Día de la marmota nel PSOE

Ún de los adaxos que más s’usen en política ye aquel que diz que la historia siempres se repite, o, na so versión más personalizada, qu’aquellos que nun deprenden de la historia tán condergaos a repitila. Nestos tiempos que mos toca vivir, muncho más prosaicos, más cutres diríemos en llinguax modernu, lo que suel dicise ye aquello de que tamos nel día de la marmota, la repetición d’acontecimientos que dio títulu a una película norteamericana de gran ésitu. El casu ye que, en munches ocasiones, tenemos la sensación de vivir en circunstancies repeties; ye no que güei mos atopamos n’España.

Na mio infancia, adolescencia y mocedá nun se falaba nin de la República nin de la Guerra Incivil, yeren asuntos que les families evitaben, por dolorosos, en cuasi toes elles. Depués, col desaniciu natural del Xeneral Franco, vieno la desapaición del réxime y la Transición política, que tan falaguera paecía y que traxo’l mayor periodu de paz y progresu pa esta vieya nación en 500 años. Too paecía dir abondo bien hasta que l'aportar de Zapatero al poder punxo en dulda el pieslle de les feríes que la Transición paecía que zarrare, dende entós la polarización, un eufemismu qu’escuende les Dos Españes que yá denunciara Machado, vieno a asitiase otra vegada nel país y con ella los españoles paecen querer tornar a güeyase de regüeyu. Nun ye pa sentise contentu nin tranquil.

Nel periodu republicanu’l PSOE nun yera’l partíu más importante, pero sí’l más asitiáu y organizáu. El gran tirón de la dómina teníalo Manuel Azaña y el so Partíu Republicanu y con él de mascarón de proa ganaron dos eleiciones les esquierdes y el centru. Tres les del 36 dexáronlu sólu pensando, a lo menos l’ala esquierda del partíu, en facese con tol poder y traer la revolución; nello tevo una de les principales razones de la guerra viniente.

Nel PSOE vivíen tres tendencies, la revolucionaria y marxista de Largo Caballero –seguramente la más dañible-, la socialista y transaccional de Prieto, y la más integra y socialdemócrata de Julián Besteiro, honestu y lleal hasta les consecuencies caberes, lo que lu llevaría a morrer na cárcel por negase a fuxir de Madrid nos últimos momentos y preferir encarar les consecuencies de les sos decisiones. Sobro Negrín  entá güei nun  se ponen d’alcuerdu los especialistes sobro si yera una mala persona, un babayu o, simplemente, una marioneta del Moscú estalinista.

Anguaño’l PSOE recuérdamos a aquellos líderes políticos. Tenemos a González que, silente hasta l’estrueldu nos tiempos caberos, salió a ¿condergar? la falta d’audiencia de Sánchez a Guaido –el presidente “encargáu” de Venezuela reconocíu pol gobiernu socialista español- con unes 

declaraciones que mos recuerden al Prieto del esiliu mexicanu. Al so comunicáu retrucó-y Zapatero, el mesmu que lleva mediando nel conflictu venuecelanu estos últimos años con una mediación que dalgunos –yo ente ellos- consideren demasiao esviada haza’l llau de Maduro, diciendo que-y paez muncho bien que Sánchez pieslle la puerta a Guaido. Nesti casu nun mos queda más remediu qu’acordamos de Largo Caballero por aquello de la Robolución  bolivariana.

Finalmente quédamos Sánchez al que paez propio enxareta-y el papel del doctor Negrín, al que naide fo a diagnosticar haza ónde diba, sacantes nela so aventadura n’allongar la guerra y arrequexar al Xefe del Estáu ¿el Rei?, col so apalancamientu nel Partíu comunista y la carísima ayuda soviética –recuérdese lo del oru de Moscú- p’acabar tres la rendición repudiáu per tolos bandos republicanos. A lo último, pente medies d’Esquierda Xunía, encuadrada en Podemos, otra vegada mos atopamos tres más d’ochenta años col Partíu comunista formado parte del gobiernu d’España.

Confieso que me cuesta alcontrar una carauterización actual pal coronel Casado. A García Page nun lu veo más que como ocasional Pepito Grillo, y los inefables Fernández Vara y Lamban namái algamen a estudiaes mosques coyoneres. Per otra parte, a Rodríguez Ibarra entá toi esperando a que pida la so anunciada baxa del PSOE de mou que, por más que busco, nun me sal naide dispuestu a 

dar una puñada na mesa.

Lo dicho, el PSOE paez autocondergase a repitir la historia y namái mos cabe esperar que'l desenllaz, esta vegada, mos seya más llevaderu.

Raúl Suevos

A 24 de xineru de 2020

Torna en castellán en repdiv.blogspot.com

El mundu de Sofia y los soldaos asturianos

El títulu pue llevar a pensar nel pá de la infanta Sofía, esto ye, el so augustu pá’l rei d’España; pero non, refierome a Sofía, l’adolescente protagonista d’un rellatu maraviosu que Jostein Gaarder, un profesor de filosofía suecu, escribió en 1991 col enfotu de, pente medies la so llectura, atraer a los adolescentes al mundu la filosofía. Los sos planes fallaron escandalosamente tocantes a la mocedá pero foi un ésitu mundial ente los adultos y encamiento-ylu vivamente a quien nun lo conoza.

El pá de Sofía apaez esporádicamente nel rellatu; nun ta presente, ta destináu nel batallón que Suecia tenía esplegáu per aquel entós nos Altos del Golan, dientro de la misión de Naciones Xunies conocida como UNIFIL, United Nations Interim Force In Lebanon, abierta en 1978 y que entá permanez activa anguaño como FINUL.

Suecia caltuvose ellí abondos años; la ONU nun atopaba rellevu. Mientres la presidencia Aznar hebo un amagu español que, afortunadamente, foi desactiváu poles valoraciones negatives de los mandos militares. Tiempu depués, mientres la presidencia Zapatero, na fase de llaváu de cara tres la intempestiva salida d’Iraq, decidióse la participación d’España en Llíbanu. Y ellí siguimos, con dellos muertos na cuenta… a cuenta los dos bandos; la chiíta Hezbollah y l’Exércitu d’Israel.

Va unos meses tornaba del Llíbanu depués de seis meses de misión un continxente asturianu de 450 homes y muyeres, au van regresar en cuanto los periodos de recuperación y los planes d’espliegue del Estáu Mayor lo decidan. Esto ye lo que correspuende a una unidá d’alta disponibilidá y preparación como ye’l casu del Reximientu del Príncipe, pero ye posible que la vegada viniente seya estremada.

Nos tiempos caberos asistimos a un aumontu la tensión, siempres mui alta, ente Irán y los Estaos Xuníos. Detrás d’esta tensión atopase la histórica y permanente guerra ente Irán y Arabia Saudí, y el sofitu americanu a los segundos y con ellos a Israel. L’asesinatu del xeneral Suleimani foi un puntu d’inflexón a partir del cualu namái se pue esperar que la situación empiore.

Dicen que la venganza ye un platu que se sirve friu y la cultura persa ye especialista na xestión del tiempu y en cobrase les deldes; sicasí, Hasan Rohaní, el clérigu primer ministru d’Irán, dexó cayer ayeri qu’Oriente Mediu ye güei un llugar mui peligrosu pa los soldaos norteamericanos pero que, nel futuru, va selo tamién pa los europeos. Paez consecuente pensar que los soldaos de nueso, na vecindá de Hezbollah, tienen motivos p'amontar les midies de seguridá.

A nivel estratéxicu, y teniendo en cuenta que yá son 14 los años que llevamos esplegaosnel Llíbanu, 

quiciabes seya’l momentu de pensar que’l nuesu interés alcontrase anguaño nel Sahel, l’actual Estremadura d’Europa, u campen a los sos deleres un gran númberu de grupos terroristes, unos d’obediencia a Al Qaeda y otros al Estáu Islámicu. Dend'ellí suben haza les sableres de Llibia, camín d’Italia, y Marruecos, camín d’España, los estremaos fluxos d’inseguridá y conflictu que’l cambiu climáticu y la esplosión demográfica amenacien con facer reinales.

Quiciabes aportó’l momentu de dise del Llíbanu y preocupase de la nuesa defensa avanzada más allá del Sáhara.

Raúl Suevos

A 16 de xineru de 2020

Torna en castellán en repdiv.blogspot.com

Margarita Robles emulando a Macron

Dalgo tienen de mancomún los dos personaxes; doña Margarita encargase de la Defensa en cuanto vicaria del presidente del gobiernu que, n’España, siempres se distinguieron pela so añollanza de les cuestiones de la Defensa. A Rajoy, según él mesmu dicía, l’asistencia al desfile del 12 d’ochobre paecía-y una penitencia, un coñazu nes sos pallabres. Macron si qu’asi, dexa al so ministru de defensa cuasi ensin rellevancia puesto qu’él, como presidente la República, ye setosu de les competencies de so en política internacional y, va de suyu, de les de Defensa.

El casu ye que a la señora ministra faltó-y tiempu pa camudar el so JEMAD, el Xefe del estáu mayor de la Defensa, xeneral Fernando Alejandre, un estraordinariu oficial del arma d’Inxenieros; xente dura, áspra y sincera, cuasi tanto como los d’Infantería. El xeneral falaba demasiao nes comparecencies énte la Comisión de Defensa; yá lo facía en tiempos de quien lu nomó, la señora Cospedal. Dicen que dicía lo que pensaba; figúrense ustedes. Y hasta se quexaba de la falta d’inversiones nel ámbitu de la so competencia; sacantes na UME, qu’esa sí, esa sí paga n’imaxe pal gobiernu, con independencia la so color.

En Francia, al entamu’l so quinqueniu, el señor Macron atopóse cola quexa del so JEMAD énte la Comisión de defensa, y nun tardó en rellevalu por daquien de confianza, el so xefe de gabinete; y escribo lo de confianza ensin segundes intenciones yá que me paez lexitimu que seya esi’l venceyu que prevaleza a la hora de según qué nomamientos, tamién nel Ministeriu de Defensa. Nesi aspeutu asemeyase doña Margarita al señor Macron, buscó la confianza qu’otorga’l fechu de que’l xeneral Villaroya fuere’l so xefe de gabinete demientres el so anterior periodu a cargu de Defensa.

Quiciabes el tiempu -desaxeradamente curtiu pa daquien procedente del ramu de la Xusticia- que tardó la señora ministra pa llevar a cabu’l cambéu seya una forma d'amosa-y al Xeneral Alejandre l’apreciu que-y tenía y poro lo fizo metanes una reunión de la OTAN en Bruxeles; quién sabe. Sicasí, ye’l momentu de deseya-y suerte al Xefe de estáu mayor de la Defensa nuevu porque de preparación toi seguru qu’andará sobráu. 

Raúl Suevos

A 14 de xineru de 2020

Torna en castellán en repdiv.blogspot.com

El mundu feliz del satisfier

L’adolescencia ye en toles dómines un periodu complicáu; na mio xeneración, y dende entoncenes yá llovió abondo, too yera un descubrimientu puesto que la radiodifusión yera práuticamente lo único qu’entraba nes cases. Les coses que verdaderamente ocupaben el pensamientu la mocedá solíen aclarase vía dalgún compañeru de correríes daqué más avezáu. Pel llau oficial La vida sal al alcuentru de Xosé Luis Martín Vigil yera la llectura encamentada y cuando daquien robaba al so hermanu mayor el Lui, la revista francesa inspirada nel Play boy, aquello convertíase nuna esplosión de testosterona xuvenil.

Nel bachiller superior había que cultivase pa dase pistu delantre les neñes, y el que más y el que menos poníase a lleer lo que se suponía que yeren les llectures de moda, hasta los de ciencies lo facíamos. El llobu estepariu daba muncho prestixu y Suecia, infiernu y paraísu del italianu Altavilla algamó a ser de llectura obligada. Otru que pegó bastante y qu’a min me impresionó descomanadamente fo’l mundu feliz de Aldous Huxley, nel que se describe una humanidá que se reproduz en llaboratoriu y camudó’l cubata polos sicotrópicos, y nel que namái queden dalgunes reserves d’humanos primitivos, controlaos y visitables polos urbanitas; yera pura ciencia ficción y lo de la reproducción tecnolóxica inquietabame de manera particular; díbamos llegar tarde. La imaxe yera la d’un mundu deshumanizáu qu’a min nun me resultaba curiosu.

La oveya Dolly vieno a confirmar que daque se diba moviendo nos alambiques de los alquimistes modernos, pero de Huxley cuasi naide s’acordaba. Unos años dempués, cuasi por casualidá, pude ver Gattaca, pa min una película de cultu que pasó cuasi desapercibida. Nella, unos mozos Ethan Hawke, Uma Thurman y Jude Law dan vida a unos personaxes futuristes, nacíos perfeutos frutu d’una seleición d’óvulos cuidadosa y con unes capacidaes físiques estraordinaries, quitando un d’ellos, concebíu na parte d’atrás del coche paternu y salváu pola burla de la llei por parte los sos proxenitores, y qu’agora llucha por engañar al sistema sobro les sos llimitaciones pa’asina poder entrar nel programa de viaxes espaciales.

Esti añu caberu, dicen los estudios del ramu, l’artículu más buscáu n’internet foi un arbíu nomáu satisfier, succionador de clítoris n’español, que paez ser que ye’l xuguete sexual femeninu final, y que, de xacíu, nun necesita de participación masculina. Y claro, un, que per edá tien tendencia al pesimismu, nun puede por menos que pensar que’l mundu ye cada vegada más femenín, ensin 

necesidá de la denomada ideoloxía de xéneru. Les coses son asina, cada vegada somos menos necesarios. Políticos y sociólogos céntrense y preocupense na equiparación, l’igualitarismu y esi tipu de coses pero, témome, la evolución ye más fonda ya imparable.

Esther Vilar algamó una gran notoriedá con una obra, el varón domáu, que, allá pel entamu los 70, trescaló fondamente a la sociedá española, a los varones sobremanera, naque plantegaba que, per baxu del poder aparente masculín despintaba y yera más potente’l de les muyeres, que yeren les que controlaben pues teníen al varón domáu. Anguaño les sos tesis paecen descomanadamente naif pero, más allá d’esa supuesta llucha pol poder, güei yá nun hai llugar, el satisfier vieno a finar definitivamente col machu clásicu porque lu fai totalmente innecesariu. Tamos ḥodíos.

Raúl Suevos

A 10 de xineru de 2020

Rorna en castellán en repdiv.blogspot.com

L'ayeri de Manuel Azaña y el güei de Rosa Díez

L’AYERI DE MANUEL AZAÑA Y EL GÜEI DE ROSA DIEZ

Diz Madariaga que la historia de la República foi n’esencia la llucha del centru por esistir y la de los estremos por torga-y ganar masa y momentu. Acordies coles cróniques el problema pa qu’esi centru, formáu pola Aición Republicana d’Azaña y el Partíu Radical de Lerroux, pudiere aportar a daqué de concretu qu’enzancase la polarización del frentismu definíu poles esquierdes yseparatistes d’un llau, y les dreches qu’acabaríen na CEDA del otru, alcontrabase esclusivamente na personalidá incompatible de dambos líderes.

Lerroux, veníu del periodismu y al qu’anguaño llamaríen populista radical, yera cordialmente despreciáu por Azaña que se consideraba intelectualmente muncho superior, y estes caxigalines personales torgaron que’l factor de distensión, enllaz y capacidá de xestar alcuerdos que representa una formación de centru algamase a facese una realidá sólida. Nel so llugar, Manuel Azaña dirixóse a la esquierda y Lerroux, abandonáu y dolíu, cayó nes dreches. La polarización estrema llevó a la Guerra incivil, esa que dalgunos paecen empeñaos en desenterrar.

Nestos años caberos asistimos a un renováu repartu de papeles na obra tráxica que ye la política española. Rosa Díez, formada na dura batalla del socialismu vascu de los años de plomu, asqueada de los de so, funda un partíu transversal, UPyD, que paecía llamáu a apinar esi necesariu centru políticu vacíu dende la desapaición del CDS. Pocu depués, en Barcelona, y ente la cesión de posiciones y principios per parte del PSC y PP, baste recordar l’estatutu promovíu por Maragall o la defenestración d’Alejo Vidal-Quadras, apaez Ciudadanos como movimientu socialdemócrata de calter constitucionalista y que, dende’l rápidu crecimientu catalán nun va tardar en dar el saltu a nivel nacional.

Lo asocedío depués recuerda al desencuentru d’Azaña y Lerroux. Rosa Díez tampoco paeció ver l’interés nacional de la xunión de dambos partíos y eso conduxo de siguío a la práutica desapaición de UPyD; pela so parte, Albert Rivera conoció, a midida que la cuestión nacional se radicalizaba, un crecimientu descomanáu que lu llevó –los fechos tán ehí pa dar fe- a tomar decisiones enquivocaes; primero un saltu haza’l lliberalismu que non toos entendieron y, nes eleiciones caberes, un nidiu posicionamientu conservador, col oxetivu de superar al PP, que dio como resultáu un escalabru eleutoral y el so abandonu de la política activa.

La situación anguaño, en cuantu al sistema de partíos, recuerda muncho a la de va ochenta años. Tenemos un Parllamentu polarizáu hasta’l desesperu, nel que nin siquier se caltienen les formes, y nel que los grupos, desgraciadamente, recuerden demasiao a los que yá entós s’atopaben ellí representaos. El centru, esi centru tan necesariu, imprescindible pa dalgunos, alcuentrase reducíu a la mínima espresión, con un grupu, Ciudadanos, de namái 10 diputaos dirixíos por una líder animosa, Inés Arrimadas, que bracia pa que les augues revueltes nun la encloyan nestos díes qu’auguren tiempos peores y nos que, amás, tien que poner en marcha un procesu de refundación y renovamientu de liderazgu nel so propiu partíu. Tiempos difíciles.

El desencuentru d’Azaña y Lerroux, en ciertu mou, llevó al desendolcamientu de la Guerra incivil y güei los analistes pesimistes creen que la situación d’España ye mui semeyante; a min, que nun cuento con abonda información, consuelame pensar que nos depósitos militares anguaño yá nun hai, como entoncenes, malapenes armamentu y, na cai, la Benemérita cuenta con un sistema de control d’armes que ye la envidia de too occidente. Entá siquier.

Raúl Suevos

A 5 de xineru de 2020

Torna en castellán en repdiv.blogspot.com

Vindicamientu de los procuradores franquistes

El réxime del xeneral Franco tenía abondo nidiu’l conceutu de soberanía nacional. Yera él mesmu, sustanzabase na so persona, a lo último él yera caudillu d’España pola gracia de Dios, de mou que tolo demás yera accesoriu. Sicasí, el réxime creó un sistema de Lleis fondamentales del reinu que pa munchos constitucionalistes compón un auténticu sistema constitucional y, dientro d’él, les Cortes cumplíen una función importante.

Yeren los procuradores los que nutríen eses Cortes; unos, miembros natos en función del so puestu institucional, otros elexíos por sufraxu pal nomáu terciu familiar, otros elexíos ente municipios, sindicatos y colexos profesionales; finalmente, un grupu de designaos pol xeneral Franco ente militares, purpuraos y otros. El so paecer sería d'importancia tráxica a la fin del réxime.

La transición política española ye un casu únicu nel mundu yá que se fai llegal y pacíficamente gracies a un artificiu parllamentariu, l’aprobamientu de una llei, una vegada desapaeciu’l Xeneral, qu’implicaba’l suicidiu llegal del réxime; la Llei pa la Reforma política. Ensin ella España diba haza un bloquéu políticu que, col amontar de la tensión interna, naide podía predicir cómo se diba resolver.

El rei Xuan Carlos y el presidente Suarez llevaronse la gloria d’esti procesu pero’l gran xestor del asuntu foi l’entoncenes presidente de les Cortes, don Torcuato Fernández Miranda. Él foi’l diseñador de la maniobra y tamién el responsable de “trabayar” a los estremaos grupos de procuradores, que los había, pues escontra lo que pueda paecer aquello nun yera un grupu monolíticu. Dientro del sistema cohabitaben estremaes sensibilidaes ya idees polítiques, anque nun s’articulasen coleutivamente de manera oficial.

La clave del votu, un votu que camudaría’l sistema políticu, nun hai que lo escaecer, atopabase nel convencimientu de que yera necesario evolucionar pol bien d’España y toos aquellos homes y muyeres –poques- actuaron en conciencia siguiendo, más o menos, el su propiu entender y convencimientu, ensin instrucciones tasatives procedentes de dalgún ente, sindicatu, colexu o, aínda menos, exércitu. Votaron según el so criteriu y d’ehí nació l’estáu democráticu y de drechu qu’anguaño esfrutamos. Sí, sélo, too ye meyorable.

Güei esfrutamos de delles Cortes democrátiques nes qu’aquelles “sensibilidaes” articulense en forma de partíos políticos, o agrupaciones de votantes como nel casu turolense. Pero equí ye au m’algama la

 molición ¿Son más llibres los actuales diputaos? ¿Son a reflexar con exactitú’l sentir de la nación? ¿O más bien mos atopamos con unos diputaos esclavos del mandatu partidariu, pesllaos dende’l puntu en que son incluyíos nunes llistes zarraes qu’esixen como contraprestación una total sumisión al líder, mayor entá de la que los procuradores teníen al Xeneral Franco?

Ye posible, visto como discurren les coses anguaño, que’l sistema políticu español tea necesitáu d’una revisión, particularmente’l sistema eleutoral, pero nel alcuerdu robláu poles dos mayores fuercies polítiques d’esquierdes, pa facese col gobiernu de la nación, la ufierta que se fai ye de llistes cremallera y baxar la edá de votu a los 16 años; nin un res de llistes abiertes o circunscripciones unipersonales, nada de dar valir al votu ciudadanu, polo que nun puedo menos que vindicar a aquellos procuradores que foron a votar pensando namái no meyor pal futuru de la nación.

Raúl Suevos

A 3 de xineru de 2020

Torna en castellán en repdiv.blogspot.com