L'actualidá de Winston Churchill

 

Foi ensin dulda la personalidá política de mayor algame y fundura de tol S. XX a nivel mundial; yá la Trocha cubana lu vio cabalgar como mozu oficial observador británicu cuando Valeriano Weiler yera’l comandante xeneral na islla; tamién na guerra de los Boers se desempeñaría, esta vegada como corresponsal de guerra; na Primera guerra mundial emtamó como ministru, siguió como lord del Almirantazgu y remató como humilde xefe de batallón nel Frente occidental. La so xefatura de gobiernu demientres la Segunda guerra mundial resultaría épica y marcaría tamién la Guerra fría. La so pluma valió-y un Nobel de lliteratura y la so oratoria sigue anguaño siendo referente de la ciencia política.

El 11 de febreru de 1947, siendo xefe de la oposición, acudió con baramentu al Parllamentu de Westminster, magar atopase enfermu, para defender la so posición contraria al vaciao de competencies de la Cámara de los lores propuesta pol gobiernu socialista de Clement Attlee. La so intervención sigue siendo güei estudiada nos manuales de ciencia política pues, amás de señalar a la democracia representativa como “la peor forma de gobiernu, sacantes toles otres formes que se pusieron en práutica a lo llargo del tiempu”, tamién apuntó que la “idea laborista de qu’un garrapiellu d’homes se ficiere cola máquina del estáu, col drechu d’obligar a la ciudadanía a facer lo que s’acomodare al so partíu ya intereses personales o doctrines ye contrario a calquier conceición de la democracia occidental”;  criticando tamién que “suponen, enquivocadamente, que democracia ye equivalente al imperiu de la mayoría, que consigue un periodu fixu de gobiernu pente medies promeses pa depués facer al so placer cola ciudadanía”.

Churchill esplicó qu’entendía la democracia como “un sistema equilibráu de drechos y autoridá compartida con munches otres persones ya instituciones a ser consideraes amás del gobiernu de turnu y los oficiales qu’emplega”, pa él “la opinión pública, espresada por tolos medios constitucionales, debe formar, guiar y controlar les aiciones de los ministros, que son los sos sirvientes y non los sos amos”.

La intervención sirvió pa toriar la mayoría gubernamental y refugar el proyeutu de llei que guetaba dar mayores poderes al gobiernu. Anguaño, en munches partes, vemos como los sistemas constitucionales nun son a controlar al executivu que, dende’l sometimientu del llexislativu, el control más o menos descaráu del poder xudicial, y la influyencia sobro’l cuartu poder,  llogren atropar tolos resortes de la sociedá dexando a la ciudadanía rehén de les sos decisiones, fondamentalmente empobinaes al caltenimientu del propiu partíu nel poder y con ello convirtiendo al secretariu xeneral nun tipu nuevu de dirixente que, envolubráu nes formes aparentes de la democracia representativa, nun tienen muncho qu’envidiar a los dictadores del S.XX.

Nestos díes de pandemia y eleiciones autonómiques tenemos oportunidá de comprobar hasta qué puntu la figura de Winston Churchill sigue tando d’actualidá, especialmente cuando, notru pasax de la so intervención afirmó que “dalu gobiernu en tiempu de paz tevo nunca talu poder arbitrariu sobro les vides y aiciones del pueblu británicu, y nengún gobiernu falló enantes tan completamente a la hora de responder a les sos necesidaes diaries”.

Raúl Suevos

A 29 díes vencíos de xineru de 2021

https://api.parliament.uk/historic-hansard/commons/1947/nov/11/parliament-bill

 Torna en castellán en repdiv.blogspot.com

Gimme some lovin

 

Diba la mañana como casi toes últimamente, metanes la tristura que’l covid paez semar per toles partes y momentos, cuando me tocó facer altu nun semáforu d’esos de llarga duración, de los que te saquen de quiciu cuando lleves prisa y que, normalmente, pa lo más que dan ye pa güeyar el dir y venir de los piátones, maxinándote hestorias pelegrines a partir del aspeutu d’unos y d’otres.

Cuando va entrando la primavera esos momentos puen ser entreteníos, especialmente cuando les mozes entamen a alixerar el pesu de los abrigos emburriaes pol subir de les temperatures y el puxu de la so mocedá; entós el divagar faise luxuriosu y, llegáu’l casu, pue algamar a ser procaz. Pero güei nun yera la ocasión; güei, nun día friu, como correspuende a xineru, la visión yera de desconsuelu.

Les lleis de la física dicen que los colores escuros capten y conserven meyor el calor de los rayos del sol y, quiciabes poro, la nuesa tendencia natural, reforciada pola moda, ye vestir ente’l negru y el gris. La visión dende’l confort del coche, nesos momentos de semáforu coloráu, ye absolutamente deprimente, dominada por esos colores de tristura, y ún nun pue menos que deseyar llegar ceo a casa.

Ye entoncenes cuando la radio vien a auxilianos con un sutrumir repentín, gimme some lovin, de Spencer Davis Group, un grupu de cultu británicu que creó esta canción nuna sentada d’un par d’hores nun estudiu de grabación –eses coses pasen- y xunto con keep on running, otra gran pieza, sedría un de los sos ésitos mayores. El canciu fálanos d’un día duru en que les coses nun foron demasiao bien; cuentanos de dalguien qu’espera que la so moza-y dea un pocoñín d’amor pa, de esa miente, iguar la que paez una pésima xornada.

Nun cabe dulda que la color ye importante; nel Caribe, tierra de branu permanente, nun tienen traxe escuro nin pa dir a un entierru, ellí too son colores vives, como si la temperatura llevare implícita una dosis especial d’alegría. Quién sabe, tamién les sos músiques paecen llevar otru ritmu, otru sentir. Quién sabe, pero los Blues Brothers, que nun se desprendíen del traxe, corbata y sombreru negros nin pa dormir, consiguíen imprimir a les sos andancies y músiques un ritmu estimulante, especialmente cuando versionaben esti gimme some lovin, que ye’l que la mayoría de la xente conoz.

Ehí fuera sigue faciendo friu y la xente cruza rápida énte la mio ventana, pero yo toi llistu pa tornar a casa guetando some lovin.

Raúl Suevos

A 26 díes vencíos de xineru de 2021

Torna en castellán en repdiv.blogspot.com

La tresparencia de la muyer del Cesar

Prestaríame poder amosame sorprendíu coles noticies qu’estos díes vienen apaeciendo sobro l’alministración de vacunes a persones o personaxes que s’atopen mui lloñe de responder a los criterios xenerales pa recibiles. Nun me sorprende, la verdá, y supongo que dalgunos, al enterase, intentarán ser comprensivos apelando a la vieya picaresca española. Pero nun debemos engañanos, tamos nel sieglu XXI y aquella yá nun sirve pa xustificar nada nin a naide.

Les noticies lleguen dende casi tolos requexos del país. Dende Ceuta hasta Bilbao, pasando poles costas mediterráneas pa llegar a la califal Córdoba, ensin escaecer Aragón o Asturies, en una versión nueva, quiciabes más rastrera, del vieyu “vusté nun sabe con quién ta falando” qu’agora intenta xustificar la so inclusión, ensin tener drechu a ello, nes llistes de los vacunaos. La hestoria de les epidemies ta cargao de momentos heroicos y d’otros nos que’l mieu, daqué mui personal, lleva a cometer aiciones de les que dalgunos s’arrepienten el restu de les so vides, anque otros habrá qu’alcuentren xustificaciones inverosímiles que-yos permitan dormir tranquilos pola nueche.

A min, como militar retiráu, les noticies que más me duelen son les que lleguen de la xefatura del Estáu mayor de la Defensa n’onde el so comandante y dalgunos otros xefes, amparándose nun protocolu qu’ellos mesmos diseñaron y aprobaron, tuvieron tamién accesu a les perseguíes y escases vacunes. Al paecer la so salú ye tan importante pal sistema como la de los sanitarios de defensa y supongo, claro, que enantes habrán vacunao tamién a tol personal de la Brigada de sanidá, aquella que disolvieron nun va muncho y que güei ye namái Agrupación, o que protexeran previamente al personal de la UME que trabayó, y tornarán a facelo, sofitando les estructures sanitaries, o al restu de soldaos d’estremaes unidaes que tamién lo faen en toles contornes del país; o a los guardias civiles, aquellos que tolos díes intenten ser “un pronósticou feliz pal aflixíu” siguiendo lo marcao na so vieya cartilla. Espero que les esplicaciones que la ministra tien esixío seyan convincentes.

Toa esta nube desarróllase cuando nel Conseyu de tresparencia y bon gobiernu s’asoceden los ceses demientres se trata d’enzancar el descreditu del organismu, supuestamente independiente, énte la opacidá del gobierno en casi toles sos árees pero, especialmente, tocantes  la xefatura del mesmu, que les sos actividaes, viaxes, visites, acompañantes, etc. cubrense cola declaración de secretu pa torgar la más mínima divulgación, al mesmu tiempu que s’esixe a la Corona, impecable na figura de don Felipe VI, una mayor fiscalización en tolos sos actos. “Cosas veredes, amigo Sancho,  que harán fablar las piedras”.   

Raúl Suevos

A 22 díes vencíos de xineru de 2021

Torna en castellán en repdiv.blogspot.com

Reconciliación n'América

 

Día grande en Washington cola toma de posesión del presidente Biden, con un gran discursu nel que la pallabra "unity", unidá, foi la más usao, con referencia tamién a la indivisibilidá de la nación, daqué a lo que tamién se refirió, en castellán, Jennifer López, participante como Lady Gaga nel eventu. Un conxuntu d’actos que, por munches razones, suponen un finxu negativu na hestoria  d’esa gran nación.

Na direición de salida colaba Trump, col acompañamientu de la so numberosa familia, faciendo comentarios que nun agoren facilidaes pal presidente nuevu puesto que’l pesu de los sos millones de votantes, y tamién los millones de dólares guetaos nestes selmanes caberes, prometen batalles de toa mena si ye que los sos, hasta güei, correlixionarios del partíu republicanu nun s’encarguen de tisoriar el so posible recorríu políticu col procesu d’impeachment. Per esi llau poca unidá cabe esperar.

Equí casi tol personal, o parte d’él, amuesase optimista con Biden. Busquen, y supongo que l’atopen, una cierta equiparación ente republicanos-demócrates y dereches-esquierdes pero, la realidá ye que la brecha en Norteamérica, "clivage" lo nomen ellí,  ta ente más gobiernu pa los estaos o más gobiernu federal. Dalgunos esperen un cambéu radical nes polítiques de los EEXX pero, paézme a min, los cambeos, d’habelos, van ser paulatinos y aselaos; l’aisllacionismu del “América first” trumpianu nun va camudar d’un día pa otru y los esfuercios del presidente van centrase en recomponer lo que la polarización d’estos años caberos, dende enantes de l’aportar de Trump, tien roto ellí.

A min, la contemplación de los actos na pantalla déxame un pocoñín d’optimismu en rellación col líder qu’Occidente espera; los Estaos Xunios, que la so hexemonía paez entamar a ser desafiada n'ámbitos estremaos por distintos actores, únvia una vegada más el mensax más importante: el so sistema políticu de democracia representativa ye fuerte y sedrá a salir alantre de nuevo, ye resiliente y ta penrriba de les persones. Esti ye’l mensax que güei llanzaba’l presidente Biden a los sos conciudadanos.

La polarización descomanada d’estos años caberos, división si vustés prefieren, ye la gran debilidá del imperiu; la gran xera a resolver una vegada solucionáu’l problema del coronavirus, y ensin dulda la preocupación principal del presidente de mayor edá na hestoria del país que, ye probable, va delegar más competencies de les habituales na vicepresidenta Harris, dándo-y una visibilidá mayor de la que’l puestu suel otorgar y, de pasu, preparando’l camín pal so relevu tres cuatro años d’una presidencia que, a bon seguru, nun va ser fácil.

Raúl Suevos

A 20 díes vencíos de xineru de 2021

Torna en castellán en repdiv.blogspot.com

Señardá nel "Gijonés" de L'Habana

 

Na parte alta del Paséu de Prado, casi na esquina col Parque Central, corazón vital de L’Habana, atópase un edificiu neoclásicu, porticáu y de cuatro plantes, nel que s’alluga, dende que Fidel Castro espropiara ensin indemnización al Centru Asturianu, l’Asociación d’Entidaes asturianes. Ellí llegaron cuando, tres munches presiones, concedió-yos graciosamente esti inmueble que perteneciera a un club norteamericanu y qu’agora alquilen parcialmente a restauradores, como nel casu del “Gijonés”.

Les pérdidas nun yeren comparables, nin de lloñe, y ent’elles taba’l magníficu edificiu construyíu por Manuel del Busto nel que güei s’amuesen les coleiciones del Muséu nacional de belles artes, tamién productu de la rapiña del comandante nel so deliriu nacionalizador. Esti inmueble, restauráu con caudales asturianos en tiempos de la presidencia de Tinín Areces, entá caltien toles señes d’asturianía coles que’l so creador Del Busto lu dotó.

Nel Gijonés, a pocu d’aportar a Cuba nel 2010, tevi ocasión de participar nuna actividá de la embaxada española na que conocí a un asturianu. Asemeyaba más d’ochenta años pero, ellí, les apariencies son engañoses y probablemente sedría más mozu. Llegara a L’Habana un par d’años enantes de que’l Comandante espulsara a Batista y “mandara parar”. Con tan mala fortuna –yeren les sos pallabres- qu’alcontrara l’amor y fundao una familia pocu enantes de l’arribada de los barbudos, lo que lu caltuviera ellí, dexando pasar toles oportunidaes de torna y, entoncenes, dependiente de la escasa pensión cubana y de los ochenta euros añales que, en forma de subsidiu, España-y facía llegar y que, anque paezan pocos, llevaben a munchos compatriotes a desplazase dende Santiago nun viaxe penosu de dos díes, pues esa cantidá representaba’l sueldu mediu de cinco meses. 

Nun sé qué sedría del asturianu aquel; nada bono supongo. En Cuba, y tres l’espeyismu d’Obama, les coses anguaño tán muncho peor qu’entós. La probeteria nun algama a la del “periodu especial” pero la busca de la proteína ye la ocupación principal del cubanu d’a pie. La represión, en forma d’arrestos domiciliarios, panaderes en comisaría, acosu a periodistes independientes y encarcelamientu de disidentes vuelve a ser lo avezao en tol país. El Virus tampocu respeta a la islla y, magar l’amañu de les cifres, la epidemia crez esponencialmente espantayando a los imprescindibles turistes. Namái les remeses de los espatriaos y el pagu polos mélicos que Cuba únvia fuera suponen un ingresu pal gobiernu. Pero nun ye abondo, y hasta Angola, siempre fiel, acaba de retira-yos l’encargu de construcción d’una carretera por incumplimientu de contratu.

El pesu convertible, segunda moneda y un desatín económicu nel so momentu, foi elimináu, lo que va suponer, vía corrupción, inxentes ganancies pa dalgunos y la ruina pa otros; pero esta operación ta dando la oportunidá de comprobar cuál ye’l verdaderu valir de la economía isleña puestu que, con un valir oficial del dólar de 24 pesos cubanos, la busca bulliciega de la divisa yanqui fae qu’esta se pague na cai a una media de 40 pesos, algamando a picos de 50, lo que mos da muesa de la realidá cubana y conderga a aquellos que nun tienen oportunidá d’accesu a les divises estranxeres a una probitú que raya na miseria.

El nuesu asturianu va tener que siguir esperando’l subsidiu de la patria, y tolos cubanos la desapaición de Raúl Castro puestu que, anque lo tenga too bien atao, tres él va venir la escorribanda del réxime, como siempres asocede nestos casos, anque la recien inclusión del gobiernu Trump del país nel llistáu de estaos terroristes nun creo qu'ayude.

Raúl Suevos

A 16 díes vencíos de xineru de 2021

Torna en castellán en abellugunelcamin.blogspot.com

El triunfu de los urbanites

 

L’añu del virus, agora tamién de Filomena, va quedase marcáu na nuesa memoria como enantes asocediera con otros grandes socedíos, la muerte de Kennedy, l’asaltu al Congresu, etc. nesti casu ye probable que la so buelga seya más rendidera por aquello de la estensión temporal d’esta plaga que nada tien qu’envidiar a les de la Biblia. Anque ye fácil que, pa los más, dalgunos detalles pasen desapercibios.

Ún de los llibros más traducíos y estudiaos del sieglu XX foi la rebelión de les mases, nél, el filósofu Ortega y Gasset daba cuenta del procesu d’emancipación de les mases ciudadanes respeutu de les élites que, hasta entós, dirixieran los destinos de les naciones de forma natural. Dend’entoncenes esti procesu namái se vio matizáu pol desendolcu de moos de comunicación social nuevos; la radio, la televisión, internet, y güei les meravioses pa unos, diabóliques pa otros, redes sociales. Anguaño, p’apoderase de la voluntá de les mases, hasta algoritmos s’utilicen.

Les mases son númberos, son votantes y, nesa matemática, non tolos factores son iguales. La llei d’Hondt y el repartu d’escaños d’un llau, y los efeutos sobro la economía d’otru, faen que les ciudaes marquen el ritmu vital de les naciones, de la nuesa particularmente. La gran ciudá merez tol’atención, a los pueblos yá aportaremos, cuando se pueda.

La nieve punxo a caún nel so sitiu. Madrid, gran perxudicada magar los repitíos avisos de tolos meteorólogos del país, rexuntó tol’atención de la prensa y de los servicios d’ayuda. L’Exércitu volcóse nel so ausiliu, depués de que la ciudadanía amacigara la nieve coles sos pisaes convirtiéndola en xelu duru. Foi un torrenteru de noticies que casi mos esmadra. Mentanto, cientos de pueblos del norte d’España, mayoritariamente habitaos por vieyos, quedaron aisllaos, en dellos casos ensin fluxu eléctricu, a la espera de qu’escample y salga’l sol. Como siempres, ensin gorgutar.

Dende va unos díes yá nun va ser posible cazar nos parques nacionales, lo que va suponer otru recorte de puestos de trabayu nalgunos pueblos. El toru, cada vegada más acorraláu, va facer les deheses antieconómiques. La proteición del llobu arruina al ganaderu pequeñu. Toes son normatives influenciaes pol poder de la masa urbanita, toes favorecen l’abandonu del campu, de los pueblos d’España.

El plan d’estensión de la fibra óptica n’Asturies pa esti añu nun recueye aiciones nos conceyos del suroccidente, tán mui llonxanos y nun tienen masa crítica. Tarrén pal osu, y pa escursiones d’urbanites    

Raúl Suevos

A 12 díes vencíos de xineru de 2021

Torna en castellán en repdiv.blogspot.com