Espeyismu nel Muru de Xixón

ESPEYISMU NEL MURU DE XIXÓN

Taba güei el Muru como n’agostu, paeciere que tol personal se concentrara ellí, anque’l Muelle y el Parque tamién taben en multitú. Ye como si la xente albidrare qu’esta antemanada primavera tuviere los sos díes contaos y l’iviernu, que ye lo que toca, esperare agazupáu a la vuelta la esquina pa cobrase esti créditu anticipáu.  

El primer güelpe de vista alegróme’l día. Too yeren neños, de toles edaes, en carrín, en bici con ruedines, en patinete, en brazos los sos pás; una esplosión infantil que me llevó a pensar, namái un  intre, qu’entá non too taba perdío, qu’esti país entovía pue sobrevivir, pero llueu, güeyando’l detalle, percibí que cuasi toles pareyes yeren d’un infante solu; les dobles, tamién abondes, en munchos casos yerenlo con ximielgos, productu posiblemente de les ayudes a la reproducción y, en xeneral, la edá de los proxenitores superaba llargamente la trentena, con esceiciones claro. Estos detalles yá dan pa pensar.

Embaxo, na sablera, había una sonadiella descomanada, pero nesti casu de canes.Tamién con dellos neños, pero sobretoo canes, de tolos tamaños, races y colores.Paecíen contentos y tamién los sos dueños. Una imaxe de felicidá completa nuna ciudá de provincies fermosa y costera. Supongo que ye lo que toca nuna mañana dominical de primavera.

Les postales, qu’agora’l móvil tien desahuciao, carautericense por unviar imáxes idíliques de llugares de tol mundu, nunca amuesen los barrios, nin les vergüences o’l deterioru d’esos sitios y un pocoñín d’eso ye lo qu’hai na semeya ciudadana d’esta mañana soleyera y benigna. Detrás de la foto de families felices despintase una tasa de natalidá en cayida llibre dende va yá munchos años, demasiaos, y especialmente n’Asturies. Una senda demográfica que namái pue aportar a un futuru cada vegada más malfadiáu pa la rexón. N’ello tamos.

En función del momentu políticu suel asacase’l problema a la falta de mira llaboral pa les pareyes moces, o a l’ausencia d’ayudes estatales pero la realidá, en dellos casos, paez indicar actitues más egoístes, con más fonderada sibarita, porque en munchos casos, con pareyes económicamente asitiaes, nun se supera’l fiu únicu, el pequeñu déspota emperador, lo que lleva a pensar que a les xeneraciones nueves realmente lo que-yos pasa ye que la crianza da-yos galbana. La crianza ye sacrificiu del yo, entrega de la vida personal en beneficiu del ñácaru, que llueu neñu, adolescente, 

mozu y quién sabe, quiciabes nini nun futuru y al que tengamos que sofitar con parte de la nuesa flaca pensión. En fin y en pos, un mal negociu.

La demografía nun enguada. España envieya, rápido y mal. Mal porque esti ritmu nun hai economía que lu soporte y porque nes poques rexones nes que la natalidá aguanta son aquelles nes que la emigración compensa lo que les pareyes natives nun tán dispuestes a apurrir; son rexones u, a diferencia del norte, la mano d’obra intensiva y temporal ye demandada. Paez que vamos haza una sociedá mestiza y quiciabes eso seya lo meyor, cazumbre nueva qu’enriqueza una sociedá anguaño más pendiente de los sos perros y les sos vacaciones.

Superao aquello de “qu’inventen otros” aportamos agora al tiempu del “que paran otres”, mentanto, el mundu sigue’l so camín.

Raúl Suevos

A 2 de febreru de 2020

Torna en castellán en repdiv.blogspot.com