Macron cantó bingo en Khartum

 

Tres les imáxes aciagues de la salida, o quiciás fuera más amañoso dicir estampida, del aeropuertu de Kabul, n’agostu de 2021, fo’l presidente Macron, entoncenes nel so primer periodu presidencial, el qu’afitó pola creación d’una fuercia europea permanente pa facer frente a esti tipu d’operaciones, daqué que nel exércitu francés conozse como RESEVAC, esto ye, evacuation de ressortisants, y que, acuantayá, taba previsto nes conocíes como Misiones Petersberg, aprobaes pa unes supuestes Fuercies europees nel yá llonxanu 1992 pola yá desapaecía Xunión Europa Occidental, una organización que, dalcuando, échase de menos.

Col pasu del tiempu lo de Kabul paeciera cayer nel escaezu pero, esta vegada en Sudan, Occidente torna a topase con una situación inesperada ¿inesperada? Na que la violencia desatada, a nivel de guerra civil, fai necesario rescatar a los connacionales ellí asitiaos, yá seya por trabayar como expatriaos, miembros d’organizaciones humanitaries, personal de les embaxaes, o calquier otru con pasaporte de les naciones afectaes. Y otra vegada descubrimos que la Comunidá internacional, o los sos representantes sobro’l tarrén, nun vieron venir lo que s’averaba.

Esta vegada Francia nun tien esperao polos EEXX, dende la so base en Djibouti, a 1500 km per aire, organizó una operación de rescate, con participación, ente otros, d’Italia y España, na que’l propiu presidente Macrón tíense encargao d’algamar el nulla osta de los dos señores de la guerra que se combaten na capital y nel restu del país, Burhan y Hemedti, ensin que la so aprobadura nun fuera posible.

Pela so parte, los británicos, antigua potencia colonial, a puntu tuvieron d’echalo too a perder por non pidir permisu pal so avión, quiciabes por un puntu de soberbia poscolonial, o escurque porque’l Brexit, y la descomposición estatal que tien implicao, tamién algama a unes fuercies armaes que, güeyos vista, nun son más qu’una alcordanza de lo que foron. Too ello pa evacuar namái al  personal de la embaxada, sacantes l’embaxador y el so segundu, qu’unos díes enantes colaran “de vacaciones”, y dexar tiraos a unos 4000 ciudadanos con pasaporte británicu. Ye lo qu’hai.

Nel casu de nueso, con pocos connacionales, tenemonos trayío tamién a unos cuantos hispanoamericanos y europeos, nuna operación coordinada na parte militar dende’l Mandu d’Operaciones de la cai Vitrubio de Madrid, too ello sobro la base del pinpanudu A-400 y miembros de la Brigada paracaidista y de los d’Operaciones especiales.

Final feliz que sirvió al ministru d’esteriores pa sacase una guapa foto a pie d’avión, que too ayuda pa la campaña eleutoral.

Raúl Suevos

A 28 díes vencíos d’abril de 2023

Torna en castellán en repdiv.blogspot.com

El Borgen nacional...y rexonal

 

Quiciabes fuera más axeitao titular la tribuna como la serie nacional pero, va dellos años, un de los protagonistes de la traxicomedia política del nuesu país, Pablo Iglesias, dío-y un emburrión complementariu a esta serie danesa qu’hasta aquel momentu yera una más ente la catarata d’oportunidaes que les estremaes plataformes mos ofrecen de forma continua.

Tamién Albert Rivera, con más motivos, puestu que la protagonista de la serie lideraba un partíu moderáu pequeñín, equilibrista ente los más grandes a los sos costazos, fizo usu de la referencia en múltiples ocasiones, por aquello de la posibilidá de dirixir un gobiernu cuando los partíos grandes son irreconciliables ¿suena-yos?

El casu ye que, más allá de les idees polítiques, la serie dábanos cuenta de los costes personales del exerciciu d’esa profesión, que nun ye nin relixón nin vocación, y de les baxeces y miseries que conlleva l’aplicadura de la máxima del poder a toa costa, criteriu profesional que paez homologar a tolos prauticantes a lo llargo del tiempu.

Equí n’España, cuando Rivera lleva tiempu desapaecío y el so partiu ta en víes de estinción, y el señor Iglesias trata de maniobrar, como un probe aprendiz de Niccoló Machiavelli, amarutao de periodista, asistimos estos díes a escenes que recuerden mui certeramente a aquelles que mos ufiertaron los guionistes de Borgen. Con partíos que dende la nada en pocos años escogollaron hasta llevar a pensar a los sos mozos ya impulsivos líderes que taben a puntu de tocar el cielu, o lo que ye lo mesmo, a garrar cachu. Col esbarrumbamientu d’esos  mesmos partíos y la nacencia de particiones en dellos casos; sin escaecer lo asocedío nes grandes formaciones, con cayida de dirixentes ¿polos sos pecaos? Y escenes vergoñoses de votaciones tres les cortines. Toa una mina pa guionistes que, pel momenti, desconozo si fue usada polos daneses, anque nun me chocaría.

Nestos tiempos caberos, tiempos preelectorales, y de plena ebullición política polo tanto, vemos, a nivel nacional, ensin poder asistir a les interioridaes como na serie, como aquella que fue empericotiada por unu, anguaño álzase p’apoderase de los caudales qu’aquél consideraba propios –votos- xenerando, a la espera de los resultaos eleutorales, una aínda mayor descomposición, que non fragmentación, del espaciu políticu. Llevando con ello la inestabilidá al sistema enteru, pa desasosiegu de políticos y alegría de sociólogos.

Nel Principáu tamién tenemos lo de nueso, con una inspiración que llegó a gobernar y bracea, tres enterrar al líder, por recuperar parte de lo perdío; y con otros aspirantes zarraos na propia see énte l’acosu del so poder central. Borgen siempres, una y otra vegada.

Raúl Suevos

A 23 de abril de 2023

Torna en castellán en repdiv.blogspot.com

El fumu nun mos dexa güeyar el llume

 

El títulu d’esta tribuna ta sacáu d’una frase pronunciada por un de los lluchadores escontra les llames demientres la recien fola de fueos sofrida n’Asturies. Anque ye una situación que suel dase en casi toles situaciones nes que’l llume nos montes ye’l protagonista; si bien, cuando’l vientu ye fuerte y el tarrén bravu amás de tendíu como nel casu asturianu, la situación pa los combatientes pue convertise n’absolutamente mortífera.

Una vegada superáu’l tragu, gracies al aportar afortunáu d’unos llovíos ca vez más arrezquilaes en toa España, y tamién n’Asturies, entramos nel periodu d’esixencia de responsabilidaes polítiques por parte de la oposición, yá que lo de terrorismu organizáu nun tien más valir que’l d’una trola pa salir del afogu momentaneu producíu pola presión del fueu y de la opinión pública; y, actu seguíu, la promesa de reparaciones económiques y llegales pel llau del gobiernu del Principáu. Ye lo qu’hai.

Tamos en periodu electoral, de resultaos dubiosos según les encuestes, y unos y otros vam dedicase a revilvar les áscuares o apagar los rescaldos, según papel designáu a caun na llexislatura agonizante pero, más allá d’esi xueu, nesti periódicu tienen dao cuenta oportunamente d’hestorias como la del ganaderu de les Peñamelleres al que’l llobu mató-y la metada del atayu que caltenía pa poder iguar un quesu ecolóxicu; o aquel otru mozu de la mesma zona al que la normativa anguaño obliga a zarrar dos vieyes cuadres per tar nel cascu urbanu, estruzando’l so mediu de vida. Qué dicir del proyeutu colectivu d’una de les queseríes más premiaes d’Asturies pa facer quesos ecolóxicos en Somiéu, que se ve ensin accesu a los fondos europeos pol dictame d’una consultora de méritos y procedimientos inotos, pero resultaos perxudiciales pa la rexón. Un camín píndiu y pedregalosu pal agru asturianu.

A esti rosario continuu de noticies humildoses y negatives xúnese l’actitú d’unos poderes públicos, a nivel rexonal y nacional, faltos de sensibilidá haza les xentes del campu, con una Llei de montes, agora, fueos mediante, en boca de casi toos, pero que s’atopa detrás de la conversión de les viesques nuna bomba d’enerxía térmica esperando namái que dalgún desaprensivu, alloriáu o aventáu la detone.

Ye posible que, col cambeu climáticu imparable, yá seya tarde pa dalgunos territorios, pero equí, n’Asturies, entá hai posibilidá de salvar lo que mos queda, siempres y cuando esista voluntá por parte del poder pa potenciar el mediu rural. Güei nun se ve.

Raúl Suevos

A 16 díes vencíos d’abril de 2023

Torna en castellán en repdiv.blogspot.com