La verdá ye que Margarita Robles, la ministra de defensa, nun dixo eso; ella descolgóse comentando que teme “un retrocesu en materia de drechos humanos” en Afganistán con l’aportar de los talibanes. Y quedóse tan ancha. Y como si eso no fuere abondo añede que propunxo a la OTAN que se sigan calteniendo rellaciones col gobiernu afgán ¿Qué gobiernu va haber cuando los talibanes entren en Kabul? Pa que se sigan sofitando les polítiques sociales. ¡Dios mío¡ Qué alliviu.
Entrúgome si la señora Robles nun fumará daqué, anque lo duldo, sedría un cante nos pasiellos de Defensa, anque bien podría facelo na so casa, cuando ye dueña de la so soledá. Namái asina, con dalgo que-y potencie los delirios ceebrales, me puedo maxinar a doña Margarita soltando semeyantes lloríes a estes altures de la película.
Tol mundiu sabía que Biden quería dise d’Afganistán, prometiéralo –Sí, yá sé lo que valen les promeses de los políticos pero, a vegaes, alcuérdense de Zapatero n’Iraq, cumplen, anque seya pa xenerar mayor aruelu- y dende’l primer día na Casa Blanca siguió aportunando, de mou que, los comparses, como España, teníen la obligación de tar al tantu.
Qu’Afganistán tornaría a ser un sindiós, nesti casu un sindiós talibán, anque estos elementos s’esfuercien por imponer un Dios engafuráu, coléricu y vengativu, sabíenlo hasta los estudiantes de primer cursu de polítiques, asina que les manifestaciones de doña Margarita suenen a necesidá de rellenar páxines agosteñes, daqué que, per otra parte, ye típico de los branos de nueso pero, habiendo campu, podía habese dío a segar notros praos.
Vámonos d’Afganistán, los españoles, y nada se sabe de lo que asocederá con aquellos afganos que trabayaron pa nós como interpretes o en funciones auxiliares. Nun sabe o maxina, o nun quier conocer nin albidrar doña Margarita cuálu va ser el so destín y el de les sos families pero, lo más probable ye que la so esistencia, casu de cayer nes manes de los talibanes, seya abondo precaria, por nun dicir mínima, por evitar dicir que la muerte ye’l destín más probable.
Los Estaos Xuníos punxeron en marcha un programa pa acoyer a los sos milenta collaboradores, incluyendo a los sos familiares, que dicen que marcha con peligrosa y desesperante lentitú p’aquellos qu’esperen la concesión del esperanzador visáu. Nel casu español nun paez que esista dala iniciativa al respeutu pero a la nuesa ministra, ensin dulda aburrida énte les bones rellaciones internas del gobiernu o la bona marcha de la pandemia, llegó-y agora la esmolición pol posible retrocesu de los drechos humanos n’Afganistán. A bones hores mangues verdes.
Raúl Suevos
En Gijón a 9 díes vencíos d’agostu de 2021
Torna en castellán en repdiv.blogspot.com
No comments:
Post a Comment