MOGHERINI, FINAL SINIESTRU EN L’HABANA
La señora Mogherini, que va ser sustituyida llueu nel so puestu pol señor Borrel, fina’l so mandatu como Alta Representante pa’Asuntos Esteriores de la XE y nun tuvo meyor ocurrencia pa despidise que con un alcuentru billateral XE-Cuba na capital d’esti país; un alcuentru, acordies la XE basáu nel respetu mutuu, un alcuentru a puerta zarrada, ensin prensa independiente, mientes en L’Habana y Santiago se procedía a acosar y detener con calter preventivu a cualquier elementu significáu de la insignificante oposición. Daqué llegal per otra parte puestu qu’en Cuba ta tipificada la actividá predelicuencial; una de les delicies, mui estremada del ron aneyu y el tabacu de Viñales, qu’ufierta’l país como nota distintiva.
La Xunión robló en 2016 el nomáu Alcuerdu de Dialogu Políticu y Cooperación que, suponíase, diba abrir un dialogu “abiertu y francu” sobro la situación social y, particularmente, sobro les detenciones polítiques –les d’estos caberos díes suenen a sarcasmu- y que ponía fin a los cuasi venti años de tar en valir la conocida como Posición Común de la XE, impulsada por Aznar al so aportar al poder y qu’esixía avances en democracia y drechos humanos pa cualquier tratu européu colos hermanos Castro.
Mogherini lleva con ella 200 millones d’euros en proyeutos de distintu tipu qu’en daqué van ayudar a la economía isleña que se prepara, agachupada énte la cayida del maná venezolanu y el recorte de facilidaes impuestu por Trump, pa un Periodu Especial nuevu, la llarga probetería avenida nel país tres la cayida de la URSS y los sos créditos a fondu perdíu a Fidel Castro.
Mentanto, el réxime cubanu, la señora Mogherini describelu como democracia de partíu únicu, remató la so operación cosmética lampedusiana con una nueva anque igual Constitución, una nueva anque igual llei elleutoral y una serie de recortes na posibilidá de crear cooperatives non agraries nueves, esto ye, aquelles con más posibilidaes de xenerar plusvalíes, conceuto esti últimu sacrílegu na ideoloxía castrista.
El presidente del Conseyu Díaz Canel, como nel so momentu ficiera Raúl, entama a mover los sos peones pa cuando llegue la desapaición del hermanísimu y esta selmana cabera removió a Ulises del Toro, octoxenariu compañeru de los tiempos de la Sierra y vicepresidente del gobiernu, por un permozu, pal canón castrista, de namái 55 años, secretariu del partíu en Camagüey y doctrinariu
aparachick, como’l mesmu Díaz Canello lo ye.
Al mesmu tiempu, na cai, la vida del cubanu d’a pie sigue igual que siempres, 60 años ye sinónimu de siempres, un enfotase a lo llargo del día por llevase daqué a la boca mientes se sonríe a los yumas, turistes pa los naturales, que son la vía más direuta p’aportar a unos dólares, o euros, tan guetaos como escasos. El camín más normal ye’l de la hostelería, territoriu abonáu de yumas en toles sos modalidaes y tamién el del amor, nes sos variantes estremaes y qu’equí-y dicen xinetear, en una amuesa más de la so estraordinaria capacidá musical y poética.
A la fin el yuma, como la señora Mogherini, torna a casa feliz, contentu y comentando aquello de “hai que ver, qué prestosos y simpáticos son los cubanos, siempres allegres y sonrientes”, pero a dalgunos esti viaxe dexa-yos un taste amargu y siniestro.
Raúl Suevos
En Xixón a 11 de septiembre de 2019
Versión en castellán en repdiv.blogspot.com
No comments:
Post a Comment