Lliandura y delicadura son les cualidaes que la RAE aplica a la morbidez y demientres dellos sieglos, especialmente nel arte, asociábase coles suxerentes figures femenines que los grandes pintores presentaben nes sos composiciones renacentistes, reservaes entós pa la esclusiva vista de los poderosos que les encargaben. Yeren otres dómines, y tamién otros cánones de belleza, porque nos tiempos caberos esa figura, la mórbida, recuerda más a un tipu d’obesidá que güei se considera una enfermedá y una plaga social.
Esta obesidá mórbido estenderexase como una epidemia, especialmente nes sociedaes occidentales, les supuestamente más opulentes nel mundiu, anque, cuando reparamos el fenómenu nel so detalle, descubrimos que son les capes sociales más desfavorecíes les que, frecuentemente, se ven más algamaes pola enfermedá. Una combinación de falta de cultura y, sobremanera, falta d’ingresos, muy probablemente, ye lo que ta tres ello.
El casu ye que, estos díes caberos, güeyando les imáxenes de los refuxiaos afganos qu’aportaben al país de nueso, llamábame l’atención la falta de gordos ente los recién desembarcaos. Ellos, casi toos, elegantes nes sos camisoles y pantalones a xuegu, típicos de la vestimenta masculina d’esi país, y elles; elles meyor nun entrar na so vestimenta pos vamos acabar nel odiosu burka que va tornar a campar naquel país. Pero toos perfeutamente delgaos, como correspuende a sociedaes au la lliandura y la delicadura nun esisten.
La mio esperiencia profesional llévame a recordar les xentes del Kósovo y Bosnia demientres la dómina de los sos conflictos. Ellí tampoco había obesidá mórbido, nin de dala otra clas; ellí toos taben delgaos; en dellos casos dramáticamente delgaos, como asocede naquellos llugares nos que’l conflictu armáu se convierte na actividá principal y el bienestar personal namái ye una entelequia.
Nós alluchámonos estos díes no bono que lo ficimos na evacuación afgana, yá llegará’l tiempu de los detalles, y pasamos per alto los indicadores que mos amuesen cuan llianda y delicada se tornó la nuesa sociedá. Una sociedá na que los mozos del botellón que salten percima de les normes y agreden a la policía, una policía xeneralmente con órdenes de nun responder, son muncho más representativos de la España futura de lo que pueden ser esos soldados esplegaos en Kabul, compañeros de los mesmos que, demientres dellos años d’espliegue afganu, foron escaecíos o simplemente desapaecíos de la información por la mor de tresmitir una imaxe sele de lo qu’ellí asocedía. Una imaxe lliando y delicao, mórbido, como la nuesa sociedá.
N’Italia, cuando llega la Navidá, el panettone ye’l rei de la gastronomía, el so grao de morbidezza ye’l que marca la calidá del mesmu. Quiciabes debiéramos entamar a pensar qu’esi ye l’únicu puntu mórbidu qu’interesa y aniciar a trabayar pa erradicar l’otru, el de la obesidá físico y mental de la nuesa sociedá, enantes de que, como col cambéu climáticu, seya demasiao tarde.
Raúl Suevos
En Xixón a 2 díes vencíos de setiembre de 2021
Torna en castellán en repdiv.blogspot.com
No comments:
Post a Comment