En Kabul non, pero equí triunfa'l rellatu

 

Fo necesario que falase un militar pa qu’entamemos a facenos una idea de la realidá. El JEMAD, xefe d’Estáu Mayor de la Defensa, dixo que los que quieran salir van tener que llegar al aeropuertu de Kabul “como puedan” y eso ye una fotografía precisa de lo qu’ellí asocede. Tolo demás ye rellatu.

A estes altures del desastre afganu; desastre en tolos aspeutos que se quieran analizar, paez que dalgunes coses van quedando nidies. La primer d’elles, y quiciabes la más fácil d’atalantar, ye la falta de precisión de los informes d’intelixencia de la mayoría de les axencies de seguridá occidentales, incluyendo, de xacíu, la española, el nuesu CNI, en cuantu a la capacidá de resistir al avance talibán per parte de les instituciones afganes, gobiernu y fuercies armaes. Toes, visto lo asocedío, paecen haber pecao de inxenuidá, llamalo optimismu paezme demasiao benevolente, anque dalgunos van pensar que ye falta de profesionalidá.

Otra de les conclusiones que se pueden sacar del cataclismu afgán ye que mos atopamos, mui probablemente, énte un cambéu importante, perimportante, tocante a los equilibrios de poder mundiales; non tantu porque les fuercies de les potencies principales tengan camudao radicalmente tres la cayida de Kabul, que nun mutaron, sinon porque les perceiciones d’unos y otros sí que van camudar; les de les potencies globales, los EEXX, China y Rusia; les potencies rexonales, India, Turquía, Irán; fixái-vos que nun cito a Europa, y ye qu’ésta nun ta nin se la espera hasta que decida ponese énte l’espeyu y pensar que fai cola so vida. Quedenmos los movimientos terroristes de toa mena, con especial preferencia los de calter yihadista producíos pol’Islam. Toos van ver la debilidá norteamericana y eso va trayer consecuencies.

El JEMAD tamién mos contó que tenemos esplegaos tolos A400, la xoya del nuesu transporte estratéxicu, tres (3), esos son los disponibles nesti momentu, esi ye’l nivel de les capacidaes de nueso nesi dominiu. Al so llau Margarita Robles tomaba un rol secundariu, recién llegada del so Candás braniegu, au la costera del bonitu yá finó y con ella les ventresques a la plancha, anque ella, con fama de moderada, nun debe ser mui aficionada. Ella representa, cola so presencia en Torrejón, la aportación cabera al rellatu que se construye nesti momentu.

Somos los campeones mundiales na evacuación d’afganos, yá lo fuimos nes vacunes covid, tamién en derrotar tempranamente al bichu, a lo menos eso fo lo que mos dixo’l doctor Sánchez. Un Sánchez desapaecíu mientres l’aniciu de la crisis –namái’l bastiazu de crítiques lu decidió a amosanos les sos zapatilles braniegues- pero que, percibíu’l peligro pa la so imaxe, tien saltao al ruedu con tola cuadrilla d’acompañamientu.

En Torrejón llegamos a tener a dos ministros, MAEC ya Inclusión social, pa recibir poco más d’un centenar d’afganos de los que, al paecer, la mayoría nun yera responsabilidá española. Al embaxador en Kabul, cesáu va yá tiempu, caltienenlu ellí transmutáu n’héroe y, ye de suponer, llistu a recibir la Encomienda d’Isabel la Católica. A los presidentes de Comisión y Conseyu Europeos trayeronlos tamién a Torrejón –¿Espontáneamente o a petición de don Pedro?, el tiempu lo dirá- y, pa rematar, el nuesu presidente anunTciamos que la base de Rota y la de Morón van servir de centru d’acoyida pa los afganos de los USA, ensin explicanos si eso lo ampara’l Tratáu de les Bases o si ye una transacción col Biden, el mesmu que va dos díes nun citó a España ente los países “amigos” que taben cooperando cola evacuación, por cuenta de que nunos meses reciba al nuesu presidente na Casa Blanca; sedría un pieslle perfeutu al Manual de resistencia del doctor Sánchez.  

El casu ye que, llegaos equí, lo que pase con Afganistán anicia a ser secundariu; ye’l nuesu honor nacional el que ta en xuegu y neso’l rellatu qu’agora cuenta ye que somos los meyores, como siempres, na evacuación de probes y desvalidos afganos; pocu importa que Bagdis, donde viven la mayoría de los que trabayaron pa España, tea a 800 km de Kabul y pol camín tengan innumberables controles talibanes. Yá lo dixo’l JEMAD, que lleguen como puedan.

Raúl Suevos

En Xixón a 23 díes vencíos d’agostu de 2021

Torna en castellán en repdiv.blogspot.com

El triunfu de la fatura totalitaria

 

Nun pude aplaudir esti añu a Roca Rey nel Bibio, la prestosa plaza de toros de Xixón, otros menesteres me caltuvieron a distancia del ruedu esos díes y quedéme coles ganes. Fo un mal añu ésti del covid pa la fiesta de los toros, como pa otres munches actividaes que, col aportar de la vacuna, paez que van recuperando adulces el ritmu.

En Xixón esperen-y años duros al toreo. La señora alcaldesa acaba d’anunciar que nun se va tornar a sacar a concursu la plaza; la señora, al paecer, aborrez la fiesta y nun-y importa un qué, por mui socialista que seya, les repercusiones que, a nivel nacional, pueda tener nel emplegu, tampoco-y interesa saber, magar el so talante ecoloxista, qué va pasar coles deheses y praos nos que se críen esos formosos animales, nin, de xacíu, los cuatro euros que puedan ganar aquellos emplegos braniegos que s’implementen, como acomodadores, almohadilleros o camareros, nos díes de corrida. A la señora alcaldesa, acordies coles sos pallabres, ofendióla ulterior y críticamente qu’ente los toros lidiaos estos díes hubiere ún de nombe “feminista” y otru “nigeriano”, dalgo que, al paecer, supón un atentáu fonderu a los valires que la sociedá xixonesa atesora. Menos mal que nun hebo un “afgano” porque cola que ta cayendo ye capaz d’ordenar la demolición de la plaza de toros. Señor, qué cuadru.

Ye curioso’l comportamientu d’esta señora yá que, magar la so filiación política, a min recuerdame muncho a los gobernadores civiles de los tiempos de la oprobiosa, que teníen l’ordeno y mando como riegla d’actuación básica demientres l’exerciciu de la so maxistratura. La señora alcaldesa paez, vista la so aición executiva, tener nidies tendencies totalitaries, anque dalgunes les camufle detrás d’un inatendíu conseyu ciudadanu, y ehí ta pa recordánoslo la “temporal” reforma del Muru de San Lorenzo, au, por cierto, sigue ensin haber traces de la bandera d’España, daqué cuanto menos chocante pa una ciudá que pretende ser faru del turismu norteñu. En fin, supongo que too esto pue ser debío a eses secueles tan pocu conocíes del covid.

Xixón, capital económica del Principáu, bracea desesperadamente pa salir a flote nunos tiempos que-y lo ponen difícil a tol mundu, y nun paez que, con prohibiciones o zancadielles a actividaes lexitimes que responden a aficiones asentaes secularmente, se vaya a meyorar la vida de la población. Nun quiero pensar qué va asoceder si la señora alcaldesa s’entera de que les espueles que usen los xinetes nes Mestes nun producen caricies.

Raúl Suevos

En Xixón a 18 díes vencíos d’agostu de 2021

Torna en castellán en repdiv.blogspot.com

Tamos de partu y nun mos enteramos

 

El sieglu XX fo ensin dulda’l de los Estaos Xuníos d’América, anque compartía’l lliderazgu, en ciertu mou, con occidente; a lo último, China lluchaba por rematar lo qu’ellí nomaben el sieglu de la humillación; les guerres del opiu, la de los bóxers, la ocupación xaponesa, un periodu desastrosu que buelga fondera y de la que’l  dirixente actual, Xi Jinping, ye dafechu consciente.

Anguaño ye posible que temos énte un cataclismu xeopolíticu de consecuencies semeyantes a la cayida de Constantinopla a mediaos del S. XV, anque les escenes de cuerpos cayendo dende aviones yanquis o les muyeres de Kabul otra vegada encerraes nos sos burkas mos lleven a centranos no accesoriu y non no fundamental, a lo último, demientres estos años la muyer afgana nun algamó nin de llueñe los niveles de llibertá que tenía baxo’l control soviéticu. Nun ye Kabul, nin Afganistán lo que ta en xuegu, ni siquier, la más que probable desestabilización de Pakistán, potencia atómica, debiera quitanos el sueño a nós.

Lo que paez tar esmoreciéndose ye l’imperiu norteamericanu. Ye probable que aguanten, o que lo intenten, entá dellos años pero la forma cómo se tien dexao cayer Kabul va pesar como una llábana sobro la so imaxe y prestixu nel tiempu por venir y eso, ensin dulda, va ser aprovechao por China.

Llevamos cinco años animando a China a tomar la delantrera. El referéndum del Brexit fo ensin dulda un tremendo avisu que declaraba la nuesa debilidá, siguió la eleición d’un Trump, validor del populismu más inconsistente, que se negaría a respaldar el artículu 5 del tratáu OTAN, enantes de salir de Siria abandonando a los sos aliaos kurdos de mala manera. Siguiría la incapacidá occidental pa xestionar correutamente la pandemia del covid, rematando esa etapa col asaltu al congresu de Washington afalada pol propiu Trump.

Podríemos siguir citando elementos de la política internacional que señalen la debilidá d’occidente y sobremanera del so líder, los Estaos Xuníos; un líder al qu’anguaño nun temen los sos posibles enemigos y del que los sos amigos tienen motivos pa desconfiar. Mentanto, nel otru llau, con independencia del so indeseable totalitarismu, China caltien un pasu firme en tolos órdenes de la política mundial, ocupando’l tarrén que dexen llibre los EEXX y avanzando naquellos que, magar la so presencia, considera del so interés, como’l sureste asiáticu.

La forma como tán saliendo los norteamericanos, y con ellos la OTAN, de Kabul, pue ser el toque d’arrebatu pa que los alversarios d’occidente decidan escaecer el peligru que siempres supón la trampa de Tucídides. El mundu, posiblemente, ta de partu, y nun mos enteramos.      

Raúl Suevos

En Xixón a 18 díes vencíos d’agostu de 2021

Torna en castellán en repdiv.blogspot.com

De Saigón a Kabul pasando per Mosul

 

Recuerden estos díes los críticos taurinos, cuando al toru yá nun hai quien lu pare, lo que pasó en Saigón en 1975. Nos USA dalgunos nun duermen pensando nes imáxenes de la embaxada yanqui tomada al asaltu por bandes de desesperaos guetando la so salvación d’última hora; piensen na posibilidá de qu’estes se repitan ceo en Kabul. Y nun ye pa menos, los talibanes avancen a una velocidá bárbara, namái un pelín inferior a la que sal corriendo l’exército afgán.

El casu vietnamita yera un pocu estremao. L’exercitu tenía una cierta entidá, tanto n’organización como na prestancia de los sos miembros, pero la opinión pública norteamericana taba farta del esgaste de tou tipu qu’aquella guerra llonxana-yos suponía y Nixon, recién aportáu a la presidencia, decidió cortar de sópito lo que Johnson yá aniciara. En cuantu salieron los marines el Vietcong entró hasta’l fondu como una fola imparable y per delantre una aluvión de refuxaos corrió, o navegó, haza onde pudo.

N’Iraq los EEXX tornaron a zarapicar na mesma piedra, un exércitu marioneta, con munchos medios pero ensin moral nin voluntá de vencer, que sal corriendo en cuanto los sos patrones nun los respalden. Vímoslo cuando’l DAESH llego a Mosul, una ciudá d’un millón d’habitantes, d’onde’l nuevu exércitu iraquí salió tan rápido que nun tevo tiempu nin pa recoyer el so equipu. Son agora les milicias chiites, sofitaes por Irán, les que paecen llevar la voz cantante no que queda de país nes tierres del Tigris y el Éufrates.

 N’Afganistán paez repetise la historia, un exércitu formáu y equipáu polos EEXX, ayudáu nesi menester por dalgunos aliaos, ent’ellos nós mesmos, que nun aguanta dos telediarios en cuantu l’enemigu, con fama de feroz y despiadáu, apaez pela esquina. De nuevo un exércitu ensin voluntá de vencer y aforoñáu pola corrupción interna, cola mayoría de les plantilles nutríes por pantasmas que namái apaecíen pa cobrar la soldada. De nuevo too s’esbarrumba en cuantu los marines y los drones USA se van pa casa.

Toca agora entrugase qué va pasar con Afganistán y paez haber quórum en cuantu que va tornar el Medievu al país de la mano de los talibanes, anque a min paezme qu’estos d’agora vienen muncho más lleídos. Nun m’imaxino a Najibullah colgáu otra vegada nuna plaza pública, nin tampocu dinamitando’l muséu de Kabul. Lleven yá años polos foros internacionales y los tiempos del mulá Omar tamién queden atrás pa ellos.

El gran xuegu yá nun ye ente la Rusia zarista y los británicos victorianos, agora ye China la que se xuega grandes intereses na zona con un importante ramal de la ruta de la seda baxando haza’l puertu de Gwadar en Pakistán, y con non menos importantes gasoductos y oleoductos atravesando la tierra afgana. China va xugar fuerte, va-y muncho nello, y son los otros vecinos, turkmenos, tayikos y uzbekos los que quiciabes tengan más de qué preocupase. Mentanto, en Washington, una vegada recuperaos del costu políticu internu, van tender más recursos pa centrase nel lloxanu Oriente, la so real preocupación.

Yo mientes, voi aprovechar el calor del branu pa tornar a ver tres películes mui apropiaes al tema y que vos recomiendo: “Alexandro Magnu”; “L’home que pudo reinar” pa los tiempos británicos, y una traxicómica “war machine” pa los recientes USA.

Raúl Suevos

En xixón a 15 díes vencíos d’agostu de 2021

Torna en castellán en repdiv.blogspot.com

https://abellugunelcamin.blogspot.com/search?q=saig%C3%B3n

Nacíu na 652

 

A primer llectura dalgún pue pensar que me refiero a una carretera; dalguna habrá con esa numberación, pero non, el númberu fala d’una comandancia de la Guardia Civil, de la entós 6ª zona con cabecera en Lleón, del 5º terciu, el d’Asturies; la so segunda comandancia, la de Xixón. Y ye que yo nací, va yá munchu tiempu, nel cuartel de la guardia civil de Salinas, conceyu de Castrillón, nada de Mediterráneu. Un cuartel desapaeciu tiempu va y sustituyíu pol actual xunto a la maraviosa sablera paraísu de surferos y vraneantes.

Soi fiu del Cuerpu, una espresión qu’entá perdura y que te trescala d’amor a esi conxuntu d’homes y muyeres qu’entreguen la so vida, y en parte la de la so familia, nel serviciu a los demás, na mayoría de les ocasiones ensin recibir un especial agradecimientu y, de xacíu, por una escasa paga per parte del estáu.

Pero la 652 ye especial pa min. De Salinas, au los mios pás llegaren de Campu Casu, onde naciera el mio hermanu, fuímonos pa Xixón, onde mio pá pasó destináu al puertu del Musel, anque tamién, yá sarxentu, el puestu de La Calzada fo llar demientres un tiempu; tornando casi un añu a Campu Casu, pa depués, col emplegu de teniente, mandar la llínea de Colunga y venir a morir, entá mozu y en activu, a la llínea de la Camocha.

Esti destín caberu tenía casa na Comandancia, en Contrueces. Una instalación moderna, entoncenes, que sustituyía al vieyu edificiu de los Campos, y en que la so inauguración, llevada a cabu pol teniente xeneral Iniesta Cano, mio pá mandó la fuercia d’honores. Ellí, nel cuerpu de guardia, fixieron-y la capilla ardiente.

Vaya too esto pa sorayar, magar l’alloñamientu de munchos años, el mio cariño haza la 652, que seguramente yá nun se va denominar d’esa forma, nestos momentos nos que se fala de la so disolución en beneficiu d’una única pa toa Asturies. Daqué a lo que, dende un puntu operativu, nada tengo que dicir dao el mio desconocimientu; másime nuna dómina na que “avancen los tiempos que ye una barbaridá”, y si non que-y lo digan a los armenios, vencíos nuna guerra rescamplu polos sos vecinos azeríes a base de drones armaos –los mesmos, por cierto, que’l nuesu vecín Marruecos acaba de comprar a Turquía- ; pero en Xixón, capital económica de la rexón, y l’oriente asturianu, hai una cierta medrana de qu’esto se traduza en menor cobertura nos servicios de seguridá.

Paez lóxico pensar que la unificación provincial de los estremaos servicios, COS, información, tráficu, xudicial, etc. va suponer un aforru nidiu de personal, y bono va ser si ello se traduz en más puestos nel espliegue territorial de la compartimentada y quebrada tierra asturiana. Si esto ye asina, bienvenida seya la desapaición, si los puestos aforraos acaben en Madrid, vamos siguir falando del abandonu de lo rural. Vamos ver.

Raúl Suevos

A 12 díes vencíos d’agostu de 2021

Torna en castellán en repdiv.blogspot.com