Carlinos ye’l Charli, el Charli
Ruiz Lapresta, un de los grandes xinetes de la nuesa promoción, esto ye, de
Caballería, un arma con escasos elementos y la escasez, yá se sabe, ye en sí mesma
una nota de distinción. Pero Carlinos tenía elementos propios pa facese estremar.
Nun yera natural de Zaragoza,
anque mimetizarase y físicamente respondía a lo que ún espera que seya un mañu.
Un cuerpu reciu y cuadráu; royu-y dicen n’Aragón, con una cara ancha y de espresión
bonachona enmarcada nuna sonrisa; una cara que paecía fecha pa llevar permanentemente
puestu un cachirulu a la tiesta, el pañuelu aragonés.
Carlinos y yo nunca coincidimos na
vida profesional. Nos raspiamonos va yá años, comandantes nuevos, cuando, recién
algamáu’l reconocimientu oficial de llingua francesa pasamos a tar nel
disparaderu pa ser unviaos forzosos a Ceuta. A dengún de los dos mos apetecía y
un matiz, que yá escaecí, facíano duldar sobro cuál de los dos sedría’l agraciáu
lo que mos tenía a dambos nun sin vivir, hasta qu’apaeció un voluntariu que mos
quitó de guelpe l’ansiedá. La anécdota sirvió pa estrechar un poco más la
fraternidá que l’Academia militar mos da a toos.
Les habilidaes de Carlinos nun diben
cola bandurria de los baturros nin los caballos de los xinetes. Lo de so yera
la pluma. Yera l’escritor de la promoción, un estajanovista de la producción lliteraria
nestos años caberos, como si albidrara que nun tendría tiempu pa espresar y
contanos tolo que tenía dientro. Facíalo amás ensin esparavanes, como avergonzáu
de que un de caballería pudiere dominar la pluma daquella miente. Pero dominabala,
facíalo mui bien.
Trabayaba estupendamente la
novela, daqué que requier maxinación y que a min paezme que ye un regalu que la natura-y fai a mui pocos;
pero au más esfrutaba, creo, yera nel ensayu históricu. Va unos años púnxome na
difícil situación de presentar una de les sos obres, sobro Cuba y Filipines y
pude comprobar hasta qué puntu yera concienciudu y trabayador na construcción
de les sos obres lliteraries. Daqué más tarde pasóme la ponencia que llevaba a
un congresu d’historia sobro la gran intérprete y traductora de la historia d’España,
doña Marina, la Malinche, y de nuevo pude calibrar la profundidad de los sos enfotos.
Raru yera’l añu nel que nun tenía
obra pa asoleyar y lo de so yera llevar más d’una en preparación. Na reunión
cabera de la promoción en Zaragoza echamoslu de menos, taba yá engarriáu col
bichu anque ainda nun lo sabíemos. En marzu pude visitalu na Quirón au taba
ingresáu; ellí taba Patricia, la compañera de toa una vida, y anque yá tuviera
un sustu importante dambos taben animaos y encomendabense a la Virxen de la qu’ellí
teníen una guapa talla, regalu d’un antiguu profesor de la promoción y depués
compañeru de Charli. Ella lu va arropar agora.
Daquel ingresu coló pa casa, pa
recuperase lloñe del coronavirus qu’entós entraba de llenu nos hospitales. El
Xueves Santu foi un mal día y tuvo que reingresar, dende entoncenes procuraba
llamalu, lo xusto pa dar calor ensin fadiar. Falábamos sobre too de lo de so, lliteratura,
y pude recomenda-y L’home qu’amaba los
perros de Padura, que se fizo llevar al hospital y que-y prestó, y que yo
voi tornar a lleer en so homenax.
El sábadu falamos per cabera
vegada. Taba mui fluexín, pero falamos de futuru.
Galopia Carlos, galopia.
Raúl Suevos
A 14 díes vencíos de
mayu de 2020
No comments:
Post a Comment