¿Van aportar los black blocs a Madrid?

 

Nun sé si a Madrid van aportar, pero a les mio oreyes llegaron per primer vegada en 2001, con ocasión de la cume de la OTAN celebrada en Xénova con Berlusconi presidiendo’l gobiernu italianu y 20.000 policíes blindando la ciudá, anque de nada sirvió. La capital de Liguría acabó afarada, con un manifestante muertu, y ello nun fo debío a les aiciones d’un mozín Pablo Iglesias, qu’llí facia los sos primeros trabayos como axitador, sinon a los grupos de black blocs; internacionalistes antiglobalización, anticapitalistes, anti too lo que suene a racionalidá y sosiegu.

Los black blocs, de filosofía anarquista ya inspiración estética mad max, cuenten con grupúsculos y adeptos per toa Europa. Les sos sudaderes negres con capucha y pequeña mochila al llombu suelen ser típiques de la so uniformidá, anque, más allá de la so aparente cutrez indumentaria, cuenten con una gran capacidá informativa y organizativa al traviés de les redes; un espaciu, el de les tecnoloxíes de la información, que conocen mui bien y del que se aprovechen.

En lo que me concierne tevi la oportunidá de conocelos con ocasión de la cume OTAN celebrada n’Estrasburgu, con Obama al frente de los USA y Sarkozy dirixendo’l gobiernu francés, yá que entós me desempeñaba nun puestu nel Eurocuerpu y participamos, tanxencialmente, na preparación del eventu. Un acontecimientu que convirtió la preciosa alsaciana ciudá de los canales nun llaberintu de cinturones sucesivos d’altes valles de metal, aparentemente inexpugnable pa los esperaos black blocs.

Too fo inútil. Nun pudiendo atacar el centru, au s’aloxaben los mandatarios y se desendolcaben les reuniones, los black blocs cebáronse colos edificios de l’aduana internacional na ponte del Rin y, de pasu, metieron fueu a un hotel averáu onde varios policíes ellí agospiaos tuvieron a puntu de perecer a lo Xuana d’Arcu. Los choques coles fuercies de seguridá, que contaben con 25.000 miembros pa la ocasión, nuna pequeña ciudá compartimentada polos canales, como ye Estrasburgu, nun foron abondo. Sarkozy, dáu a les reacciones esplosives y aparentes, sacaría un llei pa prohibir les capuches nes manifestaciones, anque na recien copa d’Europa xugada en Paris viéronse munches de nuevo, si bien con otra finalidá más averada a la de los tradicionales cacos.

Dicen qu’en Madrid hai 10.000 miembros de los cuerpos de seguridá especialmente esplegaos pa la ocasión, y anque llevamos un tiempu ensin oyer falar de los black blocs, si bien apaecieron nos disturbios orquestaos polos independentistes en Barcelona, antoxaseme que sedría una sorpresa que dexaran pasar la oportunidá pa, una vegada más, amosar la so capacidá organizativa y destructiva, precisamente cuando la OTAN se les tien tieses cola Rusia de Putin, el personax al qu’en munches ocasiones se tien acusao d’atopase detrás, de una forma u otra, de toos estos movimientos antisistema. Ye lo qu’hai. 

Raúl Suevos

A 23 díes vencíos de xunu de 2022

Torna en castellán en repdiv.blogspot.com

¿Efeutu Feijoo o efeutu Sánchez?

 

El día anterior a unes elecciones, especialmente cuando nun hai encuestes disponibles, ye tiempu d’especulaciones. En cambiu, el día depués, sabíos yá los resultaos, ye momentu de valoraciones, y de posibles xustificaciones pa’aquellos que nun foron premiaos pol humor fluíu y casquivanu de gran parte del cuerpu electoral. Ye énte lo que tamos agora tocantes les elecciones andaluces.

Tal paez, pa la mio sorpresa, que lo más importante seya la “derrota” del partíu VOX, o de la so morra de llista, Macarena Olona. Tan importante resulta’l flacu resultáu, anque meyorare respeutu a les anteriores elecciones, que tol restu del arcu parllamentariu, inclusive’l receptor del votu mayoritariu, el Partíu Popular, se centra, al igual qu’asocediera mientres la campaña electoral, nos votos algamaos polos secuaces de Santiago Abascal.

Hai una segunda llectura, especialmente pa la prensa xeneralista, y atópase nel pernomáu efeutu Feijoo, tres el que soyaz un deseyu d’otorgar al políticu gallegu una especie de halu, carisma o fortuna que taría a puntu de catapultalu a la Moncloa; daqué colo que nun puedo comulgar pos, dende’l mio puntu de vista, el líder popular namái cuenta nel so haber el fechu de cabalgar la tabla de surf que hasta va bien poco llevaba en volandes al señor Casado. Y ye que, paezme a min, nun ye importante’l surfista, nin tan siquier la tabla, sinon más bien la fola. La fola, la bona, la que rompe nel momentu xustu, ye lo que interesa.

Ye esta una fola que tien desatao, na mio opinión, el doctor Sánchez, colos sos munchos desaciertos en política esterior, nel peor momento mundial de los años caberos, y coles sos ialiances indixeribles na política interior pa la mayoría de la ciudadanía, inclusive los sos propios votantes. Ye una fola qu’avanza imparable dende yá va tiempu y que’l señor Casado pudiera tar corriendo agora si nun fuere pola so aventadura incomprensible por cargase la figura emerxente d’Isabel Ayuso.

El fenómenu VOX ehí sigue, creciendo, y en disposición de poner n’evidencia la posible inacción de Moreno en rellación cola deconstrucción ideolóxica llevada a cabu pola esquierda a nivel nacional y n’Andalucía. Van poder siguir predicando ensin necesidá de segar el trigu, a la espera del desencantu, que nun hai antecedentes pa nun descartar. Recuerden a Rajoy.

Va haber tamién tiempu para tratar d’entender cómo al partíu que dirixía les conseyerías más actives y responsables de la mayor parte del facer positivu del gobiernu Moreno paguen-y los andaluces cola desapaición. Ye’l votu útil. Ye lo qu’hai.

Raúl Suevos

A 20 díes vencíos de xunu de 2022

Torna en castellán en repdiv.blogspot.com

Desfilando n'Eurosatory

 

Nel branu del 2001, yá tien llovío, cayóme l’encargu, nel Exércitu dízse-y comisión, de facer les veces d’oficial de prensa pa la Guardia Real, que naquel entós nun cuntaba con esi puestu na so plantilla y tenía per delantre’l compromisu de desfilar el 14 de xunetu en Paris, per aquel tiempu baxo la presidencia de Jaques Chirac, un presidente que congrega división d’opiniones ente los franceses pero al que yo siempres tevi muncho ciñu pola su dicción extraordinaria na llingua de Moliere, daqué que mos ayudaba munchísimo a los estudiantes d’esa llingua nel desendolcu de la comprensión oral.

La parte tocantes a la comunicación pública fo un perfectu desastre gracies al agregáu de defensa español qu’enantes de la muesa llegada, nuna rueda de prensa, comentara que los caballos de la Guardia Real yeren sementales y eso podía ser un problema pos la Guardia Republicana contaba sobre too con yegues. Nin que dicir tien que a la prensa francesa yá namái-yos interesó esi aspectu de la nuesa Guardia Real, que llegaba coles sos meyores gales, incluyendo una maraviosa batería a tiru de espectaculares caballos hispano-bretones.

El remate del asuntu llegó’l mesmu 14 de xunetu con una tabascada descomanada que mos costó una fortuna n’uniformes echaos a perder y plumeros inservibles. Nel mio casu, la camisa blanca que llevaba baxo’l uniforme caqui tiñóse d’amariellu, negru y coloráu, colores primarios que formen el caqui, dalgo qu’escubrí esi día, y que la dexaron inutilizada pa siempres.

Los díes previos, pa los ensayos, répétition -y dicen ellí, desplazábemonos a Satory; un espaciu grandiosu, averáu a Versailles, see del famosu palaciu; y a Saint-Cyr, au s’atopa l’Academia d’oficiales del Exércitu francés. Ellí, en Satory, coral de la industria estatal de defensa francesa, reproducíase, tantes vegaes como ficiera falta, lo que depués sedría’l desfile nos Campos Elíseos; y ellí ye onde estos díes se celebra una de les feries d’armamentu más importantes del mundiu, con un númeberu d’asistentes y una cifra de negociu qu’alegra les pestañes de los fabricantes de mediu orbe, especialmente de los europeos, qu’ente  llamaes a la  paz n’Ucrania y condergues a Vladimir Putin, aprovechen pa poner nel mercáu lo último de les sos creaciones nel campu de la defensa.

Los nuesos vecinos franceses tán-yos llantando los agora famosos cañones Caesar a tou quisque, en mediu d’un renacer de la artillería. Los alemanes presenten la versión cabera del Leopard, el so carru de combate estrella. Los ingleses nun dan abasto pa producir los sos misiles anticarru, campeones de la infantería ucraniana. Ye lo qu’hai. El vieyu si vis pacen para bellum triunfa n’EuroSatory.

Raúl Suevos

A 14 dïes vencíos de xunu de 2022

Torna en castellán en repdiv.blogspot.com

Arrebol y protestes nel Muru

 

Esta mañana dominical, como casi siempres que tengo visita de dalgún amigu d’allende’l Negrón, fui a presumir del Muru de San Lorenzo, la meyor tarxeta de presentación pa cualquier ciudá y arguyu de tolos playos. Y como n’anteriores ocasiones, llegando a la maraviosa espresión d’urbanismu Art decó que ye la Escalerona, surdió la entruga embarazosa: ¿Qué bandiera ye esa? Siguida de forma inmediata de la non menos ruborizante ¿Y ú ta la d’España?

Siempres intento una vía d’escape sofitándome nel mástil del Club de regates, una institución privada, nun lo escaecer, y a vegaes pruebo a escapame del asuntu ponderando’l so allugamientu maraviosu, qu’aínda lluz más cuando’l nordestín les fai flamexar como esta mañana. Pero nun siempres cuela y güei’l mio amigu fízome notar que les dos pilastres que dan entrada a les escaleres sedríen un llugar perfectu pa dos talos mástiles au pudieran ondexar les bandieres d’Asturies y Xixón, en llugar subordináu a la d’España, como marca’l protocolu vesilolóxicu, con lo que, amás, cualquier visitante deduciría inmediatamente qu’esa bandiera blanca con bordes coloraos, na que rescampla Don Pelayu espada en ristre, ye la bandiera de Xixón. Una pena.

Nel muelle, dominiu de l’autoridá portuaria y de la Comandancia de marina, ondexen les tres espléndidamente, con preeminencia pa la d’España per allugamientu y dimensiones, lo que ye natural, adecuao y reglamentao nel protocolu del estáu; dalgo, eso de la normativa y los reglamentos, que los nuesos ediles anguaño, cola so alcaldesa al frente, que ye mui mandona, según dicen munchos de los sos administraos, o con tendencies dictatoriales, pa cualquier politólogu recién licenciáu, nun paecen tener mui en cuenta a la hora de conducir los asuntos de la villa de Xovellanos.

Ye quiciabes polo anterior que, rebasáu’l Náuticu, una grita proveniente de la cai Cabrales sorprendiónos, y nun se trataba d’una balasma, nin reña, sinon d’una manifestación perfectamente empobinada pola policía municipal na qu’unes 250 persones glayaben un nidiu “Alcaldesa dimisión”, que supongo basáu nes sos actuaciones unilaterales y alloñaes del consenso n’asuntos como la prohibición de los toros en Xixón, que la so trescendencia pon n’evidencia la visita de l’alcaldesa santanderina pa invitanos a la feria de la so ciudá; el desastre xudicial en que se tien convertío l’asuntu del Cascayu, nel que s’aprecien táctiques mafioses pa enzancar a la agrupación vecinal tres les protestes; o la más recien imposición de la pegatina ambiental pa circular per Xixón. Tres amueses d’un ordeno y mando continuu que recuerda a otros tiempos. Ye lo qu’hai.

Raúl Suevos

En Xixón a 19 díes vencíos de xunu de 2022

Torna en castellán en repdiv.blogspot.com

Barbón nel infiernu

 

Quiciabes esaxero un pocu y namái se trataba d’un purgatoriu de duración midida y controlada pero, tengo de reconocelo, la imaxe qu’ayeri tresmitía’l presidente del Principáu, mientes actuaba de palmeru pa un de los actos electorales del so collaciu socialista andaluz, llegó a preocupame seriamente, y eso que pal consumu televisivu suelen facenos llegar los momentos más interesantes, o vendibles, al veceru electoral, esto ye, al supuestu ciudadán.

Deben dir mal les coses pal partíu del gobiernu y poro ayeri llevaron como adornu de tribuna a los barones socialistes; anque non a toos, porque Emiliano Page, autodegradáu a monaguillu, buscóse dalguna coartada pa enzancar el ser asociáu a la debacle que dalgunos auguren na cita electoral de la selmana viniente y mandó un vídeu, recursu siempres a mano nestos casos.  

Ellí taben en segunda fila los más sureños y avezaos al calor, anque a Chimo Puig paeciera escurrirse-y un filín de sudor dende l’abrigu de la so cabellera abundosa; al so llau’l presidente canariu, curtíu polos calores del volcán de la Palma paecía atopase na so salsa, dada la so amplia sonrisa que contrastaba col hieratismu del extremeñu, maestru del tancredismu dende que’l doctor Sánchez aportara al poder. 

En primera fila, flanquexando al orador, o esquivando bailaores, que tamién les hebo, los presidentes d’Asturies y Aragón paecían dos condergaos a galeres mientres el so primer día ataos al bancu. Lambán, convaleciente d’un procesu canceríxenu, errara l’hábitu, más propiu pa una misa n’El Pilar cola so americana escura, y el so abanicase frenéticu col folletu socialista delataba que taba a un sospiru del guelpe de calor. Too seya pol partíu.

El presidente Barbón, al otru llau del aragonés, yera’l que más piedá inducía. Los sos güeyos desorbitaos recordabenme los del vencedor del certamen de xatos culones de roxa asturiana de los valles, na Feria de San Antonio de Xixón, celebráu’l día anterior, aterráu énte l’auditoriu tumultuosu y aplaudidor del recintu. Barbón, de brazu más forníu que Lambán, abanicábase tan fuerte que doblaba’l cartón –que pena nun tener regalao abanicos- y la so humanidá, que tamién me retrotraía al día anterior, nun paecía n’absoluto a xeitu embutida nuna camisa apretada. Qué pena que’l so talante socialista-y torgue siguir la moda que marca’l Rei, quien pa estes ocasiones elixe una guayabera bien cómodo, lo que ensin dulda aliviara al presidente asturianu. Probín.

Ye dura la vida del políticu, n’ocasiones hasta peligrosa, como ayeri, y encima col riesgu de que nun te lo agradezan los votantes cuando llegue’l momentu.

Raúl Suevos

A 13 díes vencíos de xunu de 2022

Torna en castellán en repdiv.blogspot.com

Un cetru asturianu n'Habana

 

Na mio dómina de vecín de L’Habana avezaba a paseyar con cierta frecuencia la cai Reina, asina conocida por tolos habaneros magar que la Revoluçión la rebautizó como Bolívar va yá dellos años. Ye una cai qu’abrieron nel sieglu XIX los inxenieros militares españoles pa enllazar el centru de la ciudá cola parte alta, au acababa d’abrise’l paséu Quinta del Capitán Xeneral. Nella puedense atopar auténtiques xoyes arquitectóniques, si entá nun se tienen esbarrumbao.

 de les fixaciones de mio yera’l edificio modernista del Cetru d’Oru, nacíu como see d’una entoncenes pernomada marca de tabacos propiedá d’un talu C. Granda, apellíu que delata’l so trubiecu asturianu y onde entá anguaño, en Grao, podemos atopar la casa d’un indianu propietariu de plantaciones tabaqueres en Cuba, Casa Granda.

L’edificiu fai esquina cola cai Campanariu, una vía estrecha y populosa que sube atravesando’l Centru Habana dende San Lázaro, mui cerca del Malecón, lo que debió llevar al arquitectu, Dediot, allá pel llonxanu 1910, a echar el restu nos adornos del ángulu de la edificación, au una imaxe en relieve de ¿la Virxen? –ensin neñu- col cetru,  paez colgar de la esquina abrazando la columna principal del porche. A los sos pies, el grabáu de marca registrada paez resolver el problema, secularizándolu; sobro ella, el balcón principal cuenta con una impresionante placa torneada de forxa y obra que sobresal del restu de balcones, na so mayoría güei desapaecíos.  

Queden dos plantes de vivienda con tres balcones cauna na fachada principal enmarcaos por falses columnes estriaes que rematen na parte superior del centru con un adornu sobresaliente n’altor franqueáu por dos rostros de diosa, o similar, que supongo buscaba acomodar el conxuntu al calter profanu del tabacu cubanu.

Anguaño tol conxuntu ye una cuartería, esto ye, el resultáu de la multiplicación de les families nun mesmu espaciu a lo llargo de los años. Los apartamentos, posiblemente ocupaos por terceros col aportar de la revoluçión y l’autoesiliu de munchos propietarios, tiene visto como los fios se casaben y ocupaben un cuartu, al que se-y amestaba una cocina, o se tabicaba’l salón pa algamar más intimidá. Depués llegaron los nietos que tamién ocuparon espaciu coles sos pareyes; y too ello con una falta absoluta de caltenimientu nel inmueble que, magar contar con bonos materiales na so construcción, nun puede vencer al clima caribeñu, y al pasu del tiempu.

Güei’l Cetru d’oru ye una ruina, una guapura ruinosa si prefieren, y nun sé si los caberos y abundosos esbarrumbes tres los llovios recientes habrán puestu’l so nome ente les maravielles cubanes desapaecíes. Ye lo qu’hai.

Raúl Suevos

A 8 díes vencíos de xunu de 2022

Torna en castellán en repdiv.blogspot.com

La zapa de les sanciones

 

La guerra económica ye lo que tien; los sos efeutos nun son tan inmediatos como esos misiles Uragan llanzaos dende la retaguardia rusa cola impunidá que-y da’l saber que los ucranianos nun se van atrever a bombardeyar territoriu rusu, por muncho que la rescamplante “operación especial” seya realmente una invasión en toa riegla del territoriu patriu. Ye lo que tien l’allugase no que se conoz como zona de fricción, nesti casu ente dos potencies, o casi, occidente y lo que queda de la URSS. Ucrania tien que xugar colo que-y dexen.

Con too, y magar el control férreu de la información que lleva a cabu’l gobiernu de Putin, anicien a filtrase noticies en forma de datos económicos que fluyen d’organismos oficiales rusos, como’l Bancu Central rusu que cuenta con una versión n’inglés que permite saber que la inflación y el PIB van a dar un mordigañu al poder de mercar de les families ruses que, en munchos casos, van tener que preparar pote de patates con patriotismu putinescu, a falta de meyor compangu.  

Hai, sicasí, otros datos más llamativos, como’l preciu de los fletes camioneros nel interior de Rusia, au la llínea Moscú-San Petersburgo pierde un 40% del su valir, quiciabes porque nun habiendo malapenes tráficu marítimo la ufierta transportadora vese abocada a tirar los precios. Un contraste agudu cola llínea Moscú-Xeorxa que amonta nun 30%, pa sorpresa de munchos ya que, magar la tirantez de les rellaciones ente los dos países, con miles de combatientes xorxanos nes files de la Lexón estranxera ucraniana, paez ser que’l país, con dos puertos nel Mar Negru; Poti y Batumi, el segundu con una importante terminal de contenedores, tiense convertío na puerta d’entrada pa toa mena de bienes agora prohibidos poles sanciones occidentales, lo que tendría amontao esponencialmente el tráficu ruteru haza la capital rusa y con ello’l preciu de los fletes. Ye lo qu’hai.

Esisten otros datos más difíciles de comprobar, como’l preciu de los repuestos industriales d’orixe européu, imprescindibles pa munches empreses ruses y difícilmente reemplazables polos chinos, pel momentu mui cuidadosos na aplicadura de les sanciones, que sí qu’amontaron les importaciones de crudo y gas rusu pero, lóxicamente, aprovechando la necesidá del productor y algamando unos precios mui ventaxosos pa los sos intereses. La simpatía y el sofitu moral tienen una llende.

Los datos qu’entamen a filtrase dicenmos que Putin nun ta lluchando exactamente escontra l’exércitu ucranianu, que ta respondiendo maraviosamente dades les circunstancies, sinon escontra’l tiempu, que paez gana-y la batalla de forma inevitable.

Raúl Suevos

A 8 díes vencíos de xunu de 2022

Torna en castellán en repdiv.blogspot.com

Santa Xabalina, patrona d'Ucrania

 

Nun la guetar, pos nun esiste tala santa. La historia vien a cuentu del poder que los conocíos como memes; una pallabra que la RAE recoye como tala, que procede del inglés y se refier a les imáxes gracioses o caricaturesques que se diseñen cola finalidá de propagales pente medies d’internet; y que, nesti casu, respuende a la idea afortunada d’un publicista que punxo nos brazos de la Virxen María un d’esos misiles de fabricación norteamericana qu’algamaron a frenar al entamu, y depués revertir, la invasión rusa d’Ucrania.

La imaxe ye yá mundialmente conocida y sirve pa sifitar una campaña de recoyida de fondos pa iniciatives estreamaes n’Ucrania, y yá cuenta con dellos millones d’euros nes sos cuentes. Too ye bono si sirve a la causa principal, el refugu de la invasión, pero nun dexa de ser llamativu que, a lo menos nesta fase de la guerra, tean ganando la contienda sicolóxica de forma abrumadora los ucranianos; especialmente si tenemos en cuenta qu’en 2014 foron los rusos los que, magar lo groseru del espliegue “camuflao” de les sos fuercies nel Dombás –recorda-yvos del derribu del avión de KLM y asesinatu de los sos pasaxeros- llograron vencer de forma manifiesta la batalla de la información pública.

Nun cabe dulda que contar con un presidente que vien profesionalmente del mundiu de la comedia y la televisión ye un puntu de ventaxa a la hora de comunicar; y el señor Zelensky llévalo faciéndolo de forma maxistral dende enantes inclusive del 24 de febreru, entamu de la invasión, pero ye igualmente induldable que detrás d’él, nes estructures oficiales y nes redes civiles tamién, esiste un texíu comunicativu que, de forma aparentemente espontánea –cuando too acabe yá sabremos más- ta algamando a escurecer hasta casi la so desapaición a les hasta va bien pocu poderoses, y pa munchos temibles, granxes de trolls allugaes nel territoriu rusu y trabayando en beneficiu de les polítiques del presidente Putin.

Les imáxes del aldeanu ucranianu remolcando col so tractor un carru de combate rusu na fase anicial de la invasión foron un aperitivu de lo que vendría, y la imaxe impactante de Santa Xabalina nun ye más que’l colofón –hasta agora- de lo que paez una gran campaña de comunicación pública por parte de Kiev na que’l control cuidáu y midíu de a ónde y cuándo pueden desplazase los periodistes que cubren la guerra, y les intervenciones del presidente Zelensky nes Cortes de mediu mundiu, componen parte del entramao d’una bóveda que bien merez tener como clave la victoria de les sos Fuercies armaes.

Raúl Suevos

A 5 díes vencíos de xunu de 2022

Torna en castellán en repdiv.blogspot.com

El porfiriatu de Putin

 

La pallabra Porfiriatu ye probable que dexe impasibles a munchos de quienes la oigan, o llean, puestu que sirve namái pa describir un periodu históricu del nuevu estáu mexicanu, nacíu, como’l restu de repúbliques hispanoamericanes, de resultes de la invasión napoleónica n’España y la subsiguiente vacancia, siguía d’usurpación, del tronu español.

El México independiente nació, como les sos hermanes, marcáu pola inestabilidá política, y tres dos emperadores fusilaos, y el mandatu de Benito Juárez, ensin escaecer los once periodos de gobiernu del inefable don Antonio López de Santa Anna, algamaría’l poder el xeneral don Porfirio Díaz, tou un “espadón” al meyor estilu de los españoles del sieglu XIX, que diba exercer el poder en México, en total, mientres más de treinta años; de 1884 a 1911 como periodu caberu enantes d’esilase en París.  

El Porfiriatu fo un periodu de paz, paz vixilada pero paz, que sirvió para dar un gran puxu económicu al país, anque lo ficiere a costa de les llibertaes públiques y, sobremanera, baxo l’amparu, control y corrupción del grupu de prohomes que s’acovecíen baxo la solombra del gran Porfirio. Homes que, a la fin, algamaran una gran edá, como’l so xefe, y dexaben al país, énte’l posible cambéu de ciclu, nuna situación abondo precaria; como los fechos s’encargaríen d’acotar.

L’alzamientu de Francisco Madero yera previsible. El Porfiriatu nun daba más de sí, pero aquello namái fo l’entamu d’un periodu axitáu y sangrientu que toos, gracies al cine yanqui principalmente, conocemos como Revolución mexicana y a min, a lo menos nalgunos de los sos periodos, la historia del Porfiriato recuérdame muncho a Putin, que tamién algamó’l poder tres un periodu previu de convulsiones en Rusia, y que, tres más de venti años nel poder, cuenta con una redolada de fieles prohomes, Siloviki los nomen ellí, que comulguen con, y sofiten, les polítiques del so líder a tou trance, y que, como asocedía nel México decimonónicu, fai que’l gobiernu de Rusia seya’l de mayor edá media de les antigües repúbliques soviétiques; con Ucrania col más mozu nel otru estremu.

El final de Porfirio Díaz aportó de la mano de la doble presión del alzamientu de Madero y del estáu de podrizu del sistema políticu. Ye difícil saber nesti momentu cómo van escurrir les coses en Rusia, pero son munches les coincidencies que se pueden güeyar y, desgraciadamente, como asocedió en México, nada indica que, cola desapaición de Putin, les coses vayan a camudar radicalmente. Ye lo qu’hai.

Raúl Suevos

A 29 díes vencíos de mayu de 2022

Torna en castellán en repdiv.blogspot.com