Cuando un país, o un dirixente, s’embarca nuna guerra como la
que se desendolca estos díes a les puertes de casa, n’Ucrania, tien d’echar
cuentes con abondo d’aspeutos, non namái l’operacional que lleven a cabu les
sos fuercies armaes. Nel casu rusu, paez qu’esti detalle, l’operacional, nun
taba tolo bien planificao que Vladimir Putin creía y ello, aparentemente, paez tener
dos rames responsables; d’un llau la intelixencia militar rusa, que nun calibrara
fayadizamente al enemigu, al exércitu ucranianu, a les sos milicies, a la so
xente, cenciellamente, que tienen sido a presentar una resistencia almirable a
les fuercies ruses; del otru, a los sos propios responsables militares, con
especial dedicatoria a la loxística, que nun paez que tuviere abondo estudiada,
y d’ehí’l lentu y costoso¡u avance de les fuercies estremaes haza los oxetivos
principales, Kiev, y los secundarios, Jarkov, Mariupol y Odesa. La combinación
d’entrambos paez tener conducío al empantanamientu anguaño. Daquien, más ceo
que tarde, va tener que dar esplicadures en Moscú.
Otru aspeuto¡u fundamental atopase na retaguardia propia. Hai
qu’asegurar a toa costa’l sofitu de la opinión pública. Nun se puede conducir
una campaña d’agresión escontra un vecín si nun se cuenta col soporte de la
familia. Especialmente cuando hai féretros de por medio; un mensaxe, el de los ataúdes,
que ye más que posible que yá escomecipiare a difundise per la patria rusa.
Nos EEXX, que faen estudios de casi too, yá tienen tabulao la
cayida de la valoración del gobiernu en función del numberu de baxes de
combate. Son capaces de calcular esa cayida modulándola cola mayor o menor aceutación
de la propia guerra por esa opinión pública que, aportaú’l momentu, van ser tamién
votantes. Poro, y ensin necesidá d’estudios, ye tan importante controlar la
retaguardia.
Putin tienlo nidio. bloquease la información de mou y manera
que la población rusa namái reciba les noticies qu’él decida y, de xacíu,
elaboraes y editaes pol so serviciu de comunicación, y asina les ciudaes
destruyides son les del Dombás pola artillería de Zelenski, los civiles muertos
sonlo a les manes del exércitu ucranianu y les rutes de evacuación nun
funcionen porque son atacaes por neonazis ucranianos. Pa rematar l’asuntu, el
primáu ortodosu de Moscú declara la guerra como xusta porque en Ucrania protexese
a los gays. Un cuadru.
Los rusos, con esa pelicula, tán con Putin, per agora, anque
convien nun escaecer que, con esi sistema, los Castro lleven más de 60 años en
Cuba y ainda se pue atopar muncha xente que se cree la milonga. Ye lo qu’hai.
Raúl Suevos
A 8 díes vencíos de marzu de 2022
Torna en castellán en repdiv.blogspot.com
No comments:
Post a Comment