La posguerra

 

Siempres pensé que la Crimea que Potemkin entregó a Catalina la Grande, y el puertu qu’en Sebastopol construyó pa la flota de Rusia, yeren l’apuesta principal de Putin na tarrecible y sangrina partida qu’entamó a xugar va yá un mes llargu. Les rexones del este ucranianu votaron la independencia por un 87% en 1991, pero en Crimea, magar la eufória del momentu, el votu afirmativu namái algamó el 52%. Y ye que la historia tien un gran pesu, pero la xeopolítica entá lu tien más grande.

Güei Rusia yá tien fecho saber a los ucranianos que Crimea ye innegociable. Ensin ella, convien nun escaecelo, pierde la so histórica salida al mar Negru y al Mediterráneu, y, al mesmu tiempu, l’estatus de potencia, pos la base siria de Tartús nun serviría pa un res. El regalu de Kruschev a Ucrania, dende la visión d’una Xunión Soviética indisoluble, debe tornar a Moscú, y mientes esto nun s’aclare ye mui difícil que la situación llegue a resolvese. El Dombás, magar la sangre que yá tien costao, la so potencia industrial –anguaño afarada- y la bayura mineral, tien muncha menos importancia.

El problema futuru ye cómo sal Putin d’esti entuertu, y equí convien recordar lo asocedío a finales de setiembre de 1938 en Múnich, au los líderes europeos, col inglés Chamberlain a la tiesta, aceutaron como un mal menor, y guetando’l so apaciguamientu, qu’Adolf Hitler s’anexonara la checoslovaca rexón de los Sudetes, una bolsa alemana frutu de les decisiones llacerioses de Versalles, en ciertu mou como la decisión nefasta de Kruschev con respeutu a Crimea. Unos años depués, envalentonáu, invadió lo que quedaba de Checoslovaquia.

Si Putin nun sal malparáu, arrequexáu, d’esta situación, y teniendo en cuenta’l puñu de fierru col que controla’l so país, va ser a refacese y hasta consiguir l’aprobamientu y almiración d’un pueblu en la so mayoría adoctrináu polos medios de comunicación estatales. Europa, que posiblemente va ser la pagana principal de la reconstrucción ucraniana, debe tar atenta a la posguerra de forma que les sanciones sigan en vigor demientres llargu tiempu, de mou y manera que’l pueblu rusu y los oligarques –sofitu de Putin- atalanten la situación real a onde los tien llevao’l lideralgu anguaño.

Si nos años caberos asistimos a cambeos de fronteres n’Europa, convien alcordase de la vieya Yugoslavia, desmembrada, y Serbia mutilada en Kósovo, nun paez más dramáticu’l casu de Crimea, históricamente rusa. Too ye relativamente asumible si se fai dientro d’un sistema xeneral democráticu, daqué que, nestos momentos, cola autocracia oligárquica y cleptómana qu’impera en Rusia, nun paez qu’algame los parámetros básicos como pa plantegase tala situación.

Mentanto, nel día a día, les fuecies ucranianes detienen o rechacen a los rusos en casi tolos frentes y toos queremos pensar que Rusia nun va poder sofitar l’esfuerciu bélicu nel tiempu. Vamos ver.    

Raúl Suevos

A 31 díes vencíos d’abril de 2022

Torna en castellán en repdiv.blogspot.com

Siguiendo la pandemia n'Italia

 

Tien trescendío esta selmana una de les primeres actes –van salir otres posiblemente- de les reuniones de la Comisión de Salú pública na que Fernando Simón facia predicciones optimistes que más tarde la realidá diba desbaratar cola rotundidá d’una mocada. Una d’eses tan de moda estos díes caberos.

Depués d’esi auguriu anicial del mélicu aragonés vendría l’alcuentro futbolísticu funestu de los valencianos nel Bérgamu italianu, que mos diba trayer la primer esplosión del Covid y daría pasu a lo que vien siendo una llarga contienda escontra la enfermedá, que va marcar un finxu históricu y social nel devenir de les nueses sociedaes. Tornar a lo que tien sío esti procesu puede resultar esgotador y frustrante a la vegada pero güei, precisamente, diemos, o meyor cabría dicir el nuesu gobiernu tien dao, un pasu que tien un fustaxe descomanáu en cuantu que se pretende finalizar la pandemia pola vía política. Chocante.

Elimináronse práuticamente toles torgues en rellación col Covid. Acabáronse les cuarentenes, tamién los test, autorícense les ocupaciones normales na hostelería; la tasa de positividá a 7 o 14 díes yá nun va ser divulgada, magar que temos perriba de 450 y va non muncho dicíase que la normalidá taba per baxo de la barra de 25. ¿Qué mos queda?

Quiciabes l’indicador caberu seya’l númberu de viviendes de segunda ma qu’aporten al mercáu inmobiliariu; munches d’elles resultáu de la muerte prematura de los sos propietarios y consiguiente venta de los heriedes porque, convien nun escaecer que, nun va muncho, apavoríavamonos énte la cifra diaria de defunciones, pa llenar un Airbus 380, que nos tiempos caberos nun baxa d’un Boeing 737, y como al paecer nestes folaes caberes son los mayores los que suelen vese afeutaos por una deriva mortal, el resultáu ye un amontar na disponibilidá de viviendes. Qué coses.

El gobiernu nun paez ansiosu, d’ehí la estratexa nueva de comunicación, basada na opacidá. Mayor morrina nos mayores significa más viviendes nel mercáu, y más impuestos sucesorios, más ivas a pagar tres la transacción pero, amás de lo anterior, la Seguridá social desembarazase del pagu d’unes cuantes pensiones, y del gastu inherente n’atención mélica d’eses persones d’edá. Ye la parte porcaz y políticamente incorreuta de la historia, pero ye la realidá.

N’Italia sigue’l gobiernu allegando toa mena de datos sobro la evolución de la enfermedá, y failo con calter diariu, nun s’esconde la realidá, y, daes les similitues de dambes sociedaes, quiciabes tengamos que siguir la evolución nes tierres de Miguel Ángel pa facenos una idea de lo qu’equí tá asocediendo.  

Raúl Suevos

A 29 díes vencíos de marzu de 2022

Torna en castellán en repdiv.blogspot.com

El carru Armata retrata a Putin

 

Ellí per 1998 tevi la oportunidá de visitar l’Academia de comunicación de la Bundeswehr, l’Exércitu alemán. La instalación atopábase a les afueres de Berlín no que fuera’l cuartel xeneral del Pactu de Varsovia. Nuna de les primeres conferencies, nuna sala descomanada, amosaronmos una imaxe de cómo yera nos tiempos del Pactu y pude apreciar como en llugar de la gran pantalla de proyeición taba’l pernomáu –nos tiempos de la Guerra fría- mapa d’Europa colos exes de progresión pa la so invasión, entós tapiáu anque nun destruíu pol so valor históricu indudable.

Tres la cayida del Muru de Berlín, en 1989, escomencipiaron a salir a la lluz les vergoñes de tou tipu que’l sistema soviéticu contenía; tamién les militares. Y asina mos enteramos que la loxística del Pactu yera pésima y les sos renomaes formaciones de carros hubierense parao a les poques hores por falta de caltenimientu unos y simples depósitos vacíos toos; tampocu teníen municiones pa más d’un par de díes de combate. Tol sistema se sofitaba sobro la imaxe robusta que dende Moscú se trataba de tresmitir; como la propia Berlín comunista, con grandes avenies de macizos edificios que tapaben les míseres construcciones de les cais d’atrás. La Xunión soviética verdadera escondíase tres un trampantoxu de poderíu.

Que la Rusia de Putin tien problemes estructurales graves sabíase dende va tiempu. La so economía básase casi esclusivamente na industria estractiva; enerxies fósiles y minerales de tou tipu. La productividá rusa ye mui inferior a la de cualquier país occidental, incluyendo España, y amás, el sistema oligárquicu detrae recursos descomanaos que nun lleguen a los asalariaos, desincentivando ‘l trabayu d’estos y afondando les carencies del sistema. Pero no militar entá caltenía una cierta imaxe. Un espexismu.

En 2015, mientres el desfile del 70 aniversariu de la fin de la Segunda Guerra mundial en Moscú, presentóse oficialmente, con doce prototipos, el T-14 Armata, una xeneración nueva de carros de combate que faría obsoletos a los Abrams norteamericanos, los Leopard alemanes, los Chieftain ingleses o los Lecrerc franceses. L’Armata podía con toos y los planes anunciaben la construcción de 2300 d’ellos pa 2020.

¿Tienen vós visto dalgún Armata n’Ucrania? Non, nun hai carros Armata n’Ucrania porque Rusia nun tien sío a poner el proyeutu en producción; d’un llau polos costes descomanaos del productu –convien recordar qu’Italia tien un PIB bastante superior al de Rusia- y poles “ineficaces” sanciones impuestes a Rusia tres la ocupación de Crimea que la privaron de componentes tecnolóxicos.

L’Armata ye namái un exemplu pero sirve para dar una imaxe abondo gráfica de la realidá rusa, cada vegada más similar a la de l’antigua Xunión soviética.

Raúl Suevos

A 29 díes vencíos de marzu de 2022

Torna en castellán en repdiv.blogspot.com

Vamos pagar paries

 

Cuenta Stendhal que mientres el so viaxe a Italia, nel sieglu XIX, enfermó de sopito al güeyar tanta belleza na ciudá de Florencia. El plasmu dio-y na basílica de la Santa Croce, tumba de Miguel Ángel, ente otros. Anque les posibilidaes de sufrir un síncope artísticu na ciudá son múltiples, inmensos, casi infinitos.

Nuno de los sos rincones atópase la basílica de Santa María Novella, mui visitada la so farmacia, una de les más vieyes d?Europa, por turistes de variáu orixe, anque non tanto la propia ilesia. Nuna de les sos capilles, pa sorpresa del visitante español, esiste una pintura al frescu que representa’l mitu del tributu de les cien doncelles, pagáu pol rei Mauregato al califatu cordobés por esti rei asturianu, que ya tenía abonda carga na so historia personal ensin necesidá de sufrir tala falsa ignominia histórica.

Muncho más cierta ye la esistencia del tributu de les paries, entamáu pol reinu de Lleón y depués xeneralizáu pol restu de reinos hispánicos, y que consistía nel pagu anual por parte de los reinos de taifes pa evitar que los cristianos los atacaren colos sos más poderosos exércitos o, llegáu’l casu, los defendieren énte l’ataque d’otros reinos cristianos o agarenos. Tuvimos ocasión d’apreciar la so importancia en dellos capítulos de la serie televisiva sobro la figura del Cid Campeador.  

N’España tenemos, o deberíemos tener, un conocimiento fonderu de la mentalidá de los nuesos vecinos del sur, poro resulta especialmente llamativo’l proceder del doctor Sánchez en rellación col recien cambéu de posición tocantes el conflictu saharaui, nel que, a lo que paez resultar, produzse una especie de rendición de la posición española a cambiu de tornar a la llínea de salida, esto ye, a quedanos a la espera de lo que’l rei Mohamed decida en cada momentu de la so real y soberana gana.

Les cocines y calefacciones del país tiemblen espectantes énte la reacción arxelina, y el tiempu vanos dicir hasta qué puntu’el nuesu cambéu va tener repercusiones económiques pa los bolsos de nueso pero, la decisión unilateral sanchista déxanos ensin dalu tipu de palanca sobro la política marroquí y, bien deberíemos sabelo, les promeses, si ye que les hebo de la so parte, son tan volubles como’l sable del desiertu qu’estos díes caberos tiñe de marrón los nuesos vehículos.

La valla va siguir u ta, a disposición de la voluntá de la xendarmería marroquí, y vamos tener que preparanos pa pagar paries en forma de llegada de productos agrícoles y de otro tipu ensin cumplir coles esixencias qu’Europa impón a los nacionales. Tamién les pateres, usaes como un manómetru de presión por parte de les autoridaes rabatís, van siguir aportando a la so voluntá. Va crecer el problema de les agues territoriales, qu’ehí sigue; y los alcuerdos de pesca –xestionaos por Europa- vannos facer temblar en cada revisión.  Vamos pagar paries.

Raúl Suevos

A 25 díes vencíos de marzu de 2022

Torna en castellán en repdiv.blogspot.com

Embolsamientos

L’embolsamientu ye una operación ofensiva que consiste n’acorrexar una masa enemiga, que xeneralmente avanzó más de la cuenta y tien sío fixada sobro un tarrén, pente medies dos exes de progresión poles ales, o en tiñaza, que cuando se xunten completen el cercu de la unidá embolsada.

Estos díes fálase muncho del posible cercu de Kiev, cada vegada más improbable a la lluz de les faltes de tou tipu qu’amuesa l’Exércitu rusu, pero esiste una posibilidá d’embolsamientu que tamién pue ser mui peligrosa pal futuru d’Ucrania. Pensamos nel embolsamientu de les unidaes esplegaes pa facer frente a la ofensiva rusa na zona del Dombás.

Ente febreru y mayu de 1942, va agora 80 años, desendolcóse la bolsa de Demyansk, al sur de Leningrado, na que too un Cuerpu d’exércitu de la Wehrmacht alemana quedó cercáu temporalmente pente medies un movimientu de tiñaza de les fuercies soviétiques; si bien foron a caltener el fluxu loxísticu con un puente aéreu y romper el cercu, salvando’l gruesu de la fuercia.

Daqué más al norte atópase’l llagu Ilmen, na zona au entós esplegaba la División Azul española, a la que’l mandu alemán solicitó, en xineru, qu’allegara a rescatar a una pequeña unidá -500 homes aprosimao- que quedara cercada en zona soviética. Y ellí fo la Compañía d’esquiadores divisionaria; 206 homes al mandu del capitán Ordás, que tres una dantesca travesada del llagu a temperatures ártiques traba combate con un enemigu mui superior hasta abrise pasu, contautar colos embolsaos y replegase haza les llínees propies, siempres baxo fueu enemigu. El númberu de baxes por fueu enemigu y conxelamientos ye descomanáu. 32 Cruces de fierru van ser la recompensa y una nueva páxina de gloria queda pa los anales, anque anguaño la memoria nueva quiera borrala.

Nel Dombás puede producise un embolsamientu, daqué que dexaría tola rexón en poder de les fuercies ruses y -teniendo en cuenta que lo más probable yera que l’ataque se produxere per esa zona los ucranianos esplegaron ellí lo más granao del so exércitu- una gran cantidá de fuercies y materiales podríen quedar como rehenes de los rusos.

Anguaño los rusos intenten infructuosamente abrise pasu dende Jarkov, haza’l suroeste, y dende Zaporizhia, haza’l norte. L’oxetivu de dambos ye zarrar sobro la ciudá de Dnipro, colo que, casu d’algamalo, la tiñaza taría piesllada, y les fuercies ucranianes embolsaes, lo qu’abriría un escenario nuevu que podría obligar al presidente Zelensky a aceutar una negociación en términos nun tan favoratibles como los de güei.

Raúl Suevos

A 24 díes vencíos de marzu de 2022

Torna en castellán en repdiv.blogspot.com

La inxenuidá del ciudadán

 

Esperaba yo que güei’l presidente de nueso mos allumara sobro la que foi, acordies cola mayoría d’analistes, la noticia más importante de los años caberos, tocantes a la xeopolítica del nuesu país. L’abandonu del sofitu a les xustes, creo yo, reivindicaciones saharauis y al referéndum sobro’l so futuru reclamáu poles NNXX.

Les mio esperances amontaronse ayeri énte la intervención penosa del ministru d’esteriores nel Senáu, na que, ente invocaciones a eses inoperantes NNXX, dexó a les señoríes ellí sentaes tan in albis como enantes d’entrar al solemne recintu. Va ser que quier dexar al presidente lucise nel Congresu, pensé yo. Pero non, güei nun hebo llucimientu sinon más bien escape haza alantre, o haza dala parte. Quiciabes espere que los camioneros lu ayuden a echar el balón fuera del campu, anque’l preciu lu paguemos nós.

Yo confiésome varáu  dende’l primer momentu. Dende que’l reyezuelu marroquí –reyezuelu pola so catadura moral, típica de sieglos pasaos- fizo pública parte de la carta unviada pol nuesu gobernante anguaño. Sorprendióme tanto que di por fecho que tres ella había una estraordinaria xugada política, al fin y al cabu, el doctor Sánchez, pasa por ser un maestru de les maniobres sorprendentes. Von der Leyen tuviere en Madrid una selmana enantes; dellos ministros visitaran Arxelia nos tiempos caberos, tamién Rabat; taba nidio, atopábemonos énte una operación a varies bandes na que’l gas, tan necesariu siempres, pero más agora qu’a Putin se-y fo la olla, xugaba un papel principal, y nós sedríemos los mayores beneficiarios. Gran xugada del antiguu baloncestista, baxo’l tableru y arodiáu de defenses duros; a costa, eso sí, de les esperances saharauis.

La retirada casi inmediata del embaxador arxelín fízome baxar de la mio ensoñación rápidamente. La torna, a continuación, de la embaxadora marroquí dióme señal de que’l ganador yera Mohamed. Los comentarios de Bruseles sobro la falta de financiadura pa un hipotéticu gasoductu haza Europa alarmaronme ulteriormente. Y yá, la cascada de declaraciones negatives de tol arcu parlamentariu, confirmóme que nun yera una xugada maestra sinon más bien una somorguiadura na piscina del Magreb, ensin medir afechiscamente la cantidá d’auga que nella había. Vaya trompazu que mos vamos dar.

La nuesa privilexada rellación gasística con Arxelia paez acabada, cola que ta cayendo. La inestabilidá del nuesu inestable gobierno amontada, cola que ta cayendo. La nuesa frontera sur, como siempres, en manes de Marruecos, cola que ta cayendo. Una xugada ensin oldéu del gran presidente de nueso, namái apta pa inxenuos.

Raúl Suevos

A 23 díes vencíos de marzu de 2022

Torna en castellán en repdiv.blogspot.com

De Bello Ucraino

 

Los mozos de les xeneraciones nueves, nel campu del conocimientu, tán cada vegada más güerfanos d’elementos que, na mio opinión, complementen, ya inclusive sofiten, lo que va ser la so personalidá d’adultos. La pauperización, de nuevo según el mio criteriu personal, de los planes d’estudiu nun paez una premisa bona que conduza a grandes realizaciones. Ye lo qu’hai.

El llatín yera una asinatura clave na mio dómina, y la traducción de De Bello Gallico, la gran obra de Xulio Cesar, solía trayenos de tiesta, con resultaos tan chuscos como aquel inolvidable “Cesar d’una ostia mandó los soldaos al puertu”, en llugar del correutu “Cesar unvió los soldaos al puertu d’Ostia”. Pero, a la fin, quedaben delles ideaes, como’l posu la sidra nel fondu la botella, y asina entá recuerdo lo asocedío nel cercu d’Alesia.

Ellí Cesar, colos sos lexonarios, llevó a cabu una obra d’inxeniería increible. Construyó un muru en redol al opidum galu qu’enzancaba les salides de los homes de Vercingetorix, y tamién el so abastecimientu dende l’esterior, lo que debería llevar a la rendición por fame. Pero fo más allá, decatóse de que podía ser atacáu por otres tribus gales dende la retaguardia, asina que construyó otru muru en redol al primer. Esto sedría la clave de la so victoria final cuando los galos contraatacaron. Depués vendría el pasu del Rubicón, pero eso ye otra historia.

Estos díes asistimos, dende casa, al intentu de les fuercies ruses pa cercar la ciudá de Kiev, capital d’Ucrania, y aparente oxetivu principal de la invasión. Una operación que ta costando más tiempu del que cabía esperar al entamu de les operaciones y que ta poniendo n’evidencia les faltes de tou tipu na máquina de guerra de Putin. Pero too fai pensar que ye una cuestión de tiempu y que, al final, van a algamar a piesllar el cercu sobro la ciudá.

Una vegada activada la trampa paez lóxico pensar que va siguir una llarga y tremenda preparación artillera con tolo que podieren acumular nes sos posiciones. Va siguir  l’asaltu de la infantería nun llargu ya inciertu combate en población que nunca ye fácil y sí mui costosu en baxes pal atacante; pero ye equí cuando me vienen a la memoria los “Comentarios” de Cesar y nun puedo nun dexar de pensar que, hasta agora, les fuercies ucranianes vienen desempeñándose mui bien en pequeños combates na retaguardia y víes loxístiques de los rusos.

¿Lleería daquien ellí De Bello Gallico? Quiciabes l’enseñamientu nesti casu seya más necesariu pa los rusos pos los ucranianos tienen fama alquirida d’antiguu na guerra irregular y de guerrilles.

Raúl Suevos

A 13 díes vencíos de marzu de 2022

¿Ú ta l'aviación rusa?

Na guerra convencional, esto ye, la tradicional, esa que solemos güeyar na pantalla de televisión, o del cine, con tantu de carros de combate, mases d’infantería y aviación, muncha aviación, lo primero que se da ye la batalla pel cielu, o lo que ye lo mesmo, la definición de la supremacía aérea; quien l’algama tien gran parte de la guerra ganada. Asina tien sío na mayoría de los conflictos, en dellos casos con calter históricu, como na Guerra de los Seis díes, na que l’aviación xudía abrasó nos hangares de les sos bases a la mayor parte de les fuercies aérees de los países árabes a los que s’enfrentaba. Eso asocedió nes hores primeres del primer día d’aquellos seis.

Nel casu de la invasión d’Ucrania esistía una ventaxa rusa nidia en rellación coles sos fuercies aérees, modernizaes nos años caberos y que cuenten con un gran númberu de cazabombarderos Sukoi d’última xeneración, esos que malapenes se ven estos díes polos cielos ucranianos. Y cabe entrugase por qué, y ye difícil atopar respuestes, anque la intelixencia británica danos dalgunes claves pa catar l’asuntu.

La mayor parte de los bombardeos rusos tán corriendo a cargu de misiles balísticos de tipos y algames estremaos; tamién se reparen delles aiciones de bombardéu aéreu a cargu de pareyes d’aparatos que se desendolquen a última hora del día, con poca visibilidá. Aínda asina, son yá varios los aparatos derribaos polos defensores ucranianos; y ye que, al paecer, falta instrucción na Fuercia aérea rusa.

Cuando hai superioridá manifiesta, como ye’l caso, lo normal ye entamar con folaes d’aviones, que van ser “allumaos” polos radares de la defensa aérea y dalgunos derribaos pero que, a la so vegada, van descubrir los emplazamientos de esos radares qu’entós van poder ser atacaos. Na viniente fase, enxugaes les pérdides, yá se tendría la superioridá aérea.

El problema pa los rusos ye que, anque tienen bonos aparatos, malapenes tienen simuladores, que son percaros, y los sos pilotos cuenten con mui poques hores de vuelu d’instrucción, menos de la metá que los pilotos de la OTAN, y casi dala esperiencia en formaciones complexes d’ataque; práuticamente namái conocen la aición en pareyes, como se tien visto sobro los cielos de Siria, de mou que tuvieron qu’adautase y, al mesmu tiempu, enfrentase cola defensa antiaérea ucraniana que contaba con unos cuantos sistemas Buk, de media cota, y agora con profusión de misiles MANPAD Stinger de baxa cota aportaos d’occidente.

Como resultáu les fuercies ucranianes pueden combatir ensin el temor de que’l cielu s’esbarrumbe sobro les sos tiestes.

Raúl Suevos

A 12 díes vencíos de marzu de 2022

Torna en castellán en repdiv.blogspot.com

Les operaciones de bandera falsa

 

La invasión d’Ucrania tienmos dao cadía nuevos, o recuperaos, conceutos sobro’l vieyu arte de la guerra. Toca güei falar de les operaciones de bandera falsa, aiciones de fácil compresión que consisten en llevar a cabu una aición, xeneralmente nel tarrén propiu, con fuercies o elementos que paecen pertenecer al enemigu, pa darréu, cola fuercia moral que mos dio la operación de bandera falsa, atacar duramente al alversariu.

Pa facilitar la comprensión del conceutu nada meyor qu’un par de exemplos, un de los cualos afeutamos direutamente como españoles. El primer d’ellos produxose de forma accidental na bahía de L’Habana el 25 de xineru de 1898 al españar por autocombustión el depósitu de municiones del acorazáu Maine, que fondigaría de siguío. Un fechu fortuitu del que los yanquis culparon al gobiernu español –una mina dicíen- y que xustificaría la declaración de guerra que diba finar cola presencia española ultramarina.

El segundu caso¡u díose nel Golfu de Tonkin, Vietnam del norte. Ellí los servicios secretos norteamericanos montaron un falsu ataque del vietcong escontra’l cruceru Madox n’agues internacionales, según ellos, y l’asuntu xustificaría l’amontar de 50.000  asesores hasta 500.000 desendolcáu pol presidente Johnson. Tamos falando de la Guerra del Vietnam, emtamada na so escalada con una operación de bandera falsa.

N’Ucrania los rusos lleven tiempu falando de los laboratorios químicos sovencionaos polos EEXX y la XE nos cualos los homes de Zelenski taríen preparando un axente químicu pa ser dispersáu nun se sabe mui bien onde. Tamién escomencipiaron a falar d’una bomba sucia –pequeñu inxeniu capaz d’espardir contaminación radiolóxica- que se taría preparando nalguna de les centrales nucleares ucranianes. Too recuerda a otres operaciones informatives ruses llevaes a cabu con calter previu a una aición determinada, como los ataques químicos desendolcaos na guerra de Siria.

Que los Estados Xuníos, y en xeneral Occidente, tomenlo en serio decátase del fechu del espardimientu d’estos preparativos informativos rusos por parte de los portavoces de Washington, Londres o Bruseles. Daqué que tamién se puede confirmar al ver que Rusia solicitó, y concedióse-y, un alderique d’emerxencia del Conseyu de seguridá de NNXX en Nueva York pa estudiar l’asuntu.

La opción novedosa tomada pol presidente Biden de denunciar anticipadamente los planes d’invasión rusos nun algamó a frenar los planes de Putin. Esti intentu nuevu de detener una posible operación de bandera falsa tampocu aporta con mayores seguridaes, pero paez plausible en cuantu que, ensin dulda, va servir pa poner n’evidencia la falsedá rusa, casu de producise.

Raúl Suevos

A 11 díes vencíos de marzu de 2022

Torna en castellán en repdiv.blogspot.com

Ensin loxística nun hai victoria

 

Nel sieglu XIX rellumó con intensidá especial el xéniu de Napoleón, hasta siete coaliciones de la mayor parte de los países europeos foron necesaries hasta algamar a derrotalu definitivamente en Waterloo. Lo qu’escapa na mayoría de les llectures ye que nun foi Wellington quien verdaderamente lu derrotó sinon el créditu bancariu, que s’atopaba sobretoo del llau británicu y permitía-yos dotar económicamente a los derrotaos reinos europeos y, colos sos dineros, armar exércitos nuevos, hasta que, finalmente, derrotaron al Emperador y una emprobecida Francia. Siempres ye la economía la que manda nes guerres y, derivada d’ella, la loística fondamenta les victories nes batalles.

Na primer Guerra de Golfu llevóse la victoria y el pase a la historia’l norteamericanu xeneral Schwarzkopf, pero fo la dilixente y previsora aición del xeneral Willian Pagonis la que punxo, en tiempu y forma, non sólo les tropes sinon tamién los medios de combate y tolo necesario pa sofitar y caltener nel tiempu’l ritmu de la guerra, esto ye, la loxística, ensin la cuala dalu xeneral alcanzará nunca la victoria. Me pregunto, ente la situación n’Ucrania, si los xenerales de Putin la estudiaran abondo, y les imáxenes qu’aporten hacenme pensar que non.

La invasión d’Ucrania tiénse convertío nun problema de loxística, o eso paez. El cercu de Kiev, aparente oxetivu principal de la ofensiva, nun acaba de completase porque los dos exes, este y oeste, qu’a ella conducen, nun acaben de ser seguros gracies a l’aición ucraniana; amás, les víes, de non muncha capacidá, vense atascaes por vehículos destruyíos o simplemente bloqueaos por avería o falta de combustible. La necesaria reposición d’unidaes por esgaste de combate paez que nun s’está realizando, y fálase de carencies notories na llegada de repuestos, combustibles, municiones o la más simple alimentación de los combatientes. La imaxe que se percibe en medio de la borrina informativa anguaño, dexa’l prestixu del Exércitu rusu abondo tocáu, y nun paez que puedan entamar l’ataque final hasta que los dos exes mencionaos s’atopen nel so poder y cola necesaria seguridá pa permitir el fluxu loxísticu. Hasta entós nun se va poder piesllar el cercu de Kiev.

Pue paecer que la loxística namái se preocupa de los materiales pero ye muncho más qu’eso; en realidá ye la rama de la ciencia militar que más afeuta a la moral de les tropes, elementu que, a lo llargo de la historia, supunxo la clave pa la victoria final. Ye lo qu’hai.

Raúl Suevos

A 10 díes vencíos de marzu de 2022

Torna en castellán en repdiv.blogspot.com

L'enemigu convencional

 

Nel plan d’estudios qu’“esfruté” na Academia Xeneral Militar había delles ayalgues de declaráu interés, otres non tantu, anque eso pasa en tolos sistemes d’enseñamientu. Esi gran suxetu de la atención del alievu yera l’asinatura de L’Enemigu Convencional, esto ye, naquella dómina, yá llonxana, el Pactu de Varsovia.

Nun yéramos aínda miembros del Tratáu Atlánticu, la OTAN, pero a naide se-y escapaba que, en casu de conflictu mayor, nós esplegaríamos ensin dulda del llau occidental y, poro, tendríemos enfrente a los exércitos rusos y los sos aliaos. Con estes premises, aquel llibru yera un de los que más llectures recibía. Más tarde, el devenir profesional y les vicisitues europees, sobre too a partir de 1989, ficieron qu’aquello namái fuere un recuerdu d’estudiante.

Con too, magar los años trescurríos, un aspeutu caltiense nidio, la so táctica consiste n’amasar la mayor capacidá de fueu posible, aviación, misiles y artillería pa laminar les defenses del enemigu, nesti casu les ucranianes, enantes de llanzar les formaciones acorazaes, con acompañamientu de infantería, sobro los maltrechos defensores. En Kiev paez que se preparen pa esta situación, pero con delles variantes de’importancia descomanada na mio opinión.

El pieslle sobro la ciudá táse produciendo con gran lentitú debía a la aición ucraniana y los errores propios; les aiciones de fueu tienen sío principalmente a cargu de los misiles pero nes hores caberes yá s’observa un amontar de l’aición artillera, seguramente porque, magar esa lenta aprosimación, yá dalgunes tán entrando en posición sobro la ciudá, pol este y pol oeste.

Según dalgunes informaciones yá se ven nes llínees ruses elementos pertenecientes a los Spetnatz –operaciones especiales- , Rosgvuard –Tropes federales profesionales independientes del ministeriu de defensa, y, tamién tropes chechenes del señor de la guerra Kadirov, de negra fama y que, con independencia de la so mayor o menor importancia llegáu’l tiempu del combate d’infantería, cumplen una misión de propaganda mui similar a la que los británicos-y dieron al so Reximientu Gurka, esplegáu nes Islles Malvines va 40 años y que, a la hora de la verdá, malapenes tuvieron importancia dalguna nos combates direutos que corrieron a cargu de les fuercies especiales britániques.

Esti ye l’aspeutu que no mos esplicaba l’Enemigu Convencional, el combate en población, nel que les mases acorazaes nun sirven de muncho; descubrieronlo sangrientamente los yanquis recien nes dos batalles de Faluya, n’Iraq, y eses imáxenes ye probable que conduzan a los rusos a una preparación artillera de les que nun se veíen dende la Segunda Guerra Mundial.  Depués va llegar el combate cai a cai, casa a casa, cuerpu a cuerpu.

Raúl Suevos

A 9 díes vencíos de marzu de 2022

Torna en castellán en repdiv.blogspot.com

Guetando esplicadures nel frente

 

Van aportando les noticies del frente ucranianu con cuentagotes. El convoy de 40 kilómetros pue pasar a la historia non sólo pol so llargor, tamién pola so lentitú. El casu ye que nun paez difícil deducir que d’él, de la so llegada a destín, depende la ofensiva final sobro Kiev, oxetivu principal de la ofensiva rusa.

Les fuercies ruses tán formaes por una amestura de soldaos profesionales, reservistes, y, a la fin, conscriptos, esto ye, el vieyu soldáu de reemplazu que va a facer la mili. En dos remplazos, el de primavera y el de seronda, con una duración d’un añu, del que los primeros dos meses son d’instrucción básica, siguíos de cuatro meses nes unidaes de destín dedicaos al adiestramientu específicu. La llei diz, anque nun ta nidio que se respete, que mientres esos periodos nun pueden ser emplegaos n’operaciones reales.

En xeneral, les fuercies aerotransportaes, y dientro d’elles les d’operaciones especiales, nutrense de profesionales, mientes que les unidaes motorizaes, mecanizaes y acorazaes acoyen la mayor parte del personal de reemplazu, dalgún de los cualos, y teniendo en cuenta que’l 90% de les fuercies esplegaes nes fronteres ruses y bieloruses, “en maniobres” según Putin, yá taríen en territoriu ucranianu, ye fácil deducir qu’ellí tán morriendo unos cuantos mozos qu’entá nun acabaren el periodu d’instrucción específica. Ye lo qu’hai.

Podría pensar daquien qu’ellos, los reclutes, son los responsables del lentu avanzar de la ofensiva rusa, pero ellos nun son más qu’un elementu del universu entrópicu nel que, xeneralmente, se convierten los meyores planes d’operaciones y que, nel casu rusu, paez que s’aniciara nel mesmu momentu de la invasión, cola inestimable cooperación, arroxu y heroísmu de les fuercies ucranianes.

Unes fuercies, les ucranianas, qu’enantes de la invasión teníen previsto acabar cola mili en 2024; y que dende 2014, levantamientu del Dombás con sofitu rusu, vieron pasar un bon continxente de mozos pol exércitu y, al empar, con esperiencia real nel frente del este, daqué qu’agora, cola movilización xeneral, permite-yos contar rápido con personal instruyío pa entrar en combate, mientes se prepara a les grandes cantidaees de voluntarios que lleguen pa alistase.

Nun paez que Putin vaya a levantar el pie, anque la propuesta de negociación colos oxetivos que na práutica yá tenía enantes de la invasión resulte sorprendente, y en Kiev ye d’esperar una gran batalla n’ambiente urbanu, con tarrecible preparación artillera y respuesta de l’agazapada y cubierta infantería ucraniana, como en Montecasino, como en Alepo, como en Berlín.       

Raúl Suevos

A 9 díes vencíos de marzu de 2022

Torna en castellán en repdiv.blogspot.com