La eurogafada

 

Esti fin de selmana caberu, depués de munchos años, tevi siguiendo la eleición del representante español pa Eurovisión nel publicitáu –por RTVE- festival de Benidorm. La llarga llista de deceiciones nel euroeventu alloñárame del mesmu. Canciones y artistes pocu apropiaos, y los consiguientes fracasos, con gallos en direuto o mamarrachaes productu d’un sistema d’eleición desafortunáu, dieron como resultáu’l mio extrañamientu, y, polo visto, el de la mayoría de l’audiencia.

Esti añu paecía que l’asuntu tomaba derroteros estremaos y la prensa asina se fo faciendo ecu de los diversos participantes. Pa la final yá me convencieran y ellí me llanté, énte’l televisor, cola esperanza de, a lo menos, asistir a un bon espectáculu musical, daqué práuticamente desapaecío de les nueses pantalles nos años caberos.

Y nun defraudaron. Viéronse, a lo menos na opinión d’esti humildosu aficionáu, mui bones aportaciones y espectáculos n’escena, lo que yá en sí mesmo ye un avance descomanáu con rellación a lo d’años anteriores. Con especial atención a tres de los participantes pola mio parte, que coincidíen cola opinión mayoritaria de públicu y especialistes nes xornaes semifinales. Les Tanxugueires, Rigoberta Bandini y Chanel.

Les primeres aportaben con una especie d’etnofusión de calter, sobre too, rompedor y de gran impautu plásticu y visual que, mui probablemente, podría tener munches posibilidaes nel festival, y en cualquier casu daría que falar en positivu. Depués venía l’aportación de Rigoberta; una sacudida visual y sonora con carauterístiques de reivindicación feminista, envuelto too ello d’un ritmu repetitivu, pegadizu y catárticu que, creo, podía ser un auténticu bombazu en Turín. Finalmente, la desconocida catalana Chanel, magar contar con una llarga trayeutoria profesional, que llegaba con un reggaetón y la so consiguiente escena de baille; tamién solución festivalera y que sedría la vencedora que va representar a TVE n’Italia.

Yo quedárame con Rigoberta Bandini, por aquello de la personalidá de l’aportación de una creadora polifacética, inclusive pa inventase’l so propiu nome artísticu. Sicasí, nun creo que Chanel lo faiga mal y nun son les sos cualidaes artístiques, sobro les que nun toi preparáu p’aldericar, lo que me llamó l’atención de tol asuntu.

Chanel diba llimpia de connotaciones polítiques; nun asina les otres dos. Unes, según paez, respaldaes por una campaña popular en Galicia, enguizada por elles mesmes, que resaltaba les referencies rexonalistes  ¿o yeren nacionalistes? Y que contó col sofitu esplicitu de personaxes como Yolanda Díaz o Monica Oltra. La otra, recibió tamién l’apoyu direutu d’Irene Montero y Gabriel Rufian; y el refugu, ensin citala, de soflames feministes del llau d’un Casado que nun puede evitar metese en cada charcu qu’atopa. Quiciabes hebo más intervenciones político-musicales anque lo inoro.

A la fin alcontramonos énte una amuesa más de la polarización na que s’atopa’l país, que mos dexa, otra vegada, énte una representación española gafada por un motivu u otru, pagando les consecuencies nesti casu, una artista, Chanel, que lo fizo mui bien y a la que-y deseyo lo meyor.

Raúl Suevos

A 31 díes vencíos de xineru de 2022

Torna en castellán en repdiv.blogspot.com

La inquisición nueva

 

Fo’l presidente Clinton, créome alcordar, el que mos fizo pensar per primer vegada nestes coses con aquello de la “afirmative action”; esto ye, la seleición de candidatos pa les instituciones del gobiernu en función de sexu, raza, creyencies o nacionalidá, naquelles estayes nes que podíen tar sorepresentaes eses característiques sociales. Una iniciativa a la que, d’entrada,yera mui difícil oponese. Dende entós la situación tien evolucionao y, nalgunos casos, podríemos pensar que tamos a puntu d’algamar un puntu de paroxismu tiránicu nesta situación.

De la “afirmative action” pasamos, en xeneral n’occidente y particularmente nel mundu anglosaxón, a daqué que s’avera munchu a la tiranía de les minoríes. El pensamientu o cultura woke, “espiertu”, fo lo viniente. Un movimientu qu’anima a tar sollerte énte les inxusticies sociales basaes tamién nes premises enantes citaes, daqué a lo que ye difícil tamién pone-y pegues si partimos de l’asunción de que la evolución humana, tanto no individual como no colectivo tien de tender haza la perfeición.

Asumíos estos presupuestos, particularmente nos templos del saber que son les universidaes, aportó’l momentu d’aplicalos de forma práutica, y eso fízose de la mano de los conseyos y comités encarregaos de velar pola aplicadura de los criterios D-I-E, esto ye, diversidá, inclusividá y equidá; un que los so valires principales vien marcáu pol acrónimu BIPOC, correspondiente a negru, indíxena o xente de color, característiques que dan preferencia nesos, enantes, templos de la llibertá d’opinión y pensamientu, perriba de les capacidaes.

La exacerbación anguaño de les tensiones sociales norteamericanes, llegaes de la mano, ente otros fenómenos sociales, de movimientos como’l “me too”, o’l “black lives matter”, tán convirtiendo a les universidaes en campos de caza escontra aquellos qu’osen disentir de la opinión güei imperante, dándose’l casu d’abandonu, énte l’acosu, de figures importantísimes del pensamientu y la docencia que se sienten hostigaes, más allá de lo que tán dispuestes a soportar, pola intolerancia anguaño reinante. El resultau nun puede nu ser otru que’l probecimientu intelectual de les universidaes, daqué que recuerda enormemente a los resultaos algamaos pola Inquisición siglos atrás. Esto ye especialmente llamativu y dolorosu nel casu de feministes de siempres, refugantes énte l’imperiu de lo tresxénero. Ye lo que hai.

Los valtaos d’estatues a lo llargo y ancho del mundiu anglosaxón, y tamién n’Hispanoamérica, por motivos estremaos, van pol mesmu camín y sollerten nidiamente de lo que mos vien. Anque la semana cabera, nuna universidá británica, yá s’algamó un nivel inimaxinable va bien poco cola inclusión del “1984” d’Orwell nel rexistru de llibros peligrosos pa los escolinos; situación paradóxica pa una obra maestra qu’alerta escontra’l pensamiento únicu, les neollingues y el totalitarismu en xeneral.

Quiciás el nuesu futuru seya “un mundiu feliz” huslianu vixiláu pol “Gran hermanu” nuevu, o quiciabes habría que lleer a John Stuart Mill y el so vieyu “On the liberty” pa tentar d’evitalo.

Raúl Suevos

A 28 díes vencíos de xineru de 2022

Torna en castellán en repdiv.blogspot.com

Ucrania ¿Farol o cataclismu mayor?

 

Tres la cayida de Napoleón Bonaparte asitióse, pa torgar males mayores n’Europa y baxo la inspiración del príncipe de Metternich, lo que se dio en llamar el sistema de “equilibriu de poderes”, que funcionó abondo bien hasta que les lloríes de Napoleón III lo echaron a perder, lo que-y costaría’l tronu y l’Alsacia. Depués sedría’l príncipe Bismarck l’encargáu de caltener un sistema d’equilibrios nuevu que sostevo más o menos en paz a les potencies, ente les que los EEXX entá nun pintaben un res.

Sedría’l crecimientu imparable de l’Alemania unificada por Bismarck, yá entós desapaecíu, y la direición desgraciada del Kaiser Guillermo II, lo que, cola ayuda de un sistema de pautos y alianzas nuevu y terríu n’escesu, daría llugar a la tarrecible Gran Guerra. Tres ella los Pautos de Versalles pondríen la seme de la Segunda Guerra Mundial, que diba aportar a un sistema bipolar amortiguáu por unas NNXX namái un pocu más conducente que la Sociedá de Naciones del presidente Wilson. Anguaño otra vegada l’equilibrio paez tar pasando por malos momentos.

La desapaición de la URSS faría pensar a dalgunos que’l “fin de la historia” llegara, escaeciendo que too ye pasaxero y que Deng Xiaoping yá entamara a construyir el imperiu chinu nuevu. Güei too ye más inestable y la Rusia de Putín bracia pa nun perder el so estatus de gran potencia, anque seya a costa de convertise nel guaḥe malu del barriu. Güei toca-y a Ucrania sofrir los emburriones d’esti grandoxón.

Moscú, dende enantes de la llegada de los Romanov al tronu de los zares, tien guetao y caltenío dos estratexes nidies: Una doble zona colchón, nel llonxanu este y n’Europa central; y la salida al mar, pel Bálticu y pel Mar Negru; llueu tamién pela ruta ártica gracies al Cambéu climáticu. Anguaño, col avance de la OTAN haza l’este, y enantes cola pérdida de la Sebastopol del príncipe Potemkin, vese amenaciada, y trata de reaccionar.

Ucrania fo una sorpresa pa Putin. La revuelta popular de 2013 provocó un cataclismu políticu nel país y el so allonamientu de la órbita rusa; ehí, en parte, atópase la razón de la so “reocupación” de Crimea y los orquestaos llevantamientos independentistes nes rexones del Dombás. Güei’l mundu, incluyendo una inoperante Xunión Europea, ta pendiente de los 100.000 soldaos esplegaos al otru llau de la frontiera ucraniana colos que’l presidente rusu pretende imponer un ultimátum, como aquellos d’enantes de la Primera Guerra mundial, y entrugase qué va a pasar.

Occidente, o lo que ye lo mesmo, los EEXX, no puede ceder al chantaxe rusu de calter hitlerianu, y per otru llau, depués d’un envite tan fuerte, dalgo tien que facer Putin. Los movimientos na Duma rusa pa reconocer el Dombás como estáu independiente paecen indicar per ónde van dir los tiros, puesto que’l combate, magar lo impresionante del espliegue rusu, nun aseguren l’ésitu, pues los ucranianos nun son los mesmos de va ocho años, nin en medios militares, con grandes inversiones últimamente, nin tampocu n’adiestramientu de los sos homes y unidaes, que cuenten cola moral que da defender la patria, non como los conscriptos rusos, enviaos a morrer por una causa que nun ye la de so.

La crisis de los misiles en Cuba saldóse cola retirada de los Xúpiter norteamericanos de Turquía; anguaño, a lo que se ve, nun hai pieces disponibles pa transaccionar pero la selmana de marxen que Blinken y Lavrov se tienen dao podría servir pa alcontrar dalgo. ¿Un reconocimientu de la nueva situación de Crimea quiciabes? Nunca se sabe nesto de la diplomacia.

Raúl Suevos

A 22 díes vencíos de xineru de 2022

Torna en castellán en repdiv.blogspot.com

De mayor quiero ser uḥier

 

Cantaba l’almirada Concha Velasco aquello de “Mamá quiero ser artista” na esitosa comedia musical del mesmu nome de metanes los ochenta. Un llibretu que daba cuenta de los esfuercios d’una moza provinciana pa trunfar nos escenarios de la capital. Daqué que, según rellataba la propia artista, asemeyábase en parte a lo que fuere la so trayeutoria vital y profesional dende los sos anicios na castellana Valladolid.

Concha Velasco cuenta cola almiración de delles xeneraciones d’españoles na so faceta profesional y, ensin dulda, tamién col respetu en cuantu a la so vivencia personal, pero güei, retirada de los escenarios, nun paez que se desenvuelva na bayura económica, tampocu na indixencia, ye probable que simplemente subsista con dignidá, anque si volviere la vista atrás quiciabes atopara soluciones vitales más rentables y menos ventureres.

En Cataluña una de las meyores carreres paez ser la d’uḥier, aquello qu’enantes, creo, nomábase bedel, anque dada la mio inoranza ye posible que la diferencia s’atope namái nel uniforme. Los primeros suelen portar atuendos profesionales que, n’ocasiones, como los del Congresu de diputaos nes sesiones de gala, ye fácil tomalos por altos oficiales de l’Armada. Los bedeles en cambiu, a lo menos nel mio vieyu Institutu Xovellanos, solíen llevar una simple bata, anque depués, según contaben, foron eliminaes por ser discriminatories y quedaron como esclusividá de les señores de la llimpieza.

Nel Parllamentu catalán, amás de portar uniforme, cobren un pastón, y anque intenté ver si llevar el vasu d’augua al orador de turnu requier una téunica más ellaborada que la de Faustino, el que m’escancia la sidra toles tardes na sidrería del mio barriu, nun algamo a columbrar esos matices, que debe habelos puesto que si non nun puedo decatame como se llega a cobrar 4000 euros. 4000 eurazos, ¡oiga¡

Y ye que, como les families polítiques independentistes tán engarriaes, amás de ponese direutamente a parir ente elles, entamen a apaecer informaciones, enantes sellaes pola “omertá” d’esa mafia, como la rellativa a la situación que permite a dellos funcionarios colar pa casa cobrando’l sueldu integru los cinco años caberos. Ye ehí au se columbren esos “humildosos” 4000 euros y hasta los 10000 de los cargos más altos. Como l’asuntu blindóse pente medies una llei, los que lo cobren nun van dexar de facelo, namái cabe corta-ylo a los aspirantes que, nun produciendo vacante los yá díos, cubren el trabayu qu’a estos correspondía. Tarán contentos.

Nun sé si Concha prefiriere ser uḥier pero tengo qu’entruga-y al mio primu, prexubiláu nel so momentu de la mina, qué ye lo qu’opina.

Raúl Suevos

A 22 díes vencíos de xineru de 2022

Torna en castellán en repdiv.blogspot.com

La olla podrida iberoamericana

 

Lo de podrida, que non podre, ye un resultáu de la evolución de la llingua puesto que nel so entamu medieval en Castilla yera “poderida”, de poderosa, yá que naquel entós yeren mui pocos los que se podíen permitir “empoderar” el cociu con unos añadíos del gochu aquel qu’anguaño punxo en cabecera de la campaña electoral el nuesu imprudente ministru de consumu.

El pasu del tiempu fizo que la “e” desapaeciera quedando la olla en podrida, pero igual de rica y nutritiva, con independencia del colesterol. Depués, les naves de la Corona llevaríen esa olla per toa Iberoamérica, dando nacencia a los estremaos pucheros y sancochos. Toos ellos deliciosos anque dengún algame los niveles de perfección del pote asturianu. Ye lo que hai.

La política iberoamericana ye un pocu como esa olla, o pote; siempres sometida al fueu esperando que los productos den como resultáu un platu estraordinariu pero, desgraciadamente, por dalgún motivu qu’escapa a la mio comprensión, o quiciás non, de forma repetitiva’l resultáu ye decepcionante. Cuando nun se-yos quema por escesu de fueu, son los productos los que lleguen yá pasaos o, más frecuente, nun algamen, nin de lloñe, la calidá que prometíen enantes de llegar a la cocina. A la fin más de lo mesmo.

Estos díes fálase de folada nueva de “progresismu” que llega al continente. La mesma esquierda que n’etapes anteriores, ente promeses de xusticia social, dexó una traza de mayor probitú y desesperación de la qu’atopó. En Chile un presidente mozu recién elexíu supón, metanes un procesu constitucional, una incógnita que la so autoreferencia marxista paez resolver desde l’aniciu. Brasil, tres el populismu de feria protagonizáu por Bolsonaro, va tener que decidir ente Lula o’l so encarcelador Moro, lo que nun paez una promesa de felicidá. Perú navega n’agues turbulentes baxo l’ala del sombreru del so presidente indixenista de raíz comunista. Pero ye nel triangulu caribeñu que formen Nicaragua, Venezuela y Cuba au s’algamen les mayores fondures de la desesperación humana; tres rexímenes que van más allá de la dictadura tradicional pa entrar de lleno nel vieyu conceutu de satrapía asiática nel que too-y vien dao al gobernante, y la so familia, tantu en derechos como en bayures, y nada algama a los súbditos, que se ven sometíos al xugu impuestu dende’l poder, del que namái cabe la fuxida, l’abandonu del país, pa librase de la opresión.

Les cifres de la emigración d’eses naciones son demoledores, y entá más desoladores si se tienen en cuenta los peligros infinitos que los protagonistes arrostren con tal d’abandonar el so terruñu. Too por una olla en llibertá.

Raúl Suevos

A 21 díes vencíos de xineru de 2022

Torna en castellán en repdiv.blogspot.com

Baxo la bandera europea

 

A la fin de la década de los 90 tevi la fortuna de vivir y trabayar en Florencia demientres tres años. Un de los mios paseos favoritos llevábame hasta la basílica románica de San Miniato al monte, perriba del pervisitáu Piazzale Michelangelo, y dende la que s’esfruta d’una vista espectacular de la ciudá de los Medici. Ellí embaxo, al otru llau del Arno, los Ufizzi llancen, coles estatues de les grandes figures renacentistes del so patiu interior, el mayor y más nidiu mensaxe d’europeísmu de los cinco sieglos caberos.

Al pie de la basilica y en torno a ella atópase’l cementeriu monumental con tumbes de numberosos florentinos de renome, y non tanto. A min siempres me prestó paseyar per estos llugares de recuerdu y recoyimientu; y en San Miniato impresionabame especialmente la tumba de Giovanni Spadolini, líder del partíu republicanu, con forma de pila de llibros y enrriba  l’epitafiu “equí xaz un italianu”; pero tamién dalgunes perguapes de xóvenes oficiales inmolaos na tarrecible “Gran Guerra”, muncho más mortífera y horrorosa pa la mayoría d’europeos que la Segunda Guerra Mundial.

Estos díes acordademe d’aquellos paraxes al ver el funeral del nuesu presidente David Sassoli, nuesu porque como de nueso contemplo’l Parllamentu européu por él presidío; unes honres fúnebres que se tienen desarrollao con tola pompa qu’Italia otorga a les despedies de les sos grandes figures o d’aquellos que caen en combate o n’atentáu terrorista, na basilica de Santa María degli Angeli en Roma. Unes exequies que contaron cola presencia de les altes maxistratures italianes y europees, tamién el presidente español, y que, amás de los honores militares y escolta de carabinieri, foi siguida dende la Piazza della Repubblica por milenta romanos.

Sassoli yera florentín, anque desendolcara la so vida profesional y política en Roma, enantes de llanzase con pasión a la política europea, poro la mio referencia inicial a San Miniato. Na mio vida entró pela pequeña pantalla pues naquella dómina conducía na Rai un programa d’actualidá, Panorama, y la so vocalización perfeuta, quiciabes precisamente pol so orixe toscanu, resultabame mui conveniente pal mio aprendizaxe dela llingua de Dante, en comparanza con otres figures de la televisión. Depués, enantes d’entrar en política, algamaría a presentar el TG1, lo máximo n’Italia, anque yo yá dexara’l país.

En política partió del so catolicismu fonderu pa formar parte del Partito Democrático, un grupu de raíz socialdemócrata fundáu en 2007 y que tien l’europeísmu como una de les sos divises principales, daqué non refalgable nuna Italia tremendosamente dividida estos años caberos y a la que él aportaba un apueste nidiu polos principios del humanismu cristianu.

Nes sos exequies el so féretru diba cubiertu pola bandera europea, un detalle que, xunto al so llabor, munchos europeos valoramos y agradecemos.   

Raúl Suevos

A 17 díes vencíos de xineru de 2022

Torna en castellán en repdiv.blogspot.com

Más alló del Cantábricu

 

Con esta hestoria del Covid, entrando yá nel tercer añu del so percorríu, ún nun sabe mui bien a que palu arrimase. ¿Dísti-vos cuenta de que’l notros tiempos  santificáu Fernando Simón desapaeció de la faz de la Tierra? ¿Y el doctor Sánchez? Ye como si tuviera esperando al parte final victoriosu pa asina evitar el papelón que vien faciendo coles sucesives victories finales que mos anunció nel pasáu. Güei tolo dexen, a nivel nacional, a l’autómata ministra de dulce acentu ya invariable ritmu que, por otra parte, una y otra vegada se ve sobrepasada o ninguneada poles anuncies de les autonomíes que son, por otru llau, les que cuenten coles competencies na materia. A la fin, como vien siendo desde’l aniciu, 17 frentes de batalla escontra l’enemigu común, el Covid.

A min, que por profesión toi mui fechu a obedecer, dende l’entamu de la guerra viénome un desasosiegu descomanáu, por aquello de que “orden, seguida de contraorden, el principiu del desorden”. Saber d’ónde veníen los tiros yera francamente complicao y la casa propia foi conformándose como l’únicu refuxu, non del too seguru, cada vegada que llegaba una folada de bombardeos en forma de variante nueva y contaxos. Na dómina de la información too foi más complicao, sorprendentemente, y, en xeneral, casi tol mundiu se tien buscao una forma de facese la imaxe de lo qu’asocedía.

Nesta folada cabera, pol momentu, foi Sudáfrica’l referente inicial, llueu escaecío poles enormes diferencies poblacionales col país de nueso, pero aína vieno Inglaterra, más semeyante,  a danos un avance de lo que mos esperaba y, nel mío casu, un positivu d’un fiu’l día d’Añu Nuevu obligonos a montar una habitación molokai en casa mientres estos díes, con test negativu a día de güei. N’Inglaterra lleven yá cuatro díes ensin subida de casos y nos dos caberos con nidia caída. ¿Vamos tar nós a diez díes del cumal? Vamos ver.

Raúl Suevos

A 10 díes vencíos de xineru de 2022

Torna en castellán en repdiv.blogspot.com

L'arte de la comunicación

 

Estos díes caberos puése reafitar ensin arrebol que la comunicación, la pública pa ser más esactos, ta nel candelabru, recordando a una vieya guapa nacional d’inmarchitable verbu. Y ye que los nuesos políticos, ayudaos por ciertos escribidores y comunicadores, dan, un día sí y otru tamién, munición pa que’l tirotéu partidista nun se detenga nin siquier nos fines de selmana. Somos una nación na que nun se construye porque los albañiles tán tol tiempu ocupaos en tirase los lladriyos a la morra colo que, ente baxes poles feríes y perdida d’insumos, nun hai forma de llevantar una casa.

La gran movida cabera vieno de la mano de les declaraciones del ministru Garzón al diariu británicu The Guardian. Manifestaciones que tevi’l vagar de guetar y lleer, y en les que nun algamé a atopar casi nada refugable, tanto en rellación cola necesidá de amenorgar el consumu cárnicu n’España como tocantes a los efeutos dañibles de les macrogranxes. El ministru entá tevo tiempu pa referise aponderantemente a la ganadería estensiva, con particular referencia a Asturies au, a éstes, foi tamién criticáu por dalgunos medios y políticos el probe ministru.

Entós, ¿A qué tantu aruelu? D’entrada porque’l señor Garzón vien distinguiéndose por desarrollar campañes más llamatives qu’efeutives; y toes elles con un ciertu tufu d’eco-urbanismu alloñáu de la problemática real de la xente del campu que, anque ye poca, representa, gracies al sistema eleutoral de nueso, un nada refalgable númberu d’escaños nes Cortes. Un campu que va yá mui caliente colos precios de la lleche, el llobu o, agora, el gasoil; de mou que cualquier asuntu rellacionáu corre’l riesgu de ser tomáu como munición pal combate partidista. Mal momentu y llugar pa la entrevista.

Ayeri la riña subió de tonu y les andanaes, yá nun importa si piedres o lladriyos, yeren llanzaes ente los miembros del propiu gobiernu, que caún, como ye lóxico, tien los sos intereses y trata de defendelos; y ehí se ve que l’agru ye cosa de los grandes partíos, con permisu de Vox y los Vaciaos, y que, pol contrario, Podemos nun paez mui interesáu, pues el so xardín ye más urbanita. ¿D’ehí el picu allegre de Garzón? Quién sabe.

Los espertos dicen que la esquierda va sofrir muncho nes convocaes eleiciones castellanes y el ministru de consumu, probablemente, va ser declaráu responsable por dalgunos pa xustificalo. N’Aragón Lambán yá se-y tiró al pescuezu, curándose en salú, y mientres dellos acuíferos van siguir cargándose de nitratos al tiempu que los nuesos dirixentes van continuar vocinglando, espelleyándose, o acuchillándose a caballu de la comunicación pública, esi arte que dalgunos, munchos, paecen desconocer.

Raúl Suevos

A 11 díes vencíos de xineru de 2022

Torna en castellán en repdiv.blogspot.com

!Démerdez-vous¡

 

Va yá abondo d’años, mientres el mío primer destín nun Cuartel xeneral multinacional, tenía como xefe a un xoven, pa los parámetros españoles, coronel de los cazadores alpinos franceses. Yera’l coronel Cazenave un paisanu escuédigu, con una ideia mui nidia de les responsabilidaes de cada un, él incluyíu, y asina, cuando dalgún subordináu acudía a él guetando consuelu o guía ente dalgún problema del serviciu, si entendía que yera responsabilidá del suplicante, la so respuesta invariable yera “!démerdez-vous¡”.

A min, con un nivel de francés malapenes suficiente p’algamar aquel puestu, paecíame que la espresión, de fácil comprensión, yera una ordinariez total pero, entá asina, la mio curiosidá llevóme a investigar nel diccionariu Robert, de muncho prestixu en Francia, en onde pa la mio sorpresa descubrí que sí esistía y que’l so significáu, bastante lóxicu, yera’l tradicional “arréglateles”.   

Estos díes, en Francia, y 24 horas depués en toa Europa, púnxose de moda’l pariente “emmerder” que, nesti casu, vien a ser lo contrario, esto ye, “importunar”; y ello ye debío a la intervención del presidente Macron en rellación colos negacionistes de la vacuna Covid, a los que quier importunar, o meyor nel so francés, “emmerder”. Y tiense liao un pifostiu, pallabra que sí recoye la RAE  como sinónimu de tracamundiu o abaruyamientu. Ye lo que tien ser presidente de Francia, o ministru de consumu n’España. 

A min, qué quieren que-yos diga, paecióme bien la intervención del presidente francés porque, por más que los negacionistes apelen al so derechu individual, y a que, según ellos, nun faen dañu a naide, ye un fechu que son precisamente ellos quienes más ocupen -si non en términos asolutos sí en proporción- n’ UCI,s y cames hospitalaries, xenerando con ello un cuello de botella qu’obliga a retrasar o detener consultes, tratamientos o, en dalgunos casos, operaciones quirúrxiques. Ye una forma d’ayudalos a decidir.

Asina, como una ayuda a la toma de decisiones ye como hai que tomalo, daque que, por otra parte, siempres tevo ehí; en práuticamente tolos aspeutos de la vida ayudente a decidir. A min, na Academia, ayudabenme colos arrestos, hasta que llegó un xeneral, bonísima persona, cargáu d’idees nueves qu’abolió los arrestos. Aquello duró unos meses, y más qu’un pifostiu yera un putiferiu, na aceición de desmadre de la RAE, asina que daquien atopó la solución nos incentivos negativos, esto ye, los vieyos arrestos con otru nome. Y les coses tornaron al so calce normal.

Quiciabes el presidente Macron debió asesorase pa incentivar a los sos negacionistes en llugar de los “emmerder”.

Raúl Suevos

A 6 díes vencíos de xineru de 2022

Torna en castellán en repdiv.blogspot.com

D'honores y recompenses

 

Cuenta la lleenda que cuando Xulio Cesar entró en Trunfu en Roma llevaba a los sos pies, escarreñáu na cuadriga, a un esclavu que-y bisbisaba “recuerda que yes mortal, oh Cesar”; y ye qu’entrar en trunfu na capital del imperiu yera’l máximu honor al qu’un ciudadanu podía aspirar. Taba reserváu pa los xenerales “trunfantes” y nel de Cesar, detállamos la hestoria, participaron tamién un bon númberu de prisioneros galos, ente ellos Vercingétorix, el líder sometíu n’Alexia y estranguláu al finalizar el desfile.

La romanización tienmos dexao la so impronta fondera na nuesa civilización y asina vemos qu’en tolos países síguese calteniendo la tradición de los honores a les grandes figures, nunos casos con más aciertu y xustificación que notros, como ye’l de nueso, nel que, estos díes caberos, pudimos constatar que l’honor d’ingresar na real y distinguida orden de Carlos III yá nun se fai por “tenese distinguío especialmente poles sos aiciones en beneficiu de la corona y d’España”, sinon que ye’l simple fechu de lu nomaren ministru, anque fuere per bien pocos díes, lo que motiva’l supuestu honor. Cabe entrugase si ye que la Orden yá nun supón un honor, o si, simplemente, la sociedá tien otra midida de lo qu’enantes representaba talu honor.

Roma non sólo premiaba a los sos próceres, tamién lo facía cola base de les sos lexones pa lo que contaba con una amplia gama de recompenses, perfeutamente regulaes y descrites, tanto que conocemos hasta’l nome del más condecoráu de los sos lexonarios, Spurius Ligustinus, combatiente mientres 22 años en casi tolos frentes de Roma. Tamién mos llega’l nome de Dentato ente los oficiales, qu’algamaría fama y recompenses. Y ye que, la relixón d’homes honraos qu’escribiera Calderón, siempres merez el reconocimientu.

Vímoslo estos díes caberos nos que’l nuesu gobiernu tien premiao a los soldaos que cola so entrega taparon la falta de previsión na evacuación de los nuesos colaboradores afganos, munchos, según se va sabiendo, entá ellí varaos. Hebo un llovíu de medalles, unes cuantes con distintivu coloráu pa los mandos; eses mesmas que tan cicateramente foron restrinxies nos venti años del nuesu espliegue naquel país, magar los combates y les muertes de los nuesos militares ellí esplegaos. Agora trátase de vender la “bona” aición gubernamental, entós guetábase tapala, que nun se falase d’ella, anque dalgunos recuerden aquel vieyu dicho: “lluchó con denuedu’l teniente Pimentel y dieron-y la medalla al so teniente coronel”, si bien pa los guardias civiles y policíes del “proces”, ensin distinción de grau, el gobiernu namái tien silenciu.

Son los honores y recompenses que mos aporten dende la nuesa vieya historia romana, y bono ye qu’esistan anque, cola que ta cayendo, bien vendría tener en cuenta a los sanitarios que lleven dos años esplegaos en llínea de batalla.

Raúl Suevos

A 2 díes vencíos de xineru de 2022

Torna en castellán en repdiv.blogspot.com