Nos tiempos de la por dalgunos estrañada Xunión soviética, qu’entá los hai, inclusive nel nuesu gobiernu anguaño podemos atopar dalgún espécime, esistía una especialidá ente politólogos y periodistes que se conocía como kremlinoloxía, que consistía nel estudiu y analís de les polítiques y dirixentes de la URSS. A esta ciencia dedicabense esfuercios apolmonantes y con ella componíense sesudos estudios, ensayos y llibros de toa mena. Yera toa una fuente de recursos y medios de subsistencia pa munchos de los qu’a ella se dedicaben. Con Cuba, dende va yá abondo tiempu, asocede daqué paecío, especialmente nos Estaos Xuníos, y más particularmente en Miami. Ellí la cubanoloxía ye más qu’una especialidá de la politoloxía, ye casi una relixón; y equí n’España, según la temporada, apaecen munchos siguidores d’esa creyencia.
Estos díes, depués del calenturón sufrío coles manifestaciones espontánees, que lo fueron por más que dalgunos quieran ver la mano de la CIA detrás, tiénse desencadenao una especie de frenesí al rodiu les muertes de xenerales cubanos, seis nuna selmana, númberu qu’a estos cubanólogos-yos paez descomanáu y, ensin dulda, frutu de dalgún tipu de depuración interna del réxime, pa dalgunos, o dalgún tipu d’operación secreta yanqui, pa otros. En xeneral, toos ellos, demuestren un desconocimientu fonderu de la realidá cubana, incluyíos los teóricamente meyor informaos, los de Miami, la gusanera, d’acordies col terminu qu’acuñó Fidel Castro.
Cola dificultá que tien falar de cifres en rellación con Cuba –práuticamente dalu programa de NNXX incluye al país pola falta de fiabilidá de les qu’apurre- puese afirmar que Cuba tien una de les poblaciones más vieyes d’América, y ello ye debío a dellos factores: la medicina preventiva, especialmente les vacunes infantiles, la emigración de la mocedá que fai más notoria la prevalencia de los más mayores, la comida mayormente de vexetales y frutes debío a la dificultá de llograr proteína animal –el pitu made in USA ye de lo poco que se consigue anguaño ellí- y hasta va unos años –cuando Raúl entamó a unviar masivamente a los mélicos a trabayar fuera- una aceptable asistencia hospitalaria.
Nel Exércitu cubanu impera la xerontocracia, de los seis xenerales muertos, namái unu taba n’activo, mandaba l’exércitu Oriental y, anque’l oscurantismu del réxime nada diz, pudiera ser que’l covid seya’l responsable del so pasamentu. Respeutu a los otros cinco, toos ellos na reserva, qu’en Cuba dura hasta que t’entierren, combatieran na insurxencia colos Castro, dalgún yá nel 53, asina que, suponiendo-yos 18 años al entamu de la revolución, toos ellos andaríen percima de los 80, esto ye, que nuna islla que tien muncho covid, na cuala les vacunes covid de desarrollu propiu tienen una más que duldosa eficacia, paezme a min que’l fechu de qu’estos señores se muerran nun debiera alarmar a naide, al contrario, trátase del fechu más ñatural del mundiu y namái cabe esperar qu’al más famosu de los vieyos cubanos, Raúl Castro, y-vaya llegando tamién el turnu; non por nada, más qu’otra cosa pa que corra l’escalafón, y de pasu los cubanólogos de Miami tengan daqué en qué entretenese.
Raúl Suevos
A 31 díes vencíos de xunetu de 2021
Torna en castellán en repdiv.blogspot.com
No comments:
Post a Comment