Pablo ta iguando les maletes

Ta siendo esta una selmana de muncha violencia verbal, afortunadamente la otra, la tradicional, paez adormilitiada pel momentu anque si les noticies económiques, Alcoa, Nissan, siguen produciéndose tampoco hai que refugar qu’aporten a devasar la cobertoria del coronavirus.

El verbu esplosivu corrió al cargu del señor vicepresidente del gobiernu, el doctor Sánchez nun ta pal navaxéu tabernariu anque esti se produza en see parllamentaria. El líder de Podemos tevo especialmente batallosu depués de les tarascaes recibies pola so “desapaición” na responsabilidá, por él reclamada, na xestión de les residencies de vieyos. Había que contraatacar.

Ayeri nel Congresu nun tevo especialmente rellumante coles sos recurrentes referencies al marquesáu de la señora Álvarez de Toledo, que recordaben a los repetitivos insultos de les clases de los neños del parvulariu. La respuesta, midida anque dalgunos piensen otra cosa, llevaba una carga esplosiva mui superior a la que’l faltosu esperaba, y la so llamada a la denuncia paterna recordaba a aquel clásicu anguaño escaecíu “Pápa llama”.

Lo de güei recordaba al toru recrecíu col castigu del picador. El vicepresidente viénose arriba y fízolo na Comisión de reconstrucción ¿Reconstrucción? Asina la llamen anque toos tean güeyando pa Bruxeles. El casu ye qu’ellí tenía al señor Espinosa de los Monteros, al qu’atacó con insinuaciones golpistes alliñaes con xiros espresivos de chulería d’arrabalde, a lo que l’aludíu tien reaccionao col abandonu de la sala. La reña, a la vista las imáxes, nun paez que sirva pa meyorar la imaxe del señor vicepresidente, quitando pa los cautivos ideolóxicos a los que diba dedicada, anque’l que paez que más imaxe perdió fo’l señor Pachi López, que nun tenía muncha que perder per otra parte.

Pudiera paecer que too esto ye espontaneo pero en política cuasi nada lo ye. Tamos en medio d’una crisis mundial que va dexar cientos de miles de muertos pol camín, y gobiernos caedizos. Nel nuesu casu garrónos con un gobiernu de coalición, d’imposible ensamblaxe según declaraciones anteriores del so presidente, y una polarización tremenda nel ambiente políticu; amás, la situación económica atopanos entá intentando superar la crisis anterior, de mou que tol eventu políticu adquier significáu especial, anque esti pueda ser manipuláu según l’interés d’unos u otros.

La purga del coronel Pérez de los Cobos, nun cabe nomala d’otra forma, hai que encuadrala na crisis xeneral de la nuesa nación y el so tratamientu, resalvando que l’oxetivu caberu ye la Xusticia, ye una amuesa de cómo se reparten les cartes nesti xuegu. Iglesias ta escoyendo les de so, sabe qu’Europa va ayudanos con condiciones, dures y costoses pal gobiernu, daqué qu’él nun ta dispuestu a pagar. Trátase de escomencipiar el desmarque, como azote de la drecha, como conseguidor del ingresu vital; eses son les so cartes pa cuando diga adiós al doctor Sánchez, en cuanto haiga qu’apretar les tuerques a los españoles. Cartes marcaes.

Raúl Suevos

A 28 díes vencíos de mayu de 2020

De dimisiones y nomamientos

En 1888 el reformador Xeneral Cassola proponía cambeos fonderos nel mundu militar. Un d’ellos yera la eliminación de los ascensos por “méritos de paz” que llevaben a los más altos emplegos a oficiales que malpenaes golieran la pólvora en tiempos qu’eso representaba lo cotidianu nel oficiu de les armes.

Pasáu’l tiempu esos méritos foron trocaos polos “de guerra” y nel sieglu XX, mientres el conflictu del Rif, xeneraron grandes carrieres militares, algamando a provocar un grave problema políticu col Arma d’Artillería que, al tener poca oportunidá d’espliegue,  refugabalos. L’asuntu enguedeyóse de tal miente que Primo de Rivera llegó a disolver l’Arma nun de los sos prontos.

Anguaño usase un sistema d’ascensos perfeutamente regláu dende los anicios. Nos primeros emplegos ye l’escalafón, la antigüedá, quien manda; posteriormente, hasta l’emplegu de coronel, va ser la seleición oxetiva sobro una serie de parámetros la que va decidir el futuru del oficial; pal xeneralatu ye la eleición de los Conseyos Superiores la que va decidir, pendiente siempres de l’aprobamientu del poder políticu, daqué que cuasi siempres se tien respetao.

Na Guardia Civil, cuerpu policial de calter militar que sigue pa los ascensos el mesmu procesu que l’Exércitu, caltúvose cuasi siempres el respetu –per parte del poder políticu- desta normativa. Hasta güei, cuando tres la crisis, evidente por más que se ñegue, de la dimisión del Teniente xeneral Ceña, el señor ministru decidió saltase al supuestu sucesor, a los otros dos tenientes xenerales y a media docena de xenerales de división de más antigüedá que’l so elixíu, el Xeneral Salas, Xefe d’Información y del que nun hai motivos pa duldar de la so capacidá, más que sobrada acordies cola so fuella de servicios.

El principal afeutáu, el Teniente xeneral Santa Fe, al paecer pedió cuentes –qué descaru- lo que llevó al señor ministru a apartalu del cargu qu’ocupaba, realimentando la non esistente crisis que mañana va dar más lleña al fueu. Y quien paga la cuenta desta verbena ye la Guardia Civil, la Benemérita, que se ve envolubrada nuna querella política qu’esgasta’l so prestixu bien ganáu.

Güei completase’l día tamién con nomamientos, pa compensar, anque estos son de calter económicu y pal conseyu d’alministración d’Enagas, tres políticos de contrastaos conocimientos nesi campu, motivu pol cualu los tenedores d’aiciones de la empresa deben tar contentos. Y falando d’alegríes, si mañana los independentistes de toa mena amosen el so contentu colo asocedío na Guardia Civil, nun lo dulden, ye malo pa España.

Raúl Suevos

A 27 díes vencíos de mayu de 2020

Torna en castellán en repdiv.blogspot.com

Pita da Veiga y Cassola

Vaya títulu pa escomencipiar una tribuna. Esixe esplicación dende l’entamu y ye lóxico puesto que son nomes que tán yá namái nos llibros d’historia. El primeru yera’l Ministru de Marina cuando Adolfo Suarez decidió llegalizar la esistencia del Partíu Comunista d’España, que non el partíu puesto qu’esti nunca dexara d’esistir nel país, y l’almirante Gabriel Pita da Veiga, franquista hasta la médula, decidió dimitir y dise pa casa, desapaeciendo de la vida política de la nación hasta la so definitiva desapaición física.

Vien a cuentu porque dende entós nun tuvieramos dala dimisión d’almirante o teniente xeneral y esta mañana produxóse esti fechu insólitu pa los añales modernos de la vida militar española. El xefe militar de la Guardia Civil dimitió énte lo que consideró un abusu y presión política inaceutable pa quien manda militarmente’l  Cuerpu, el cese del coronel xefe de la Comandancia de Madrid, el coronel Pérez de los Cobos que la so falta fuera’l cumplir escrupulosamente col so deber.

La prensa de toa clas llanzóse a la noticia como una crisis Guardia Civil-gobiernu, amontao too ello pola reaición ente cínica y negacionista del señor ministru del ramu, dexando de llau que l’enquiz del asuntu, otra vegada, ta nel intentu del gobiernu de turnu de controlar y, a ser posible, manipular la xusticia, daqué que pa la ciudadanía debiera ser muncho más importante que l’honor, aseguráu per otra parte, de dos intachables servidores uniformaos de la nación.

El segundu nome pertenez al xeneral Manuel Cassola qu’allá pol perllonxanu 1888, siendo ministru de la Guerra, asina se nomaba entoncenes esi ministeriu, presentó un rompedor proyeutu de reforma del mesmu que nunca foi aprobao pero que les sos propuestes serdíen asumies ya implementaes dellos años más tarde por otros gobiernos. Les sos reformes yeren tan fonderes pa la dómina que él tien pasao a la historia como “el reformador”.

El xeneral Cassola nun yera un cualquier; de familia humilde fuera instruyise en forma al llargu la so carriera, al empar qu’esplegaba en primera llínea de combate nos estremaos escenarios que-y cupo encarar, especialmente en Cuba, au tuvo destináu varios años y fo’l responsable de la creación y mandu d’unidaes d’especial eficacia como les guerrilles volantes, mui temies polos mambises.

Nel preámbulu del proyeuitu de llei, dicía’l xeneral Cassola, que “la xusticia ha d’imperar nos exércitos de miente que naide tenga qu’esperar del favor nin temer de l’arbitrariedá”, y esto manifestabalo en 1888. Poro vienenme güei a la memoria esos dos oficiales xenerales de dómines estremaes, porque ayeri un coronel de la Guardia Civil sufrió l’arbitrariedá na so persona y güei un teniente xeneral nun pudo o nun quiso soportalo.

Raúl Suevos

A 26 díes vencíos de mayu de 2020

Torna en castellán en repdiv.blogspot.com

Namái obedecen al Duque d'Ahumada

Esa frase ganó notoriedá va unos años cuando un xuez instructor mozu de l’Audiencia Nacional abrió dilixencias por un chivatazo a los cobradores del impuestu etarra na frontera vasca, el casu Faisán. Nel significáu taba que la Guardia Civil nun se casa con naide, solo colo que-y manda la Cartilla del Guardia Civil, creación del so fundador el Duque d’Ahumada en 1852; y nella, nel so primer artículu señalase que “el honor ye la principal divisa del guardia civil, una vez perdío nun se recupera enxamás”.

Yeren otros tiempos, el nuevu xuez d’entós, tenía como referente a la so conciencia y actuaba cola ciega rectitú de la xusticia; anguaño, pasaos dellos años, daquel maxistráu poco o nada queda, la so credibilidá foi faciéndose baldrayos dende la so entrada en política y agora amuesa ensin vergüenza la fealdá de la so condición verdadera. Col envís d’amosase como’l meyor de los llacayos del so xefe va dexando calávres d’honraos profesionales pel camín. Ye’l meyor de los esbirros del Partíu Sanchista Obreru Español.

El Nuesu sistema políticu ye francamente ineficiente; una de les mayores probiteries atopase na indisimulada subordinación de la xusticia al poder políticu que ye quien noma a un Conseyu Xeneral del Poder Xudicial nutríu por miembros de les dos asociaciones mayoritaries na maxistratura, esto ye, les que se sofiten nos dos grandes partíos del país. Si nun perteneces a una d’elles nun hai carriera xudicial; magar too ye posible alcontrar xueces independientes. Pocos.  

Los axentes desa autoridá xudicial son los cuerpos policiales; especialmente la Guardia Civil, precisamente porque solo obedez al Duque d’Ahumada, y los xueces instructores saben que nun va haber filtraciones con ellos, daqué que los políticos, particularmente cuando tán nel poder, reprochen especialmente. Ye daqué a lo que venimos asistiendo estos años caberos.

Va dalgún tiempu, yeren momentos d’afogón nel PP a cuenta la corrupción, el ministru Zoido camudó l’organigrama del Cuerpu pa tratar d’aportar a esa información tan sensible, nun lo consiguió. Tres él llegó Marlasca, que al poco de la so entrada defenestró al coronel Corbí; Xefe de la UCO y con una impresionante trayeutoria profesional, cometió l’erru de poner por escrito la probetería de fondos cola que trabayaba la unidá, una forma encubierta de peslala. Agora ye Pérez de los Cobos, xefe de la Comandancia de Madrid y que la so cabeza pidieran los partíos golpistes del Procés; y que, con dilixencies abiertes a varios miembros de la administración socialista pola xestión del Covid, el señor ministru nun duldó n’executar.

El honor ye la principal divisa del Guardia Civil, va siguir siéndolo magar les presiones, va caltenese intautu anque-y rescueza a la clas política, y a min prestaríame ver dalguna dimisión solidaria percima del emplegu de coronel.

Raúl Suevos

A 25 diés vencíos de mayu de 2020

Torna en castellán en repdiv.blogspot.com

Un rexeneracionismu nuevu

Mientres xeneraciones, n’España, énte una llaceria llegaba’l dichu acompagador de “más se perdió en Cuba”, recordando la perda de les provincies ultramarines a manos del yanqui. Foi una hecatombe auténtica pal maxinariu de los españoles de la dómina; d’un llau la tarrecible cuantificación de les pérdigues humanes y la visión de los réfugos humanos que diben aportando en condiciones llercioses nos barcos del Marqués de Comilles, y del otru’l sentimientu de tener perdío les posesiones americanes caberes, anque la pronta recuperación de la economía amosaría que la perda nun yera tan tarrecible.

El sentimientu xeneral yera tremendamente negativu y daría llugar no artístico a la conocida Xeneración del 98, y no político al Rexeneracionismu. Un movimientu ésti de calter transversal nel qu’había figures de tol arcu políticu pero nel que sobresalía Xoaquín Costa, el Lleón de Graus. Enseñante, xurista, historiador, xeógrafu y políticu, pocos ámbitos escaparon al so interés anque foi como morra más conocida desi movimientu rexeneracionista como pasaría a la historia.

Costa ellaboró un lema pa la so teoría, “Escuela, despensa y siete llaves a la sepultura del Cid”. Anguaño, pa dalgunos, atopamonos énte un desastre de dimensiones y consecuencies iguales o superiores a les de la Guerra colos EEXX, y tamién pa dalgunos faise necesario un movimientu rexeneracionista, y quiciabes el lema de Costa tenga entá dalguna vixencia.

La escuela yera entós fundamental, namái’l tenue brillu de la Institución Llibre d’Enseñanza, de la que Costa formara parte, se salvaba, el restu yera desolación, y anguaño queremos autoconvencenos de que tenemos un sistema educativu de primer clas, como asocedía col sanitariu por cierto, pero la realidá ye que la universidá de nueso, con munchos años de cooptación interna al llombu, nun ye seguro qu’aguante munches comparaciones; y les privaes apaecen más na prensa por oscuros negocios coles titulaciones que por llogros académicos. Les leyes d’enseñanza, dende va años, nun son más que’l campu de duelu de los dos grandes partios. En fin, pa qué más.

La despensa ye, nun cabe dulda, u más se tien progresao pero, dexando de llau la toma proteínica entós mui escasa, y centrándomos nos medios p’aportar a ella, esto ye, el trabayu, tamién ehí paez necesario un cambeu fondu puesto que la dependencia tan enorme del turismo y l’esparcimientu va  ponenos de rodielles mui ceo. Cuasi tola gran industria ta a la eventualidá de que les grandes cabeceres a las que pertenecen decidan la so desllocalización. En Sevilla tiembla la industria aeronáutica y los centros automovilísticos recen en ca ciudá al so patrón.N’Asturies va tiempu que nun queden llárimes.

Les siete llaves de Costa, afortunadamente, atopóles don Ramón Menéndez Pidal que recuperó y tráxomos la figura del Cid pa conocimientu, satisfacción y arguyu de los españoles, pero paez nidio que güei, más que nunca, hai que dexar de llau la historia, especialmente la que mos divide, y centrase en construyir una nueva sobro la base de una Europa fuerte, esa de la que’l nuesu gobiernu espera un maná, que mos sirva de locomotora y referente nos conocimientos y actitues que necesitamos pa sobrevivir como nación nun mundu cada día más competitivu y batallosu, más tensionáu poles polítiques de les potencies.

¿Van ser los nuesos políticos a tomar el camín del rexeneracionismu?   

Raúl Suevos

A 20 díes vencíos de mayu de 2020

Torna en castellán en repdiv.blogspot.com