xudíu alemán superviviente del xenocidiu desendolcáu polos esbirros de Hitler na Europa d’entoncenes ente los componentes de la so raza y relixón. Un campeón de la ciencia política que llevó ente les sos manes, direutamente o al traviés de los so escritos, les rellaciones esteriores del so país d’adopción, los Estados Xuníos, l’Imperiu.

Kissinger yera un paladín de la teoría realista nes rellaciones internacionales, nes que los estaos son protagonistes y la so sobrevivencia l’oxetivu a algamar polos so mandatarios. Una teoría que ye la que tien marcao l’aportar del mundiu modernu cuasi ensin esceición.

Nel casu español nun paez muncho nidio que los nuesos gobernantes tengan una ideia muncho clara d’esta teoría, por simples que les sos premises pudieran paecer, y, el nueso presidente de gobiernu anguaño, responsable d’esa política, paez empecináu en procuranos, un día sí y otru tamién, descomanaes dosis d’incertidume y preocupación.

Aínda nun algamamos a recuperanos de la sorpresa del so cambéu de postura, rotundu y sorprendente, tocantes la posición española –antigua potencia responsable- respeuto al conflictu del Sáhara. Un cambéu que tevo como añedío la casi rotura de rellaciones con Arxelia y el deterioru radical de les nueses rellaciones comerciales con aquel país, hasta entós el nuesu proveedor enerxéticu principal. Y ello ensin meyora aparente de les siempre tenses rellaciones con Marruecos.

Agora, y como presidente rotatoriu del Conseyu Européu, tien viaxao a Israel au, coles sos declaraciones, llogró encabronar al gobiernu israelí, mientes aplaudíen los portavoces de Hamás, el grupu terrorista que provocó el conflicto anguaño. Tou un exemplu de lo que nun ye la teoría realista de les rellaciones internacionales.

Nun paez fácil atopar beneficios pa España nesti movimientu del doctor Sánchez pero, teniendo en cuenta que namái caltenemos planes de continxencia militar con rellación al nuesu vecín del sur, convien nun dexar de llau lo que supón la industria militar israelí con respeutu a les nueses fuercies armaes, y les de Marruecos.

España cuenta, acordies información pública, con misiles Spike pa helicópteros y cazabombarderos; el sistema Arrow 3 de defensa aérea; los sistemes de vixilancia Hermes 900 y el Heron 1, asina como’l satelital EROS; toos ellos d’importancia fundamental pa la nuesa defensa y necesitaos de mantenimiento permanente y reposición de materiales y repuestos.

Nel casu marroquí atopamonos colos mesmos sistemes d’armes y vixilancia, dalgo que, teniendo en cuenta’l recien reconocimientu del estáu d’Israel per parte marroquí, y la tebia posición énte’l conflictu amosada pel so rei, debería preocupanos si, llegáu’l casu, los planes de continxencia conviertense de sopitu en cruda realidá. Ye lo qu’hai.    

Raúl Suevos

A 5 díes vencíos d’advientu de 2023

Ente Cesarismu democráticu y Democracia illiberal

 

El primer conceutu, el de Cesarismu democráticu, ye un términu políticu desarrolláu pol venezuelanu Vallenilla Lanz nun llibru asoleyáu nel llonxanu 1919. Acordies con él, pártese d’un líder carismáticu qu’algama’l poder, inclusive pente medies d’eleiciones, pa depués perpetuase, por aciu del opacamientu o control de les instituciones democrátiques, el cultu a la personalidá del líder, y l’emplegu de la fuercia si se fae necesario. Teniendo como exemplo rescamplante a Xuan Domingo Perón, y en tiempos más averaos, al inefable comandante Chávez. Dexamos a Fidel Castro de llau por ser un casu paradigmáticu de dictadura militar.

El segundu, esto ye, el de Democracia illiberal, ye muncho más recien, y aportanos de la mano del analista políticu estadounidense Fareed Zakaria que lo diba allumar nun artículo memorable de 2003 nel que-y alxudicaba como carauterístiques les siguientes: L’accesu al poder pente medies eleiciones llimpies pa lluéu acutar l’exerciciu de llibertaes; recortar l’imperiu de la llei mediante’l control del sistema xudicial; la supeditación absoluta del poder llexislativu al executivu, y, finalmente, la medría del control y subordinación de los medios de comunicación pública. Un sistema políticu que tendría como exemplos notorios al turcu Rayip Erdogan, y más cerque al otrora conspicuu Victor Orban d’Hungría.

Vien too esto a cuentu de la noticia de l’anulamientu por parte del Supremu del nomamientu de la señora Valerio como presidente del Conseyu d’estao, por nun ser xurista de prestixu, o tamién l’anulamientu del nomamientu de la señora Delgado como fiscal de la Sala militar del Supremu por evidente desviación de poder; o l’inéditu pronunciamientu negativu del Conseyu Xeneral del poder xudicial en cuantu al propiu nomamientu del Fiscal xeneral  por falta de condiciones morales. Dalgo que nunca enantes asocediera. Tou un rosariu de señales alarmantes pa la nuesa democracia.

Son alvertencies que mos dicen que, enagora, el poder xudicial aínda ta vivu, pero son tantos los peligros que lu acesmen, especialmente coles menacies siniestres que suponen les referencies al “lawfare” nel proyeutu d’amnistía, anglicismu que señala la xudicialización política interesada, que debemos nun perder de vista’l fechu de que l’acabamientu de la independencia xudicial ye direutamente proporcional a la nuesa consolancia como ciudadanos, pa pasar otra vegada a la de súbditos, pero agora d’un secretariu xeneral, non d’un rei. 

El sistema políticu de nueso da un poder cuasi absolutu, demientres la duración de la llexislatura, al presidente del gobiernu, camudándolu cuasi nun autócrata, y, como pudimos ver, los controles y equilibrios que la llei marca, nun siempres son abondo pa caltenemos na sienda constitucional. Ye lo qu’hai.

Raúl Suevos

A 30 díes vencíos de pallares de 2023

Torna en castellán en repdiv.blogspot.com

El Napoleón de Scott

 

Va yá dellos años tevi la fortuna de ser unviáu a París como oficial de prensa empotráu na Guardia Real, que diba desfilar nos Campos Elíseos na festividá del 14 de xunetu. Una quincena, la de mío, que va ser difícil d’escaecer en munchos aspeutos, especialmente porque me punxeron un despacho en Los Inválidos.

El trabayu de prensa foi más difícil de lo esperao porque l’agregado español de Defensa, nun aconceyamientu previu, tevo la mala idea de comentar que la Guardia Real trayía caballos enteros mientes que la Guardia Republicana usaba yegües. Como cabía esperar esi comentariu desafortunáu convirtióse nel suxetu principal d’interés de la prensa francesa. Paecía lo único importante del asuntu.

Pa min, l’alcordanze más fondera, a parte de la moyadura monumental que toos garramos el día del desfile, ta na visita que, de la mano del destacamentu de xendarmes de Los Inválidos, pude facer a les impresionantes baxocubiertes del monumentu, au aínda se conservan grafitis de los pilotos aliaos que s’escondieron ellí demientres la Segunda Guerra Mundial, y, sobremanera, la xuba a la cúpula y la so linterna, con unes vistes increíbles de la Tumba de Napoleón y de los barrios centrales de Paris.

Tres la cúpula visitamos el pasaxe inferior de la Tumba que na so rotonda atopense significaes en mármol les realizaciones, principalmente civiles, promovíes pol xenio del gran corsu; col código civil, del qu’entá güei bebe’l de nueso, como mayor obra, ente otres munchas. Ablucante.

A Ridley Scott tengo-y visto la mayor parte de la so obra cinematográfica, y casi nunca me defrauda, anque esti Napoleón creo que lu voi llantar al llau de “la teniente O’Neil”, pues, magar la so duración, nun s’avera nin de lloñe a la figura del emperador de los franceses, salvándose namái les escenes de batalles, y non toes. Na retirada rusa tendría-y bastao con reponer la escena de “los duelistes” pa contentamos a toos.

Nos personaxes, fundamentalmente Napoleón y Xosefina, creo que se pierde en buscar demasiados ángulos, en munchos casos histriónicos, y desaprovecha a un Xoaquin Phoenix otres vegaes maxistral. Nun digamos yá de les licencies históriques, que son abondoses, y en dellos casos arregallantes; tamién les había, descomanaes, en Gladiator, y quedó un espectáculo ababayante, del que nunca me canso de ver la batalla del entamu. Una pena.

La meyor biografía de Napoleón, dicen, ye la de Max Gallo, que se centra nel personaxe y pasa de puntilles sobro les batalles. Abel Ganze pensaba facer seis películes pa tratar la so vida, anque quedóse nuna. Y a Scott paez que-y tenga podío la so condición de fíu de la Gran Bretaña. Ye lo qu’hai.

Raúl Suevos

A 26 díes vencíos de pallaress de 2023

Torna en castellán en repdiv.blogspot.com

Falando neerlandés

 

Holanda yá nun ye Holanda, agora, y tamién enantes, son los Países Baxos, y too ello porque el nombe primer correspuende a una rexón y non al conxuntu del país, dalgo que, al paecer, tocaba-y los pies al restu de neerlandeses, y d’ehí’l cambéu del nome oficial del país pol de Netherlands o Países Bajos, que ye lo mesmo.

Ye un país particular, vieya posesión de la corona de los Austrias; a nós, los españoles, supunxómos momentos de gloria pa les nueses armes gracies a los Tercios, y tamién una sangría descomanada d’homes y caudales que d’otra forma hubieran podido dedicase a otros asuntos más rentables nel tiempu.

Ellos, los neerlandeses, una vegada independientes, foron a crear un imperiu gracies a les sos téuniques comerciales, los sos navegantes, y la so mala lleche; pero la presión de los ingleses, d’un llau, y los sos propios pecaos, del otru, dieron al traste colo que paecía imparable. Too, o casi too, s’esbarrumbó cola ampolla de los tulipanes, una lloría inflacionaria qu’españó de guelpe fundiendo la economía del país.

Nos tiempos modernos nun-yos va mal, o diba. La so monarquía parllamentaria ta mui asentada, y el réxime de llibertaes ta ente los más avanzaos del mundiu. Con un sistema de acoyida que foi exemplu pa to l’Occidente, anque dalgo paez que tien entamao a dexar de funcionar.

La emigración ye un problema pa munchos. Con un 13% de población inmigrante, ensin contar los de segunda xeneración, y una mayoría de procedentes de países musulmanes, el país tíense visto nos años caberos como noticia de primer plana por estremaos asocedíos rellacionaos col radicalismu islámicu, lo que dio nel so tiempu a la nacencia de partíos contrarios a la emigración, o xenófobos pa dalgunos, o islamófobos pa otros.

Ye’l casu del Partíu pola llibertá, de Geert Wilders, fundáu por él nel 2006, tres dexar al Partíu popular, demasiao medranosu pa él tocantes al Islam. Un partíu que pocu a pocu foi creciendo nos procesos eleutorales posteriores, hasta’l celebráu esti martes, nel que tien llograo un 37% de los votos, de llargo’l ganador.

Llega’l tiempu de formar gobiernu. Ya veremos qué pasa, pero ye un fechu que n’Europa tenemos un problema de difícil solución –güei enteramonos que la tasa de natalidá española tien tocao fondu, y que les muyeres migrantes tripliquen la de les españoles- pues nun algamamos a integrar culturalmente a los pobladores nuevos, que s’apiñoten en guetos modernos, al tiempu que siguimos necesitando esos brazos pa la nuesa estructura económica. Ye lo qu’hai.

Nun ye un fenómenu holandés sinon européu.  

Raúl Suevos

A 23 díes de pallares de 2023

Torna en castellán en repdiv.blogspot.com

La guerra de los uniformes

 

Aporten noticies fresques tocantes un alcuerdu ente los terroristes de Hamás y el gobiernu israelí pa detener los combates demientres cuatro díes, ya intercambiar de parte de los rehenes garraos el 7 de ochobre pasáu por presos de les cárceles israelíes. Por embargu, nun debemos pensar qu’esti españíu ta en víes de solución. Non.

L’exércitu israelí nun puede parar hasta desmantelar tola infraestructura política y militar de los terroristes de Hamás y de Yihad islámica, puestu que, en casu contrariu, vase atopar con namái un periodu más o menos llargu de tranquilidá, hasta que’l grupu se recupere. L’oxetivu debe tar na reposición na gobernación de la Franxa de l’Autoridá Nacional Palestina, namái ella ye a llevar un pocu de sensatez a les poblaciones palestines, y ello si l’estáu xudíu llogra desembarazase de los gobiernos ultra-radicales que tien liderao Netanyahu.

Pa los que güeyen la situación dende’l buenísmu biempensante, convien qu’estrapolen los 1400 asesinaos del 7 d’ochobre a la población norteamericana, y van atopar unos 45.000 muertos, munchos más que los 2.400 de les Torres xemeles, y yá ven cuála foi la reacción de los Estados Xuníos, incluyendo l’aplicadura del artículu 5 de l’Alianza Atlántica.

Na guerra de les redes sociales, alimentadores en munchos casos de los medios de comunicación tradicionales, asistimos a la batalla de los uniformes. Per un llau’l tradicionalmente identificable exércitu israelí, colos sos uniformes verde oliva y los sos amplios cascos de combate, y nel otru llau vimos, na fase d’entamu, con vídeos mui bien editaos y al mou del Estáu islámicu, a combatientes de Hamás con uniformes tipu pixeláu yanqui, mui de moda en casi tolos exércitos anguaño, lo que mos tresmitía la idea, rellatu, de dos exércitos que s’enfrentaben en términos d’igualdá. A lo menos dende’l puntu de vista de la xestión de la violencia institucional, patrimonial de los gobiernos.

Posteriormente, y hasta estos díes caberos, les redes facenmos llegar imáxes de combatientes en texanos, chancles y camisetes moviéndose ente les ruines que los combates van produciendo. Unos combatientes que, llegao’l casu y desprovistos de les armes qu’empuñaben, pueden pasar ensin mayor problema a engrosar les cifres de población civil “asesinada” pol exércitu israelí. Ye una segunda fase na que Hamás yá nun ta en condiciones de siguir “vendiendo” la imaxe de fuercies armaes regulares y trata d’esplotar la de la población civil víctima, de la qu’ellos mesmos son los victimarios en mayor midida que’l propiu exércitu israelí. Ye lo qu’hai.

Raúl Suevos

A 22 díes vencíos de pallares de 2023

Torna en castellán en repdiv.blogspot.com

Fáltenme los de la ceya

 

Son díes convulsos los que s’asoceden n’España, en casi toa. Son díes axitaos porque l’escurrir políticu tien echao a la cai a los inhabituales, a la “bona xente”, a la mayoría silenciosa que dicen dalgunos, a los que, xeneralmente, entienden la so actividá política namái como l’exerciciu periódicu del so drechu de sufraxu activu, esto ye, el votu; y aínda asina, en munchos casos, por corréu, que los colexos eleutorales a vegaes son mui aforfugantes.

Esi personal nun ye mui dao a manifestase. Faenlo namái nes grandes ocasiones, como colos asesinatos d’ETA, nos que toos mos aconceyábemos na cai, ensin distinción de creos políticos, porque el sangre vertíu yera’l de toos. Tamién tres l’intentu de güelpe d’estáu del 81, toos a una, como Fuenteovexuna. Dempués la cai siempres tevo una color.

Vímoslo col Nunca mais, la convenientemente dirixida reacción popular a un vertíu petrolíferu, que la progresista esquierda uso como caballu de troya pa esgastar la imaxe d’un Partíu popular entós nel so periodu meyor. Una marea negra qu’echó a la esquierda a la cai, la so cai, pa manchar de chapapote la imaxe d’un Aznar qu’entá nun punxera los pies sobro la mesa de les Azores.

Pa l’alcordanza queda la respuesta unánime a los atentaos d’Atocha pero qu’un avispáu Rubalcaba, Richelieu de toles conxures, metabolizó con aquello de que “España nun merez un gobiernu que-y mienta”, que daría pasu, tres díes depués, al gobernante del talante, el célebre Zapatero.

El lleonés, con un gobiernu rompedor en munchos aspeutos, algamó a abrir la ferida que la Transición llogrará piesllar, y con él llegó la polarización y el desencuentru ente españoles, de nuevo, con un Rubalcaba en plen apoxéu que, dende’l ministeriu del interior, controlaba a unos y a otros. Ente esos otros a los intelectuales de la sovención, quienes nun alarde de creatividá montaron la campaña de la ceya en sofitu a Zapatero pa la so segunda campaña, aquella que refugaba l’aportar funestu de la crisis mundial, y que nun ye necesariu recordar cómo acabó.

Había de too nesi grupu, anque’l so rasgu más común yeren les sovenciones, y el so paroxismu algamábase nes gales añales del cine, con Almodovar de heraldu tráxicu acusando de golpistes a la oposición, y Ana Belen y los sos mariachis como acomodadores. Gales interminables y aburribles magar los chistes envenenaos.

Güei paecen desapaecíos. La situación anguaño nun paez escitar les sos meninxes creadores, y cabe tamién entrugase aú taría güei Rubalcaba, ¿Con cuálu de los hermanos García-Page? ¿Con Nicolás Redondo o con Felipe González? Ye lo qu’hai.

Raúl Suevos

A 19 de noviembre de 2023

Torna en castellán en repdiv.blogspot.com

La virtú acordies con Machiavelli

 

Una de les mio pequeñes xoyes bibliográfiques ye un exemplar del Príncipe de Niccoló Machiavelli mercáu en Florencia metanes los noventa. Ye una obra asoleyada en 1939, tercer añu del Imperiu, según Mussolini, y conforme colo que vien estampao na so páxina cabera. Ye un llibru promovíu por un historiador pernomáu de la dómina, Angelo Pernice, que se permite adoctrinanos con un prólogu perllargu del que lo más atanante resulta la so afirmación de que Machiavelli, profeta él, pensaba nun home que, como’l Duce, aportaría un día pa llevar otra vegada a la Italia a la morra del mundiu. Lo dicho, un profeta.

Yá nel interior, casi too ye interesante, pues el florentín Machiavelli fo’l primer teóricu del realismu en política, de forma tan precisa que tien sío estudiáu, seguíu, imitáu y aponderáu o refiertáu, según la ocasión, en oportunidaes estremaes; tantes que hasta yo mesmu, nestes llínees, atrévome a trayelu tamién a colación. Y ye que la virtú, tala como él la defín, ye una carauterística que, una vegada más, el doctor Sánchez paez tener en cantidaes infinites.

Diz Machiavelli que la virtú ye “un conxuntu de cualidaes que permiten al caudillu vencer los trabancos del presente y facer frente a cuantos tropiezos pueda depara-y el futuru”, y señores míos, nun cabe otra, dende esti prisma, que reconocer que’l doctor Sánchez  ye’l alumnu meyor del Machiavelli nestos cinco sieglos pasaos dende l’apaición de la so obra, yá que, como él mesmu mos tien dicho, “hai que facer de la necesidá virtú”, dalgo que güei  se ve refrendao, yá de forma ineludible, na Sesión d’investidura.

Tamos, tolos españoles, nes manes d’un individuu que lleva hasta l’estremu’l conceutu de que’l fin, caltenese nel poder, xustifica los medios, anque, como ye’l casu, ponga a la nación nuna situación que recuerda alarmantemente a los entamos del socialismu bolivarianu que campa dende va años en Venezuela, la antañu atractiva nación.

Tenemos per delantre tiempos difíciles, nos que la nación española va ser puesta a dura prueba, porque la virtú tala como la entiende’l doctor Sánchez, en realidá, nun tien dala llende, a lo menos mientes los electores nun pidan cuentes polo que, si tenemos en cuenta lo dicho enantes de…, tien sío una estafa eleutoral pa munchos de los que votaron confiaos al partíu socialista.

La llegalidá vixente da marxe al secretariu xeneral socialista, que yá anuncia’l caltenimientu de subsidios hasta xunu del 24 pa engrasar les eleiciones europees, y al que nada-y importa que la polarización qu’él, colos sos alcuerdos bastardos, provoca y potencia, mos lleve a un túnel ensin salida. Ye lo qu’hai.

Raúl Suevos

A 15 díes vencíos de pallares de 2023

Torna en castellán en repdiv.blogspot.com

El fundimientu

 

Esti fo’l títulu que se-y dio n’España a una película inescaecible de 2004 que nel alemán orixinal yera “Der Untergang”, dalgo asina, col mio dominio llamentable de la llingua del príncipe de Bismarck, como’l “Camín haz’abaxo”. De coproducción italiana, austríaca y alemana, relata los díes caberos d’un Adolph Hitler pieslláu, neuróticu y enllenu de pastilles nel bunker del so cuartel xeneral en Berlín.

El protagonista ye Bruno Ganz, un actor suizu escelente yá desapaecíu que ye a  facenos sentir l’ambiente trupu y afogadizu  que se respiraba dientro d’aquelles paredes; con unos acompañantes, los más allegaos de la so redolada, conscientes de tar tan condergaos como’l so xefe, ensin escapatoria haza l’esterior, y cola presión omnipresente y deliriante del führer sobro toos ellos.

Foron les redes sociales les que me ficieron recordar la película, con un montaxe d’una de les escenes que caltien el soníu orixinal, n’alemán, pero que propón unos diálogos en sotítulos absolutamente traxicómicos, pues el dictador xermanu camúdase nel doctor Sánchez y’el so círculu de xenerales nos ministros más aparecientes del gobiernu anguaño en funciones. Un cuadru graciosu enforma si nun llatiera n’él la traxedia del nazismu y la situación perpenosa pela que pasa güei la nación de nueso.

El autor tevo un sentíu de la oportunidá particular yá que, ente tantes noticies y manifestaciones de refugu al debalu anguaño de lo que nun tiempu fo’l partíu socialista, esta mañana tien trescendío la carta de baxa como militante del que fuera ministru de Felipe González, Javier Sáenz de Cosculluela, que non contentu con abandonar la so militancia de cincuenta años nel partíu, manifiestase con una durez inaudita haza los sos vieyos correlixionarios ¿Va ser l’entamu d’un untergang?

El partíu socialista anguaño, tres los estatutos que Sánchez ficiera aprobar dempués de la so espulsión de la secretaria xeneral, ye una estructura política que funciona como un sistema autocráticu, nel que la voluntá del líder ye la llei, ensin dala posibilidá de disentimientu, como nos tiempos de González y les corrientes internas del PSOE. Naide s’atreve a pronunciase a la escontra de la doctrina oficial, y quien lo fae, como García Page, nun va más allá del so xuegu rexonal, y n’él se protexe. Ye lo qu’hai.

El xestu de Cosculluela, inalvertíu nos telediarios del día, puede quedase nun xestu individual, o quiciabes como l’entamu d’esi fundimientu que la película del títulu mos contaba; ello va depender de qu’otres figures socialistes sigan el so exemplu, y, como les xanes asturianes, habeles hailes.

Raúl Suevos

A 14 díes vencíos de pallares de 2023

Torna en castellán en repdiv.blogspot.com

Técniques de negociación

 

Va yá abondo d’años, el tiempu ye inclemente, el Ministeriu de Defensa contrató la realización d’un cursu de Comunicación pública cola facultá de Ciencies de la información de la Universidá Complutense de Madrid. N’él yo yera un de los aplicaos escolinos, y nel plan d’estudios esistía una materia col nome de Técniques de negociación.

Yera un asuntu que, de primeres, nun paecía mui rellacionáu cola finalidá del cursu, anque lluéu mos dimos cuenta de la so importancia, tanta que’l profesor yera’l decanu de la propia facultá, y, anque güei casi too yá lo escaecí, una de les so clases maxistrales tornóme estos díes a la tiesta dende’l caxón de les alcordances.

Dicía’l vieyu profesor que nuna negociación, si esiste voluntá d’algamar alcuerdos vidables, les partes, toes, deben tar dispuestes a ceder nos sos presupuestos iniciales, pues ensin esta predisposición nun se puede falar de negociación y sí, sicasí, d’imposición, que ye lo que’n munches ocasiones asocede, si bien la necesidá de caltener les apariencies fai que mos lo presenten como resultáu de la cesión de les partes.

Contaba tamién l’enseñante, y sorayábalo como axiomáticu, que cuando una de les partes cedía en too ensin presentar, aparentemente, dalu tipu de resistencia, yera señal evidente de que nun taba nes so intenciones respetar lo pautao. Y equí ye a ónde quería aportar. 

Y ye que los pactos recien algamaos pol secretariu xeneral de los socialistes españoles, el doctor Sánchez, presenten toos ellos, con indiferencia de quién seya l’interlocutor nos estremaos contubernios bilaterales, el común divisor de la entrega total a los requerimientos de la otra parte. Una cesión casi absoluta, pero siempres colos costes direutos y colaterales, o inesperaos, a costa del restu de los españoles.

Y a min too ello llévame a pensar que nun hay voluntá de cumplir colo pautao, más allá de lo que’l tiempu vaya imponiendo en cada casu; y ye que’n mayu viniente va haber eleiciones nes Provincies vascongaes, con cambéu probable de los equilibrios anguaño; la amnistía, según proclama del propiu presidente del tribunal constitucional, va sofrir un íter que nun va acabar enantes de la fin del 24; camín más curtiu, sicasí, que’l del referéndum hipotéticu, que, más allá de la grandilocuencia de dalgunos, y cómo señala’l cabréu de los CUPistes, nin ta nin se lu espera.

Los presupuestos pal 2024 tán yá aprobaos, y eso da-y tiempu pa repartir cartes nueves al tahulleru –neoloxismu de tahúr y fulleru- qu’anguaño mos gobierna. Ye lo qu’hai.

Raúl Suevos

A 12 díes vencíos de pallares de 2023 

Torna en castellán en repdiv.blogspot.com

La llucha proana

 

Cuando’l boxéu, por primitivu y salvaxe, paecía tar condergau a la desanición, hete equí que la UFC, Ultimate Fight Combat, vieno a devolvenos, con ésitu descomanáu, a los instintos combativos más básicos, especialmente cuando contamos n’España con una figura d’interés induldable como ye’l casu d’Ilia Topuria.

Pel camín de la historia foron cayendo, o amenorgando, espresiones de llucha, como la canaria, la lleonesa, la turca, la olímpica greco-romana, o’l llerciosu pancracio, combinación de llucha llibre y puxilatu, sanguinariu y de consecuencies tarrecibles, que güei paez revivir na citada UFC. Pero tien habido otres especialidaes; dalgunes de característiques respigantes, como la llucha proana.

Esta disciplina nació y vivió na Academia Proa de Zaragoza, centru u se preparaben los opositores al ingresu na Academia Xeneral Militar. Ellí, va yá más de cincuenta años, nel so internáu, reinaba como campeón invictu Fernando, el garbanzu pa los sos allegaos, y el cabezón pa los demás. Ñetu d’un famosu llaureáu, lo que lu facía plaza de gracia pal ingresu, contaba con tiempo de sobra pa dedica-y a la llucha, y desafiar a tol que llegaba como aspirante a aquella famosa casa.

El combate desarrollábase en calzoncillos, anque nun llegábemos a untanos n’aceite como notru tipu de lluches. La posición d’equilibriu y ataque implicaba adelantar los brazos coles manes abiertes y los deos curvaos como garres, col torsu avanzáu y sofitáu nunes piernes que se cruzaben colos güevinos pegaos al culu, al mou que lo faen los travestíos.

El combate solía ser rápidu, rellampiante. Un amagu del contrariu podía facete perder l’equilibriu, y con ello’l  pieslle de piernes relaxábase dexando al to “tesorín” a mercé de les manes del contrario que, en casu d’apriete, provocaba una rendición inmediata. Ye imposible nun capitular cuando te tienen garráu polos testículos.

Col ingresu na Xeneral acabóse la mio carriera na llucha proana, qu’al nun algamar a ser olímpica nun me supunxo una fería especial na mio carriera atlética, y nos cincuenta años caberos nun tornara a recordar aquella disciplina d’internáu varonil y mozu. Hasta estos díes caberos.

¿Imaxinense vustedes al doctor Sánchez y el fugitivu Puigdemont en posición d’ataque-defensa de llucha proana? Yo nun consigo refugar la imaxe dende va unos díes, y puedo imaxiname la medrana del presidente en funciones énte la posibilidá de que’l so alversariu lu atrape con una de les so garres. La rendición va ser inmediata, y nun-y va quedar más remediu qu’entregar la plaza, la posición, tolo que-y pida. Ye lo qu’hai.

Raúl Suevos

A 8 díes vencíos de pallares de 2023

Torna en castellán en abellugunelcamin.blogspot.com

La consulta

 

La Congregación pa la evanxelización de los pueblos, De Propaganda Fede, un de los dicasterios más vieyos del Vaticano, de 1622, periodu culminante de la Contrarreforma, ye considerada como madre de la comunicación institucional; una noción ésta de factura moderna nacía pa disimular o tapar la idea de propaganda, más rellacionada colos ámbitos comerciales, y necesariamente alloñada, pa los protagonistes, de la esfera política. Ye lo qu’hai.

En tiempos de la Oprobiosa malapenes conocíemos el conceutu. El NODO, y posteriormente’l Telediariu, l’únicu, tresmitíen les bonanzas del Réxime, con especial atención a la inauguración de pantanos, esos, los mesmos qu’agora güeyamos con esmolimientu énte los sos perbaxos niveles, la pérda de capacidá natural por colmatación, y la falta de construcciones nueves debía a les teoríes naturalistes. Eso yera too.

Col aportar de la democracia l’asuntu camudó. Facíase necesario “comunicar” les realizaciones de los ministerios del gobiernu, y de los estremaos dirixentes, pues a lo último, ca cuatro años, había que retratase nel ritu fondamental de les eleiciones. Yera una inversión de futuru autentica pal partíu qu’exercía’l poder, cualquier fuera’l nivel, nacional, autonómicu o llocal, y el tiempu foi puliendo y afinando los preseos.

Güei atopamonos na fase de sofisticación, con gabinetes de comunicación nes grandes empreses, y “Spin doctors” nes formaciones polítiques -pallabru d’orixe anglosaxón que vien del llanzamientu con efeuto de la pelota de beisbol- que pueden llegar a ser figures de relieve a nivel nacional, como fo’l casu del notoriu Iván Redondo, anguaño na gueta de metes nueves.

Nesti analayar de la comunicación política, estos díes atopamonos con una nueva y alambicada operación de propaganda, la consulta. Una supuesta votación interna, nel partíu que dirixe na actualidá los destinos de nueso, qu’intenta dar un barniz de colectivismu a les decisiones tomaes pol líder inmarcesible, el doctor Sánchez, pente medies la cuala trataríase de tresmitir la idea de que lo que foi necesidá personal, pase a ser decisión del partíu, y, por qué non, de los millones de votantes de les eleiciones pasaes.

Un consulta nun colexu de 120 mil sufraxos, dicen, de los cualos más de 20 mil son conceyales del partíu, dellos miles más exercen como delegaos sindicales d’UGT, cientos o miles son representantes nes asamblees europees, nacionales y rexonales, a los que s’amesten los collaboradores que pa ellos trabayen, casi tantos como los milenta que lo faen como asesores na redoma, gabinetes, etc, de los puestos de dirixentes socialistes, tanto institucionales como nos cientos d’empreses municipales o rexonales creaes nestos años. Un colexu de paniaguaos.

Ye propaganda, y hai que tener fe, o interés.

Raúl Suevos

A 6 díes vencíos de pallares de 2023

Torna en castellán en repdiv.blogspot.com

Una perda de tiempu

 

Los malfadosos alcuerdos del presidente en funciones pa llograr sacar alantre la so investidura algamaron a tapar de güelpe’l chute d’optimismu nacional xeneráu pola Xura constitucional de la princesa Leonor. Un actu, en sí mesmu, que proclama y defín el conceutu de monarquía parllamentaria por cuantu, quien ta llamada a rumbar la xefatura del estáu y representación de la nación, declara’l so sometimientu a la Llei fondamental del mesmu, la Constitución, énte los representantes eleutos pola ciudadanía.

Pocos detalles de los estremaos actos de la xornada, sacantes la reunión familiar nel Pardo, quedaron ensin análisis minuciosu, pero a min, quiciabes pol mio pasáu vital, llamaronme l’atención, especialmente na tribuna del Congresu, los xestos pequeños de la princesa, toos ellos d’una impronta militar innegable. Una posición de firmes cenciella y conducente, colos brazos rectos y pegaos al cuerpu, un xiro n’oblicuu drecha casi imperceptible pa saludar al so pá, siguía d’una inclinación de tiesta enerxica, idéntica al saludu a la Bandiera; toos xestos mínimos que tienen una factura y orixe precisu, la instrucción militar recibía na Academia Xeneral Militar demientres el so curtiu ya inicial pasu pa efectuar la so Xura de Bandiera.

Una Xura, la de Zaragoza, que si se pierde un minutu en lleer la fórmula anguaño, pronto se comprende que tien más fondu fustaxe que la constitucional, si bien ye verdá que l’algame y repercusión de la segunda ye muncho mayor. Quedámonos, a lo úlitmo, cola satisfacción de comprobar que nel solar zaragozanu síguese formando en la escelencia, y que lo que-y queda de cursu va siguir alquiriendo conocimientos y valires na mesma midida.

Al llau de la cadete Borbón pudimos confirmar cómo, una vegada más, el presidente del gobiernu, recluta cacereñu nel so momentu, y soldáu de reemplazu enchufáu nel Serviciu xeográfico del Exércitu en Madrid, nun aprovechó’l tiempu d’uniformáu, pues nun llogra adoptar una posición simple de firmes nos momentos más solemnes, y entá peor, tampocu paez entender el momentu y forma de saludar a la bandiera. Una pena.

Van dicir dalgunos que la so peralta responsabilidá ta percima d’esos detalles, y puede que tengan razón, especialmente tando ocupáu n’arbitrar talu cúmulu d’alcuerdos, descomanaos en cuantu al númberu, ya infinitos si tenemos en cuenta les esixencies inacabables de los socios estremaos nos díes caberos. Pero otros van pensar que’l so ministeriu, la presidencia, tamién merez, pola so visibilidá, un pocu d’atención, anque namái seya pa nun dar ocasión a comentarios negativos qu’en nada ayuden a la marca España.   

Raúl Suevos

A 2 díes vencíos de payares de 2023

Torna en castellán en repdiv.blogspot.com

Ascu y vergoña en Marsella

 

Ye Marsella una ciudá particular, guapísima, con tol so tastu portuariu mediterráneu maduráu demientres milenta años, que cuenta anguaño con una de les poblaciones mayores d’orixe norteafricanu de toa Francia; árabes, dicen-yos ellí pa evitar llamalos moros, pallabra qu’esiste en francés pero se considera políticamente incorreuta. Ye lo qu’hai.

L’equipu de futbol, l’Olimpique, ye un de los clásicos del país, pero tien una afición insoportable, tantu que Marcelino, l’escelente entrenador xixonés, dexó-los tiraos nun va muncho, fartu de les presiones inaceptables d’unos siguidores catalogaos como los más violentos del país.

Esti domingu xugaba’l Lyon y reventaron-y a pedraes les llunes del autobús al so aportar, y al entrenador la cara con una llata de cerveza, enllena. Un desafueru que llevó a la suspensión del partíu previstu y a que l’Equipe, el periódicu deportivu parisín llenase la so primer páxina con un “Ascu y vergoña” descomanáu que nun dexa dala dulda sobro los sentimientos que produz lo asocedío.

Güei llunes enteramonos, con fotografía incluyía, que’l númberu tres del PSOE, partíu del nuesu gobiernu anguaño, dirixíu pol doctor Sánchez, tiénse axuntao en Bruseles col delincuente Puigdemont, certificando con esti aconceyamientu lo que yá mos vien anticipando el so xefe con midies declaraciones dende les eleiciones pasaes; y yo nun puedo menos qu’entrugame cualu va ser el sentimientu d’aquellos españoles que-y otorgaron el so votu confiáos nes sos declaraciones negando la posibilidá d’amnistía, y, por qué no, referéndum.

Ascu y vergoña en Marsella.

Anque tamién ye obligao entrugase pol sentir de les altes autoridaes que mañana, con esclusión del rei Xuan Carlos, van asistir a la Xura de la Constitución por parte de la princesa d’Asturies, con especial preocupación polos pensamientos que van allegar a la mente de los miembros del Tribunal Constitucional, llamaos a refrendar los arreglos, inconfesables en cuantu a los pagos acordaos, del secretariu xeneral socialista. Una fotografía, la de mañana, que nun creo que munchos tean interesaos n’enmarcar pa poner nel so despachu.

Ascu y vergoña en Marsella.

Unos actos, los de la Xura, que van suponer un dispositivu de seguridá descomanáu a cargu de Policía nacional y Guardia Civil, y nel que ye posible que dalgún de los sos miembros fuera d’aquellos qu’esplegaron en Cataluña y foron acosaos, y atacaos, por turbes de radicales nacionalistes de forma inmisericorde ¿Qué van pensar? Pocu importa, máxime cuando l’oprobiu va ser validao por una militancia socialista de bovina sumisión, teniendo en cuenta que na so mayoría viven de la política del so secretariu, pente medies cargos electos o designaos.

Ascu y vergoña en Marsella.

Raúl Suevos

A 30 díes vencíos d’ochobre de 2023

Torna en castellán en repdiv.blogspot.com

Isabel Ayuso y Marlaska

 

Cola que ta cayendo, tres dellos meses de gobiernu en funciones y ensin pronósticu nidiu de futuru, con una amnistía y referéndum menaciando la estabilidá nacional, y digo lo d’estabilidá dempués de guetar demientres llargu ratu una pallabra que nun xenerara demasiada subida de tensión ente los mio escasos llectores, henos equí que mos atopamos col yá tradicional aportar de cayucos a les Islles Canaries, particularmente al Fierro, que ye la más averada a les bases de salida en Senegal.

Son estos cayucos un dolor de tiesta estacional, como lo yeren, anque ensin bombes nin muertos, aquelles campañas de branu de la derrotada ETA, a manes de Zapatero, según indecente afirmación d’esti gran estadista. Ye un malestar que, magar lo aparatosu de les cifres, cabe suponer qu’un país de la talla poblacional y económica del de nueso debería tar en condiciones d’apencar, pero eso depende, claro, del ambiente políticu de cada estación. Y nesta la temperatura tá abondo alta.

Pa la España democrática, la de la Transición, ye una primerísima eso de topanos con un partíu que gana les eleiciones xenerales y, magar ello, nun tien opción de gobiernu, y, pela cueta, un perdedor de les eleiciones, dende la so posición de mandu, que se declara dispuestu a too, hasta vender les esencias de la nación, con tal de gobernar. Y’ehí, nesa situación tensionada hasta’l paraxismu, áu s’inscribe esi tirotéu verbal que sufrimos dende les posiciones d’unos y d’otros.

Nel xaréu de declaraciones, d’un llau y del otru, atopamonos cola presidente del gobiernu madrilanu, Isabel Ayuso, que la so formación universitaria fo en Ciencies de la información, con máster posterior en comunicación pública, que s’amuesa preocupada, y manifiestalo, pola llegada masiva d’emigrantes y los efeutos qu’eso pueda tener pa la seguridá nacional. Dalgo que paez razonable mientes nun se demuestre lo contrario.

El presidente del Partíu popular, señor Feijoo, tamién se tien espresao na mesma direición, y eso paez haber sacao de les sos casilles al ministru d’Interior, señor Marlaska, quien calificó a los dos xefazos conservadores como inorantes e irresponsables. Declaración que, ye de suponer, fai dende la so condición anguaño de ministru del ramu y, tamién, como maxistráu vieyu de l’Audiencia Nacional. Ye d’agradecer. O non.

Les duldes al respective de Marlaska, pa quien nun les tuviera yá contrastaes, vienen pol fechu de que la Estratexia de Seguridá Nacional, roblada pol doctor Sánchez en 2021 tres ser aprobada pol Conseyu de ministros, señalen, ente los riesgos y amenaces pa España, los “fluxos migratorios irregulares”.

Fáigaselo mirar señor Marlaska.

Raúl Suevos

A 27 díes vencíos d’ochobre de 2023

Torna en castellán en repdiv.blogspot.com