L'argumentu del argumentariu

 

Va un par de díes asoleyáronme una tribuna nel periódicu llocal; hasta ehí nada de particular, seique la satisfacción natural pol fechu de que’l director alcontrara eses ringleres humildoses abondo interesantes como pa decidir la so publicación pero, siempres suel haber un peru, el títulu sufriera un cambéu pequeñu, malapenes una sílaba pero, siempres esi peru, suficiente pa faceme recapacitar en redol l’asuntu.

El títulu falaba d’argumentario, un preséu típicu de gabinetes de comunicación y modernos spin doctors, que’l so significáu esplicábase, creo que con claridá, lleendo la propia tribuna. Al camudalo por argumentu, esto ye, por un razonamientu que s’emplega pa llevar a cabu una demostración, táse-y dando al titular de la cabecera de la tribuna, una ministra nesti casu, una capacidá intelectual que, precisamente, tratábase de poner en cuestión nel escritu. Si non en cuantu al so real coeficiente intelectual sí en rellación cola so capacidá pa decidir por sí mesma n’asuntos de comunicación pública.  

L’asuntu tien un ciertu fustaxe, alloñada de les capacidaes de los titulares de los ministerios, oxetu de la tribuna citada, y va en rellación con la situación anguaño de los medios de comunicación, casi siempres deficitarios no económico y dependientes de l’aición gubernamental –ayudes directes y publicidá- nunos casos o les semi-anónimes plataformes económiques propietaries de los mesmos, notros, que nun tienen como oxetivu la información del públicu precisamente, sinon la “formación” de la opinión d’esi públicu que cada cuatro años, aproximao, nun escaecemos, camudase en votante.

En branu les redaiciones enllenense de becarios, lo qu’enantes llamábemos aprendices. Teóricos titulaos, estudiantes del añu caberu de ciencies de la información, o paganos de un master patrocináu pola propia plataforma peridiodistica, que nun ven diferencia ente argumentu o argumentario, por mui fonderes qu’estes seyan; lo que da pa pensar en cuantu a la so formación cultural xeneral; o aínda peor sobro’l currículu de la so formación universitaria, que nun incluye dalgo tan básicu como’l conocimientu de lo que ye una ferramienta normal del oficiu. O quiciabes tamos énte un casu típicu de saltu de la tecla, anqu’anguaño s’use más el corta y pega, que diera como resultáu esti pleitín d’algame escasu pero, nesti casu, vamos haza la conclusión de que, con esa probetería económica de la qu’enantes escribíemos, yá nun queden correutores nes redaiciones que repasen el productu final enantes d’unvialo a rotatives. Ye lo qu’hai.

Dalgo ta nidio, a min l’anécdota dióme argumentu pa tornar sobro’l argumentariu que dalgún periodista prepara pa los ministros en Moncloa pa tratar de conformar la nuesa opinión.

Raúl Suevos

A 26 díes vencíos d’agostu de 2022

Torna en castellán en repdiv.blogspot.com

Margarita tien argumentariu

 

Mientres un tiempu tocóme trabayar como xefe d’información pública d’un organismu multinacional, importante pol so significáu pero modestu poles so dimensiones y presupuestu. Tan humildosu qu’había que sollertase pa “vender” el productu yá que nun yera avezao que naide viniera a picar a la nuesa puerta. La política de comunicación de nueso yera proactiva, pa ver si pescábamos daqué.

Cuando llográbemos una entrevista pal señoritu –toles organizaciones tienen un señoritu- teníemos qu’andar finos y preparala a conciencia y nello, la parte final, yera l’iguar un argumentariu ad-hoc en función del mediu y’el momentu de l’actualidá. L’oxetivu yera que’l xefe quedara bien y que l’imaxe de la organización saliera reforciada. Nun había munches oportunidaes.

Esi argumentariu implicaba, ente otros elementos, una serie de mensaxes y d’ideyes que guetaben tresmitir la trescendencia de la nuesa mera esistencia, la necesidá de siguir creciendo, la importancia que pa Europa tenía’l conceutu y, sobretoo, lo bien preparaos que tábemos. Yera esti argumentariu, quiciabes, el productu más importante de la oficina de comunicación.

Na alta política, alta pel altor nel organigrama del estáu, cuntase con más medios, especialmente los económicos, que faen que, por poner un exemplu, al doctor Sánchez-y les pongan como a Felipe II, que se decía en tiempos non mui llonxanos. Son les ayudes empresariales y los gastos de publicidá gubernamental que convierten l’argumentario n’innecesariu. Coses de la Secretaria d’estáu de comunicación.

El trabayu de detalle, n’España, ye de suponer que lu desendolca dalgún d’esos cientos, quiciabes milenta, de conseyeros designaos privativamente, que pululen pelos estremaos gabinetes, anque una recien serie danesa, Borgen, apurriómos  la figura del Spin Doctor pa exemplarizanos cómo funciona l’asuntu cuando’l mercáu políticu funciona a la manera lliberal, esto ye, ensin ventaxes de parte. Yera notru planeta, anque fuere Europa.

Equí too ye más simple, dende’l garitu monclovita, quiero suponer que tendrán a lo menos un grupu de whatsapp, llánzense los mensaxes del momentu a los distintos ministerios, en función de calendariu u oportunidá, y asina vemos como varios ministros un mesmu día, y con independencia de la especialidad del ramu, llanzense desaforaos a criticar al líder de la oposición; o clamar escontra’l consumu irresponsable d’augua, magar que’l nivel de los embalses lleva meses avisando; o animar a vacacionar magar l’estáu llamentable de la nuesa economía; inclusive saben de vacunes y pandemies. Son los mensaxes del argumentario gubernamental.  

La víctima cabera del argumentariu tien sio Margarita Robles, recién acabao’l so veranéu asturianu, tiense llanzao a envianos el mensaxe del tronu de fierru avisándonos que vien un inviernu durísimo, y que mos vayamos preparando. Como si nun lo supiéremos.

Raúl Suevos

A 25 díes vencíos d’agostu de 2022

Torna en castellán en repdiv.blogspot.com

La bandera del navarrico

 

Ta güei la prensa deportiva entusiasmada cola medalla d’oru que’l mozu atleta navarru tien algamao nos campeonatos europeos de Munich, y nun ye pa menos pos, si dexamos de llau a los nacionalizaos Quiñonez y Ortega, tenemos que remontanos al roxu y bigotudu Xavier Moracho, na llonxana década de los ochenta, pa llevanos una primer alegría patria nel asuntu de les vallas, prueba que esixe una técnica perdepurada y potencia abondo pa poder esguilar al pódium internacional.

El mozu navarru, de Cizur dicen que ye, un pueblín a un pasu de Pamplona convertíu anguaño en pastu d’adosaos con una  población diez vegaes mayor que la que tenía cuando Moracho s’arrefundiaba en plancha pa ganar unes milésimas a los sos competidores, paez dominar la disciplina a nivel européu, anque el so final apretáu col campeón saliente nun paez una promesa de victories plasmantes, más bien cabe abarruntar subíes de la presión arterial pal espectador aficionáu; como yo.

Ayeri hebo qu’esperar a los minutos caberos de la sesión p’asistir a la carrera final, con doble presencia española amás. Y mereció la pena, anque, una vegada pasada la euforia del momentu, quédame una cierta comeción cola forma de llucir la bandera nacional que’l mozu amosó, apretándola nun puñáu na so mano de forma que quiciabes namái los españoles podíemos decatanos de lo qu’aquello yera. Seique yera simplemente’l momentu inicial pensé, puestu que la escaleta televisiva obligó al corte súbitu de la emisión.

Güei aínda me siguía intrigando la cuestión y gracies a google pude facer una revisión rápida de les imáxes cargaes na rede nes que, desgraciadamente, namái pude atopar una semeya del campeón encuadráu por dos banderes, les franceses de los sos dos acompañantes nel pódium, dambos d’esa nacionalidá y argullosos d’amosar la so enseña nacional. ¿Temor de que nel so pueblu lu llamen españolista quiciabes?

El casu ye que, tres el contentu d’ayeri, quedeme güei un tantu atristáu énte la dulda sobro lo que pasaría pela tiesta del xoven campeón, que debiera conocer sobradamente la liturxa d’esas xestes deportives, y entá me duraría’l pesar si nun fuera porque güei llegaba al acuartelamientu del Reximientu del Príncipe nª 3, n’Asturies, el piragüista Carlos Arevalo lluciendo les sos dos medalles d’oru nel campeonatu del mundiu de la so especialidá, y facíalo amosando, argullosu, el so uniforme de soldáu de la Infantería Española, cola so banderina na manga drecha. Ye lo qu’hai.

Raúl Suevos

A 18 díes vencíos d’agostu de 2022

Torna en castellán en repdiv.blogspot.com

Les caxigalines de Trump

 Escritu vieyu de febreru de 2017

Dende que’l señor Trump ganó les eleiciones nos EUA, muncha xente, non yá no so país, y confieso que yo ente ellos, ta que nun-y  llega la camisa al cuerpu. Los medios de comunicación, de tou tipu y xeografía, tán encantaos cola mina informativa que la so llegada supon. Y nun ye pa menos.

Yo intenté manteneme al marxe del asuntu. Supongo que porque quedé KO dende les mentaes eleiciones; y ye que, anque me creía curáu de los espantos eleutorales yanquis, torné a pecar de pardal. Como cuando George Bush-y robara la cartera a Al Gore y dempués asistimos a aquel espectáculu deprimente de la revisión de les papeletes eleutorales. Y ye que yo tamién pensaba que los EUA yeren, básicamente, Nueva York y los Ángeles; amás, Gore contaba col apoyu de Bruce Springsteen ¡Qué caramba¡ el sucesu enseñóme que la cosa ye muncho más complicada, y pue que tuerba.

A raíz d’esi adefexu eleutoral que’l imperiu mos brindó, decidí ser más frío nos mios anális al respeutu. Pero claro, esta vegada paecía más fácil. Desapaeciu Jeff Bush, que yo creía’l republicanu más fuerte de salida, Hilaria Clinton teníalo francamente fácil. Eso pensaba. Y tamién esta vegada Springsteen, Hollywood y Nueva York sofitaben a la candidata demócrata. De nuevo los pronósticos fallaron. Yo aínda nun me repuse.

Por tolo anterior parecióme prudente manteneme al marxe del asuntu. Amás, el mio amigu Xabiere, capaz de producir ocho fueyes d’una sentada, so cualquier tema de la situación mundial, y ello ensin perder el filo, tienlu permanentemente so la presión de les tecles del so PC. Nun yera la mio guerra.

El casu ye qu’esta selmana una amiga cubana, como rempuesta al mio pedimientu necrófilu, fízome aportar les ediciones del día de la muerte de Fidel Castro, de Granma, Xuventú Rebelde y Tribuna de la Habana y con elles tamién me lanza una petición d’opinión sol fenómenu Trump, que paez preocupa-y más que los resultaos de la zafra del azucar. Y nun puedo negame.

Anicié por preguntame cómo ye posible que’l Imperiu, cola, supuestamente, meyor Constitución posible pal Gobiernu Representativu pue tener una vulnerabilidá tan grande n’algo tan importante como ye la eleición de quien va dirixir el Poder executivu. Nun paez normal y pa ello fuime a investigar nel Federalista. Un llibru que, xuntu con un montón de buenos recuerdos, tráxilu d’un viaxe al México, n’español y edición del 57, y que ye’l compendiu de los artículos que, na prensa de Nueva York, escribieron Hamilton, Madison -5º presidente de los EUA- y Jay, mientres la Convención pa la discusión y redaición de la Constitución de los EUA.

Dempués de la guerra con Inglaterra y algamada la independencia, les trece colonies, yá estaos, entraron n’una fase de descomanáu descontrol, un bordel-lo, na sonora y espresiva pallabra italiana d’innecesaria torna. D’ehí que se convocara una convención pa dotar al conxuntu d’una constitución qu’evitara’l colapsu y el sometimientu final a Inglaterra o a otres potencies. Los artículos del Federalista fueron la base discursiva y formadora de la opinión pública y de la de los propios delegaos. Son tan importantes que’l Tribunal Supremu, cuando dirime temes constitucionales, allégase a ellos pa intentar comprender cuál yera l’ánimu del llexislador naquel periodu constituyente.

En rellación cola eleición presidencial y el so sistema de doble eleición, una primera direuta nos estaos y otra segunda a cargo de los compromisarios escoyíos na primera, paez claro que, ente otres coses, les distancies y los transportes d’entós imponíen ciertes llimitaciones y, poro, adecuaes soluciones. Dafechu, pala Convención, somente asistieron 2/3 de los delegaos elixíos y Hamilton, que foi quien escribió sobro’l tema, y pa esplicar “por qué’l puestu de Presidente rara vez tocará-y en suerte a un home completamente desprovistu de les cualidaes necesaries pa desempeñalu” diz que, ente otres motivaciones, “l’habilidá na pequeña intriga y nos baxos trucos que provoquen la popularidá pue ser suficiente pa encumbrar a un home fasta’l primer puestu nun estáu determináu; pero necesitaráse otra clase de talentu y méritos mui distintos pa ganase la confianza y la estimación de tola Unión”.

A lo caber, paez que’l señor Hamilton, y ello ye llóxico,  magar la fuercia que yá tenía la prensa naquel periodu y llugar, taba lloñe d’imaxinar lo que les modernes técniques eleutorales, col usu de la publicidá, les redes sociales, televisión y tolo que tea al algame de los equipos de campaña, puen llograr y nes que l’equipu de Trump mostróse superior al de Clinton. Sicasi, vienme tamién a la memoria un comentariu d’Ortega en La Rebelión de les mases, onde señala que “la salú de les democracies, cualquiera que seya’l so tipu y grau, depende d’un míseru detalle téunicu –nun sé por qué lo de míseru pa Ortega-, el procedimientu eleutoral, tolo demás ye secundariu”. Si xunimos el fallu de previsión de Hamilton, col acertadísimu comentariu d’Ortega y algunes de les eleiciones llevaes a cabu nos EUA, ye pa echase a tremecer.

Bien, fasta equí lo, quiciabes, negativo. A lo anterior podemos contrapone-y el propiu sistema políticu norteamericanu diseñáu nesa constitución que preparaba la convención citada, un maraviyosu sistema d’equilibrios ente los tres poderes nel que ningun prevalez sobro los otros y que, nos casos d’eleición enquivocada, como, p’algunos, el casu presente, la situación nun corre’l riesgu dise de les manes. Un acaparamientu del poder como nos años 30 n’Alemania o n’Italia, o na actual Venezuela, equí ye imposible y eso siempres ye una tranquilidá.  Sicasi, too esto escríbolo cuando El Economista, el periodicu inglés d’indiscutiu prestixu, acaba de rebaxar a los EUA, nel so índiz añal sol estáu de les democracies,  de democracia completa a deficiente; non pola eleición de Trump sinon pola creciente desconfianza del votante norteamericanu nel propiu sistema.

Vaya too esto como introducción al problema de la mio amiga, que nun ye Trump y el Tratáu Transpacíficu, nin tampocu Trump y Putin. A ella lo que-y preocupa ye Trump y Cuba. Respeuto a lo anterior solo diré que dexar, en términos comerciales, el terrén llibre a China, nun me paez que seya acertáu, pero hai qu’esperar a ver. Y respeuto a Putin, o debemos dicir la OTAN –pala que yá hebo un anicio de rectificáu-, dempués del avance escontra l’Este protagonizáu pol señor Obama, nun paez qu’en dos díes se pueda abandonar a Ucrania y los Países Bálticos. Tamién ehí habrá que aguardar a ver qué pasa. Trump supon una nueva y mayor incertidumbre a los problemes de la xeopolítica mundial. D’India naide fala, pero tamién ta pellí y querrá dicir daqué. Pero eso ye otra hestoria.

Pa falar de Cuba y los EUA tenemos que dir por aproximación, y ello llévanos a Iberoamérica; ehí, no xeopolíticu, enxamás hebo problemes, y nel sieglu XX el que nun yera neutral allinéabase colos aliaos; fasta Cuba tevo oportunidá de fondigar un somarín alemán mientres la Segunda Guerra mundial, lo  que enllena d’arguyu al mio amigu Gustavu. No económicu, atopamosnos cola anunciada política proteicionista de Trump y nesto apunto lo viniente: El proteicionismu, según los economistes, ye una política económica solo recomendable pa países que pretenden poner en pie una industria ellí onde nun la había, ye’l casu del famosu arancel que axudó a desendolcar la industria catalana, eso y les oleades de mano d’obra barata procedente de les rexones españoles menos afortunaes. Aína nesos casos, somente se debe caltener per curtios periodos de tiempu ya que, al xenerar un mercáu cautivu, desincentiva la inversión en investigación y fomenta la corrupción. Nun creo que seya’l casu de los EUA y, amás, los espacios qu’abandone Norteamérica ye mui probable que China, mui presente nestos últimos años, tea pronta pa ocupalos.

Si vamos a la so balanza comercial con Iberoamérica vemos que en 2015 ésta tevo un superávit de 37 mil millones de dólares siendo solo deficitaria con México y Venezuela, de mou que si’l señor Trump zarra’l so mercáu vase alcontrar cola mesma rempuesta y ello traerá la perda de mercaos y emplegos. ¿Quién sabe? Iberoamérica, la zona del mundu con meyor posición de partida pala integración rexonal enxamás llogró progresar nesti campu, quiciás llegó’l momentu pa que l’Alianza Pacíficu y Mercosur, distintes opciones, se conviertan nela base d’una auténtica y potente integración rexonal. Veremos, anque soi de la opinión de que nesti tema reculará, sobremanera porque’l paganu sería’l consumidor EUA y nun creo qu’esti lo consintiese pacíficamente.

El casu mexicanu ye peculiar, “Pobre México, tan lloñe de Dios y tan cerca de los Estaos Xunios”, la esclamación famosa y completa de pesar atribuida a Porfirio Díaz, anque nun yera suya, esplica gráfica y dramáticamente cual foi la principal desgracia del país nestos dos últimos sieglos. Les coses nun paecen haber camudao muncho. México tien a los EUA como primer sociu comercial y estos al primeru como’l so terceru. Lo anterior diznos qu’entrambos deben dir con munchu cuidau coles coses del comerciu y yá vimos que l’asuntu del muru fronterizu ta dando munchu dolor de tiesta, si bien l’amenaza de tasar con un 20% les mercancíes mexicanes foi llueu desmentíu. El norte de México ye una fábrica pal mercáu norteamericanu, non yá les maquiles –fábriques a les que apuerten los insumos dende los EUA  y ellí fabriquen los texanos o calquier otru tipu de producción. Too vien de los EUA y too torna pellí como productu acabáu, beneficiándose d’una mano d’obra bien barata- tamién la industria auxiliar del automóbil  tien ellí los sos grandes centros de producción. Too esto aumenta la competitividá de los productos EUA que nun sólo se consumen ellí, tamién s’esporten pal restu del mundu.

Los mexicanos tienen nes sos remeses el so calcañu d’Aquiles, como-y  pasa a casi toa Iberoamérica, y en particular a Cuba. En 2015 fueron superiores a los ingresos por esportación de petróleo, casi 15 mil millones de dólares, munches perres. Y nesti tema les acciones executives presidenciales puen ser d’efeutu rápidu, anque tampocu equí creo que la sangre vaya a enllegar al riu.

Nel asuntu de los emigrantes illegales toi un poco amoriáu, confíesolo. El muru d’anguaño construyólu Bill Clinton, Obama deportó más que naide y lo que ye más importante ¿Quién se va a encargar de los trabayos básicos nes grandes ciudaes norteamericanes y nel campu? La última vegada que tuve en Nueva York cuasi nun emplegué l’inglés, ellí too’l personal tres un amosador fala español. Más populismo, ensin escaecer que México, de la mesma, tien una lexislación migratoria tremendamente restrictiva. Que-yos lo digan a los centroamericanos.

https://www.youtube.com/watch?v=5mWAYZE1s10

Aportamos a Cuba y equí declárome fondamente desorientáu. La cancelación del Piessecos-piesmoyaos por parte d’Obama dexóme arreguiláu. ¿Una promesa a Raúl Castro? ¿A quién beneficia? ¿Por qué nun-y dexó la xera a Trump? Nun tengo rempuestes, per agora.

En rellación con Cuba hai dos fuerces antagóniques que trabayen nos EUA,  d’un llau la “gusanera”, la emigración cubana na Florida, en apellativu del difuntu Fidel. Estos son los que-y dieron los votos a Trump pa facese col Estáu y suponse qu’ésti ta en delda con ellos, la otra fuercia vien de la mano de los lobbies de l’alimentación y la industria pequeña, ente otros, ardíos toos ellos de facese con un mercáu de más de 10 millones de habitantes escasos de too, tamién d’ingresos pa mercar esos productos.

Gustaríame tener accesu a la internet fonda pa pescudar si les industries Trump tienen intereses na islla, lo que nun ye improbable, pos lo suyo ta na construcción, hoteles, campos de golf, etc. y ehí hai munchu campu en Cuba. Apunto esto porque una de les últimes, y más contestaes, acciones del señor Trump foi la prohibición d’entrada nos EUA pa los nacionales d’una serie de países musulmanes. Fasta ehí nada que nun  anunciara, pero los matices lleguen cuando la prensa se percata que quedaron fora de la prohibición los países onde los Trump tienen intereses, ente ellos los de los pilotos del 11-S. Llamativu ¿non? Amás paez que conxenia mui bien col rey Salman d’Arabia Saudi, xuntu con Quatar los grandes esportadores del wah.abismu, la doctrina islámica que fondamenta muncho del terrorismu islamista actual. A lo último, qu’habrá que ver si los Trump tienen o esperen intereses en Cuba. Yo per agora nun veo per ónde va a tirar anque confieso que nun m’importaría qu’adoptase algún tipu de medida en rellación colos Castro, lo que fizo Obama nun acabo de tenelo claro.

Si naide lo remedia, esti 2017 verá la eleición de la nueva asamblea cubana, d’onde, suponse, colará el xefe de gobiernu que sustituyirá a Raúl Castro en 2018. En too esto nun creo que’l señor Trump pueda facer muncho y, probablemente, veremos a Diaz Canel, güei vicepresidente, presidir el gobiernu cubanu, con Raúl como secretariu xeneral del PCC. No que sí pue intervenir ye nel mantenimientu de la llei Helms-Burton, nos vuelos a la islla y, sobremanera, nes remeses, que si se recorten podríen facer  un dañu tremendu a la economía cubana mas, fasta’l momentu, el señor Trump nun amosó la patuca perbaxo de la puerta. Soi de la opinión de que enterriará la situación.

Pa nun allongame, creo que, en fin y en pos, ye pronto pa sacar conclusiones sobro los caminos que siguirá la presidencia Trump, nin a nivel mundial, nin tampocu col asuntu cubanu. Fasta agora too foi muncho más efeutista que efeutivu. Los diputaos y senadores norteamericanos  xueguense la so eleición a distritu unipersonal, nun hai llistes de partíu, y muchu menos llistes zarraes, caún d’ellos xuegasela nel so distritu y si bien ambes cámares tán agora en poder de los republicanos esto nun quier dicir, nin muncho menos, qu’éstes van plegase a tolo que-yos diga’l presidente. Detrás de cada decisión presidencial fase necesaria una lexislación posterior o un espayáu llegal como vimos estos díes nos aeropuertos de los EUA. Aquel, afortunadamente, yá nun ye un bordello, como nel tiempu de les trece colonies, y too ta muncho más reglamentáu y permediáu de lo que mos pueda paecer dende la vieya Europa. Habrá qu’esperar y comprobar fasta qué puntu la realidá será capaz de poner nel so llugar al señor Trump. 

 

En Zaragoza, febrero 2017

Ventresca nel merenderu

 

El merenderu ye una vieya tradición asturiana de la que van quedando ca vegada menos exemplares, especialmente na so versión urbana. Recuerdo con ciñu en Xixón el que esistía nel altu de Santa Olaya, ente’l barriu de la Calzada y el Natahoyo, al que diba colos mio pás;  tamién cuando llevaba a los mio fios al que s’allugaba xunto al riu Piles no qu’anguaño ye la gran rotonda que reparte’l tráficu nesa zona. Pero anguaño fai falta coche pa dir a un merenderu, con una esceición.

A la entrada de la Guía, camín de Somió, entá aguanta una vieye casa de comíes, Casa Arturo, col so gran merenderu de meses y bancos de cementu na so parte posterior. Quiero pensar que caltien el vezu secular de permitir l’accesu con comida y la obligatoriedá de comprar les bébores, anque nun creyo qu’anguaño la xente faiga muncho usu de lo primero. La so carta cenciella y tradicional caltien el tastu y el atractivo que siempres tuvieron estos establecimientos.

Nós acudimos al reclamu d’una receta poco conocida, la ventresca al fornu; y na fase d’aproximación, mientres el paséu pola zona del Bibio, la mio tiesta díbase caleciendo cola cantinela del mio fiu lleéndome les males apreciaciones que tenía nesi inventu malignu que se llama Trip Advisor. Según él díbamos a una encerrona total, anque la ventresca yá taba reservada vía teléfonica y yo nun taba dispuestu a arrenunciar.

Una vegada ellí, comprobamos que la Casa cuenta con varios ambientes, la entrada tipu chigre, au tamién se puede comer, más allá un comedor modernu y zarráu, al que sigue, yá nel esterior, una zona de terraces cubiertes con mobiliariu modernu, y, finalmente, un merenderu amplísimu con meses de cementu y hasta zona de tobogán pa que xuegue la reciella. Una delicia de merenderu.

El pedíu y serviciu ye como siempres, a cargu del cliente na barra, onde hai que facer cola, como siempres, reitero, u ye posible que s’atope l’orixe de les males calificaciones d’algunos, pocu avezaos a esti tipu de costumes antigües; y depués de esa espera llega’l momentu de los camareros de la barra, atareadísimos y magar ello atentísimos, hasta’l puntu d’aconseyanos recortar el pedíu teniendo en cuenta’l númberu de comensales y el tamañu de los platos. Tamién mos marquen tiempos pa tornar dende la mesa a recoyer nel momentu afayadizu la buscada ventresca.

Dempués, pa baxar la cena, un paséu agradable, Piles abaxo, col Molinón y la Feria faciendo de xendarmes, conduznos al Muru, que mos recibe con una borrina densa y típica del branu que me río yo de les londinenses. Ye lo qu’hai.

Raúl Suevos

En Xixón a 11 díes vencíos d’agostu de 2022

Torna en castellán en repdiv.blogspot.com

Los güertos de La Habana

 

Mientres el periodu especial, los años de fame que pasaron los cubanos tres la cayida de la URSS y la salida de los rusos de la islla bonita, les autoridaes promovieron la cultura de los güertos familiares; cualquier requexu, azotea o patiu yera bonu pa semar daqué que pudiera ser comestible, anque tenía que ser proteína vexetal, como la qu’agora promueven los círculos veganos; la proteína animal taba proscrita, como la crianza de gochos nes cuarteríes destartalaes habaneres, que yera guetada y perseguida por patrulles especializaes como les que dende va dellos años se dediquen a  guetar antenes satelitales peles azotees de la ciudá, muncho más peligroses pa la salú del réxime que la proteína animal. Ye lo qu’hai.

Cuando aporté nel 2010 a la ciudá del hispanocubanu doctor Finlay, padre de la llucha escontra la fiebre amariella, a la que Cuba gracies a él fizo frente, al contrario de lo que anguaño asocede col dengue, tresmitíu pol mesmu mosquitu masivamente, atopéme  yá con una gran falta nel suministru de verdures nos mercaos capitalinos; había escasez de munches cosas y otres consiguíense cola vieya técnica que n’España conocemos como estraperlu. Hasta que daquien m’apuntó la solución; los güertos urbanos.

Yeren estos güertos dalgo anormal pal réxime en cuantu que funcionaben nun sistema cooperativista o casi privao, como les famoses Paladares que la película “Fresa y chocolate” y la Guarida punxeron de moda pal turismu mundial. Ellí podía atopase una gran variedá de productos a precios que nun taben al algame del cubanu d’a pie, siempres a la gueta de la cantidá de proteína, de cualquier tipu, que lu caltenga mínimamente saludable. Güei los hortelanos güeyen al cielu con preocupación.

El cielu tá cubierto de fumu negru, cargáu de povises y golor a petróleu quemáu. Llega dende Matanzas, a cien kilómetros de la Habana y pegadín a Varadero, au dende’l vienres arden los depósitos de combustible de la central petroquímica ellí allugada. Dicen que too entamó con un rayu cayíu sobro’l primer de los depósitos. Muncho rayu o probe sistema anti incendios, qué más da. El casu ye qu’hai abondo de bomberos desapaecíos, casi toos mozos que cumplíen el so serviciu militar y pertrechaos seguramente con medios precarios y adiestramientu somero, y aquello, tres l’esbarrumbamientu de los tres primeros depósitos nun paez desaniciase. Hai pa díes.

Habrá que ver como acaben les verdures habaneres baxo esa nube escura, una más ente les desgracies qu’acosen al pueblu cubanu; una más depués de más de 60 años de revolución castrista y metanes un segundu periodu especial.

Raúl Suevos

A 9 díes vencíos d’agostu de 2022

Torna en castellán en repdiv.blogspot.com

La espada de José Tomás

 

Trunfó esti domingu caberu’l gran diestru n’Alicante, cuatro oreyes, faciendo gala como siempres del so sentir tráxicu del toréu, el so estatuariu dinamismu escontra la fuercia animal, y la so lexendaria entrega, quiciabes por edá y lesiones nuna de les sos tardes caberes d’apoteosis. Y en too ello nun ye la espada l’elementu que lu lleva a la gloria; non más que’l conxuntu del so toréu incomparable. Ye lo qu’hai.

A min, aficionáu humildosu d’una plaza de vieya afición a la que les decisiones polítiques dexaron güérfana de la so tradición taurina, vienme, por embargu, a la memoria, la figura d’otru tocayu estraordinariu, un asturianu inigualable, José Tomás Bovés, caudillu –lo de líder paezme una mariconada- de los llaneros venezuelanos mientres les guerres d’Emancipación, mal llamaes d’Independencia, y que-y dio pal pelo a Bolívar al frente de los sos xinetes hasta que, engarriando en primer llínea, cayó en combate. Dempués, faltos de la so dirección, se pasaríen a les files de los insurxentes, camudando con ello’l cursu de la guerra. Gran figura la de José Tomás.

Los llaneros nun usaben la espada, nin siquier el sable de caballería; lo de so yera la lanza, y tampocu ye probable que Simón Bolívar, aportáu a la corte madrilana como xoven oficial de la milicia caraqueña y suxetu del menospreciu que na capital-y dieron siempres a los aldeanos, fuera mui duechu nel so usu, anque’l tiempu pasáu en Madrid fo abondo pa enxendrar una rensía haza lo español que lu llevaría a traicionar al so comandante, el “precursor”, Francisco Miranda; y a declarar dempués “la guerra a muerte” al español. A la fin, tres dexar tres de so un rastru de repúbliques dividíes, enfrentaes y endeudaes casi pa siempres, sedría un español quien-y diera abellugu pa morrer con una mínima dignidá.

Ayeri en Bogotá entamaba la so presidencia Gustavo Petro, un vieyu terrorista del M-19 qu’aporta a la máxima maxistratura colombiana, como notros países del hemisferiu n’ocasiones anteriores, cargáu de mensaxes d’esperanza, de fechu los que lu ficieron ganar les eleiciones, pero que nun cuenten con eficacia asegurada. Veremos.

Na ceremonia, con presencia del rei d’España, tevo’l señor Petro la ocurrencia de trayer la espada de Bolívar, énte que la so entrada tolos mandatarios presentes se levantaron, quitando’l rei Felipe, al cabu de las esixencias del protocolu pero con una ideya nidia d’au tán les llendes, que permaneció sentáu. Y yo agradezo-ylo.

Bolívar tien cais y estatues en munches ciudaes d’España, quiciabes demasiaes.

Raúl Suevos

A 8 díes vencíos d’agostu de 2022

Torna en castellán en repdiv.blogspot.com

Los chips de Nancy Pelosi

La selmana cabera muncho se tien falao de Nancy Pelosi, la presidenta –speaker la nomen na so tierra- del Senáu norteamericanu, el segundu cargu n’importancia nesi país, dempués del de presidente, qu’anguaño cubre Joe Biden. Y ello debióse al viaxe incamentable de venticuatro hores a la islla de Taiwán, la vieya Formosa de los portugueses y que nós, la España de los Austrias, controlamos mientres un periodu de tiempo curtiu.

A Nancy tánla poniendo a cayer d’un burru –ignoro si esta espresión atenta a los principios de la llei de bienestar animal de la Belarra- porque col so viaxe tien desatao la roxura de los todopoderosos chinos de Xi Jinping, que retrucaron con unes maniobres descomanaes al rodiu y sobro la islla que punxieron de los nervios a mediu mundiu pol peligru de que la cosa –el riesgu de choque militar- vaya a mayores. Que nun cunda la llercia.

Tocantes a Pelosi convien recordar qu’esta señora, ochentaitantos años, lleva tola so vida política, tan llarga como la de Biden, garriando cola China comunista de toles maneras y formes que tán al su algame, y esti viaxe nun ye más qu’una muezca nueva na so traxectoria. Una muezca qu’ella sabe que nun va dir más alló porque ye a los chinos a los que menos-yos interesa que vaya a más. Veamos.

El focu d’atención bélica mundial tá nes llanures ucranianes, y aínda tien recorríu, pero los USA va yá tiempu –presidencia Obama- que tienen pivotao haza’l llonxanu Oriente, haza’l Mar de la China, nomáu asina anque les sos augues son compartíes por munchos países, toos ellos d’importancia vital pal comerciu mundial. Ellí China caltien una política d’imposición unillateral sobro les sos augues dende va dellos años y el crecimientu de les sos fuercies armaes, especialmente la Marina, preocupa especialmente en Washington.

Pelosi tien dío a Taipei, capital de Taiwán, pa recorda-y a China qu’ellos siguen pendientes de los sos movimientos, incluyendo’l sofitu asolapáu a Putin, magar que dalgunes empreses chines, aquelles más susceptibles a les sanciones d’Occidente, dexaren d’operar colos rusos, y tamién que, pel momentu, los Estaos Xuníos nun van permitir una ocupación pola fuercia de la islla de Chiang kai shek.

Taiwán ye’l productor principal de microprocesadores del mundiu, con patentes propies u occidentales, con TSMC y la so producción de 50M millones añales, sirviendo a mediu mundiu, especialmente a China que la so maquinaria industrial depende al 70% de los chips importaos. La destrucción de Taiwán supón la de la industria mundial énte la falta de microprocesadores, y col “internet de les coses” va facer qu’esta dependencia seya entá mayor. Ye lo qu’hai.

Quiciabes poro China tenga yá en marcha dos planes pa evitar esta dependencia, pa 2025 y 2030. Tamién los USA trabayen nesti campu, y va ser entós, cuando dambos puean prescindir de Taiwán, cuando les espades tean verdaderamente n’alto; mentanto, el viaxe de la Pelosi nun ye más qu’una demostración de que la señora tiene los chips bien puestos, y les maniobres chines un simple marcar paquete a la manera de Xi Jinping.

Raúl Suevos

En Xixón, a 6 díes vencíos d’agostu de 2022

Torna en castellán en repdiv.blogspot.com