Ye la loxística !mazcayos¡

 

Cuando se fala de la primer guerra d’Iraq aína vien l’alcordanza del xeneral Schwarzkopf, comandante en xefe de la operación, anque l’artífiz del so ésitu fo’l xeneral Pagonis, xefe de la loxística y primer norteamericanu n’aportar a la zona d’operaciones. El diseñó tol sistema loxísticu que diba sofitar toa aquella operación que lu llevaría, al acabar la guerra, a desendolcar una carriera esitosa nes empreses loxístiques más importantes de los EEXX. Ye lo qu’hai.

Cola guerra d’Ucrania, de consumu diariu al traviés de redes y grandes medios de comunicación, too paez cixise a la espectacularidá siniestra de los bombardeos de los misiles rusos, la precisión mortal de la moderna artillería ucraniana y la sorprendente eficacia de los medios contracarru d’esa mesma infantería. Pero detrás d’eses imáxenes hai otra historia, más estudiada, más complicada.

Los rusos, pa sorpresa de toos, embarcáronse na incomprensible invasión d’Ucrania con cuatro exes de penetración que, enfrentándose a la “rasputitsa”, el barru primaveral, obligabalos a cinxise a les víes asfaltaes au los esperaben les unidaes d’operaciones especiales ucranianes, y au pudimos apreciar los problemes loxísticos básicos rusos, que s’empantanaben nos dos exes que dende Jarkov y Jersón trataben de baldíu d’embolsar a les Fuercies de defensa ucranianes defensores del frente del Dombás.

Estes fuercies son quiciabes la parte más importante de la maniobra ucraniana pos teníen la misión d’aguantar y afitar l’esfuerciu principal rusu una vegada que los exes de Jarkov y Kiev foron refugaos pola infantería lixera de los defensores. Ellí nel Dombás tratábase de ganar tiempu pa que la movilización xeneral decretada por Zelensky pudiera organizar, equipar y formar les nueves unidaes del exércitu, loxística. Y foron a consiguilo, mientes facíen llegar al frente un fluxu de medios de combate apurríos pola mayoría de les naciones occidentales, tamién loxística.

La fase viniente diba llegar, tres una maniobra de decepción magistral sobre Jersón, col bombardéu selectivu con artillería pesada dotada de proyectiles intelixentes, Excalibur, y colos cohetes HIMARS de guía satelital, llegaos d’occidente y previa formación de les unidaes artilleres nos países proveedores, tamién loxística, como lo foi y  ye’l fechu de tomar como oxetivu les víes loxístiques ruses y los sos depósitos y arsenales que diben dexar desangraes a les sos unidaes.

Entramos nuna nueva estación, l’hibiernu centroeuropéu, que sirve a los ucranianos para recuperar y relevar unidaes con vistes a la situación nueva na que’l millón y mediu d’uniformes d’hibiernu desapaecío misteriosamente de los inventarios rusos, loxística, ta yá suponiendo un esgaste tarrecible pa les so tropes, como dalgunos videos de grupos de soldaos semiinconscientes pola hipotermia tán amosando. Y ye que dormir ensin sacos, nin tiendes, nin refuxos decentes, mal alimentaos y cola moral perbaxa nun ye mui saludable.

La noticia loxística cabera lleganos del campu ucranianu que ta únviando parte de la so artillería pa caltenimientu fonderu de les ánimes de los cañones debío al esgaste esperimentao demientres la campaña pasada. Nin que dicir tien que los rusos deben tar esperimentao’l mesmu problema anque se desconoz, pel momentu, si la so loxística va ser a resolvelo, anque lo que mos llega nun presaxa un res de bono.   

En retaguardia la loxística ucraniana en forma d’equipos mui eficientes y voluntariosos de tou tipu de profesionales civiles tán algamando a recuperar les redes d’augua y electricidá golpiaes pola criminal campaña de bombardeos rusos sobro oxetivos civiles tamién ta ganando la batalla a la canalla putinesca.

Vien agora la campaña invernal na que, visto lo visto, ye previsible que la loxística ucraniana torne a ganar pola mano a los rusos que, nel casu de Crimea, yá tán práuticamente aisllaos de la madre Rusia. Vamos esperar qu’asina seya y tamién que los demás tomemos nota de too esto, anque nel nuesu casu llama l’atención la desapaición del Cursu superior de loxística del Exércitu de Tierra, por una decisión que yá nel so momentu paecía difícil d’entender y qu’agora, el desendolcu de la guerra n’Ucrania, paez amosar que fo un erru descomanáu.

Raúl Suevos

A 28 díes vencíos de payares de 2022

Torna en castellán en repdiv.blogspot.com

Traducción 

Condergaos a la segunda división

 

Díbemos un pocoñín subíos de moral últimamente colo del aportar del AVE a Asturies, que’l señor Barbón señaló pa mayu énte la dubitativa ministra del ramu; y si bien va ser un AVE d’aquelles maneres, a la espera, vaya vusté a saber pa cuando, de la llegada de la infraestructura al términu xixonés, sí que paecía danos un soplu d’esperanza dempués de tantos años. Ye de suponer qu’aínda más al dirixente socialista que con un güeyu mira a les víes y col otru al calendariu electoral.

El Sporting ente disgustos, alegríes y decepciones, nun paez que defina con clarencia una sienda que lu lleve a cantar la ranchera mexicana de la primera división. Pero ye que’l mundiu del futbol ye asina, y entá con más clarescuros si mos vamos a contemplar el mundial anguaño en xuegu, au unos y otros pasen de la risa al lloru con velocidá ablucante. Una rapidez que nun tienen les cosas d’Asturies.

Acaba de ratificase por parte d’Europa la red global de comunicaciones ruteres de la mesma y ellí, pa desgracia de nueso, y d’algunos otros arrequexaos, nun se contemplen les autovíes haza Madrid, lo que mos dexa ensin accesu a los tan necesarios fondos europeos. Ye lo qu’hai, pero, si güeyamos con atención el mapa de tales rutes, que son negociaes pol gobiernu de la nación, salta a la vista que les rexones más privilexaes son aquelles, sorpresa, que cuenten con fuertes partíos nacionalistes, o meyor, independentistes, como ye’l casu de País Vascu y Cataluña.

El noreste, Asturies y Galicia, queda postergáu, y dalgún podrá pensar que la segunda paga les consecuencias de votar al partíu opositor demientres demasiao años, pero, nel nuestru casu, siempres de dócil votu socialista, esta premisa nun paez casar con tala idea. Tampocu hai consuelu pa los aragoneses, tamién parroquianos del partíu de Pablo Iglesias, l’autenticu, y que, magar tener pol túnel de Canfranc una ruta perdirecta haza Europa, con llínea férrea incluyida, tampocu ven los sos pruyimientos colmaos cola inclusión en tan deseyada planificación europea.

Seguramente habrá munches razones, asina vannoslo esplicar llegáu’l momentu electoral, si ye que dalgún pretendiente lo saca a colación, pero la realidá es emporfiada y paez querer glayanos qu’hai rexones que, combinando’l mayor pesu poblacional, que se reflexa en representantes nes Cortes, y el nuesu sistema electoral que prima la concentración del votu en determinaes árees, dándo-y mayor valir al mesmu, llogren sistemáticamente que’l gobiernu de turnu se vuelque nelles en perxuiciu d’aquelles que, obedientes y despoblaes, amostiense na segunda división.  

Raúl Suevos

A 27 díes vencíos de payares de 2022

Torna en castellán en repdiv.blogspot.com

Un abortu de sociedá

 

L’asuntu del abortu ye siempres entrellizáu. Nun importa l’ángulu dende’l que se lu quiera enfocar, nunca hai aselu nel analis porque, se quiera o non, toos sabemos que se trata del fin d’una vida; más o menos incipiente, con meyores o peores perspectives vitales, pero una vida, en definitiva.

A min nunca me prestó, quiciabes porque la nuesa primera oportunidá acabó con un abortu espontáneu, o quiciabes porque, nel fondu, soi muncho menos “progresista” de lo que creo, pero, el casu ye que cola edá  voi tornándome cavegada más críticu tocantes al fenómenu del abortu voluntariu. Ye lo qu’hai.

Entiendo la congoxa de les madres futures que, por razones varies, vense emponíes a tomar semeyante decisión, que toi seguru que va dexar buelga indeleble nel ánimu d’eses persones; y entá recuerdo, va yá abondo d’años, cuando amás del ablayamientu natural qu’ensin dulda produz esa decisión, les españoles veíense obligaes a pelerinar per Europa pa sometese a la operación amarga. Anguaño la cuestión tien camudao abondo.

Güei n’España l’abortu ye llibre hasta la semana 14ª, y pue efectuase hasta la 22ª en casu d’enfermedá grave o malformaciones nel fetu, y lo único que se me ocurre apuntar ye que n’Alabama, Estaos Xuníos, cuenten col record de supervivencia mundial pa un bebé de 21 selmanes y un día. A partir del datu caún pue pensar lo que-y pete.

Muncho más allá de la llende española tienen llegao los británicos qu’acaben d’aprobar l’abortu hasta’l momento mesmu del partu en casu d’enfermedá grave o, ablucai-vos, síndrome de down, y, qué quieren que-yos diga, anque yá a raíz de lo del Brexit paecióme que’a los fios de la Gran Bretaña habíase-yos ido la pinza, con esta decisión nueva, recién aprobada pola instancia xudicial más alta, creo qu’algamaron cumes insuperables nel so camín de destrucción social, nel que, na mio opinión, yá diben abondo llanzaos.

Lleendo la noticia nun podía sinon pensar en dos bonos amigos, dambos con fíos con carauterístiques mui personales, un d’ellos con esi síndrome de down que produz persones maravioss y a los que los británicos paez querer condergar ensin dase cuenta que, seique, lo que tán faciendo ye manifestar que la so sociedá como tala aportó al puntu de culminación, dalgo paecío a lo de los rusos nel so intentu d’invasión n’Ucrania; un puntu, a partir del cualu, vien el descensu, nesti casu como sociedá, porque matar a los bebés down con esti nivel d’impunidá ye la espresión del propio abortu como sociedá humana.    

Raúl Suevos

A 25 díes vencíos de payares de 2022

Torna en castellán en repdiv.blogspot.com

Un rostru del pasao

 

Nun lu conozo más allá de les sos mui contundentes intervenciones nel Congresu de diputaos; siempres de curtia duración como correspuende al so enantes grupu minusculu, y agora como parte del Grupu mistu, pero en toles ocasiones faise notar pol so verbu directu, tayante, y de pallabres llanes, cencielles, ensin dalu tipu de circunloquiu.

El diputáu García Adanero tien un rostru que m’apurre alcordances daquelles  estampes vieyes de requetés. Resultame fácil maxinamelu cola so boina collorada, la so manta cruciada sobro’l costazu contrariu al del fusil, y el detente bala nel bolsu de la camisa, sobro’l corazón; anque esti navarru nun naciera nel reinu vieyu sinon na Talavera toledana. Pocu importa, pos paez comulgar con postures y actitues qu’anguaño tán en desusu y recuerden a la fe infrayable daquellos vieyos soldaos, güei denostaos pola llei de memoria democrática y énte los que corrieron los gudaris vascos.

Conocimoslu con alocuciones curties sobro asuntos rellacionaos col terrorismu etarra y los partíos qu’en Navarra, direuta o indirec¡utamente, sofiten l’escaezu o la aceptación daquellos asesinatos sanguinarios. Tamién s’amuesa combativu escontra l’avance constante ya interferencia de la política vasca en Navarra, especialmente nestos tiempos caberos nos que les xeneraciones nueves, tres años d’abandonu nel planu educativu y aculturación nes ikastoles, paecen avanzar haza un equilibriu políticu nuevu na rexón.

Cola votación de la Reforma llaboral, superada pol doctor Sánchez gracies a la enquivocación d’un diputáu popular, dio la campanada xunto al so collaciu Sayas al votar escontra de lo ordenao pol su partíu, dalgo qu’a dambos-yos costó la expulsión del so grupu. Pero tien sío estos díes cuando, otra vegada, la so voz tonante se tien dexao oyer pa poner n’evidencia al ministru Bolaños en relación cola retirada de la Guardia Civil de tráficu de Navarra, dalgo doliosu en sí mesmu, pero especialmente enxitosu al ser pagu del votu de los heriedes bildutarras d’ETA na votación de los presupuestos del estáu.

Nun sé si na llexislatura viniente vamos ver otra vegada’l rostru pétreu del señor García Adanero, una cara que paez sacada del pasao, como si nél se hubiera inspirao Xuan d’Avalos pa les sos escultures del Valle de los caíos, yá que, posiblemente, faltu del sofitu del so vieyu grupu, nun ye seguru qu’algame a llograr un curul nes Cortes españoles dende la plataforma política qu’él y el señor Sayas crearon.

Ye lo qu’hai.    

Raúl Suevos

A 25 diés vencíos de payares de 2022

Torna en castellán en repdiv.blogspot.com

A la pita España malapenes-y queden plumes

 

De neñu pasaba los branos na casa familiar de Marentes, n’Íbias. Yera un estivu tremendamente risonderu y sorprendente pa un guaḥe de ciudá, anque’l Xixón de finales de los cincuenta tampocu ye que fuera Manhattan precisamente. Y el mundiu animal del caseríu, abundosu, aportaba un plus descomanáu al conocimientu de la vida que la escuela nun podía suplir.

Entá tengo l’alcordanza de qu’ente les pites solía haber una d’apariencia malfecha, con poques plumes, menos cadía. Una pita que yera oxetu de la roxura del gallu del corral y tamién de les propies collacies, qu’a picotazos dibenla desaposiando del so plumaxe, dexando ver un cuerpu esbirriáu en comparanza col volumen polencu que les plumes daben a les so hermanes. A min, malapenes un guaḥe de cinco añiños, l’asuntu dábame pa velees que, en munches ocasiones, cortaba’l glayíu nochirniegu de la raposa intentando en davanéu asaltar el piteru. Al cabu d’un tiempu la hestoria finaba de secute cuando la tía Sara facíase cargu del negociu, y la espenada pita acababa nel pote.

Estos díes vienme’l recuerdu de la pita cuando güeyo lo qu’asocede cola subasta qu’un gobiernu débil se ve obligáu a facer pa sacar alantre los so presupuestos. Dalgo, por otra parte, abondo normal nel xuegu parlamentariu naquellos países que tienen la suerte de contar con esti sistema políticu. Pero suponíase qu’había delles llendes infranquiables a la hora de subastar, pos eso paez la situación anguaño, los recursos del estáu.

Les noticies d’ayeri dieronmos cuenta de les plumes caberes, per agora, que-y rincaron a la pitaa España. Dalgunes yeren pa facenos llorar a los asturianos al tomar razón de los 250 mil euros que van dir pa la promoción del circu en vascuence. ¿Nun me digan que nun suena a coña? Mientes l’Academia de la LLingua supongo que va deber esperar a que dalgún diputáu valencianu, como l’añu caberu, introduza una moción pa dotar con 100 mil euros a la humildosa institución rexonal.

Polos pasiellos de les Cortes siguen cayendo les plumes de la pitaa, de más que improbable reposición, y una de les caberes, y quiciabes la más dolorosa polo qu’implica, foi la retirada de la Guardia Civil de tráficu de les carreteres navarres. Una pluma que se va llantar  a mou de troféu nel so penachu’l grupu Bildu, heriede de los asesinos d’ETA, que con esta cesión del doctor Sánchez algama que’l sangre derramao demientres los años de chombu paeza que nun sirvió pa un res, y qu’aquellos guardia civiles de la Barranca se sientan güei como si la xauría d’Alsasua siguiera patiándolos nel suelu. Ye lo qu’hai.   

Raúl Suevos

A 23 díes vencíos de payares de 2022

Torna en castellán en repdiv.blogspot.com

El mundial wahabita

 

Estos años caberos, desgraciadamente, fumos acostumbrandomos a oyer y lleer pallabres como yihadista o salafista. Pallabres rellacionaes col fenómenu del terrorismu islamista pero que nun tienen una connotación inicial terrorista, como se pudiera pensar d’entamu.

El conceutu salafista fai referencia a los salafs, los compañeros del profeta, y tómalos como referencia de pureza vital y relixosa p’aquellos musulmanes que quieran vivir la so relixón con firmeza absoluta. El yihadismu, sicasí, nacíu cola “interpretación” del Llibru y los fechos del profeta, fala del combate interior del fiel p’agradar a Dios, lo que sedría la gran Yihad, y el combate colos infieles pa traelos al únicu Dios, esto ye, la pequeña Yihad, que ye la qu’impera nos campos de batalla dende’l sieglu VII.

Col pasu del tiempu los asuntos de la Fe foron viciándose, ablandándose, esmuciéndose, de forma que a lo llargo y ancho del  mundiu islámicu diben apaeciendo corrientes purificadores que, xeneralmente con ayuda del alfanxe, traíen otra vegada a la corrada a les oveyes escabarriaes, como pudieron comprobar los relaxaos musulmanes de Al-Andalus col aportar d’Almohades y Almorávides, radicales siguidores de les doctrines salafistes y los sos corolarios yihadistes.

Nel sieglu XVIII, nuna Arabia entós ocupada por un sultanatu turcu indulxente con otros pueblos y relixones, y nada rigorista na interpretación del Islam, apaeció un predicador radical de nome Muhamad Ibn Abd Al-Wahhab, que tres aliase y casar a la so fia con un tal Muhamad Ibn Saud, va dar llugar a la saga Saudita que va liderar la independencia d’Arabia nel planu políticu y a la corriente relixosa radical conocía como wahabismu. Alianza qu’anguaño sigue dirixendo’l país y que s’estendió a otros llugares, como’l Qatar que güei llena les pantalles de mediu mundiu.

Qatar ye wahabita, y radical, como la notoriedá del mundial ta poniendo n’evidencia, quiciabes demasiao tarde, pal públicu en xeneral. Ellí, camuflada ente la rellumanza de los petrodólares, tán les caxes de caudales que financien rexímenes radicales y grupos terroristes, como los qu’imperan y asuelen les tierraes del Sahel, la Extremadura d’Europa; tierres d’u van venir nel futuru próximu folades de desesperaos inmigrantes, y zones de combate pa los nuesos soldados anguaño, y muncho más nel futuru.

El mundial de Qatar ye una gran operación de mercadotecnia política de la que nunca va llegar a sabese cuantes voluntaes, y a qué preciu, se mercaron pa la so eleición, pero, más allá de los estadios campanudos y el brillu de los futbolistas, quédense cola realidá. Ye un mundial wahabita qu’empericotia a una dinastía islamista radical. Ye lo qu’hai.

Raúl Suevos

A 21 diés vencíos de payares de 2022

Torna en castellán en repdiv.blogspot.com

Discursu d'agradecimientu

 

Mui bonos díes, dames y caballeros:

Tomo la pallabra nel nome de los premiaos con estos Premios Revista Ejército 2022, y en primer llugar prestaríame agradecer al Xefe del Estáu Mayor del Exércitu la so presidencia d’esti actu, que queda asina rivistíu d’una relevancia especial. Tamién al restu d’invitaos, con particular afectu a familiares y amigos. En segundu llugar, agradecer a la Revista, personificada nel so xeneral director, por tener la deferencia d’asoleyanos los artículos nel so momentu, y posteriormente señalalos pa la concesión del premiu. Munches gracies.

Tien sío esti añu caberu, como casi tolos de la nuesa historia, ricu n’aniversarios de sucesos estraordinarios, y ye quiciabes poro qu’estos tres artículos fácense ecu de xestes, qu’en dalgún casu, contienen resonancia global, y toos ellos son amuesa del épicu y lexendariu valir de los soldaos españoles.

El teniente xeneral Muro, referente militar pa la mio xeneración na so etapa d’actividá, qu’a min me devuelve a los tiempos de Bosnia i Herzegovina, y qu’agora, arrequexada la espada, y reconvertíu en guía de la recuperación histórica de fechos y valires pente medies la pluma, allantanos en “Los Tercios en Lepanto” con una descripción sintética de la historia xeneral de los mesmos, que fina col so desempeñu gloriosu en “la más alta ocasión que vieron los siglos”, y qu’a min tresportame otra vegada a Mújica Láinez y la so descripción del combate na galera del duque Orsini, lectura de la mio mocedá. Un exerciciu de virtuosismu lliterariu nel arte de facer más con menos, ciencia na que, desgraciadamente, dalgunos responsables institucionales vense a vegaes obligaos a especializase. Les mio felicitaciones, mi xeneral.

El comandante Cañete, articulista de llarga trayectoria nos medios de calter históricu/militar, y autor d’una obra reconocía sobro’l reximientu Alcántara y la so Laureada, algama nel su premiáu artículu llevanos, a caballu de les sos llínees, a aquel día malfadiáu, pa sentir el polvu asfisiante metanes el calor sofocante y baxo’l fueu enemigu, y sobre manera, la voluntá soberana d’entregar la vida pola patria y los compañeros que la so proteición se-yos encomendara por parte d’aquellos homes y guaḥes qu’escribiríen, quiciabes, la xornada más gloriosa de la caballería moderna. Norabona, mi comandante.

No qu’a min me toca, atreveríame a dicir que pocu mérito tien el premiu, que comparto cola muyer, primera crítica de tolo qu’escribo, pos el mio trabayu nun ye sinon un comentariu humildosu a les Cartes Rellación de quien pa min  representa, xunto al Gran Capitán, la cume del xeniu español, don Hernán Cortés, quién nes sos Cartes, que la so lectura completa dende equí encamiento pa les nueses Academies de formación, da cuenta de la conquista del imperio azteca y del nacimientu de la nación mexicana, que la so paternidá-y correspuende. Fácil lo tenía quien como yo, nun facía más que comentar los renglones del xenial almirador de Cesar y Alexandro.  

Quisiera felicitar tamién al teniente García Moya, señaláu güei con un diploma qu’acredita la so colaboración dilatada cola Revista y que supón una forma de reconocer el trabayu, l’amor a la institución, y la dedicación qu’hai detrás de caún de los artículos que proponemos a la revista, y que nun siempres algamen l’oxetivu de vese asoleyaos.

Reitero pos, el mio agradecimientu nel nome de los premiaos a la Revista Exércitu pola difusión adicional que con ello llogren los escritos de nueso, y, puestu que nello tamos, prestaríame facer unos comentarios sobro la propia Revista, que m’atrevo a conxeturar que los mio collacios van compartir.

La Revista Exércitu, una mocina adorable de 82 años, tien la responsabilidá de ser “la publicación profesional militar del Exércitu de Tierra”, nada menos. Y esto asocede cuando asistimos quiciabes a la revolución más fondera de los asuntos militares, como podemos observar nos más recientes conflictos, el de Nagorno-Carabaj y el entá en cursu n’Ucrania, au la combinación del emplegu de les tecnoloxíes de la información colos más clásicos usos del Arte de la guerra “glayenos” la necesidá de dir más allá na puesta al día de los miembros del Exércitu, daqué no que la Revista tiene muncho qu’aportar.

No qu’a min me toca, y dada la mio condición de retiráu, tengo de dicir que como modus operandi tocantes cualquier asuntu rellativu al Exércitu que requier aclaración, ye la Revista Exércitu, a la qu’uso como si d’una aplicadura informática se tratara, la que m’aporta los conocimientos necesarios. Nada hai que nun se solucione introduciendo la etiqueta adecuada nel buscador siguía de “Revista Exércitu”. Tou tipu d’información militar atopase ellí. La so bayura documental ye descomanada.

Yá nun esiste Guión, la hermana menor que la Revista editaba, tampocu les revistes de les Capitaníes Xenerales, nes que munchos ficimos los nuesos escarceos primeros cola pluma. Sí contamos col Boletín Tierra, que col so equipín de profesionales desendolca una función necesaria; pero sigue siendo la Revista la que cumple cola misión de ser el foru profesional de difusión de idees, materiales, histories, pensamientu militar en xeneral. Una función a la que sedría deseyable que llegaran tou tipu d’aportaciones, entamando pol nuesu personal de tropa, al qu’habría qu’animar a participar d’alguna manera. Tamién los alumnos de la enseñanza de perfeccionamientu, seguramente punta de lanza del pensamientu militar, y tamién, ¿por qué non? Investigadores civiles y personal d’otros exércitos.

Los premios d’esti añu tienen, como señalaba al entamu, el denominador común de la historia, pero ye’l futuru y l’actualidá lo que marca la pauta de los Exércitos, y necesitamos que la Revista, pente medies les aportaciones de quien ta a lo último, state of the art, diríen los nuesos compañeros mozos, más versaos nel usu del inglés, mos allumen col so conocimientu del actual Arte de la guerra. ¿Cómo facelo? Esa ye la cuestión.

Munches Gracies pola so atención

Raúl Suevos

En Madrid a 16 de payares de 2022

Torna en castellán en repdiv.blogspot.com

Otra vegada d'uniforme

 

Diben yá dellos años que nun vistía l’uniforme, casi siete, esactamente dende que me dispidí nel mio destín caberu nel Centru d’Intelixencia de les Fuercies Armaes, pero ayeri yera una xornada especial y decidíme a despolvorialu dende el requexu caberu del armariu.

Entregabenme’l premiu al artículu meyor de la Rivista Exércitu del año últimu nun actu presidíu pol Xefe del Exércitu, Xeneral Amador Enseñat, na see del Cuartel Xeneral, Palaciu de Buenavista de Madrid. Too un enunciáu esto de la parte ceremonial o protocolaria del asuntu, dempués sigue la parte emocional, de xestión más sometía a les perceiciones.

Nel café con pastes previu al actu, señaláu pa les diez d’una de les primeres mañanes de frescu serondiegu, notéme menos sueltu de lo que me recordaba nesti tipu d’actos institucionales cuando taba n’activo, y ello magar que l’uniforme sigue axustándose tan bien como entoncenes, y tamién magar de cuntar col calor de la compañía de la familia y un de los mios meyores amigos. Y ye que la seriedá del ambiente militar y la so liturxia de cortesía y xestos perfectamente axustaos puede llegar a amedranar, inclusive a los que como yo tenemos pasao más de media vida na Institución, y particularmente dalgunos años nel propiu Cuartel Xeneral.

Del actu formal, media hora más tarde, quédome cola parolada, al finar el mesmu, col Xefe del Ejércitu, tres promociones posteriores a la que yo pertenezo, con quien coincidí delles vegaees a lo llargo de la nuesa vida militar y que me acoyó con un sorprendente “Hola Raúl, acuerdeste de min?”, detalle d’humildá  que da cuenta de la talla de la persona que s’atopa al mandu del Exércitu.

Al tomar l’astráu pa falar nel nome de los premíaos debo reconocer un cimblíu de piernes leve y transitoriu, que nun achaco a la presencia imponente del públicu uniformáu sinon a la frialdá de la sala, ensin calefacción poles midides d’austeridá vixentes, y que desapareió una vegada lleíes les frases premeres del discursu.

Del restu queda’l saludu con un par de vieyos collacios de destín nel Eurocuerpi, anguaño xenerales de división; ignoro si con aínda percorríu militar pero a los que siempres ye un placer saludar. Tamién la noticia de que se trabaya na modificación del plan d’estudios de la nuesa Academia Xeneral con vista a la so meyora y adaptación a los tiempos actuales, necesidá que vien impuesta polos avances que s’observen nos campos de batalla modernos.

Tres les correspondientes despidíes entá quedó tiempu pa retratarse nel patiu d’estatues del Palaciu énte la del imperecederu Hernán Cortés, protagonista del artículu premiáu, como figura histórica y como escritor.

Y agora a siguir escribiendo.

Raúl Suevos

En Madrid a 17 de payares de 2022

https://www.academia.edu/60872186/Las_Cartas_relaci%C3%B3n_de_la_Conquista_de_M%C3%A9jico

Torna en castellán en repdiv.blogspot.com

Camín a Venezuela

 

Los países iberoamericanos, na so mayoría, tienen reviciao  poco de sistemes democráticos de gobiernu. La grana autocrática de Bolívar creció bien naquella tierra fértil y dio llugar a una saga descomanada  de dictadores que gobernaron a munches  daquelles naciones hasta anguaño .

Ye Cuba’ l casu paradigmáticu pero Venezuela llévase’l primao  en cuantu a menor proporción de gobiernu democráticu acordies  cola esistencia  del propiu están, y ye qu’ellí’l ciruxanu de fierru, otra forma grandona d’amarutar al dictador, tien sío casi siempres lo qu’imperó.

Al entamu’l sieglu XX, ente 1908 y 1935, “manexó’l” país el xeneral Juan Vicente Gómez, con man de fierru  cabría añader; y pa 1918 Vallenilla Lanz, un renomáu intelectual y ministru nel  so gobiernu, asoleyó’l llibru “Cesarismo democrático, estudios sociológicos sobre la constitución de Venezuela”, un pestiñu que guetaba  sofitar política y moralmente’l gobiernu del so patrón. Magar el so esfuerciu la historia nun absolvió al dictador pero sí empericotió’l términu de Cesarismu democráticu, qu’entá perdura y paez  que con puxu renováu .

Na mesma Venezuela tenemos l’exemplu d’Hugo Chávez, amnistiáu  tres un intentu de guelpe d’estáu -erru grave- algamó  lexítimamente la xefatura de la nación pente medies d’eleiciones llimpies  -les caberes  nel país- pa, darréu, entamar  un procesu de control o eliminación del restu de poderes del estáu  p’algamar la perfección del nomáu  socialismu del sieglu  XXI, tamién conocíu  como Chavismu y qu’agora cola batuta del so heriede  Maduro tien llograo fondigar  al país a cotes  namái  comparables a Cuba o Nicaragua, tamién exemplos  de Cesarismu democráticu.

En toos estos casos hai  eleiciones , tamién poder xudicial , inclusive partíos políticos, pero en toos ellos, na práutica, ye una voluntá unipersonal la que dirixe  los destinos de la nación puestu que, nel procesu, foi  anulando al restu de poderes, los Checks and balances, frenos y equilibrios.

Vien too esto a cuentu  del proceder del nuesu particular Cesar, que cola so permanencia na Moncloa como oxetivu únicu, tien entamáu un procesu d’anulación del restu de poderes, incluyendo’l cuartu, la prensa, rematáu estos díes  cola anulación y modificación de los delitos de sedición y malversación que, pa beneficiu  de socios independentistes y secuaces andaluces, llamentablemente, recuerda y sollerta sobro’l procesu que tien llevao a Venezuela, un país perricu y nel so momentu democráticu, al malfadiáu  estáu d’atristamientu en que güei  s’atopa.

Namái  les eleiciones van poder correxir la ruta. Ye lo qu’hai

Rául Suevos

Torna en castellán en repdiv.blogspot.con

El Serviciu esterior d'España

 

A lo llargo la mio vida profesional desempeñé’l mio trabayu n’operaciones esteriores y destinos nel estranxeru, teniendo en casi toos ellos la oportunidá de rellacioname con personal del Serviciu esterior d’España, esto ye, del Cuerpu diplomáticu, y la mio impresión, que como toles personales pue tener siesgu, ye que, en xeneral, siempres hai esceiciones pa confirmar la riegla, son persones ayenes al mundiu real porque, especialmente mientes los sos periodos nel estranxeru, viven nuna burbuya de servicios a la so disposición que los alloña de la perceición de les coses del común.

Esto nun sedría un problema especial si nun afeutara al desempeñu de les sos funciones pero, témome, cuando aporten a puestos de responsabilidá suel asoceder que nun llogren ver l’algame de los intereses d’España; y nun tenemos más que güeyar como la nuesa acción esterior, ensin dulda marcada pol empaque mínimu de la mayoría de los ministros d’esteriores de nueso, y dalgún escándalu económicu de nivel embaxador, vese cada día más amenorgada ya inclusive arrequexada, ensin que l’acción de los mandos intermedios contribuya a apangar la situación.

El mio puestu caberu n’activu fo como agregáu de defensa nuna embaxada au pude güeyar d’averao’l desempeñu diplomático, tamién tevi ocasión de conocer la Escuela diplomática como alumnu del cursu d’observadores electorales y más tarde pude participar como observador internacional pa la OSCE únviau pol nuesu MAEC, dalgo que supunxo una esperiencia personal descomanada y arriquecedera.

Como observador comprobé l’interés qu’esa actividá pue tener pal Ministeriu de defensa, corroborao pol personal de los servicios de defensa d’otros países qu’ellí atopé, dalgo que me llevó tiempo dempués a intentar abrir una vía de collaboración ente Defensa y la Oficina de drechos humanos del MAEC, responsable de la observación electoral española. Pa la mio sorpresa tala posibilidá fo refugada radicalmente por “antinatural” según la responsable de la Oficina, dalgo que me dexó ablucáu y atristáu pos taba convencíu de lo beneficiosu qu’ello sedría pal serviciu esterior, entendío ésti como conceutu.

Esti añu, dempués de unos cuantos ensin facelo, tiense convocao un cursu d’observadores nuevu na Escuela diplomática, y anque me consta que dalgún uniformáu había ente los candidatos, nun paez que hubiera espaciu pa dalu d’ellos, supongo que porque el nuesu cuerpu diplomáticu debe siguir viendo eses rellaciones como antinaturales magar que’l EEAS, el Serviciu esterior de la Xunión Europea, tien el so propiu departamentu militar pa dirixir les múltiples misiones esteriores nes qu’Europa se ve somorguiada, cada día más.

Los nuesos servicios d’inteligencia cuenten con analistes que siguen l’aportar de países llonxanos, dalgunos d’ellos ensin posibilidá de pisar el tarrén, y les misiones d’observación electoral son una oportunidá escelente p’averase a la realidá de dalgunos d’ellos, xeneralmente inestables, que facilita l’anális posterior. Son cuadros de gran preparación qu’ensin dulda realizarían el so trabayu como observador de forma impecable pero, a lo que paez, nel MAEC nun se ve como dalgo natural que los uniformaos s’averen al so mundiu particular. Ye lo qu’hai.

Raúl Suevos

A 2 díes vencíos de payares de 2022

Torna en castellán en repdiv.blogspot.com