Les guerres modernes suelen ser un escaparate de dalgunos de los más novedosos llogros de la ciencia y la tecnoloxía moderna. Nestos tiempos caberos, por exemplu, son los drones, vehículos aéreos non tripulaos, los que paecen ser les estrelles nos conflictos más recientes. Llegaron de la mano de los fabricantes norteamericanos, casi siempres en cabeza de los desarrollos nesti campu, y agora paecen tar a disposición de exércitos más modestos; vímoslo n’Armenia, au Azerbaiyán se llevó la victoria sofitándose n’inxenios turcos ya israelíes. Estos díes tamién paez que dalgunos d’ellos s’esplieguen nos cielos ucranianos.
Por embargu, nada impresiona más a quienes güeyen un conflictu bélicu dende la distancia qu’un tipu de batalla que ye casi tan vieya como les edaes del home, l’asediu. Asedios bíblicos como’l de Xericó, asedios xigantescos como’l de Stalingrado, asedios televisivos como’l de Sarayevo, asedios históricos como’l de Xulio Cesar n’Alexia, o asedios totales como’l d’Escipión en Numancia. Esti caberu de trescendencia perpetua pa nós pues entá güei l’axetivu numantín sirve pa espresar qu’una resistencia pue algamar les últimes llendes imaxinables; y anguaño, otra vegada, ye posible que temos asistiendo al “espectáculu” d’una resistencia numantina na capital d’Ucrania.
L’aportar de los acontecimientos, paezme a min, tiennos sorprendío fonderamente. Naide se esperaba esti ataque total por parte de Vladimir Putin, evito conscientemente dicir Rusia, pero ye mui posible que tampocu’l mandatariu rusu se esperase talu nivel de resistencia pel llau ucranianu, anque tampocu ye menor el nivel d’ineficacia de les sos propies fuercies y xenerales; una conxunción que dío al presidente Zelensky y la so xente unos díes de marxen que pueen resultar vitales a la fin.
A lo anterior hai que sumar el resultáu xeopolíticu desastrosu que Putin ta cosechando puesto que, si les sanciones económiques yeren esperables, la casi unanimidá na so aplicadura ye pernotable y, sobre too, les decisiones por parte de la Comisión europea o la tradicionalmente neutral Suiza pueen calificase como históriques. Mui pocos países quedaron al marxe y llama negativa y poderosamente l’atención la tibieza d’España nesti casu. Ye lo qu’hai.
Los habitantes de Kiev y Jarkov tienen per delantre, cola acumulación de fuercies ruses y el previsible desendolcamientu de bombardeos masivos, unes cuantes xornaes tráxiques y tarrecibles esperando. El so sacrificiu ye posible qu’a nós mos ayude a nun escaecer el vieyu lema latín de “si vis pacem para bellum”, si quies la paz prepara la guerra, y quiciabes, namái quiciabes, mos decidamos a poner en pie una Defensa europea verdadera.
Raúl Suevos
A 1 día vencíu de marzu de 2022
Torna en castellán en repdiv.blogspot.com
No comments:
Post a Comment