Erdogán, l'aniciu del final

Nun cabe la  menor dulda que Recep Tayyip Erdogán ye una de les grandes figures polítiques del so tiempu; dende l’alcaldía d’Estambul esguiló pela estructura política de un país teóricamente laicu dende que Mustafá Kemal Ataturk lo costruyera al entamu el sieglu XX. Consiguió lo que paecía más difícil, desactivar al Exércitu turcu, guardián de les esencies laiques de la república turca, cola fuercia d’un partíu relixosu; el so partíu, el Partíu del bienestar, al que-y llavaría la cara pa evitar la confrontación cola llei y col que, col nome nuevu, Partíu de la Xusticia y Desendolcu, diba apoderase de tolos resortes del poder, con Constitución nueva incluyida, hasta convertise nel sultán nuevu de la Puerta dorada; a lo menos eso ye lo que paez qu’él creyó.

Tantu poder, la historia tiénmoslo amosao munches vegaes, acaba por enfilar y esto paez que ye lo que-y pasó al señor Erdogán que nos tiempos caberos fo derivando cada vegada más haza posiciones llegalmente incuestionables pero que lu llevaron a perder llexitimidá de forma acelerada, y la perda d’Estambul y Ankara nes eleiciones municipales caberes ye namái l’amosamientu de lo que pue depara-y el futuru. 

Nos últimos tiempos el presidente turcu paez qu’entamó una fuxida haza alantre. El so apueste por convertir el so país en potencia rexonal yá se percibió cuando con ocasión de la segunda Guerra d’Iraq negó accesu a les Fuercies USA; el so xantaxe políticu a Europa al entamu la Guerra en Siria y la crisis de refuxaos fo una forma codalosa de cobra-y a Europa’l so refugu al ingresu. Nestes dómines siguió apostando con compres de misiles rusos y alcuerdos con Libia sobro agues territoriales que sólo paecen conducir a ulteriores tensiones colos sos aliaos atlantistes.

La entrada en territoriu siriu va unos meses http://repdiv.blogspot.com/2019/10/yanqui-go-home.html  fo’l so apueste más fuerte y direutu; paecía que, primeramente, los perdedores seríen los kurdos, y los sirios d’El Assad tendríen qu’aceutar la situación demientres los rusos certificaben la situación y los yanquis de Trump plegaben veles abandonando los sos protexíos kurdos. Pero les coses de la xeopolítica cuasi nunca salen como los aprendices de bruxu pretenden. Esta vegada tampoco.

La selmana pasada, tres dellos combates previos que pagaron dalgunos soldaos turcos, un ataque aéreu amontó la cifra de muertos a 36 y munchos más feríos. Nestos casos l’apostador suel doblar l’apueste y Erdogán nun paez ser estremáu.

Autobuses, taxis, coches d’alquiler, too mediu de tresporte paez ser conducente pal envite nuevu del presidente turcu. Trátase de conseguir el sofitu de la Xunión Europea cola amenaza d’un millón de refuxaos sirios aportando a les sableres de les islles griegues próximes a la costa d’Asia Menor; una crisis que yá punxo a tremecer a Europa va cinco años. Entós la situación yera sobrevenida, agora ye provocada poles ambiciones del sultán turcu qu’atrapáu nesi apueste demasiáu arriesgáu y unillateral que fizo en Siria llama a les puertes de la OTAN apelando al artículu 5, daqué descartable daes les circunstancies.

Metanes una crisis sanitaria de calter global lleguen problemes nuevos pa Europa. Grecia va recibir en primer llugar l’efeutu d’otru  ábanu pero van ser les estructures de la Xunión les qu’otra vegada van ser puestes a prueba y yo espero que seyan abondo fuertes y salgan alantre ensin problemes pero tamién deseyo qu’esta xugada cabera seya l’aniciu del final pa un Erdogán que, amparáu nun sistema democráticu desarmáu, convirtióse nun dictador más.

Raúl Suevos

A 29 díes vencíos de febreru de 2020

Torna en castellán en repdiv.blogspot.com

El virus ta dientro, disparái sobro nosotros

Quiciabes resulte un pocoñín dramáticu apellar a los defensores del Simancas pa falar del coronavirus pero les noticies del día traxeromelo a la memoria. Güei’l virus díomos el nuesu paciente ceru, esto ye, un infectáu que nun tien rellación con dalu país de riesgu nin tampoco con naide que venga d’allá. Pa facer la situación más potencialmente dañible’l interesáu foi tratáu mientres dellos díes nun hospital de Sevilla como si d’una neumonía normal se tratare, ye dicir, tamos ente la mesma situación del primer paciente italianu, tresmitiendo’l virus a tol equipu mélicu y familiares ensin nengún tipu de prevención. Lo probable ye que en díes apaezan nuevos casos como níscalos nel valle de Roncal nuna seronda llenta.

L’enemigu ta dientro, yá nun ye l’home del sacu a la puerta, y, como nel casu del acorazáu Cervera, naide paez haber creyío nos avisos y agora pue ser yá demasiao tarde. Los espertos de la Organización mundial de la salú dicen, tamién güei, qu’en China la epidemia emtama a ser contenida gracies a les draconianes midides que tomó ellí’l gobiernu, daqué bono habíen de tener los gobiernos dictatoriales, pero que-yos preocupa constatar que, en cambiu, n’occidente nun paez que la reacción seya contundente. Ello ye que les redes sociales, añedo yo, paez que se tomen a xirigota les poques midides que n’Italia se tomaron, por esaxeraes, anque los Erasmus españoles –los únicos- faltó-yos tiempu pa salir tarifando de la Lombardía.

Si los tiempos d’incubación son correutos preveo una Selmana Santa mui sele ya igualmente la Feria d’Abril. Nun algamo a maxinar los cofrades tosiendo baxo los Pasos, pero en fin, yá qu’esto seya namái la visión d’un agoreru. Pel llau positivu apuntesemos dos elementos, dambos riquieren tiempu, el primeru un compuestu esistente nel mercáu, cloraquina, que paez qu’anicia a funcionar en China y que si se confirma nun va tardar en ser usáu de forma xeneralizada en tolos sistemes hospitalarios trepando cola pandemia; el segundu ye’l clima, pues dicen dalgunos virólogos que los virus respiratorios estallazen col tiempu calorosu y que s’espera qu’eso tamién afeute al coronavirus. Vamos ver.

Mientres tanto, y magar que’l doctor Sánchez diz que’l nuesu sistema sanitariu ta perfeutamente preparáu pa trepar cola situación, nes farmacies, y nes ferreteríes tamién, quedaron ensin mascarilles y ensin desinfeutante pa les manes. ¿Ye posible que’l personal nun confíe nel señor presidente? M’Italia escosaron les esistencies de pasta en tol Milanesao pero nós ¿Qué vamos facer? ¿Fabes? ¿Garbanzos? ¿Patates? ¡Dios¡ Qué complicao. El gobiernu tendría de dar instrucciones de compra, qu’esto nun ye Italia, coyona.

Raúl Suevos

A 26 díes vencíos de febreru de 2020

Torna en castellán en repdiv.blogspot.com

L'home del sacu ta na puerta

Tábemos tan sele, pendientes de la Champions, siguiendo como daqué llonxanu y ayén les informaciones que diariamente aporten de China, a lo último “los nuesos” yá salieron del Gómez Ulla ensin novedá, cuando de secute descubrimos que tamién n’Europa pue asoceder, tamién equí’l confinamientu d’una población ye dalgo perfeutamente posible, y lo que ye peor, el coronavirus.

Ye como si l’home del sacu, esi qu’enantes s’usaba pa meter mieu a los neños –agora pue ser una forma d’acosu susceptible de denuncia- tuviere picando na nuesa puerta. ¡La epidemia yá ta equí¡ y de mano sentimos un respigu de llerza. Güeyámoslu dende la mirilla la puerta, ensin abrir, cola esperanza de que se canse y se vaya pero sabiendo, a lo fondero, que nun va ser asina, que va acabar por colase per un ventanu, pelos respiraderos del bañu, o per dalgún sitiu que nun controlamos. Ye lo que tien la llerza.

En tiempos antiguos les pestes tardaben dellos años en desplazase. Facíenlo al llombu de comerciantes o pelegrinos, esto ye, a pie y con munches y llargues paraes. Cuando atopaben una frontera piesllada por razones polítiques podíen detenese meses, inclusive años, anque acababen por pasar y diezmaben la población d’Europa. Agora too ye muncho más rápido.

El mundu fízose, a güelpe d’avión, muncho más pequeñu que’l del Medievu; y los viaxeros nun son unos pocos sinon que son millones, munchos más col inventu malinu de los vuelos de baxu costu. La cifra de pasaxeros anuales ye estelante. Si enantes nun se podía pone-y puertes al campu agora facelo nel cielu ye entá más difícil. Y Codogno, el centru del coronavirus italianu, ta a una hora de camín de Milán y Bérgamo, perimportantes nodos aéreos con varios vuelos diarios haza España. 

Con too y con ello nun hai ainda motivu pa preocupase puesto que’l nuesu sistema sanitariu ye de gran calidá, acordies coles pallabres del presidente del gobiernu ayeri en Bruxeles, y nun voi ser yo quien dulde de la pallabra d’un presidente. Quiciabes va haber que ver lo que piensen los conseyeros autonómicos cuidao que la competencia ye d’ellos o quiciabes pensaba’l presidente nel sistema de sanidá militar ensin saber –eses caxigalines nun son de la so competencia- que por instalaciones y plantilles ta anguaño cuasi desguazáu. Daqué tendría na tiesta, seguro.

L’hombe del sacu pue güei amarutase d’histeria coleutiva, como n’Ucrania, con xentíu acantellando l’autobús au se conducía a compatriotes non contaxaos haza la cuarentena. ¿Tarán les granxes de trolls rusos detrás d’eses manaes? Nunca se sabe, anguaño too ye posible y la guerra tolo xustifica pero, sicasí, el gobiernu de nueso faría bien en dir un pocoñín más allá puesto qu’esta vegada nun hai entá retro-virales disponibles como cuando, pa resolver la posible crisis d’imaxe gubernamental cola Gripe A de 2009, Trinidad Jiménez mercó 37 millones de dosis que nunca llegaron a usase.

El nuesu gobiernu de coalición ye, por construcción, un gobiernu feble al qu’acesmen en cada rellabicu del camín amenaces estremaes, la so propia composición, la escayente economía, los independentismos rampantes y agora esti home del sacu cargáu de coronavirus. A ver si ye a igualo.

Raúl Suevos

A 22 díes vencíos de febreru de 2020

Torna en castellán en repdiv.blogspot.com

L'honor del segurata

La Llexislatura vien d’entamar y les facciones estremaes que se repanchinguen nel hemiciclu de la Carrera de San Xerónimu necesiten asitiase, sobre too les de la oposición, pa caltener l’ánimu los sos votantes y, de ser posible, aniciar a captar nuevos compradores de promeses. Esto siempres foi asina pero, nesta ocasión, con un gobiernu de coalición sinónimu de pocos votos pal partíu mayoritariu, les pulsiones internes déxense sentir más que nunca, y les de la oposición, sorielles énte una llexislatura tirante y curtia, entá más; per otru llau too ello combinase con unos partíos nacionalistes/independentistes que güelen el sangre y cual vampiros aprestense a chupa-ylo enantes de que’l gobiernu quede esangüe.

Frutu d’esta tirantez ye’l llargu percorríu qu’ainda tien la metedura de pata, calificativu indulxente, tocantes la escala de la non grata ministra bolivariana de Maduro nel aeropuertu Adolfo Suárez de Madrid. Al ministru Ábalos ta poniéndose-y cara de Morán nos memes qu’empecipien a ser llexón, y eso que nos tiempos  del probre ministru felipista entá nun esistíen, si bien algamó a superar a Lepe como fondu de chistes curtios. Ehí se les tien el ministru de tresporte y veremos cómo fina la cosa.

A min llamóme l’atención que de tol asuntu seya un humilde vixilante de seguridá quien mos traya, hasta agora, la visión más nidia de lo qu’ellí asocedió. Siempres son los más humildosos los que paecen tener más claro que naide’l conceutu del bien y del mal, el sentíu de lo que ye debío. ¿Quiciabes seya porque namái tien un emplegu mal pagáu pa perder? O non.

Y ye qu’a midida que vas creciendo vas comprometiendote. Cáseste y pierdes un pocu de llibertá; yá nun digamos si amás hipotequeste, entós yá tas encadenáu pa siempres, el cuelmu ye si compres un casoplón nuna bona zona de la to ciudá, a partir d’ehí hai que asegurar, a toa costa, la posición llaboral, o política; nada pue ponela en peligru y si fai falta mírase pa otru llau, o súfrese ceguera temporal. Ye lo qu’hai pero, nesti asuntu, ye posible que la desfamada xudialización de la política seya la que devuelva la vista a los ciegos.

Que la sociedá evoluciona, anque nun se sabe mui bien haza onde, tamién mos lo amuesa la política de nomamientos nel enantes seriu Ministeriu de defensa. Va menos de lo que dura una bola la señora ministra promovía al cumal de la carrera militar al so xefe de gabinete, decisión llegal pero malapenes estética. Güei enteramonos que, llegada la promoción a División de dos xenerales togaos, los elexíos foron el cuartu y sestu, per delantre los tres meyor calificaos ¿La so gracia? Trabayar na cercanía de la señora Robles. De nuevo paez venir a cuentu aquello que’l reformador Cassola escribía nos antecedentes de la Llei de Reforma militar de 1887, “pa que naide tenga qu’esperar del favor nin temer de l’arbitrariedá”. Tenemos l’Exércitu meyor preparáu de los dos sieglos caberos pero les formes paez quedadon encharcaes na escualidez moral de tiempos pasaos. ¿Será qu’esto ye la modernidá? Quiero creer que va siguir habiendo dalgun segurata que mos recuerde cómo deben ser les coses.

Raúl Suevos

A 21 díes vencíos de febreru de 2020

 Torna al castellán en repdiv.blogspot.com

Coló Xuanxu, ensin avisar

COLÓ XUANXU, ENSIN AVISAR

La Promoción, pa los militares, ye muncho más qu’un grupu llaboral o educativu. N‘Academia Xeneral Militar entres cuando malpenes entamaste a formate como persona y pases ellí unos cuantos años en réxime d’internáu, cinco na mio dómina. Los llazos que se creen son indisolubles de fuertes que son, nin la espada d’Alexandru algamaría a tayalos. Son llazos formaos per munches hores de brega, de marches y de sudu, d’exercicios con fueu real, de profesores convencios de que la disciplina imprimese pente medies la obediencia y en munchos casos el castigu. Salimos, nun sé si con espíritu de cuerpu, pero sí con espíritu de promoción. La mía ye la xxxv, la de Xuanxu.

Xuanxu aina empecipió a resaltar por contestatariu nun ambiente au eso yera sacrilexu. El siempres tenía una salida de tonu, siempres de bon humor y siempres en positivu. En segundu añu, creo recordar, demientres una galopiada pel campu de San Gregoriu, el so caballu llegó ensin xinete y a Xuanxu atopamoslu desorientaú, pasó pel hospital militar y al so regresu yá nun yera’l mesmu, o meyor, yera’l mesmu pero amás yera estrambóticu. Dende entós dexó de ser Téllez pa ser siempres Xuanxu. Un elementu distintivu de la xxxv.

Cuando salimos tenientes d’Infantería Xuanxu garró’l camín del cursu d’Operaciones Especiales y yo que colé pa Montaña perdí-y un pocu la pista. Supe que se casara y divorciara malpenes nun telediariu y yá capitanes recuperamoslu na Brigada de Montaña, nel batallón Pirineos. Ellí aportó fechu cuasi un activista pa lo que yeren los parámetros de la institución. De la so salida de formación metanes una Misa entá se fala ente los collacios de Montaña. Él entendía que nun yera de recibu nun actu militar y el casu dio p’arrestos, recursos, victories y derrotes. La Reserva sería'l so escape defensivu.

Per esa dómina la so molición filosófica tocó techu. Coló pa la India a meditar y pelli tuvo dellos años hasta que, según me contó, la llegada de neófitos occidentales al so particular retiru a la gueta d’un supuestu gurú y el barruntu de que pudiere ser él a quien buscaben fo motivu abondo pa pensar que yera’l momentu de tornar, y asina lo fizo depués de múltiples peripecias viaxeres.

De nuevo n’España, y col aselu que siempres apurre la edá, tuvo trabayando un tiempu pa La Rioja en xeres d’emigración hasta que l’amor, o daqué asina, picó otra vegada na so puerta en forma d’una natural de Querétaro, la maraviosa ciudá mexicana, a onde emigró a la gueta d’esi nirvana que dexara na India. Tampocu resultó nesa ocasión pero sí'l so namoramientu de la ciudá y el país, y tamién un amor nuevu encarnáu esta vegada nuna sinaloense de güeyos fermosos y otres bondaes non menos curioses. Con ella intentólo per dellos años pero pesó más, creo, Sinaloa y la so peculiar cultura de la violencia, cantada polos Tigres del Norte y caltenida pol Chapo Guzmán y los sos esbirros.

Nesta dómina tuve ocasión de visitalu. Como yo nun pude subir a Querétaro foi’l quien baxó al DF. Quedamos nel Centru Español, cabo’l Zócalu, y pellí apaeció Xuanxu tirando de la so pequeña maleta, americana y sombreru crema, abriéndose pasu ente'l xentíu. Los mios cuñaos, vecinos del DF per 12 años, taben plasmaos, nunca vieren apaición semeyante. Yera Xuanxu, que nun conducía y desplazabase per México como si de la cai Uría se tratare.

La comida, nel Centru cómese perbono, foi una raxona de estraversión y vivencies de Xuanxu; los cuñaos de mio entá lu recuerden como si fuere va unos meses y siempres con sorpresa y ablucamientu. Yo recuérdolu como si fuere’l comedor de l’Academia, yera’l Xuanxu de siempres, simplemente dexárase barba, yá cana, y un mostachu esplendidu.

Estos años caberos tornamos a venos en Xixón. Pasaba una temporada de reposu en casa Perico, un amigu común que tien una Quintana na zona de Colunga. Habíenlu operáu de cáncer y taba decidíu a superalo y asina paeció cuando tres dellos meses regresó al so Querétaro aparentemente fuerte y sanu. Pero’l bichu tornó.

Va unos meses descubrí que taba en casa la so familia, en Cartaxena. Un descuidu nel corréu dióme la pista y confesóme que recayera. Nun quería entrar na dinámica de más operaciones y quimioterapies, valoraba más la calidá de vida. Siempres me comentaba daqué sobro les parolaes que yo escribía pero facia una selmana que taba en silencio radio. Malo.

Güei enteréme que Xuanxu mos dexara y la Promoción pierde más qu’un miembru, pierde un de los sos xilgueros y eso dexanos con menos música, más murnios, más solos.

Nos vemos Xuanxu.

Raúl Suevos

A 13 días vencíos de febreru de 2020

Torna en castellán en repdiv.blogspot.com