Los gallegos son unos mazcayos

 

Debo entamar por esplicar que mazcayu ye un axetivu perasturianu que nun s’atopa na llingua castellán y que significa, acordies el diccionariu de la llingua asturiana, “1.-Bobu, que carez retrasu mental 2.-Que tiene poca capacidá pa entender les coses” y que me paez muncho más afitao que’l “gilipollas” qu’en castellá s’hubiera  adaptao a la situación.

Y ye que parte de los dirixentes políticos de nueso, los pertenecientes al partíu del gobiernu, tienense balanciao a espelleyar al xefe de la oposición a cuenta del desalcuentru caberu en rellación col bloquéu del Conseyu Xeneral del Poder Xudicial, dalgo que dambos partíos, saltándose l’espíritu de la Constitución, que na so inocencia pretendía daqué parecío a la independencia pa esi Poder, vinieron manipoliando de forma obscena p'asina poder mangoniar –nun se m’ocurre meyor verbu- a la esperanza cabera del ciudadán, esto ye, a la Xusticia.

Verdaderamente la nuesa situación ta entá lloñe de la que carecen rusos, cubanos o venezuelanos, pero que’l presidente d’esi Conseyu dimitiera, fartu d’esta situación insoportable, o que la Comisión Europea manifestara en delles ocasiones el so esmolimientu polo qu’asocede n’España, ye motivu abondo pa que toos temos intranquilos, sobre too si tenemos en cuenta qu’ella, la Xusticia, ye la esperanza cabera del ciudadán.

L’ábanu d’insultos vien pola retirada del partíu opositor de les negociaciones énte la noticia, avanzada pola vicepresidenta de verbu atropelláu en see parllamentaria, del amenorgamientu de pena del delitu de sedición viniente, colos consiguientes efeutos pa los yá indultaos nes sos penes accesories y pal prófugu de Waterloo na so totalidá, dalgo que, dicen les encuestes, ofende a votantes d’esquierda y drecha.

Según los mandamases del gobiernu, ministros na so mayoría, Feijoo nun tien criteriu nin cuenta con dotes pa gobernar. Déxase manipoliar pola estrema drecha, y poco menos que sedría una marioneta de la señora Ayuso, dalgo que demostraría la so ineptitú pa llegar a posesionase de la see monclovita. Too lo cualo llévame a la mio aparente falta de respetu polos gallegos nel títulu d’esta tribuna.  

Y ye qu’esta acometida del argumentariu preparáu polos asesores en comunicación paez escaecer que los gallegos tuvieron siempres fama de ser los más llistos del país, de fechu nunca se sabe si van o vienen, y asina algamaron a tener más presidentes de gobiernu que dala rexón d’España, y nun nomo al Xeneral nun vaya a incurrir en falta o delitu, pero nun me privo de recordar a don Manuel Fraga o al inabarcable Pio Cabanillas que nun llegaron a presidir; asina que, si los gallegos escoyeron cuatro vegaes a Feijoo ye que son unos mazcayos.

Fáiganselo mirar.

Raúl Suevos

A 31 díes vencíos d’ochobre de 2022

Torna en castellán en repdiv.blogspot.com

Dende Asturies pal mundiu

 

Siempres que puedo, asturianía obliga, pégome al televisor p’asistir, dende la comodidá del sillón, a la entrega de los premios Princesa d’Asturies; seguramente la más importante, recurrente y efectiva operación de comunicación institucional que se tien desendolcao n’España nesta etapa histórica.

Observando los ecos na prensa internacional, que son munchos, pue constatase quel llombu de la reina o los vestíos de les princeses conciten enorme interés, pero en delles publicaciones, les más importantes, préstase atención a los discursos. Esti añu los de Adam Michnik y el Rei ensin dulda resultaron de especial relevancia europeísta; un Rei de rostru permanentemente preocupao que namái se permite baxar la guardia en pequeños momentos de complicidá cola heriede; pero a min tamién me conmovió “la pallabra” de Mayorga, y el fondu sentimientu humanista de Matos Moctezuma.

Na prensa nacional destaca la llamada del corazón, centrada nes vestimientes de les señores, con especial dedicación a lo que l’acontecimientu tien de pasarela mundana. Ye quiciabes el signu de la sociedá española anguaño, basada no superficial y dexando de llau los fundamentos. Como asocede col covid, aparentemente desapaecío nesti eventu d’importancia singular a tenor de l’ausencia de mazcares, pero menaciante con variantes nueves nel futuru viniente. Ye lo qu’hai.

Dellos analistes, y yo tamién anque nun mereza tala cualificación, tienense centrao nel papel de la titular del premiu, la Princesa d’Asturies, escaeciendo por supuesto la indisposición inoportuna que deslució’l día segundu de les infantes; una actuación que xiraba al rodiu de dos factores, el discursu, redactáu maxistralmente por daquien averáu a la Corona, con visión y conocimientu de la trescendencia d’esti actu, y que doña Leonor supo lleer col barafuste que s’espera de la so edá y proyección pa quienes creemos nel futuru de la Monarquía; y per otru llau la so evolución física, fenómenu secuestráu pa la ciudadanía a causa del so internao en tierres de la vieya Gales, y qu’estos díes pudimos apreciar que ta afitada pa responder a la gran entruga del añu viniente.

¿Va venir d’uniforme la princesa Leonor nel 2023? Son tiempos d’igualitarismu radical, especialmente col nuesu gobiernu actual, que va ser l’encargáu de lidiar cola cuestión si se cumple’l calendariu electoral. Y ye que, una vegada finalizao el periodu actual de formación de la Princesa, daquien va tener que decidir, cola anuencia de la Corona o viceversa, si doña Leonor va causar alta na Academia Xeneral Militar, como ye tradición n’España y tamién nel restu de Corones europees.

El plan d’estudios actual de les Academies militares españolas, con participación universitaria, facilita compaxinar un plan militar con un currículu adaptáu a les necesidaees de la Corona, y averaría a doña Leonor a la ciudadanía.  

Raúl Suevos

A 31 díes vencíos d’ochobre de 2022

Torna en castellán en repdiv.blogspot.com

El xeriatricu penitenciariu del Caribe

 

Nos años cincuenta del sieglu pasáu púnxose de moda nos Estaos Xuníos, y entá perdura, la emigración de los xubilaos de los estaos norteños, siempres acosaos polos fríos hibiernos, haza’l soleyeru estáu de Florida, au-yos esperaba un conceptu residencial nuevu específicamente diseñáu pa persones mayores. Urbanizaciones con xalés pequeños nes que cuntaben con entretenimientos adaptados a la so edá, y, lo que ye más importante, servicios médicos afitaos pa facer frente a les continxencies más frecuentes.

Güei Florida sigue siendo la meca pa munchos xubilaos yanquis, que venden les sos propiedaes ya instalense nel “estáu del sol”, que ye como se la conoz. Ellí atopense cola colonia hispana más grande del mundiu, pos tres el triunfu de la revolución castrista en Cuba foron permunchos los cubanos qu’aportaron a lo que yá yera dende’l sieglu XIX un pequeñu emporiu de la industria tabaquera xestionada por isleños. Ye tantu’l pesu de lo cubano qu’ellos presumen de ser los creadores auténticos de la esitosa Miami.

Nos años caberos el fluxu de cubanos nun se tien parao, y vióse reforciao pola llegada, sobre manera, de venezuelanos fuyendo de la represión chavista; o colombianos guetando tierres menos peligroses que les de la so nación. Anguaño la hispanidá ye la cultura preponderante na península, percima de los campos de golf llenos de xubilados, con Trump a la morra, o les milenta families qu’aporten guetando unes vacaciones de parque temáticu nos condaos del norte.

Les autoridaes d’Inmigración yanqui sacaron les cifraes de los 12 meses caberos y nelles vemos que 230 mil cubanos llegaron a los EEXX, principalmente pela frontera mexicana, au cuenten con un especial estatus que-yos otorga de manera inmediata la tarxeta de residencia temporal. Nesos milenta nun se cuenten los munchos balseros deteníos pola Guardia costiera enantes de tocar tierra, lo que-yos lleva a ser repatriaos darréu. Tampocu los qu’arriben a les sableres de les Bermudes, o, dende’l Yucatán haza l’oeste en cualquier de los países ribereños; nin muncho menos a los que, simplemente, son tragaos pol Mar Caribe. Queden por cuantificar, nesi censu del escape, los que consiguen visao y billete d’avión pa cualquier parte del mundiu. Too-yos vale con tal d’abandonar la islla.

Ye fácil pensar que cada añu más de 300 mil cubanos dexen la islla, que yá va muncho tiempu que nun computa los 11 millones oficiales. Son xente mozo, animosa y valiente, que, nel meyor de los casos, sofiten la supervivencia del réxime coles remeses económiques qu’únvien cada mes a casa. Una casa llena de vieyos, torgaos per edá y recursos p’aventurase nun autoesiliu llenu d’incógnites, ensin l’alegría de reciella nel rodiu pos tienen la tasa de natalidá más baxa d’América. ¿Para qué trayer fíos a esi mundiu?

¿Qué mos queda entós? Una islla llena de vieyos, ensin malapenes asistencia social y vixilaos polos partidarios del réxime, amarutaos de policíes o CDR,s, y en compañía de los mélicos y enfermeres a los que nun se permite emigrar pos van ser alquilaos, baxo el control contractual del gobiernu cubán, a países estremaos a lo llargo y ancho del mundiu. Una islla na que los “morenos” ven como, al nun tener accesu a la nacionalidá española pente medies la llei de Memoria, ahora democrática, cuenten con menos recursos y oportunidaes pa colar, quedando “condergaos” a entrar nos cuerpos policiales del réxime, y similares, o cualquier otru mediu de subsistencia que puedan atopar na Perla del Caribe. Ye lo qu’hai.

Raúl Suevos

A 28 díes vencíos d’ochobre de 2022

Torna en castellán en repdiv.blogspot.com

La Dilixencia

 

El títulu ye probable qu’a la mayoría del personal, especialmente a los de cierta edá, yos-traiga alcordances de John Wayne y John Ford, y aquella película esplendida del oeste cargada d’estereotipos; pero esti escribidor ta pensando naquelles dilixencies que, hasta l’apertura de la Rampa de Payares, allá pol llonxanu 1885, facíen el percorríu d’Uviéu a Madrid nun fugaz ralu de cinco díes, a unos precios descomanaos pa la dómina, incluyíos los que s’acomodaben na baca del vehículu a mercé de les inclemencies del tiempu. yera lo qu’había, y yá entós yera mui caro viaxar a la capital del reinu.

Too ello viénome a la tiesta coles noticies caberes tocantes a la puesta en marcha de la Variante de Payares pal primer semestre de 2023. Noticies que suponen la enésima ocasión qu’ello s’anticipa y que convien poner ente comines, por aquello de la prudencia en tiempos d’afliximientu; anque esta vegada la cosa debe dir meyor empobinada pos en Xixón yá decidieron nomar como Rosario Acuña a la estación de Moreda futura, anque, anciosos ellos, tamién se va llamar asina l’actual, por si acasu.

Cuando a fines del XIX s’acometió’l proyectu de la Rampa, que diba dexar orellaos a los vieyos arrieros que corríen col pesu del tresporte comercial na rexón de nueso, dióse un impulsu fundamental a Asturies, qu’entós atopábase en plenu surximientu del fenómenu mineru y que diba conllevar a la construcción casi inmediata de los muelles de Fomentu nel pueblerín Xixón, embaeciu na so autocomplacencia xovellanista. Percima d’aquelles travieses diba a discurrir la nueva savia de la rexón, llena de puxu, hasta’l so incomprensible parón n’ochobre del 34.

Yera una obra d’inxeniería espectacular, colos sos casi noventa túneles en menos de cincuenta kilómetros, los sos desniveles terribles, que la facíen un finxu nes ferrovíes europees. Un camín de fierru pel que diba a discurrir la historia de la nuesa rexón demientres casi sieglu y medio, pos entá anguaño sigue siendo l’arteria principal del tresporte industrial asturianu. Ye lo qu’hai.

Unos falen de piesllala cuando s’abra la Variante, de la que nun ta nidio’l so potencial loxísticu. Otros de caltenela pa eso, pa la loxística, y tamién pa usos turísticos. Pero lo único que ta pernidio, pel momentu, ye que, teniendo en cuenta los precios del ferrocarril d’alta velocidá, y los dos peaxes que los asturianos tienen que pagar p’aportar a la capital, ensin escaecer que la vía a Barcelona per Bilbao tien el peaxe más caru d’España, tamos, indudablemente, como nel tiempu de la dilixencia.

Raúl Suevos

En Xixón a 22 diés vencíos d’ochobre de 2022

Torna en castellán en repdiv.blogspot.com

Reflexos nel arenal

 

De y sobro Xoaquín Sorolla tiense escrito milenta de páxines, y les sos obres se esponense nos museos de tol mundiu. Conozse-y coml pintor de la lluz y dizse que naide como él algamó a captar esa especial lluminosidá del Mediterráneu y, particularmente, el xuegu que dan los rayos solares sobro eses perfines llámines d’augua que la ola abandona sobro’l sable nel so camín de torna al mar.

El casu ye que dalgunos estudiosos aventuren que Sorolla pudo algamar la so técnica de los reflexos del augua nos branos que pasó pintando al entamu del sieglu XX ente San Xuan de la Arena y San Esteban de Pravia. A lo último, les marees mínimes del Mediterráneu ye difícil qu’aportaran les circunstancies para talos xuegos pictóricos. Quién sabe.

Toos estos pensamientos vinieronme de la mano de la anuncia de la viniente esposición de María Antonieta Laviada na vieya Rula del Muelle de Xixón, au yá tien espuesto otres vegaees, y que, procedente de la factoría Currás, amuesanos una de les sos obres en forma de rellume playeru que munchos andariegos de la oriella del arenal de San Lorenzo van reconocer nel intre como parte de la torre de San Pedro, reflexada nesa llámina treslucida y brillante que mos dexen les foles nel so alientu caberu. Una maravía.

Laviada, de pinceles espertos y sensibles, ye una paisaxista depurada, con especial dedicación a les marines de foles que paecen tar esperando ser cabalgaes polos xinetes de la tabla de surf; ensin escaecer les vistes sernes y serondiegues de cargueros adormilitiaos esperando el so turnu nos espigones del Musel, a vegaes con acompañamientu de parafernalia portuaria. Notres oportunidaes combina la mar, la sablera, los pedreros, les praderíes costeres o los cantiles, dexando constancia de los más requexos más guapos de la costa de la nuesa tierra; anque ello nun-y torga atacar les cumes de les sierres interiores o de la cordillera, xugando cola nieve o colos más tenues colores serdondiegos ya invernizos. Un cantu asturianista que mos regala con la delicadura de les sos manes.

Nun tamos, a lo menos a min paezmelo, mui sobraos d’artistes de nivel que canten col so quefer pictóricu la guapura y plasticidá qu’atesora la nuesa tierra asturiana nos sos estremaos aspectos. Desconozo si detrás d’ello s’atopen les facilidaes qu’otorguen los enfoques nuevos de la creatividá pero, quiciabes poro, resultame de mayor apreciu cuando m’atopo con trabayos cargaos de clasicismu como ye’l caso de María Antonieta Laviada, que la so esposición tengo anotao yá como inescusable a partir del 4 de payares viniente.

Raúl Suevos

A 20 díes vencíos d’ochobre

https://www.mariaantonietalaviada.com/

Torna en castellán en repdiv.blogspot.com

Singladura radical nel Mar de Bering

 

Vivimos na sociedá de la información, ye un suponer, un mundiu nel que les estremaes tecnoloxíes mos procuren una visión supuestamente real de lo que pasa nel globu. Ye lo que creemos que pasa cola guerra d’Ucrania, de la que mos llega un torrente d’información que mos avera a la realidá de los combates y al sufrimientu de les persones que nun algamaron a colar a tiempu de los invasores rusos.

Nel llau rusu faise más difícil llograr una imaxe de la realidá, tantu de la vida civil como de lo qu’asocede nel mundiu militar, pos el control de la información lleváu a cabu pol gobiernu de Vladimir Putin failo si non imposible sí abondo  llendao na mayoría de los casos, o simplemente manipulao nos demás. Magar ello, dalgunes noticies, en principiu insignificantes, aportennos unos nicios mui interesantes.

Va dellos díes trescendió la noticia de que llegara un bote con dos homes rusos a la islla de San Lorenzo, al sur del estrechu de Bering y en medio del mar del mesmu nome. Un mar del que podemos facenos idea pente medies les imáxes d’un programa de televisión abondo conocíu, Pesca radical, nel que dellos pescadores s’aventuren per un mar casi constantemente embravecíu a la gueta del tesoru gastronómicu que suponen los centollos reales. Un mar que nun paez adaptáu a los viaxes turísticos.

La noticia nun especificaba qué mena de bote yera, si de motor, de vela o a remos, anque la distancia de la población d’u procedíen superaba les cien milles nautiques. Un llargu y perpeligrosu percorríu pa llibrase de la movilización militar a la que Putin los sometiera y que-yos otorgaba una esistencia breve y precaria na lloxana Ucrania.  Razón abondo pa echase al mar y arriesgar la vida nunes agues xélides y menaciantes.

A min la noticia resultame más gráfica que los datos del frente de combate y, sobremanera, de los resultaos de la movilización en tol país, au al paecer producense fregaos colos comisarios de la lleva forciosa, y onde tamién son amburaes les oficines del ramu en munches provincies. Too ello mientes los reclutas nuevos van llegando a Ucrania y son únviaos a morrer al frente ensin malapenes instrucción nin tampocu equipamientu individual.  

Les cifres de varones n’edá militar qu’abandonaron el país superen ampliamente a les de conscriptos puestos a disposición del Exércitu, y si tán dispuestos a llanzase al Mar de Bering nun bote nun paez que la situación vaya a meyorar pa Vladimir.

Raúl Suevos

A 16 díes vencíos d’ochobre de 2022

Torna en castellán en repdiv.blogspot.com

Xerardo Iglesias, una realidá cotidiana

 

Reapaeció’l vieyu dirixente políticu estos díes nos medios de comunicación de la rexón. Fíxolo nuna silla de ruedes, que nun deslucía nin llixu la dignidá d’un personax de trayectoria incontestablemente consecuente, daqué práuticamente inesistente na política moderna. Una postración física a la qu’aportó tres accidente llaboral y dello años de falta de cuidaos mélicos, inadecuaos o simple aplicadura de la realidá asistencial na qu’anguaño mos desendolcamos.

Iglesias sucedió a Carrillo al frente del Partíu comunista d’España. Yá en plena escayencia de la organización y de la ideoloxía, posiblemente dexada ensin sofitamientu pol “estáu de bienestar” creáu pol vieyu caudillu, anque esto mui pocos van tar dispuestos a reconocelo, y, afirmalo, cola llei de desmemoria democrática, ye posible que seya susceptible de sanción alministrativa o inclusive penal. Ye lo qu’hai.

Iglesias fizo lo que pudo en Madrid, y dexó’l puesto, yá empobinao l’inventu d’Esquierda Xunía, pa que Xulio Anguita, tamién un personax d’otres dómines y consecuente nos sos actos como Iglesias, tomara’l timón d’una organización baxo asediu del arbíu socialista montáu en Suresnes. De la capital tornó p’Asturies, al so puestu na mina, dalgo inéditu, y supongo qu’irrepetible, qu’a un políticu modernu paecerá-y ganes de dar la nota. Actitues del pasáu ensin dulda.

Al pocu de retomar l’actividá minera sufrió un accidente, con daños pal so llombu, al parecer, daqué que-y produz dolor crónicu, dolor fondu y angustiosu según manifestó, lo que, xunío a la falta d’estudios afayaizos por parte de los facultativos que lu atienden, a la dilatación nel tiempu de pruebes y operaciones, al tratu frio y distanciao por parte de los doctores, convierte la so situación personal nun llargu y penosu camín haza’l calvariu –nun me resisto al chisgu bíblicu- del que trataba de dar cuenta pública énte la Seguridá social carballona. Seguramente nun se lo merez, como tantos otros usuarios de la Sanidá de nueso.

Comentaba Iglesias que tien escrito a munchos estamentos pa dar cuenta de la situación, ente otros a la presidencia del Principao, de quien, magar el so orixe de les Cuenques y la so constante eshibición de bones pallabres nos medios de comunicación, nun mereció recibir nin un míseru acuse de recibu. Tiempos modernos, polítiques modernes.

Nun mos cuenta Iglesias un res de nuevu, anque apurre la so notoriedá pública, pos la nuesa blasonada Sanidá va tiempu que s’esmuce nuna cuesta abaxo que, nestos tiempos de política ficción, ye difícil que pueda detenese. Y mentanto siguimos exportando xeneraciones nueves de mélicos y enfermeres al restu d’Europa.

Raúl Suevos

A 16 díes vencíos d’ochobre de 2022

Torna en castellán en repdiv.blogspot.com

Cosacos zaporogos escribiendo-y una carta al sultán

 

Y’esti’l títulu d’un cuadru d’Iliá Repin fecháu a finales del S.XIX que recrea’l momentu nel que los cosacos de l’anguaño y tristemente pernomada Zaporiyia, esto ye, de la zona aú güei se desendolquen parte de los combates de la invasión d’Ucrania, retruquen a la esixencia del sultán d’Estambul, que a les so tropes derrotaran en delles ocasiones naquel final del S.XVII, pa que se rindieran ensin condiciones a la so suprema autoridá. ¿Suénavos?

Los cosacos, qu’ensin perder la so independencia bascularan ente’l kanatu de Crimea, el ducáu de Moscú o los reinos de Polonia y Lituania, contestaron con mui males formes a la Sublime Puerta, y nel cuadru podemos talantar dalgunes de les sos característiques sociales, lo que diba inspirar al director de vestuariu de la famosa película Taras Bulba, protagonizada por Yul Brinner y Tony Curtis. Anguaño yá casi naide escribe cartes.

A min la historia recuerdame muncho a la sobeya amosada por Vladimir Putin colos cosacos anguaño, les Fuercies armaes d’Ucrania y el so presidente Zelensky, que foron invadíos pol exércitu rusu, al que, tres la heroica defensa de les fuercies territoriales del país, que dieron tiempu a les unidaes nueves pa formase y cohesionase, tán actualmente solmenando derrotes perdures que pueden significar, acordies dellos analistes, el principiu del fin de la autocracia del amu del Kremlin.

Zelensky, tres la anexón política de les cuatro provincies ucranianes recién roblada, tien-y retrucao qu’Ucrania nun va tratar con Rusia demientres Putin siga al frente. Y esto ye un elementu a tener en cuenta porque los conflictos armaos namái acaben con la rendición incondicional d’una de les partes, o pente medies negociaciones patrocinaes por terceros. Y yo creo qu’esti va ser el fin del conflicto anguaño porque nun veo a Rusia rindiéndose.

Henri Kissinger yá va dellos meses que faló de transaccionar, faló de Crimea. Esta semana cabera tamién se tien espresao en términos paecíos Elón Musk, que punxo estos meses a disposición d’Ucrania el so sistema Starlink. Dambos foron verbalmente masacraos, pero dambos, dende ámbitos estremaos, son realistes fonderos, y saben que naide, nin Rusia, nin los EEXX, tampocu China, nin India,  nin muncho menos Ucrania, pueden plantegase una guerra de percorriu llargu.

Les previsiones del PIB mundial pa 2022 cayeron a metá d’añu dende’l 4,1% al 2,9% lo que supón una cifra descomanada qu’entá se pue engrandar no que queda y que va obligar a los grandes actores mundiales a mover ficha. El problema, y él sábelo, ye Vladimir Putin, quien nestos momentos nun pue cuntar nin siquier coles bendiciones de Kiril, el Patriarca moscovita, un taráu como él.     

Raúl Suevos

A 6 díes vencíos d’ochobre de 2022

Torna en castellán en repdiv.blogspot.com

Al rodiu l'hibiernu nuclear

 

Dende casi l’entamu de la invasión d’Ucrania, esactamente dende cuando’l zar de toles Rusies punxo n’estáu d’alerta a les sos fuercies nucleares, el pantasma de lo que se conoz como hibiernu nuclear, esto ye, les consecuencies climátiques de les nubes de povisa que s’espandiríen per tol globu tres un conflictu nuclear más o menos xeneralizao, y que, acordies dellos científicos, sedríen de mayores efeutos que les de la nube provocada pol volcán Krakatoa en 1883, calculada nuna potencia de 350 megatones, que, pa metenos en situación, yera mui superior a los 20 megatones de Hiroshima.

Ayeri, l’asuntu del hibiernu atómicu garró impulsu nuevu cola noticia de que’l modelu caberu de somarín rusu, el Belgorod, de nomín tarreciblemente semeyante al del demongriu Belfegor, que tamién ye casualidá, abandonaba’l so puertu nel mar Árticu pa escomencipiar desconocíes y foscones singladures. Y ye que’l talu inxeniu, o sistema d’armes en terminoloxía militar, lleva a bordu un supertorpedu de tarrecible nome también, Poseidón, armáu de tiesta nuclear y capaz d’afarar una ciudá como Nueva York, o Xixón, si se-y pon a Vladimir. Ye lo qu’hai.

Pa ponenos en situación, nesto de lo nuclear, convien recordar que la nomada Guerra Fría tevo como fase inicial la doctrina de la Contención por parte de los Estaos Xuníos, que yeren los únicos en posesión de capacidá atómica. Siguió-y, cuando la URSS algamó’l poder nuclear, la doctrina de Disuasión, que diba evolucionar rápidamente haza la teoría de la Destrucción mutua, n’inglés MAD, llocu, Mutual Assured Destruction, que nun necesita esplicadura, y tres la que s’alcontraría l’ausencia de confrontación directa demientres aquel periodu ente les dos grandes potencies.

A min paezme que Putin quier renovar esi xuegu, el de la disuasión, anque nin siquier ye seguro que’l Poseidón esista tal cualu, pos a un nivel más precariu, nun foron a desarrollar l’innovador y potente carru de combate Armata, por falta de componentes gracies a les cacarexaes sanciones; y tampocu’l somarín tien por qué ser tan conducente, y equí vienme a la memoria’l desgraciáu Kursk, tamién una xoya de l’Armada rusa.

Otra de les opciones baraxaes, más humildosa ésta, ye la del emplegu d’un inxeniu nuclear tácticu nes tierres ucranianes, pero esta solución tamién ye problemática pos el so usu, acordies la doctrina militar, va siguío del avance de les fuercies propies, con medios ya instrucción mui especiales pa progresar per tarrén contamináu; y visto lo visto n’Ucrania cuéstame atopar una unidá rusa que seya a facelo.

A la disuasión enantes nomabenla alarde, y guetaba impresionar al alversariu.

Raúl Suevos

A 3 díes vencíos d’ochobre de 2022

Traducción en asturiano en abellugunelcamin.blogspot.com

La campaña ucraniana n'Asturies

 

La guerra d’Ucrania, a fuer d’usu, ta camudando n’espertos nel arte de la guerra a munchu personal, especialmente nes nómines de les tertulies radiofóniques y televisives, au yá malapenes se ven los especialistes militares, estos sí, qu’al entamu de la invasión mos esplicaben el desendolcu de les operaciones.

Nel mio casu, quiciabes por deformación profesional, llévame a ver situaciones béliques ellí u, seguramente, nun hai más que epresiones normales de los estremaos y fecundos cuerpos sociales. Y asina atopéme’l sábadu metanes un congresu anual d’un partíu asturianu, y asturianista, al que fui invitáu por un de los sos dirixentes, al que agradezo’l detalle, y que me somorguió nel conflictu ucranianu. Tratábase de Foro Asturias.

La vida política, en xeneral, ye una guerra continua, ensin final nin aselu, anque afortunadamente pacífica. Los partíos políticos viven nuna llucha permanente por ganar territoriu, o lo que ye lo mesmo, votantes. Y p’algamar los sos oxetivos planeen campañes, que suelen coincidir con feches específiques rellacionaes col calendariu electoral, y asina tenemos les campañas de les xenerales, les de les autonómiques, o les municipales, qu’en delles rexones, como’l casu asturianu, coinciden coles anteriores.

Dientro de la planificación d’eses campañes suel producise dalguna batalla, o más d’una, davezu; anque en munches ocasiones estes batalles son escontra uno mesmu, esto ye, nun ye l’alversariu quien les conduz sinón los propios erros o intrigues. Como nel casu de Foro Asturias.

Ayeri nel congresu, celebrao nesi canciu desaforáu al “grandonismu” asturianu que representa la obra de Calatrava y que los “carballones” conocen como “el centollu”, nun pude evitar entrar na dinámica ucraniana al güeyar el cromatismu con que se presentó la señora presidenta, seguramente pensando nel logu nuevu de la so formación y na bandiera d’Asturies pero que suponía un cantar a la bandiera d’Ucrania, tan metía na nuesa memoria ocular dende’l pasáu día 24 de febreru. Y atopé munches semeyances.

Foro Asturias vien de superar una batalla tarrecible nos tiempos caberos, la d’enterrar al so propiu creador, y nun quiero pensar nos replicantes de Blade Runner, nacíos con fecha de caducidá. Una batalla qu’a tenor del sentíu parllamentu de la señora Morillón, con pasaxes al puntu de papuxar, debió de ser tremendo. Siempre lo ye acabar col proxenitor. Pero hai futuru tres el duelu.

Foro lleva ventaya en cuantu qu’esta batalla sirve-yos pa, como Ucrania tres la invasión rusa y los duros meses de resistencia a estazón, salir reforciaos y llistos pa empeñase en campañes nueves con puxanza renovada, como los ucranianos tán amosando na ofensiva que lleven a cabu estos díes y que los lleven a recuperar parte del tarrén perdío. El territoriu que dicen querer recuperar, nesti casu, ye’l del asturianismu, y, anque nun lo tien fácil, el campu contrariu nun paez tar nos sos momentos meyores.

Los dos partios grandes tán atollaos nes sos batalles propies, un descabezáu dende Madrid y l’otru en plenu usu de la daga florentina nel so bastión xixonés, dalgo que daría ventaya táctica al recuperáu Foro si nun fuera pola falta d’artillería pesada, los Cesar y los HIMARS suministraos a los ucranianos y que nesta incruenta campaña política asturiana toma la forma de presencia nos medios de comunicación, siempres escasa pa los asturianistes.

Tocantes al programa de la formación anotar, ente otros elementos, el tele-coloquiu tenío con dellos investigadores mozos na diáspora, con especial mención a Xurde Menéndez, discípulu de López Otín anguaño trabayando en Dallas y con quien compartí estudios ya nos cursos de la UABRA en Cangues de Narcea. Toos ellos dan fe del ésitu de la formación universitaria asturiana y, al tiempu, del fracasu de la rexón pa da-yos continuidá ensin tener qu’abandonala.

Los foristes amosaben el sábadu una voluntá de vencer descomanda, dalgo que, xunto a la sorpresa y l’acción de conxuntu, conformaban los vieyos principios del arte de la guerra; toos ellos escasos nel enantes temíu Exércitu rusu. ¡Slava Ukraini!  

Raúl Suevos

A 2 díes vencíos d’ochobre de 2022

Torna en castellán en repdiv.blogspot.com