Al rodiu de Jacques Chirac

AL RODIU DE JACQUES CHIRAC

Morrió Jacques Chirac, antiguu presidente de Francia, y pue paecer estrañu que-y dedique unas llinies pero ye que, dende va yá abondo tiempu, tengo-y un ciñu especial y, tocantes España, particular reconocimientu. Voi tratar d'esplicame.

Zarapiqué con Chirac por casualidá, cuando entamaba a estudiar francés en serio, tiempos nos que namái se contaba con Berliz o'l Assimil, y yera mui difícil exercitar l'oyíu, a lo menos pa los que nun teníemos posibilidá de viaxar a Francia. Atopélu na radio d'onda curtia dando un discursu o daqué paecio, creyo qu'entós yera l'alcalde de París, y de baramonte descubrí una llingua francesa nueva, redonda, vocalizada, intelixible. Oyer a Chirac, pa un primerizu, yera una delicia. Dende entoncenes, siempres que tenía oportunidá, oyíalu con placer.

Chirac foi un paisanu especial, pero un enarca egresáu de la ENA, la Escuela Nacional de l'Alministración que creara De Gaulle. De familia de clas media, llogró dende la carrera de Ciencies polítiques, ingresar na ENA, au se formen los grandes dirixentes franceses dende la so fundación y con independencia de la so filiación política. Macron u Hollande son un exemplu, anque Sarkozy yelo de lo contrario y quiciabes poro intentó cargase la Escuela. No que me toca presumo de tener dao na so see d'Estrasburgu un par de conferencies sobro l'Eurocuerpu.

El casu ye que Chirac, flamante enarca, yá casáu con Bernadette, no que siempres se nomó un braguetazu –que me perdonen les feministes- tocó-y facer el serviciu militar, yeren tiempos de la Guerra d'Arxelia, y pudiendo quedase na capital por posición y familia política, esto ye, enchufáu, marchó como oficial de caballería voluntariu a un puestu avanzáu, u-y tocó a vegaes exercer el mandu y sentir el valir de la institución militar y de la camaradería, y el significáu de los desastres de la guerra, de toles guerres, lo que faría que siempres sofitase con claridá la institución armada del so país. Si vis pacem para bellum.

Tornáu en Francia anicia la so carrera política de la mano de George Pompidou, reconvirtiéndose dende les sos universitaries posiciones comunistoides -ye probable que la so voluntariedá militar se sofitara nun deséu de facese perdonar esos pecaos de mocedá- y averándose a la drecha gaullista, onde faría carrera. Una carrera que, lu llevaría e exercer de ministru, primer ministru, alcalde de Paris y, a lo cabero, presidente de la República demientres dos mandatos.

Nes eleiciones presidenciales aportará a ser el más votáu de la historia de la República magar hai que señalar que competía, en segunda vuelta, escontra Le Pen lo que faría que toa Francia lu votare de forma masiva. La so presidencia viose marcada pola cohabitación col socialista Lionel Jospín, nun asonsañamientu de la qu’él mesmu protagonizara con Miterrand como Presidente, y poles denuncies por pequeñes irregularidaes demientres el so periodu como alcalde de París, polo que sería condergaú una vegada perdida la inmunidá presidencial. Fina la presidencia con cotes perbaxes d’aprobamientu ciudadanu nes encuestes, hasta’l puntu que’l refugu francés en referéndum al proyeutu de Constitución europea dicen que foi una forma de censuralu a elli.

La prensa d’allá siempres se fizo ecu de que a la so muyer-y procuró múltiples protuberancies frontales, asuntu que tantu ella como la propia Francia siempres-y perdonaron, pues ellí, como n’España y nesa dómina, eso yera un detalle d’homía, bon vivant creyo que-y dicen. El so sucesor, Hollande, superaríalu en entrambes materies, los líos amorosos y el refugu final de los franceses.

Yo, sobre too, guardo-y especial reconocimientu porque foi demientres el so mandatu como primer ministru que s’empecipió a piesllar el santuariu d’ETA nel país vecín y la Guardia Civil pudo entamar a trabayar dende ellí d’una forma conducente p’acabar col cáncer de la serpiente. Más tarde, en tiempos d’Aznar, pondríase de perfil nel asuntu de Perejil, lo que llevaría a José Mari a poner los pies enriba la mesa del ranchu de George Bush jr, y al Exércitu español a esplegar nuna pacífica zona hortofrutícola del centru d’Iraq; pero eso son otres histories.

Que descanse en paz Jacques Chirac.

Raúl Suevos

En Xixón a 28 de septiembre de 2019

Versión en castellán en repdiv.blogspot.com

País ¿Qué país?

PAÍS ¿QUÉ PAÍS?

La Real Academia Española, que ye la encargada de fixar y dar esplendor a les pallabres, da-y a país una aceición que la oldea a estáu, pero a min préstame más aquella otra que la lleva a dimensiones más pequeñes, más averaes, como de la contorna.

Préstame la más familiar porque recuerdame a mio tío Enrique en Casa Bartolo, el bar del pueblu, allá n’Ibias cuando ainda sonaba’l cantu los carros polos caminos del puebluy la redolada, y les cases taben enllenes de xente y neños, magar que la emigración fuere, en cauna d’elles, el tema de conversación que’l carteru traía dende Arxentina, Cuba, o les más averaes Barcelona y Madrid. Per aquella dómina entamaba tamién la fuxída masiva haza la siderúrxica y la naval asturianes. Solo’l carbón de Cangas y Tormaleo algamaría a detenela temporalmente. Sería un espeyismu.

Mio tío baxaba a Casa Bartolo de xemes en cuando; cuando’l trabayu agotador del caserío-ylo permitía, que nuna tierra especialmente dura y probe como Ibias yera mui poques vegaes. Sentabase a echar una partida de Brisca, ¿o yera Tute? xunto a otros llabradores, agostiados como él, y pidía una copa de país. Entá lu recuerdo garrando aquelles cartes vieyes y gastaes por mil parties coles sos manes calloses, na boca'l pitillu fechu a mano col tabacu que’l semara na güerta del chao d’arriba, y removiéndose la pucha cola mano drecha cada vegada que tenía que pensar la xugada.  El mio primu Manolín y yo allugabemonos detrás d’él, como minúsculos guardaespaldes, silenciosos porque nesi país aprendíase bien ceo que los mirones son de piedra, y los neños más.

Depués, cuando la partida finaba, los homes tiraben perriba, pa les cases, au les muyeres yá tendríen catao les vaques y la cena taría cuasi a puntu. Ellos, mientres caminaben, falaben de cómo diba madurando’l centén, o lo curtio que crecía’l maizal de cabo’l banzáu; Manolín y yo, si había suerte, quedábemonos paraos énte l’espectáculu asombrosu de dalguna gata de lluz, d’eses qu’anguaño namái se ven nos documentales, hasta que mio tío mos glayaba ¡nenos¡ ¡tirái perriba ho¡

Esi “país” que mio tío pidía yera una copa d’oruxu, del propiu pueblu, de Marentes, que per aquella dómina caltenía del otru llau del riu, na cara sur del valle, unes viñes, d’eses qu’agora nomen heroiques, con fama de producción de calidá y que güei tán abandonaes y comies pol monte, como cuasi toa Ibias, per otra parte. Poro, cuando veo qu’empleguen la pallabra con un significáu muncho más ampliu, odeándolu al estáu,magar la RAE lo xustifique, hai daqué que, pa min, canta de forma 

aguda, como aquel cantu los carros asturianos, anguaño, nel meyor de los casos, arrequexaos debaxo de dalgún hórru.

Rescueceme esi “Más país”, ambiguu, inconcretu, indefiníu, que paez guetar precisamente eso, el nun amosar les cartes, anque s’arriesgue a consiguir lo contrariu, que se-y vean toes elles. ¿Ye quiciabes España esi país? ¿Por qué nun dicilo? Porque se pretende esñalar nesi tornáu de tendencies y corrientes d’esquierdes de calter rexonalista ¿Independentista? que perdieron pol camín el puxu internacionalista col que naciera’l movimientu vá yá más de cien años ¡Ay si Lenin llevantara la morra¡

El mozu cabezaleru la formación nueva, formáu como los sos correlixonarios d’orixe naquella facultá de ciencies polítiques d’una Complutense rexida pol fiu de Carrillo, aquel prócer de la patria, paez cada día más duechu neses coses del diseñu, políticu nesti casu, y xuega, na mio opinión, a abrir un espaciu ente PSOE y UP que-y permita, con unos pocos diputaos y muncha indefinición, convertise n’árbitru de la política nacional de la que lu espulsaren naquel cainita congresu de Vistalegre.  

Esi país al que se procura nun nomar, nun vaya ser que daqué chisque, vase paeciendo cada vegada más a aquella Italia de partiti y partitini na que hasta ventitantos partios d’estremada talla aportaron a

 tar representaos na Asamblea nacional, la mayoría d’ellos cola fin de caltener l’estatus políticu de los sos líderes a costa l’esfuerciu y trabayu los italianos, que a lo último ye l’oxetivu de toles élites estractives nes que se convierten la mayoría los políticos de güei y de siempres.

Raúl Suevos

Licenciáu en Ciencies Polítiques

En Xixón a 26 de septiembre de 2019

Versión en castellán en repdiv.blogspot.com

Tarantino y la fienda xeneracional

TARANTINO Y LA FIENDA XENERACIONAL

Zarapiqué con Tarantino nel 94, con Pulp Fiction, la so segunda obra tres la nomadísima Reservoir Dogs qu’a min pasareme desapercibida. Per aquel entós esforciabame yo n’estudiar inglés, y hasta creyía qu’entamaba a controlalu; nuna visita a Barcelona descubrí que pasaben la película en versión orixinal nun cine vecín y p’allá que me fui cargáu de infundaes ínfules anglófones.

Salí del cine con dolor de morra de tantu tentar siguir los subtítulos. La única espresión que distinguía nidiamente yera mother fucker, que’l so significáu desconocía pero qu’aportaba a albidrar perfeutamente, y la mio autovaloración respeuto al inglés redimensionóse pa siempres. Dende entoncenes soi mui prudente nesi campu.

Confieso que quedé apoderáu pol espectáculu cinematográficu, nel que me paeció percibir un paradigma nuevu nel tratamientu de la violencia que superaba’l yá aneyu de Sam Peckimpah y que se caltevo como una seña del güei aclamáu direutor, xunto coles bandes sonores. Procuro dende aquel día nun perdeme dala de les sos realizaciones y, de xacíu, vi varies vegaes dalgunes d’elles, aniciando por Reservoir Dogs, anque la qu’encabeza les preferies de mio ye una magnifica y cuasi escaecida Jackie Brown, y de cutio suaño con Salma Hayek y la so culiebra n’Abierto hasta el amanecer, magar esta tarantina pelicula la dirixiere’l mexicanu Robert Rodriguez.

Va unos díes fui a ver, acompañáu d’un fiu trentañeru, Erase una vez en Holywood. Dos hores y picu de cine d’altu nivel que se me pasaron nun soplu. Dos actorazos nel meyor momentu la so carriera con dos papeles que-yos van como aniellu al deu, anque quiciabes el de Di Caprio seya más completu y complexu. El rellatu llaráu de referencies y chisgos de finales los 60, que me llevaben al mio primer cubalibre d’adolescente, retrataba de forma áxil y fresca la industria del cine d’aquellos años, y tamién los fluidos y vapores nos que se sofitaba la creatividá de los grandes nomes. Los siguidores del protagonista de Rawhide, que son lexón, van reviciar descomanadamente.

Hasta equí la crítica de cine pero, al salir de la proyeición y entruga-y al fiu, tamién acérrime de Tarantino, qué-y pareciera, apaeció la sorpresa. “Muy lenta, aburrida, menos mal la escena final”; escena de violencia na que, na mio opinión, el direutor fai una parodia, u homenax, qu’esto nunca nun ta nidio abondo, del so personal tratamientu la violencia.

Unos díes dempués, participé nuna parolada con un ventiañeru anque yá conocíu y llaureáu poeta 

asturianu de más que sólida formación cultural, na que señalaba la so deceición con esta obra de Tarantino, y aducía práuticamente les mesmes razones que’l fiu. Nun la garrara, namái salvaba la escena final.

Les razones pa esta discrepancia son abondo simples. Tarantino llévanos a la década de los 60 pente medies referencies; namái Polansky y Sharon Tate son presentaos direutamente, ensin escaecer el deliciosu homenax a Steve Mcqueen, lo que fai que seya necesaria una cierta edá pa reviciar de personaxes y situaciones, y la xente mozo, na so avasalladora llimitación vital, nun algamen na mayoría les oportunidaes a identificase cola intrahistoria, que ye, posiblemente, lo que más mos lleva a esfrutar a los maduros.

La comunicación, la tresmisión del mensax, del rellatu pa los más cool, ye anguaño la clave de cuasi tolo que mos arrodia y mueve, tamién, de xacíu, nel séptimu arte. Ehí ye u falla esta vegada Tarantino, el so mensax ye nesta oportunidá muncho más ellaboráu y poro, nuna dómina na que primen los mensaxes simples, lapidarios, xeneralmente non constructivos sinon denigrantes de la imaxe del alversariu,  el gran direutor vese faltu de la compresión d’una parte del públicu.

Una estaya del públicu que ye tamién una porción del cuerpu eleutoral, el mesmu que, per cuarta 

vegada en dos años, vase ver llueu llamáu a espresase dempués d’un periodu de bombardéu a base d’eslóganes y mensaxes diseñaos n’oscuros gabinetes de mercadotecnia eleutoral; mensaxes que nun precisen de muncha atención, nin tiempu de reflexón, qu’en dalu casu recuerden el pasáu, nun vaya ser que’l receptor del mesmu se ponga a pensar o inclusive a entrugar. El ciudadanu veceru, el gobiernu representativu ensin representaos.

Tres dos años, y de siguío cuatro eleiciones xenerales, el país nun paez resentise, a lo menos no que la macroeconomía mos diz. ¿Será que somos tan bonos y conducentes que nun precisamos gobiernu? Veremos cómo reaccionen los que nun entendieron a Tarantino.

Raúl Suevos

En Xixón a 22 de septiembre de 2019

Versión en castellán en repdiv.blogspot.com

La UME y la ineficiencia del Estáu

LA UME Y LA INEFICIENCIA DEL ESTÁU

Mientres les parolaes ente’l gobiernu y los representantes d’ETA pa la lliquidación de la mesma, paez ser, un políticu manifestaba, en rellación cola dificultá pa controlar –que caún maxine la fonderada del verbu controlar- a la Guardia Civil, qu’ésta namái obedecía al Duque d’Ahumada. Ensin dulda la meyor de les allabancies que se-y puen facer a la Benemérita, pero ye na Cartilla del Guardia Civil, de la pluma del Duque y asoleyada en 1846,  u s’atopa’l particular códigu bushido que guía dende entós a tolos sos miembros.

N'ún de los primeros artículos d’esti reglamentu pue lleese que “va procurar ser siempres un pronósticu feliz pal aflixíu,…; el que tenía la so casa presa les llames, considere’l fueu apagáu; el que güeyaba’l  so fiu arrastráu pola corriente les augues, lu crea salváu;…”; y asina sigue asocediendo, como esta selmana cabera, con quemes en Galicia y bestiales llenes nel Sureste d’España. Ellí taben los guardies dende’l primer momentu, colos medios precarios de los Puestos rurales y más tarde cola sofisticación de les sos Especialidades centrales. Pero toos col mesmu espíritu, el marcáu na Cartilla, el socorru al aflixíu, lo qu’anguaño se conoz como Protección Civil en toles sos variantes.

La UME, la Unidá Militar d’Emerxencies, naz muncho más apocayá, malpenes 15 años, como resultáu de la decisión del presidente Zapatero énte les crítiques pola inoperancia del estáu mientres una nevada terrible que dexó miles de persones bloquiaes na nieve. L’estáu autonómico balerare de competencies y capacidaes al gobiernu español que nun podía permitise’l luxu de perder imaxe, y de pasu votos. Había que facer daqué.

La solución encamentóse-y al Ministeriu de Defensa, siempres obediente, siempres dispuestu, anque la operación-y costare enormes recursos humanos y económicos y anque una fuercia policial de calter militar como la Guardia Civil naciere pa ello.¿Quiciabes pa nun violentar el sentimientu de delles autonomíes con competencies policiales?

L’Exércitu, esti exércitu modernu y profesional col que cuenta España, púnxose a la xera y a la vista ta que’l resultáu ye más que meritoriu. La UME, xunto coles Misiones de Paz, representen los pilares nos que se basa la mui positiva imaxe con que cuenten les nueses Fuercies Armaes énte la opinión pública y hasta altos mandos que al entamu nun lo veíen nidio güei apadrinen la so creación.

La UME sigue xorreciendo en medios y capacidaes, tamién n’especialidaes, ente otres les 

bacteriolóxiques, sobro les que la crisis del Ébola yá sollertó va dellos años, y en so favor tamién trabaya’l Cambéu climáticu que va facer que nun futuru próximu, yá ta equí, mos veamos enfrentaos con mayor frecuencia y virulencia a tou tipu de calamidaes que van poner a prueba les capacidaes del estáu. Anque no que más crez ye n’eficiencia. A la vista ta.

Con too, a min quédame un taste d’amargor cuando me recuerdo d’aquello de “zapateru a los tos zapatos”. L’Exércitu ta pa sofitar les instituciones del estáu en casu de necesidá y siempres que’l gobiernu lo ordene, pero’l so oxetivu principal ye y tien de siguir siendo la Defensa, con mayúscules, y a min paezme que la esitosa creación de la UME nun fue más qu’una amuesa de la ineficiencia del estáu en rellación col sistema autonómicu, que lu obligó a vistir un santu nuevu cuando yá tenía otru que llevaba más de cien años faciendo milagros.

Raúl Suevos

Coronel d’Infantería (R)

En Xixón a 16 de septiembre de 2019

Versión en castellán en repdiv.blogspot.com

Mogherini, final siniestru en L'Habana

MOGHERINI, FINAL SINIESTRU EN L’HABANA

La señora Mogherini, que va ser sustituyida llueu nel so puestu pol señor Borrel, fina’l so mandatu como Alta Representante pa’Asuntos Esteriores de la XE y nun tuvo meyor ocurrencia pa despidise que con un alcuentru billateral XE-Cuba na capital d’esti país; un alcuentru, acordies la XE basáu nel respetu mutuu, un alcuentru a puerta zarrada, ensin prensa independiente, mientes en L’Habana y Santiago se procedía a acosar y detener con calter preventivu a cualquier elementu significáu de la insignificante oposición. Daqué llegal per otra parte puestu qu’en Cuba ta tipificada la actividá predelicuencial; una de les delicies, mui estremada del ron aneyu y el tabacu de Viñales, qu’ufierta’l país como nota distintiva.

La Xunión robló en 2016 el nomáu Alcuerdu de Dialogu Políticu y Cooperación que, suponíase, diba abrir un dialogu “abiertu y francu” sobro la situación social y, particularmente, sobro les detenciones polítiques –les d’estos caberos díes suenen a sarcasmu- y que ponía fin a los cuasi venti años de tar en valir la conocida como Posición Común de la XE, impulsada por Aznar al so aportar al poder y qu’esixía avances en democracia y drechos humanos pa cualquier tratu européu colos hermanos Castro.

Mogherini lleva con ella 200 millones d’euros en proyeutos de distintu tipu qu’en daqué van ayudar a la economía isleña que se prepara, agachupada énte la cayida del maná venezolanu y el recorte de facilidaes impuestu por Trump, pa un Periodu Especial nuevu, la llarga probetería avenida nel país tres la cayida de la URSS y los sos créditos a fondu perdíu a Fidel Castro.

Mentanto, el réxime cubanu, la señora Mogherini describelu como democracia de partíu únicu, remató la so operación cosmética lampedusiana con una nueva anque igual Constitución, una nueva anque igual llei elleutoral y una serie de recortes na posibilidá de crear cooperatives non agraries nueves, esto ye, aquelles con más posibilidaes de xenerar plusvalíes, conceuto esti últimu sacrílegu na ideoloxía castrista.

El presidente del Conseyu Díaz Canel, como nel so momentu ficiera Raúl, entama a mover los sos peones pa cuando llegue la desapaición del hermanísimu y esta selmana cabera removió a Ulises del Toro, octoxenariu compañeru de los tiempos de la Sierra y vicepresidente del gobiernu, por un permozu, pal canón castrista, de namái 55 años, secretariu del partíu en Camagüey y doctrinariu 

aparachick, como’l mesmu Díaz Canello lo ye.

Al mesmu tiempu, na cai, la vida del cubanu d’a pie sigue igual que siempres, 60 años ye sinónimu de siempres, un enfotase a lo llargo del día por llevase daqué a la boca mientes se sonríe a los yumas, turistes pa los naturales, que son la vía más direuta p’aportar a unos dólares, o euros, tan guetaos como escasos. El camín más normal ye’l de la hostelería, territoriu abonáu de yumas en toles sos modalidaes y tamién el del amor, nes sos variantes estremaes y qu’equí-y dicen xinetear, en una amuesa más de la so estraordinaria capacidá musical y poética.

A la fin el yuma, como la señora Mogherini, torna a casa feliz, contentu y comentando aquello de “hai que ver, qué prestosos y simpáticos son los cubanos, siempres allegres y sonrientes”, pero a dalgunos esti viaxe dexa-yos un taste amargu y siniestro.

Raúl Suevos

En Xixón a 11 de septiembre de 2019

Versión en castellán en repdiv.blogspot.com