El mediu ye'l mensaxe

 

Marshall Mcluhan foi un eruditu canadense del sieglu caberu qu’investigó y filosofó con abondanza en rellación col mundiu nuevu –entoncenes- de los medios de comunicación. Él foi quien acuñó’l términu d“aldea global” y tamién la máxima de que “el mediu ye’l mensaxe”.

Estos díes caberos los medios audiovisuales recordaronoslo de forma casi obscena con ocasión de la erupción volcánica de la islla de La Palma. Ellí, una vegada entamada l’actividá y la colada de lava, dieronse cita una serie de cares, les más conocíes de les nueses cadenes televisives, nun esfuerciu non yá de comunicar, daqué que perfeutamente podíen llevar a cabu, y de fechu tábenlo faciendo, los periodistes de les delegaciones canaries d’esos mesmos medios, sinon de transmitinos, a los televidentes que’l mediu y el mensaxe son la mesma cosa. El volcán ellí va siguir, y va continuar tamién el fluxu de lava y la destrucción d’haciendes y medios de vida, daqué qu’esos territorios, conocidos como “malpaís”, llevan llabrao na so morfoloxía, pero en cuanto que los medios detecten un baxón nel interés informativu, por escesiva duración, o por finalización de la erupción; o la inesorable globalidá  xenere otru puntu más importante del interés d’esos mesmos medios, los palmeños van quedar relegaos na parte fondera del torrente informativu, esperando por unes ayudes que se van retrasar nel tiempu y, pa dalgunos, quiciabes nun lleguen nunca.

La mayor parte d’eses cares conocíes, enantes bustos parlantes y desde va un tiempu peripatéticos nel estudio, desapaecieron col aportar del primer fin de selmana, dexando pasu, en dellos casos, a figures de segundu nivel; la vida nel mediu, como en toes partes, tamién ta xerarquizada. A min too esto, quiciás  polo recien de la crisis cabera, la d’Afganistán, déxame un ciertu taste amargosu.

En Kabul asistimos a un exemplo sobeyosu de falta de previsión nacional –dellos países, como Italia, llevaben tres meses preparando la operación d’evacuación- que se pudo maquillar comenientemente cola entrega de un carrapiellu de militares y policíes ellí destacaos, y tamién, por qué nun dicilo, cola cooperación de los medios, interesaos en pasar páxina rápidamente porque ellí, en Kabul, nun había mediu nin poro mensaxe, a lo menos per parte española.

Qué curiosa ye La Palma, qué espectáculu impresionante mos ofrez el volcán, hasta la ministra del ramu turísticu, nun ataque inconcebible d’incontinencia verbal, mos la ofreció pa un futuru viniente y soleyeru. Una pena que’l mediu, camudáu en mensaxe, mos oculte, o mos escamotee, na mayoría de les vegaes, lo importante, la información.

Raúl Suevos

En Xixón a 26 díes vencíos de septiembre de 2021

Torna en castellán en repdiv.blogspot.com

Veda abierta pal ganaderu asturianu

 

Fo siempres difícil la vida del ganaderu n’Asturies. Na mayoría de los casos nin siquier yera ganaderu sinon llabrador con daqué de ganao. Caseríos u, dependiendo de la contorna vivíase del maíz, el centén o’l trigu, inclusive’l miyu; les imprescindibles pataques, la huerta, los gochos y gallines, quiziás tamién delles oveyes, un par de nogales pa vender los sos frutos, unas viñes n’Ibias pa sacar unos cuartos pol par de garrafones d’oruxo d’escedente y, en toes partes, les vaques productores de lleche y de tracción pal carru y el aráu, amás del xatu pa vender na feria. Con esi retratu curtiu yá casi tenemos la realidá secular de l’Asturies rural, la de siempres, la qu’anguaño se mos muerre.

Vien d’entrar en valir la llista nueva d’especies en réxime de proteición especial na que se inclúi’l llobu, y anque les rexones norteñes, au esiste mayor población d’esti cánidu, anuncien recursu en vía xudicial, la realidá representa un elementu de presión añedíu pa la menguante población rural asturiana. Los precios antieconómicos de la lleche en dellos casos piesllaron esplotaciones, notros, los menos, impulsaron el cambéu a la cabaña cárnica. La proteición y crecimientu de la población osera, xerme d’un futuru turísticu prometedor pa los menos, tampocu paez haber ayudao. Agora, finalmente, vien el llobu.

L’agru asturianu paez condergáu a convertise nun páramu deshabitáu. Vamos ser un paraísu natural, entendío esto como la visión promovida polos neo-ruralites recién llegaos a los valles asturianos, o ainda peor, polos eco-urbanites que s’alcuentren detrás de los programes de les modernes plataformes llamaes progresistes, toos ellos formaos, o meyor, adoctrinaos, nes idees o eslóganes ellaboraos nos documentales de la 2 o de los canales temáticos; una visión idealizada pero llueñe de la realidá.

Les montañes asturianes necesiten al ganaderu; yá perdimos a los vaqueiros, y con ellos una parte de la cultura asturiana, pero, ensin l’efeutu benéficu de la cabaña ovina y bovina, el paisax natural, naturalmente conformáu pola mano del home asturianu a lo llargo de los sieglos, va ver como’l monte se va apoderando de too, como yá asocede en munches partes, cola su carga esplosiva de material pa los incendios que, anque esti branu foron mínimos, ensin dulda alguna, de la mano d’esi cambéu climáticu imparable van llegar.

Les alministraciones públiques suponse que deben tener como fin meyorar la vida de los alministraos y per esta vía nun paez que lo vayan a llograr, a lo menos non colos ganaderos.

Raúl Suevos

En Xixón a 23 díes vencíos de septiembre de 2021

Torna en castellán en repdiv.blogspot.com

Capitalidá y estatutu

 

A falta de polítiques tanxibles presentase la seronda, de la mano del presidente Barbón, como una sucesión de pequeñes píldores que deben dar carrete pa dir tirando unos cuantos meses; hasta que se dexen ver per equí los flecos de los Fondos europeos, si ye que lleguen, o se produza dalguna noticia positiva, como la del aportar de los trenes primeros, en pruebes, a la variante de Payares, qu’Adif vien d’anunciar.

La semana cabera foi la de los contautos primeros coles formaciones presentes na Xunta, escluyida Vox por nun creer nel estáu autonómico, Principáu dixit, anque’l partíu gobernante nun tenga embargu p’aliase con independentistes y filoetarres notros llugares d’España. Superada esta primera descarga, con matices, ayeri’l presidente entraba nos medios de comunicación col asuntu de la capitalidá uvieina. Otru aspeutu estatutariu inatacable ya indiscutible, al paecer.

Diz el  presidente qu’esa capitalidá, de factu dende va dellos sieglos, necesita ser ratificada nel estatutu nuevu y debe implicar el caltenimientu de les sees de los muérganos de poder, esto ye, gobiernu, Xunta, Tribunal superior, rectoráu, arzobispáu, etc. ah, tamién la comandancia nueva de la Guardia Civil se presupón ellí llantada. Vamos, lo que yá tenemos.

Uviéu lleva dellos sieglos acomodada na so capitalidá; d’ella viven, y tiene vivío, los miembros d’una clase funcionarial responsable d’esi ambiente tranquilu, calmu y como aformigáu que cola so esistencia dieron pie a la xeneración d’un comerciu provincianu que nos tiempos caberos, especialmente cola llegada de les tecnoloxíes nueves, malapenes llogra sobrevivir.

Podría pensase que tien lóxica la posición de Barbón, pero nesi casu vamos tener qu’entruganos qué foi del cuentu inacabable del Área metropolitana, porque eso paez ser, un cuentu. Un área, la central, aquella inicial enantes de que’l Principáu, unilateralmente, y enantes de poner una piedra, l’ampliara a los conceyos de les ales d’Asturies. Un área que cobra vida propia tolos díes al traviés y pente medies de la Y griega, infraestructura vital de la rexón y a la que se debe, en gran parte, el que’l Principáu nun cayere más baxo de lo que yá tá. Una zona central d’una Asturies que’l 2020 perdió el 0,7% de la so, yá amenorgada, población.

El casu ye qu’al presidente preocupa-y qu’Uviéu tenga la so declaración de capitalidá, y el so seguru de dormiyosa vida provinciana, pa poder siguir tirando nesi “equí me les den todes” por cuenta del restu de los asturianos, y de lo que bonamente caiga de Madrid, o de Bruseles. Un gran futuru.

Raúl Suevos

En Xixón a 18 díes vencíos de septiembre de 2021

Torna en castellán en repdiv.blogspot.com

Somarinos españoles p'Australia

 

Saltó’l xueves caberu la noticia de que los EEXX van vender dolce somarinos de propulsión nuclear a Australia, y tamién la robla d’un pautu defensivu, o militar a cencielles, nel que s’inclúi’l Reinu Xuníu. L’AUKUS lu nomen, y vamos tener que dir avezándonos al acrónimu nuevu.

En Francia la noticia cayó como una bomba, afórrome’l calificativu de nuclear porque podría paecer de mala lleche, yá qu’ellos yá firmaren colos australianos la construcción d’una dolcena de los sos modernos somarinos de tecnoloxía convencional, y agora’l negociu camuda en fumu. Un negociu de 50 mil millones d’euros que se sofitaba na construcción del somarín nuclear Barracuda en versión convencional, porque hasta antier Australia declarabase antinuclear. Hai que ver cómo camuden les coses d’un día pa otru.

Dicen que los chinos quedaron gúeyipláticos[i], na midida que eso seya posible pa un chinu, pero a naide se-y escapa que’l cambéu de paecer sorpresivu de los australianos xustificase na política de chulo de barriu que la marina china desendolca nel mar del mesmu nome; política asertiva la nomen anguaño. A nós, los españoles, paez que nun mos afeuta pero, va dellos años, el negociu paecía de nueso.

En 2013 saltó la llebre nel mundiu de la defensa de que’l somarino español, el S-80, llamáu a ser la prima dona nel baille internacional de los somarinos convencionales, cola so propulsión a hidroxenu y otros elementos avanzaos qu’incorpora, taba demasiáu gordu y yera probable que nun flotara, daqué verdaderamente incómodu pa los tripulantes futuros, polo qu’había que refacer tol proyeutu, que güei, 2021, avanza a bon ritmu col primer exemplar yá a puntu de facer les pruebes de navegación. El patinazu nel diseñu supunxo qu’Australia, el cliente exterior principal de Navantia dende va dellos años, se decantase pol proyeutu francés que güei pasa, sorpresivamente, a manes yanquis.

Paez que, visto l’AUKUS, lo d’occidente, n’asuntos de defensa, definse en clave anglosaxona, y non yá Francia, que de la mano del so presidente Macron yá lo vien avisando, sinon tola XE debería tomar nota y ponese en marcha tocantes la defensa, y non yá a la defensa énte pandemies, que tamién, pero sobre too en lo que se refier al ámbitu de les rellaciones internacionales, inclusive la OTAN, au, si siguimos yendo con 28 voces, vamos facer tantu ruiu que va ser imposible que la nuesa voz s’escuche.

La cume europea en materia de defensa convocada pola señora Von der Leyen pa la primera metá de 2022, mientres la presidencia francesa, única potencia nuclear europea, pue ser un bon entamu p’aniciar.

Raúl Suevos

En Xixón a 17 díes vencíos de septiembre de 2021

Torna en castellán en repdiv.blogspot.com

---

[i] Esti ye, paezme, un neoloxismu recién creáu qu’ofrezo de gratis a l’Academia de la LLingua

L'órdagu de Joe Biden

 

Nel xuegu del mus, d’ampliu desendolcu nel país anque con preferencia nel norte d’España, un de los lances o xugada más famosu yel conocíu órdagu, nome que vien d’una espresión en vascuence que quier dicir daqué asina como “ehí ta”, o tamién “vamos velo”. Un “hasta equí llegamos” pues implica’l tou o ná nesi puntu de la partida.

Nel casu de Biden podríemos pensar qu’entá tamos al entamu de la partida, quiciabes un pocu pronto pa un órdagu, pues una presidencia supón cuatro años y él malapenes lleva unos meses, dende’l xineru caberu, pero, quiciabes poro, yera’l momentu fayadizu pa llanzar l’órdagu sobro Afganistán, una partida perllarga, venti años, que a los EEXX suponía-yos una sangría económica descomanada, inclusive pa ellos; una pérdida constante de prestixu nel ordre internacional y, más importante, de vides norteamericanes y votos nel planu nacional.

Sobro Afganistán dixóse yá casi too. En breve, una entrada non planificada e innecesaria de Bush Jr, una promesa de salida d’Obama que se traduxo en más tropes, un alcuerdu de salida mal negociáu de Trump y, a la fin, un escape a cualquier preciu de Biden. Pero les imaxes del aeropuertu de Kabul, que va dar pa noveles y películes, yá lo verán, nun torguen ver al observador atentu que los EEXX acaben de desemtamagase d’una mochila perpesada y con ella un dispendiu presupuestariu enorme. Biden pue agora dedicase al programa que lu llevó a la presidencia.

La política internacional ye realista y ye fácil dase cuenta qu’anguaño los EEXX tienen más llibertá d’aición. Per otru llau convien nun escaecer que’l New Deal de Roosevelt, tres la crisis del 29, consistió nun programa d’infraestructures terrible que punxo la maquina industrial yanqui a too gas; daqué paecío a lo que llevó a cabu Eisenhower, tres el baxón posterior a la Guerra Mundial, cola so construcción de la red interestatal d’autopistes. Biden tien un problema semeyante, recuperar la maquinaría yanqui, ponela a funcionar a tou trapu pa facer frente a l’amenaza real, el desafíu chinu; eso ye lo que se nasconde tres el so programa eleutoral nel que la puesta al día de les infraestructures del país yera lo principal. Y pa eso necesita dinero, perres, parte de lo cual va venir del aforru afganu.

Cola recuperación económica de los EEXX va llegar también la so capacidá pa retrucar a China, qu’agora paez llevar ventaxa. Y convien nun escaecer tampocu que Kennedy entamó la so presidencia chaplotiando na Bahía de cochinos, en Cuba, y depués yá ven.    

Raúl Suevos

En Xixón a 15 díes vencíos de septiembre de 2021

Torna en castellán en repdiv.blogspot.com