La xeopolítica del Corredor central

La xeopolítica ye pa munchos una ciencia, y, como toles qu’estudien elementos rellacionaos col home, abondo complicada por cierto; pero, sicasí, ye un conceutu que vien a rellacionar l’espaciu físicu y/o humanu colos efeutos y repercusiciones polítiques que la so xestión produz. D’otra miente, les decisiones polítiques deben tener en cuenta la xeografía porque si nun lo faen ésta fina por vengase, y d’eso sabemos muncho n’Asturies.

Casi siempres s’asocia’l conceutu al ámbitu internacional pero ye induldable que no domésticu tamién tien la so importancia. Nun hai más que ver les torgues que se producen p’aprobar o modificar un plan xeneral d’urbanismu; en Xixón echamos más de diez años y entá rabea. Pero a nivel nacional tamién se tomen decisiones de nídiu calter xeopolíticu, sobre too si’l país, como ye’l casu d’España, tien na so xeografía carauterístiques continentales.

Nestos tiempos caberos vimos na prensa una campaña nueva a favor del nomáu Corredor mediterráneu, hasta con anuncios televisivos pagaos. Supónse que se trata d’una vía férrea moderna qu’entrando pola Junquera va llegar –fecha yá en parte- ensin interrupciones hasta Algeciras y pola cuala lleven años presionando los empresarios catalanes y valencianos especialmente, y equí ye cuando aportamos a la xeopolítica española.

Les dos víes d’entrada y salida del país anguaño pasen pola Junquera y Hendaya, tren y carretera; en dellos casos tamién les grandes víes eléutriques, eses que mos trayen los eleutrones xeneraos nes centrales nucleares franceses que nós nun queremos y que, en casu d’accidente nuclear, mos regaríen col so lloviu radioactivu si’l vientu lo decidiere. Pero tornemos a lo de nueso qu’aina me pierdo.

Va non muncho, con ocasión de la sentencia del Tribunal Supremu tocantes los separatistes catalanes pudimos güeyar como’l pasu la Junquera se piesllaba pola presión manifestante mientres más de 24 hores, xenerando un grave problema loxísticu al país enteru. Nel intre, durante unes curties hores, otros manifestantes zarraben el pasu d’Hendaya, en solidaridá colos separatistes catalanes.

Les dos víes d’entrada y salida del país, vía férrea y rutera, son susceptibles de ser cortaes pola presión de manifestantes que cuenten cola comprensión, si non el sofitu manifiestu, de los sos gobiernos rexonales. ¿Daquien se paró a pensar la vulnerabilidá qu’esto significa pa la nación? ¿Tará preocupáu’l doctor Sánchez?

Esiste una solución. Hai otru corredor, el Corredor central, que saldría d’Algeciras, subiría a Madrid, 

siguiría a Zaragoza au se-y amecería’l ramal viniente de Valencia pa siguir haza Francia atravesando’l Pirinéu per Canfranc, en Huesca, per u yá discurre una autovía, y un túnel ferroviariu va más de cien años. Paez la solución lóxica pa un problema de xeopolítica interna al que, me temo, los gobiernos españoles nun van prestar la debida atención por aquello de nun fadiar a los sos socios enantes nacionalistes, agora separatistes. Y asina mos va.

Raúl Suevos

A 30 d’avientu de 2019

Torna en castellán en repdiv.blogspot.com

El discursu del rei

Cuando se diz asina, ensin agregos, a la xente vien-y a la cabeza una película protagonizada por Colin Firth, esi actor inglés que, como David Niven na so dómina, paez especializáu en facer d’inglés, precisamente, y que nesa película encarna a Jorge VI, el pá de l’actual monarca del Reinu Xuníu quien aportaba al tronu por causa sobrevenida y tenía que resolver el tragu, dada la so tatexatura, de dar el discursu inaugural de la Corona.

Sicasí, güei ye un día particular n’España tocantes el discursu del rei. Forma parte del entamu la Nuechebona dende va munchos años, cuasi diríamos que dende siempre pues cada vegada somos menos los qu'entá mos acordamos de cuando’l momentu-y correspondía al Caudillu. A les nueve en puntu, enantes el rei Xuan Carlos y agora'l so fiu, el rei Felipe, métesemos en casa per unos minutos, malapenes diez, y agasayamos con un repasu de lo que foi l’añu y aventura una espresión de bonos deseyos pal futuru de la nación. Pero güei paez que tamos nuna ocasión particular.

Va dalgo más de dos años sorprendíamos el rei Felipe con un discursu fuera de programa nel que mos falaba de desllealtá institucional, antónimu del conceutu que suelda l’entramáu de la nuesa Constitución dende qu’España ye democracia. Discursu que supunxo l’activación d’un gobiernu hasta entós petrificáu énte l’abilsu que suponía l’aplicadura per primera vegada d’un artículu 155 que paecía apavoriar a tol arcu parllamentariu. Foi ensin dulda un discursu históricu, como nel so día lo fo’l de so pá con ocasión del intentu del guelpe d’estáu de 1981. Discursos dambos que marquen la historia d’un reináu.

España ta soriella. Les votaciones caberes amuesen nidiamente una polarización del espectru políticu con un amenorgamientu claru, cuasi evaporación, de les posiciones centristes y, poro, transaccionales. Les posibilidaes de formación de gobiernu paecen pasar pola construcción d’un arbíu políticu que nel so senu o sofitos lleva posiciones non yá diverxentes sinon antagóniques en cuantu a la integridá de la nación española. Y, amás, aporta, pasaos más de cien años, una entente nueva ente Marx y Bakunin, pues a la presencia socialista y comunista, amecese una CUP, vía sofitu al gobiernu independentista catalán que, a la so vegada sofitaría al futurible de la nación, representa una nueva y menos curiosa versión del entoncenes frescu y, en ciertu mou, naif movimientu anarquista catalán.

Esperen dalgunos que So Mayestá entre nesti ruedu a manos llimpies, ensin esperar a ver qué clas de morlacu sal per toriles y cuando esti gobiernu en funciones caracterizóse por obsequialu con aventones innecesarios y siendo él, el gobiernu, quien tien la pallabra cabera sobro’l so parllamentu de fin d’añu. Nun barrunto yo que’l rei Felipe mos sorprenda esta nueche, les sos pallabres van ser estremadamente midíes. Nun pue ser d’otra miente. El tiempu tien de pasar, al rei nun-y correspuende gobernar y a nós tócamos, una vegada más, esperar y deseyar que les instituciones y mecanismos del estáu seyan abondo conducentes y áxiles como pa que, nesta hora de negros presaxos, llogren sacanos adelantre con los menores daños pa la nación.

Nun podemos nin debemos esperar que cada añu So Mayestá-y recuerde a la clas política cuáles son les sos responsabilidaes.  

Raúl Suevos

A 24 d’avientu de 2019

Torna en castellán en repdiv.blogspot.com

Y con Xibraltar ¿que ye lo que pasa?

Y CON XIBRALTAR ¿QUÉ YE LO PASA?

Tán estos díes los tertulianos radiofónicos, columnistes de prensa y comentaristes de lo político en xeneral, desataos énte la mina discutinios, polémiques y charráes desustanzaes que se-yos ofrez per delantre. Apunto lo de desustanzao porque a nada que ún se detenga a pensalo conclui que nin el doctor Sánchez nin el plumilla Johnson tienen pinta de dedica-y nin siquier un ceguñón a lo qu’estos profesionales del fumu puedan opinar o divagar sobro la futura formación de gobiernu n’España o los efeutos que’l –por fin- Brexit pueda suponer pal Reinu Xuníu o la Xunión Europea.

El doctor Sánchez, dende’l so aportar a la ¿alta? política española vien dando sobrada amuesa de tener como exe del so credu políticu ¡Non el bien d’España! Nin siquier el del so partíu, el vieyu PSOE; esi que fundara Pablo Iglesias y heredara, pa malvendelo, Largo Caballero; l’exe direutor de l’andadura d’esti narcisista ensin complexos foi siempres el llegar a lo más alto; a costa de lo que seya; y nello ta. De mou que ye una perda de tiempu tratar d’analizar, dende los parámetros clásicos, el a ónde, cómo y cuándo de los sos envises o los del so alter ego, el toscanu Iván Redondo. Dicho lo de toscanu pola so innegable machiavelofilia. Sólo les circunstancies van torgar qu’algame los sos oxetivos, anque seyan un desastre pa la nación española, y eses circunstancies van prestase al análisis de los politólogos una vegada pasada la crisis, como per otra parte asocede colos economistes. La vita é cosi, que diríen en Florencia.

Pel so llau, el bufonescu Boris Johnson, mediocre periodista y peor alcalde de Londres, lleva años medrando na política británica gracies a les sos salides de tonu y tamién, nun hai que lo escaecer, a que los sos antecesores –mediocres tamién ellos- punxeron-ylo mui fácil. El so haber más destacáu fo el sofitase en Dominic Cunmings, el sosias o alter ego de Redondo. Chifláu pa unos, xeniu pa otros pero que, sicasí, conduxo la campaña del Brexit y la de les eleiciones xenerales de forma maxistral, ganando les dos y la cabera con mayoría apolmonante pal señor Johnson. Irlanda del Norte y Escocia van ser los problemes internos a resolver por esta pareya particular pero, d'anicio, nun debe preocupanos a nos, españoles.

La conxunción desastrosa, en mi opinión, d’estos dos arquetípicos políticos –sí, desgraciadamente dambos respueden a un modelu que paez ser mayoritariu anguaño, y si nun presta quédense con Donald Trump- pue tener una incidencia direuta en daqué que mos vien afeutando dende va yá 

tiempu abondu, demasiáu, 315 años exautamente. Xibraltar se noma l’asuntu ésti, y nun se fala d’ello.

Cola salida oficial del Reinu Xuníu de la Xunión Europea van entamar les negociaciones de detalle pa lo que deben ser les rellaciones futures ente ún y otra, y ehí tamién va entrar la cuestión xibraltareña. Y nada s’oye, nin se llee, en rellación con esti tema, y a min paezme que nun ye menos importante que l’atención médica de los xubilaos británicos n’España o la situación contractual de los españoles trabayando o viviendo na Gran Bretaña, que tamién lo son. Xibraltar ye siempres importante y, de xacíu, tamién lo ye’l Campu de Xibraltar, la zona económica que vive y ye interdependiente col Peñón. Una zona sobro la cuala tendría d’haber yá unos planes de continxencia económica que torguen, desanicien o faigan insignificante’l desastre que s’avera cuando’l territoriu llanito dexe de ser territoriu européu, con tolo qu’ello significa.

Nun se fala un res de Xibraltar y el desastre pue ser tan tarrecible y repentín como cuando’l ministru Castiella pieslló la verxa. Nun esiste un grupu de trabayu o similar que tendría de tener planes yá en desendolcu y los únicos que paecen pensar en futuru son los clanes del contrabandu de h.achís y emigrantes. Y el Brexit yá ta ehí, y nos ensin gobiernu.  

Raúl Suevos

A 15 d’avientu de 2019

Torna en castellán en repdiv.bolspot.com

El Reximientu tien coronel nuevu

EL REXIMIENTU TIEN CORONEL NUEVU

El viniente vienres 13 el coronel Alfonso Pardo de Santayana va facese cargu del mandu del Reximientu del Príncipe númberu 3; el reximientu que, heriede del Terciu Vieyu de Lombardía y poro ún de los más antiguos d’Europa, atópase de guarnición n’Asturies dende 1893. Cumple afirmar que la unidá, que’l so mandu ye ún de los más deseyaos ente los coroneles d’Infantería, alcuentrase ente les más operatives del Exércitu Español y poro, dende qu’España participa en misiones y operaciones esteriores, ta permanentemente en mou espliegue, preparación o recuperación de dalguna de les sos espediciones. El coronel tien motivos pa sentise argullosu y preocupáu pola responsabilidá que recibe.

Pardo de Santallana pertenez a una familia que tien dao cuatro tenientes xenerales del Exércitu nos tiempos caberos, lo que nel Exércitu anguaño namái mos diz que la so vocación vien-y de tradición familiar. L’ascensu a coronel produzse tres una carriera na que los méritos académicos, operativos y personales son valoraos pola Xunta de calificación de forma refecha. Algamar l’ascensu ente los primeros certifica la excelencia del individuu y agora-y el mandu de dalguna de les unidaes piqueres, como’l Reximientu del Príncipe. Una responsabilidá de primera categoría teniendo en cuenta l’historial y el personal que nutre la unidá.  

Va atopase con un reximientu de doble batallón, en sí yá una categoría, que va entrar lluéu a formar parte de la Fuercia d’Intervención Inmediata de la OTAN, una especie de guardia permanente que mientes seis meses tien que tar pronta pa ser allanciada a intervenir en cualquier parte d’Europa a requerimientu de la Organización. P’aportar a ello tuvo que pasar per un llargu periodu d’evaluaciones que dan fe del so altu nivel d'adiestramientu. Depués, durante’l mandatu de dos años del coronel, van venir el Llíbanu, una misión d’interposición ente israelíes y la Hezbolá llibanesa que yá mos tienen costao dellos muertos, demasiaos, y que, como cuando daquien s’interpon ente dos que se solmenen, ye segura promesa de problemes graves.

El Sahel, esa franxa descomanada del sur del Sáhara que ye anguaño la estremadura d’Europa, tamién ye probable que reciba a los homes y muyeres del reximientu de nueso nuna misión, entá por definir, pero que tien una trescendencia direuta pal sistema de seguridá del nuesu país y de los nuesos aliaos.

El Sahel toma un cuelmu de países nos que l’ingresu diariu per cápita nun algama un dólar, con una 

tasa de natalidá galopiante y unos gobiernos que conxuguen corrupción ya ineficiencia a niveles insoportables pa la xoven y creciente población de los sos países. Ellí verbenen estremaos grupos terroristes de raigañu islámista, siguidores d’Al Qaeda o del Estáu Islámicu, cada vegada más potentes y difíciles d’erradicar magar la presencia de delles misiones internacionales de Naciones Xunies, de la Xunión Europea o de Francia, que sofiten los sos gobiernos y qu’entamen a ser percibíos como fuercies d’ocupación poles poblaciones de la zona.

El Sahel ye un aviesperu y una barrera xeopolítica pa Europa al que, como a la velutina, hai que pone-y remediu si nun se quier que s’estienda de forma imparable. Nesti casu la falta de control representa la facilidá pa que los fluxos de terrorismu, drogues, armes y emigración descontrolada aporten ensin torgues, primero a los países norteafricanos, yá de por sí fráxiles, y depués a los de nueso, y con ellos la medría de la inseguridá pa bienes y persones.

Tien el nuevu coronel del Reximientu del Príncipe per delantre dos años d’enormes responsabilidaes pues recibe una unidá dafechu conducente y preparada y a min, dende estes llínees, cabeme da-y la bienvenida y desea-y qu’algame los mayores éxitos a la fin del so mandatu.

Raúl Suevos

A 10 d’avientu de 2019

Torna en castellán en repdiv.blogspot.com

¿Qué ye lo que lleen los españoles?

Esta mañana mientes lleía dellos periódicos dixitales, nún d’ellos, de los más importantes, atopéme con una información que daba cuenta de les seis noticies más lleíes nesi mediu. Dos d’elles informaben del alcuentru d’un toreru d’aneya fonduxe con una supuesta amiga nuna cafetería londinense, otros dos apurríen la filiación completa de la susodicha, y a lo cabero, quedaben dos más dedicaes a dar cuenta de la trayectoria personal y detalles de la fechoría d’un asesín descuartizador, resalvo lo de presuntu porque nun siendo profesional tampocu me siento obligáu.

Estes son, con la que ta cayendo sobro’l país, les coses que, al paecer, interesen a los españoles. Nin la formación de gobiernu, nin l’embaranzu d’Inés Arrimadas, nin los ten que tienes de la Cume de la OTAN tenida en Londres, tampocu l’alcuentru retrasáu ente’l Madrid y el Barcelona paez llamar l’atención de los llectores d’esi diariu; y teniendo en cuenta qu’eses rellaciones de noticies formense de manera automática cada vegada que damos un clic na que mos interesa nun queda otra que pensar que son rigorosamente ciertes. Al español mediu, tipu, del montón o como ustedes quieran llamalu, los asuntos oficial, política o académicamente importantes importen-y una higa, eso ye lo qu’hai.

Escribía va yá tiempu Salvador de Madariaga que sacar del analfabetismu a la xente pa que leyere páxines que nunca debieren habese escrito  yera esfuerciu inutil y polo que se ve ye posible que nun anduviere descamináu. Les sos idees cuasi enllacen direutamente, lo cualo nun ye estrañu pues yeren coetáneos, con Ortega y Gasset cuando sollertaba escontra les mases que, creyéndose santificaes pola fuercia que dan los sistemas democráticos modernos, refugaben ser conducies poles élites rebelándose escontra elles. Viendo lo visto nun paez que’l tiempu quitare razón a dalu d’ellos.

Cabe nel casu d’Ortega, sicasí, facer dalguna salvedá, pues les sos élites lo yeren. El perteneció a esa España frutu de la Institución llibre d'enseñanza y a la Xunta d'ampliadura d'estudios que daría llugar a una xeneración académica d'altísimu nivel y que la Guerra incivil malograría. Tampocu-y diba a la zaga l'estamentu políticu que, anque incapaz d'evitala, tenía, en xeneral, una mayor talla intelectual y moral que la qu'agora mos representa. Talla por demás fácil de superar.

Formamos los ciudadanos d’esti país un fatáu pastueñu, fácil de dirixir, que va al engañu con dondura, por mui malu que seya’l lidiador, que lo ye. Un fatáu qu’actúa como si supiere que nada cabe facer col reglamentu de lidia que mos toca sufrir y que, cuando se-y faz dalgún retoque estéticu, namái tien como oxetivu meyorar la posición del lidiador.

Lo cierto ye que yá nun hai toreros como los d’enantes. Los d’anguaño abusen del toru y del respetable y cuando se retiren hasta se regodeen cola mofla como’l qu’estos díes mos presenta les sos memories ensin tener dao un bon pase en toa la so carriera y esperando que, disfrazando los munchos pinchazos y descabellos lu aplaudan como cortador de rabos.

En fin, que viendo lo que los españoles lleen nun ye d’esperar que les mases se rebelen y, per otru llau, col reglamentu taurinu a valir, ye mui difícil, por nun dicir imposible, qu’apaeza un bon toreru n’España. Tenemoslo mal.

Raúl Suevos

A 5 d’avientu de 2019

Torna en castellán en repdiv.blogspot.com

Va de sentencies

VA DE SENTENCIES

Esta selmana la cosa foi de sentencies; unes emitíes pero entá recurribles, otres son namái’l paecer del xuráu y esperen la sentencia del xuez, y les más recien nin siquier aportaron al ámbitu xudicial, son asuntu de la Guardia Civil. Toes elles, cuando seyan firmes, nun van ser más que la espresión del sentir de la ciudadanía, pues la xudicatura nun fai otra qu’aplicar les lleis qu’enantes aprobaron les Cortes, eses u se sienten los  nuesos representantes, los que nos eleximos.

La primera de les sentencies sacó ronches en Zaragoza, escenariu de los fechos. El tipu, d’orixe xilenu y nacionalidá italiana, venía de Barcelona au dexara parapléxicu a un mozu d’escuadra nun desallogu d’okupes; foise de bareta, pola cara, y aínda dio l’asuntu pa un documental onde los mozos d’escuadra yeren peores que la división Das Reich de les SS. El grupu políticu que sofita a l’alcaldesa Colau nin que dicir tien que tamien sofitaba al individuu en cuestión.

Con esos antecedentes vienose pa Zaragoza sofitáu pol movimientu alternativu, esi caldu au, como la olla aranesa, cabe too si lleva la vitola ultraprogresista, por etiquetala de dalguna manera. Y too debía dir bien hasta qu’una nueche nun bar cruzóse con un home que llevaba tirantes cola bandera española. El desgraciáu alcuentru finó con un muertu, el de los tirantes, y, magar les pruebes evidentes d’asañamientu, el xuráu optó pola mínima. L’individuu ye probable que, teniendo en cuenta que yá lleva cuasi dos años en preventiva, salga en breve a la cai, hasta que zarapique con otru desgraciáu.

En Galicia ta a puntu de rematar, nel aspeutu xudicial, el drama de la neña de a Pobra do Caramiñal. Un casu que, pola complicada resolución al cargu de la Guardia Civil y la enrevesosa rellación familiar, ente otros motivos, foi primer páxina de la prensa mientes munchos meses. Col paecer del xuráu, emitíu güei precisamente, falta la sentencia que va ser comparativamente muncho más dura que la recibida pol encantador elementu que, llueu, va tornar a campar poles cais de Zaragoza.

Zaragoza y la Pobra son casos estremaos nos que l’únicu puntu en común, aparentemente, ye la importante participación del xuráu popular na resolución del casu xudicial; un xuráu que, dende una visión progresista, paez ser ún de los elementos fundamentales del sistema xudicial. Yo, que soi llegu nel asuntu, pensaba que la independencia de la xusticia y la so fayadiza dotación en medios 

materiales yera más importante, pero vese que la parte popular, ¿O será populista? Ye más importante

 entá.

El tercer casu traenoslu güei la prensa. Un vieyu de 93 años mata la so muyer de 86 años afeutada d’alzhéimer. El so tratamientu entra de llenu dende’l primer momentu no que se considera políticamente correutu, esto ye, la violencia de xéneru. Ye improbable que, anque dalgunos lo puedan pensar, entre dientro de lo que llamen delitu d’amor. Eso, el delitu d’amor, son pixaes lliteraries que nun tienen nin pueden tener reflexu nun sistema xudicial modernu, ye dicir, nun sistema progresista. Polo pronto’l vieyu ingresó en prisión y yá veremos cómo fina la historia.

Préstame dir escontra corriente. Anguaño lo imperante ye’l progresismu ensin más, esi que nun precisa esplicar nin tan siquier cuálu ye’l so significáu. El xuráu popular ye sinónimu de democracia xurisdiccional y nun se fale más. La violencia de xéneru ye unívoca, esto ye, del home escontra la muyer; lo de violencia intrafamiliar ye un subterfuxu de la derechona, y asina vamos. D’ehí al pensamientu únicu poco hai. D’ehí a la dictadura intelectual aínda menos. Y amás de too ello los nacionalismos pa arreglar la situación.

Tengo la impresión de que la sentencia de los tirantes, o la de la Pobra, tán mediatizaes, como lo va tar la del vieyu de güei si ye qu’aporta a un tribunal, pero nun tengo nidio qu’eso seya pal bien de los xusticiables, de la ciudadanía d’esti país, y la situación política anguaño nun me da elementos pa pensar que les coses vayan a meyorar. Pero esto ye lo qu’hai.

Raúl Suevos

A 30 de payares de 2019

Torna en castellán en repdiv.blogspot.com