Ascu y vergoña en Marsella

 

Ye Marsella una ciudá particular, guapísima, con tol so tastu portuariu mediterráneu maduráu demientres milenta años, que cuenta anguaño con una de les poblaciones mayores d’orixe norteafricanu de toa Francia; árabes, dicen-yos ellí pa evitar llamalos moros, pallabra qu’esiste en francés pero se considera políticamente incorreuta. Ye lo qu’hai.

L’equipu de futbol, l’Olimpique, ye un de los clásicos del país, pero tien una afición insoportable, tantu que Marcelino, l’escelente entrenador xixonés, dexó-los tiraos nun va muncho, fartu de les presiones inaceptables d’unos siguidores catalogaos como los más violentos del país.

Esti domingu xugaba’l Lyon y reventaron-y a pedraes les llunes del autobús al so aportar, y al entrenador la cara con una llata de cerveza, enllena. Un desafueru que llevó a la suspensión del partíu previstu y a que l’Equipe, el periódicu deportivu parisín llenase la so primer páxina con un “Ascu y vergoña” descomanáu que nun dexa dala dulda sobro los sentimientos que produz lo asocedío.

Güei llunes enteramonos, con fotografía incluyía, que’l númberu tres del PSOE, partíu del nuesu gobiernu anguaño, dirixíu pol doctor Sánchez, tiénse axuntao en Bruseles col delincuente Puigdemont, certificando con esti aconceyamientu lo que yá mos vien anticipando el so xefe con midies declaraciones dende les eleiciones pasaes; y yo nun puedo menos qu’entrugame cualu va ser el sentimientu d’aquellos españoles que-y otorgaron el so votu confiáos nes sos declaraciones negando la posibilidá d’amnistía, y, por qué no, referéndum.

Ascu y vergoña en Marsella.

Anque tamién ye obligao entrugase pol sentir de les altes autoridaes que mañana, con esclusión del rei Xuan Carlos, van asistir a la Xura de la Constitución por parte de la princesa d’Asturies, con especial preocupación polos pensamientos que van allegar a la mente de los miembros del Tribunal Constitucional, llamaos a refrendar los arreglos, inconfesables en cuantu a los pagos acordaos, del secretariu xeneral socialista. Una fotografía, la de mañana, que nun creo que munchos tean interesaos n’enmarcar pa poner nel so despachu.

Ascu y vergoña en Marsella.

Unos actos, los de la Xura, que van suponer un dispositivu de seguridá descomanáu a cargu de Policía nacional y Guardia Civil, y nel que ye posible que dalgún de los sos miembros fuera d’aquellos qu’esplegaron en Cataluña y foron acosaos, y atacaos, por turbes de radicales nacionalistes de forma inmisericorde ¿Qué van pensar? Pocu importa, máxime cuando l’oprobiu va ser validao por una militancia socialista de bovina sumisión, teniendo en cuenta que na so mayoría viven de la política del so secretariu, pente medies cargos electos o designaos.

Ascu y vergoña en Marsella.

Raúl Suevos

A 30 díes vencíos d’ochobre de 2023

Torna en castellán en repdiv.blogspot.com

Isabel Ayuso y Marlaska

 

Cola que ta cayendo, tres dellos meses de gobiernu en funciones y ensin pronósticu nidiu de futuru, con una amnistía y referéndum menaciando la estabilidá nacional, y digo lo d’estabilidá dempués de guetar demientres llargu ratu una pallabra que nun xenerara demasiada subida de tensión ente los mio escasos llectores, henos equí que mos atopamos col yá tradicional aportar de cayucos a les Islles Canaries, particularmente al Fierro, que ye la más averada a les bases de salida en Senegal.

Son estos cayucos un dolor de tiesta estacional, como lo yeren, anque ensin bombes nin muertos, aquelles campañas de branu de la derrotada ETA, a manes de Zapatero, según indecente afirmación d’esti gran estadista. Ye un malestar que, magar lo aparatosu de les cifres, cabe suponer qu’un país de la talla poblacional y económica del de nueso debería tar en condiciones d’apencar, pero eso depende, claro, del ambiente políticu de cada estación. Y nesta la temperatura tá abondo alta.

Pa la España democrática, la de la Transición, ye una primerísima eso de topanos con un partíu que gana les eleiciones xenerales y, magar ello, nun tien opción de gobiernu, y, pela cueta, un perdedor de les eleiciones, dende la so posición de mandu, que se declara dispuestu a too, hasta vender les esencias de la nación, con tal de gobernar. Y’ehí, nesa situación tensionada hasta’l paraxismu, áu s’inscribe esi tirotéu verbal que sufrimos dende les posiciones d’unos y d’otros.

Nel xaréu de declaraciones, d’un llau y del otru, atopamonos cola presidente del gobiernu madrilanu, Isabel Ayuso, que la so formación universitaria fo en Ciencies de la información, con máster posterior en comunicación pública, que s’amuesa preocupada, y manifiestalo, pola llegada masiva d’emigrantes y los efeutos qu’eso pueda tener pa la seguridá nacional. Dalgo que paez razonable mientes nun se demuestre lo contrario.

El presidente del Partíu popular, señor Feijoo, tamién se tien espresao na mesma direición, y eso paez haber sacao de les sos casilles al ministru d’Interior, señor Marlaska, quien calificó a los dos xefazos conservadores como inorantes e irresponsables. Declaración que, ye de suponer, fai dende la so condición anguaño de ministru del ramu y, tamién, como maxistráu vieyu de l’Audiencia Nacional. Ye d’agradecer. O non.

Les duldes al respective de Marlaska, pa quien nun les tuviera yá contrastaes, vienen pol fechu de que la Estratexia de Seguridá Nacional, roblada pol doctor Sánchez en 2021 tres ser aprobada pol Conseyu de ministros, señalen, ente los riesgos y amenaces pa España, los “fluxos migratorios irregulares”.

Fáigaselo mirar señor Marlaska.

Raúl Suevos

A 27 díes vencíos d’ochobre de 2023

Torna en castellán en repdiv.blogspot.com

Taces de té y vasos de sidra

 

El muséu provincial de Zaragoza dispónse a piesllar demientres un llargu periodu, obres. La so coleición descomanada emburriálu a ampliar haza l’edificiu allegante de la vieya Escuela d’Artes y oficios, exemplu formosu de l’arquitectura zaragozana de primeros del S.XX. Ellí va poder siguir allumando a propios y foriatos al rodiu de la bayura artística de l’añosa Cesar Augusta.

Enantes de qu’echen el cerroxu averamonos a ver una esposición escelente sobro’l kimonu xaponés, que mos sosprende vivamente pola bayura de les teles, casi toes forraes en seda, y, sobremanera, la decoración increíble y exuberante de les mesmes, que nuna de les sales s’amuesen abiertes y esplegando tola belleza del estampao que los pliegues de la vestimenta nun permiten apreciar.

Hay tamién una amuesa de tazes de té d’un ceramista contemporáneu recien fallecíu, Tanzán Kotage, qu’exiben una guapura rara nos sos contornos esmaltaos, con motivos, como munches de les teles de los kimonos, de la natura xaponesa a lo llargo de les estaciones. Una maraviella que conmueve anque un nun seya un espertu, nin en cerámica nin en Xapón.

Un panel esplicativu cuenta que la Ceremonia del Té, que na so versión china ye Patrimoniu inmaterial de la Humanidá, tien una primer parte na que los invitaos, cuatro o cinco, beben toos d’esi primer té, fuerte y trupu, na mesma taza, como si quisieran declarar la so comunión nel espíritu de la ceremonia, y colos sos collacios.

Lleéndolo nun pude evitar pensar na epidemia del Covid, y en cómo superaríen en Xapón el problema mientres la eclosión de los contaxos, al tiempu que recordaba que la nuesa Sidra tamién pretende ser reconocida como Patrimoniu inmaterial, y tamién tevo que superar el problema del compartir el vasu.

La ceremonia de nueso, por inesistente, ye muncho menos complexa que la xaponesa, y nació nel so momentu por la escasez y el preciu de los vasos de vidriu, que llevaba a compartir y dexar un pocu del culete pa echalo per onde se bebiera, y asina llimpiar, mínimamente, la buelga de los nuesos llabios.

La solución asturiana aportó col amontar de los vasos, tantos como bebedores, y, en dalgunos negocios, los tapones reguladores o los arbíos escanciadores a presión, dalgo, esto cabero, que desmerez a una bona sidra, especialmente si se cuenta con bonos escanciadores na sidrería. Ye lo qu’hai.

Está la nuesa cultura sidrera mui lloñe del ceremonial, la delicadura y la dulzura d’un pueblu que, nim lo escaezamos, amosó una brutalidá inconcebible demientres los conflictos del S.XX, pero, con un ritu muncho más simple y popular, la sidra sabe meyor.

Raúl Suevos

A 25 díes vencíos d’ochobre de 2023

Torna en castellán en abellugunelcamin.blogspot.com

El ministru Albares desahucia a Maduro

El presidente venezuelanu ye un exemplu de resiliencia; na so etapa de chofer del metro de Caraques dicen qu’algamó cotes nunca enantes llograes en cuantu a erros, averíes y problemes, pero eso nun foi torga pa, tres una fayadiza formación en L’Habana de Castro, llegar a Ministru d’esteriores del más famosu muertu del hospital del Ministeriu del interior cubanu, el comandante Chávez.

El pernomáu comandante venezuelano, dalgo menos famosu que’l cubanu, tevo la ocurrencia de nomalu herieder políticu; non de los sos caudales, munchos, que dexó a les sos fies, y agora los revicien; pero Maduro, al que, magar recibir conseñes directes de Chávez a traviés del cantu de paxarinos estremaos, la mayoría d’analistes políticos agoraben una presidencia percurtia en Venezuela, ehí sigue. Toos s’enquivocaron.

Maduro, dende’l so aparente analfabetismu funcional, espresáu en intervenciones publiques multiples a lo llargo d’estos años, supo controlar el poder con mano de fierro, cola ayuda, o coparticipación, de Diosdado Cabello. Al mou cubanu, tien llograo que siete millones de venezuelanos, pocos d’ellos votantes de so, colaran del país, provocando una descapitalización ciudadana descomanada, namái comparatible a la de Cuba. Agora, por necesidaes del mercáu petrolíferu, los EEXX paecen da-y otru marxe temporal de supervivencia.

Biden quitó-y dalgunes de les sanciones impuestes, too ello, supuestamente, cola promesa d’unes eleiciones llímpies l’añu viniente, pal que-y lo quiera creer. Y con eses, les eleiciones, la oposición púnxose d’alcuerdu pa escoyer como candidata, nunes primaries que contaron con toa mena de pilancos pel llau del gobiernu chavista, a María Corina Machado, a la que’l réxime yá desaposiara del so drechu de votu pásivu pol so sofitu a les vieyes sanciones USA. La so invalidación por parte de Maduro y la reacción yanqui va dinos hasta ú va esta vegada’l presidente Biden.

Equí n’Europa ye áu entra en xuegu Albares, recién rientráu xunto col doctor Sánchez del aconceyamientu del Grupu de Puebla, que, como yá ficiera Moratinos tocantes a Cuba en tiempos de Zapatero, quier que la XE alce les sanciones a Maduro. Asina, por la cara, ensin esperar a ver qué pasa con Corina Machado, y ensin atender a los conseyos de los munchos expatriaos, o meyor esilaos, qu’habiten ente nós.

Ye equí áu’l métodu de la reducción al absurdu me lleva a pensar que’l réxime chavista ta nes últimes, pues si un gobiernu que lexisla pa meyorar l’accesu a la vivienda consigue que se dispare l’alquiler de los pisos y se reduza la ufierta de venta de vivienda; o desarrolla lleis de xéneru pa meyorar la situación de la muyer al respective de la violencia y llogra sacar de la cárcel o recortar la so conderga a más de mil violadores o asesinos de muyeres; o, tocantes el bienestar animal lexisla de forma que va multiplicase los abandonos de mascotes, particularmente perros, y va amontar escomanadamente’l preciu de la proteína animal pol aumento de los costes, a min, nun me cabe otra que pensar qu’Albares anunciamos el fin del chavismu, anqu’él nun lo sabe.  

Raúl Suevos

A 24 díes vencíos d’ochobre de 2023

Torna en castellán en repdiv.blogspot.com

¿Haza ónde vamos?

 

El día 12 pasáu asistimos como invitaos a los actos de la Patrona de la Guardia Civil en Xixón. Al llau de nueso sentábase la madre d’Irene Fernández, la guardia civil mozo asesinada en Sallent por ETA va yá 23 años, cola que, aparte los saludos de cortesía, nun intentamos confraternizar n’absolutu, y nun lo ficimos por falta d’empatía, sinon por tolo contrario, porque mos sentíemos totalmente incapaces de sostene-y la mirada, un día enantes de que’l presidente del gobiernu s’axuntara colos representantes de Bildu, nuna representación d’ignominia institucional que nun va muncho paecía imposible d’algamar.

Son tiempos duros pa la familia de la Guardia Civil, y pa cualquier español con un mínimo sentíu de vergüenza nacional. Son díes nos que’l voceru socialista, Pachi López, encargáu de defender lo indefendible, apaez de cutiu na pantalla del televisor, y, ca vegada, nun puedo evitar acordame de Pilar Ruiz, la madre de Pagazaurtundua, socialista asesináu por ETA, que yá va dellos años, con ocasión del primer averamientu de los socialistas vascos al mundiu filoetarra, escribió-y al ínclitu voceru, “Pachi, vas dicir y facer munches más cosas que me van xelar el sangre”, pallabras que, al ser previsibles, nun algamaron l’axetivu de profétiques. Ye lo qu’hai.

Son díes d’afogón pa gran parte de la xeneración que sufrió la llocura de los terroristes vascos, qu’agora ve como’l sacrificiu vital de tanta xente de bien va a resultar baldiu pol simple interés de la mercadotecnia política, que camuda n’imprescindibles los votos de los heriedes de los terroristes de les Vascongaes y de los golpistes en Cataluña. Un oprobiu que pasa desapercibíu pa muncho integrante de les xeneraciones nueves, frutu d’un sistema educativu que tien abandonao los valires y principios de siempres por un conglomerao d’idees woke que nun conducen a dala parte y, en cambiu, trivialicen lo que fo la Transición y la llucha antiterrorista.

Son xornaes complicaes que, creo, nin el mesmu protagonista, el doctor Sánchez, tien mui nidio haza ónde pueden conducinos, pues el so actuar más se paez a una fuxida haza adelantre qu’a un plan diseñáu, y too lleva a  pensar que namái se trata de caltener el poder a toa costa, anque’l preciu seya la mesma España, a lo menos tala como se la conoz dende va unos cientos d’años.

La recien apaición nun mediu radiofónicu del expresidente Zapatero, pretendiendo facer comulgar ruedes de molín a l’audiencia ye un detalle más d’aquelles pallabres que la madre de Pagaza auguraba a Pachi López. Van venir más. Yá lo van ver.

Raúl Suevos

A 18 díes vencíos d’ochobre de 2023

Torna en castellán en repdiv.blogspot.com

El terror, más allá de la guerra

 

Si la guerra ye la continuación de la política por otros medios, Clausewitz dixit, nun queda otra qu’entrugase aú llantamos el terror, porqu’éstu, el terror, vieno usáu dende antiguo en moos estremaos, pero casi siempres con unos oxetivos más o menos nidios, pocu o munchu declaraos, pero siempres definíos pal perpetaor.

Tamerlán, aquel Timur el coxu que visitara Ruy de Clavijo n’embaxada castellana a la so corte de Samarcanda, allá pel lloxanu sieglu XV, avezaba a facer torres coles calaveres de los derrotaos al entamu de les sos campañes, p’avisu de las ciudades vinientes a conquistar. Dicen que, col pasu del tiempu y los procesos químicos de la descomposición, les torres rellumaben na nueche como lluciérnagues xigantes que proclamaban la saña de Tamerlán.

En tiempos más modernos el personaxe del coronel Kurtz, na bestial película de Coppola, Apocalipsis Now, danos nel so monologu una descripción respingante de lo que significa l’usu del terror como ferramienta de guerra conduncente, pero agora, y aplicando la doctrina del takfirismu yihadista, y les enseñances sangrines del GIA arxelinu y l’Estáu islámicu, los de Hamás devolvieronmos momentáneamente al Medievu más sanguinariu.

Les matances perpetraes nun son frutu de l’alloría sinon productu de la mente fría de un calculador dirixente terrorista que guetaba lo que se tá yá produciendo, la respuesta demoledora y non menos sangrina del estáu israelita; dalgo que, ensin dulda, y conforme vayan aportando imáxes, non menos demoledores que les del asaltu de Hamás, van facer pensar a munchos nel terrorismu d’estáu, por más que se quiera apelar al drechu de venganza, o al de defensa.

El takfirismu considera apostates a toos aquellos que nun comulguen colos más puros ente los fieles; nesti casu los miembros de Hamás. Namái ellos supieron interpretar la Llei, el Corán, nos sos términos xustos, como los Salafs, los compañeros del Profeta, y, poro, tán nel so drechu de tomar la vida d’aquellos, los otros, ente ellos y con más motivo, los infieles. Na so deriva fanática’l pueblu de Gaza debe sacrificase pola causa de Dios, y nun-yos va tremecer la mano al facelo.

L’oxetivu tácticu ta algamáu, rehenes pa intercambiu, la cólera d’Israel, y la so respuesta; l’estratéxicu, la ira del Islam y otra vegada l’aisllamientu d’Israel paecen también al algame de la mano. N’España, esta solitú israelí, vámosla dir viendo nos días vinientes, a midida que los “progresistes” s’horroricen col emplegu de la fuercia del estáu xudíu, na mesma midida que tán escontra’l sofitu a Ucrania.

Raúl Suevos

A 13 díes  vencíos d’ochobre de 2023

Torna en castellán en repdiv.blogspot.com

Xeopolítica sangrina en Palestina

 

Una vegada más al gobiernu d’Israel garránrolu yendo a por uves. Como cuando lo del Yom Kippur; como cuando lo del Llíbano. Y nesta ocasión namái unos díes depués de que’l señor Netanyahu fardara na tribuna de les Naciones Xuníes del futuru esplédidu qu’esperaba al Oriente Mediu de la mano y baxo la direición d’Israel. Vaya moyón.

A la operación xeopolítica namái-y faltaba la guinda del reconocimientu del estáu israelita por parte de l’Arabia de Bin Salman, la enantes Saudita. Una operación qu’entamó col reconocimientu yanqui del Sahara Occidental como marroquí, siguíu del reconocimientu del estáu israelí dende Rabat. Hasta lo del Yemen paecía camín de empobinase. Agora too puede dise al garete.

En Gaza, con una operación enforma espaxarosa que nun va más allá de la toma de rehenes, con tantu d’asesinatos pel camín, pa trocalos posteriormente por palestinos de Hamas encarcelaos n’Israel, llama poderosamente l’atención el fracasu de los servicios d’información xudíos, enantes tan poderosos, y que güei nun deben tener nin fondos pa contratar el Pegasus, tan conducente colos teléfonos de mandatarios europeos, ente ellos el doctor Sánchez.

Ye un casu bultable de sobeya por parte de Tel Aviv; o de hubris, si lo quieren n’eruditu. Una situación que vien depués de meses d’acosu na ocupada Oriella occidental del Xordán, Cisxordania, que’l gobiernu ultrarradical nuevu de Netanyahu menacia con anexonar de la mano del ministru Smotrich, líder del Partíu sionista. Ellí la cuenta de muertos palestinos supera a la d’asesinatos n’Askalon estos dos díes caberos. Pero nun ye lo mesmo. Ye lo qu’hai.

Agora va venir la “xusta” venganza del llau d’Israel, con bombardeos masivos sobro la ciudá de Gaza que van dexar a los rusos n’Ucrania como aprendices, y una fase nueva, aínda nun se sabe si con ocupación por parte del exercitu israelí, que va llevar a algamar cotes renovaes de sufrimientu a la población de la Franxa. Pero Bibi Netanyahu quedóse colas vergüenzes al aire. El so gobiernu, yá de por sí inestable, quédase bailando na cuerda floxa. Y tou Oriente Mediu, una vegada más, pasa a fase de fiebre aguda. Y ello esperando que los llibaneses de Hizbullah nun la líen, dalgo que diba garrar a les Fuercies españoles metanes la llínea de tiru.

La parafernalia de cohetes que vimos, de baxu coste y tecnoloxía iraní, son baltaos pol sistema Iron Dome, qu’Alemania vien de mercar, al módicu preciu de 50.000 dólares cada misil disparáu. En Teherán débense tar partiendo la caxa.

Raúl Suevos

A 8 díes vencíos d’ochobre de 2023

Torna en castellán en repdiv.blogspot.com

S'acabó

 

Qué frase más llapidaria. Qué radicalidá no qu’espresa. Como un latigazu que pon fin a cualquier discursu o actividá que s’estuviera llevando a cabu. Un españíu rompedor qu’evita la necesidá de dar esplicadures. Anque éstes fueran imprescindibles.

Fo’l títulu d’una canción d’ésitu descomanáu de la recien finada María Jiménez. N’ella daba cuenta de la finalización drástica de la so rellación tormentosa con Pepe Sancho, el so maríu en tres ocasiones, con tonu induldable de reivindicación feminista, dalgo que, con independencia del tirón contrastáu de la artista, contribuyó direutamente al triunfu del cantar.

Nesti branu inacabable, el venablu oratoriu tornó a cobrar notoriedá  tres el chuchu mundialista; má, o pá, de tolos besos de la historia. De la mano, vía redes, de la notable Putellas, que, nuna amuesa d’oportunidá, vio nel canciu de la Jiménez la forma de radicalizar de manera imparable l’asuntu del pucu. Y la cayida del dirixente federativu. Ye lo qu’hai.

El casu ye que l’asuntu nun s’acabó, nin muncho menos. La interesada revolución feminista/igualitaria sigue puxante de la mano de la clas política nel mundiu del futbol, que vien d’anotase otru tantu, o morra, n’Alfonso Pérez, por atrevese a manifestar la diferencia permanente –en clave económica- ente’l futbol masculín y el femenín. Pero hai más.

En Xixón tuvimos un episodio nuevu de la descarga verbal de la mano de la nuesa primer edil, la señora Moriyón, que con un tayante “s’acabó” despachó del gobiernu municipal al partíu VOX, al paecer por pretender, nada menos, reconducir ideolóxicamente al mundialmente pernomáu festival de cine xixonés, pente medies la concexalía de cultura qu’esti partíu detentaba. Si señora, asina se manda.

L’alcaldesa nun podía soportar qu’esta xente camudara la idiosincrasia de la villa de Jovino, sunponiendo qu’esista, y poro, na so capacidá de primer rexidora, cargóse’l gobiernu a doble banda, que non tripartitu, quedándose namái col sofitu del PP. Y ye que, al paecer, ella yera la única que nun sabía que VOX declarara, por activa y pasiva, la so intención de allugase nes árees de cultura, naquellos llugares y rexones au participara nel gobiernu, pa dar la batalla ideolóxica qu’ellos consideren como oxetivu fondamental de la so aición política. ¿Ú taba? Señora Moriyón.

Malapenes cuatro meses de gobiernu municipal y yá tamos neses, na enxeblez de la corporación que mos aboca a un cuatrieniu cargáu de respingos y axorizos, y too porque l’alcaldesa non sabía per ónde diba VOX. Damos paciencia, Señor.

Raúl Suevos

A 7 díes vencíos d’ochobre de 2023

Torna en castellán en repdiv.blogspot.com

Giorgio Napolitano

 

Los españoles, dame la impresión, tenemos tendencia a güeyar perriba del llombu a los italianos; quiciabes ello se deba a les campañes glorioses del Gran Capitán, o más probablemente pola nuesa contrastada ignorancia sobro les vivencias ayenes. El casu ye que, nel asuntu políticu, tenemos delles coincidencies, como, por casu, el sistema semipresidencialista na xefatura del estáu. Un presidente, nel so casu, un rei, nel de nueso, con mui poques competencies, pero con una auctoritas que, más allá de lo que dicta la Constitución, tien un poder enorme sobro’l devenir de la nación.

Ellí escoyese al presidente pente medies un sistema d’eleutores; diputaos, senadores, y representantes rexonales, que, n’ocasiones, tien conducío a una serie interminable de votaciones hasta algamar un resultáu. En delles oportunidaes l’asuntu paecía insoluble, llevando a la reeleición del presidente saliente énte’l bloquéu de la situación. Asina asocedió con Giorgio Napolitano, y l’anguaño, Sergio Matarella.

Anque’l sistema paez complicáu y poco conducente, los resultaos suelen ser ponderatibles, y asina podemos recordar a Sandro Pertini, o a Carlo Azeglio Ciampi. Toos políticos de llargu percorríu y con un sentíu fonderu del estáu y d’Italia. Toos de gratu recuerdo pa los italianos.

Italia, un país nacíu del Resorgimento escontra los austríacos, con un himnu, Fratelli d’Italia, escritu por Mammeli, pero que prefieren el Va Pensiero de la opera Nabuco, de Giuseppe Verdi; que se camuda en república pente medies referéndum tres la Segunda Guerra Mundial, y, sobremanera, el comportamiento cobarde de la familia real tres l’acuerdu de paz colos aliaos, que dexó’l país a mercé de les fuercies del Exe. Una nación fonderamente argullosa de la so historia pero consciente de les dificultaes del mundiu modernu; que son munches, y a les que los sos presidentes suelen retrucar con una idea inequívoca de les prioridaes nacionales.

Italia vive nes sos crisis; dalgunas descomanaes, como les que supuxeron el terrorismu independentista nel Alto Adige, o’l de les “Brigadas Rojas” , ensin escaecer el de calter filofascista. Pero nes sos momentos peores sabe adoptar una solución d’estáu, como cuando Matarella nomó a Mario Draghi pa presidir el gobiernu; o como cuando Napolitano acudió a Mario Monti, tamién en situación delicada del país.

Soluciones pragmátiques, con tecnócratas, cuando la clas política nun ta a l’altor de les circustancies. Dalgo que los presidentes italianos, como Napolitano, saben emplegar cuando ye necesario, y qu’equí, n’España, paez lloñe de tar al nuesu algame. Ye lo qu’hai.

Napolitano, comunista, a quien el Papa Ratzinger confió el so deséu de dimitir,  morrió, en paz, con 98 años, ya Italia llóralu. 

Raúl Suevos

A 25 díes vencíos de septiembre de 2023

Torna en csstellán en repdiv.blogspot.com

El lladríu del arenal

 

Salgo a la sablera de San Lorenzo nesti domingu gloriosu, que non de Gloria, con un sol que quier homenaxar la playa xixonesa. Aquel arenal que punxera de fondu l’universal Goya al so retratu de Jovino. Una ñatura que propón alegría, con llámines fines d’augua que doblen la imaxe de los andariegos xunto a la oriella. Una oportunidá pa retratistes, como aquelles que prindara, va yá más d’un sieglu, Sorolla, nel entoncenes nomáu Muros de Pravia.

El Paséu, yá a media mañana, va quedando na solombra d’un sol con trayeutoria serondiega, lo qu’amonta la lluminosidá de la playa pal pasiante, y, mientes sorteo les señores que, azotaes, empobinense a les escaleres coles sus típiques silles plegables, pienso nel mio amigu, el poeta Emilio, que si pudiera güeyar la estampa dende el so balcón, ellí n’El Alto, a bon seguru diba sacar un de los sos rellatos conmovedores. Lo mío ye más pedestre. 

Más allá, camín del muelle, apaecen los primeros cánidos, y dóime cuenta que, magar la total imaxe braniega, tamos yá n’ochobre, cola temporada de baños oficialmente acabada, y media playa a disposición de los animales y los sos amos. Ye lo qu’hai.

Al altor de la Escalerona, una llámina d’augua más grande devuelvemos la efixe misilística de la torre de San Pedro, rota pola aición de dellos neños que xueguen a facer pantanos nel sable, baxo la güeyada atenta y averada de los pás, seguramente preocupaos pola proliferación de chuchos de tou tipu y pelaxe.

Hai un conciertu de lladríos pero, en xeneral, los cazadores de les dosis caberes de vitamina D d’orixe solar nun paecen inmutase, anque una dama sufre’l respingu de ser gusmiada por un pastor alemán, que s’aparta y sigue impertérritu el so camín, mientes la respingada se yergue sobro les sos posaderes guetando cola mirada un amu que nun atopa.

Más allá, un pariente del anterior, anque de pelaxe blancu, roba-y la pelota a una pareya que xuega coles sos raquetes, y anque la so ama, tres esculpase, da-y la de so sacándola del bolsu, repite la operación con unos neños más alantre. El so castigu va ser la correa y abandonar la sablera pela escalera viniente. Por rabeliscu.

Na Rampa veo llegar una pareya con un salchicha peludu que, magar les sos pates curties, da saltos de contentu y lladra como un alloriau en cuantu que toca’l sable, como si supiera que ya tien entamao la so temporada. 

Too paez rodar bien, a lo menos dende’l balcón del Muro, pero, si queremos ampliar la temporada turística, va haber que repensar esti aspectu.    

Raúl Suevos

A 1 día vencío d’ochobre de 2023

Torna en castellán en repdiv.blogspot.com