Avenida de los Insurxentes...rusos

 

Ente las xoyes de México capital ta’l Muséu nacional d’Antropoloxía; una maraviella a nivel mundial, construyida nos tiempos del presidente Cárdenas, aquel que acoyió a los refuxaos españoles tres la Guerra incivil, y tamién el buque Vita, cargáu de xoyes pa sofitar esos esilaos, y qu’Indalecio Prieto se encargaría de controlar ensin que nunca se supiera’l fin de los caudales.

Dende’l Muséu, casi ensin cortes, discurre la famosa Avenida Insurxentes, qu’en casi treinta kilómetros mos lleva hasta’l non menos renomáu lagu Txotximilco, una escursión imperdible, como la de Tenochtitlan, si se va per aquel país, güei nes manes infames d’Andrés López Obrador.

En Rusia, que yo sepa, nun cuenten con una avenida semeyante, pero tienen la autopista a Moscú dende Rostov del Don, una ciudá de millón doscientos mil habitantes que s’atopa na desembocadura de esi riu, nes orielles del mar d’Azov, territoriu rusu au s’alcuentra’l cuartel xeneral militar que, se supón, mal dirixe les operaciones n’Ucrania.

D’ella, al paecer, tiense apoderao’l señor Prigozín, y les sos tropes irregulares –nun me gusta lo de mercenarios- que, dempués de dexar miles de muertos en Bajmut al serviciu de Putin, paez que se fartó del so papel de carniceru y limpiador de prisiones, y tres una serie d’intervenciones públiques maldiciendo al ministru de defensa rusu, yá decidió llanzase abiertamente a la insurxencia militar, también llamada rebelión.

Yá hebo combates y derribu d’helicópteros, pero lo más preocupante, pa Putin, ye que nun hebo resistencia en Rostov, nin de los militares nin de la policía, y les informaciones dicen que tán a 340 kilómetros de Moscú, au l’Exércitu, o lo que d’él queda, espliega nes víes de llegada con intención de corta-yos el pasu.

Prigozín solu nun tien un res que facer pero, si baxo l’aparente calma de ciudadanía ya instituciones, que la comunicación pública del Kremlin mos treslladó dende que la Operación Especial escomencipió, resulta qu’hai un tresfondu de descontentu y fartura, puede que mos atopemos énte una situación semeyante a la de febreru de 1917 en San Petersburgo, cuando les tropes zaristes refugaron disparar a los manifestantes, faciendo con ello cayer al réxime zarista, y l’aportar d’un gobiernu de concentración a cargu de Kerensky.

Suena bien el cuentu, pero convien nun escaecer que, unos meses dempués, sería Lenin, pente medies un guelpe maxistralmente executao por Trosky, el que se faría col poder y crearía’l gobiernu de los Soviets. Asina que cuidadín con facese demasiaes ilusiones, sobremanera si nun se sabe lo que puede venir más tarde.

Raúl Suevos

A 24 díes vencíos de xunu de 2023

Torna en castellán en repdiv.blogspot.com

Margarita ponse digna

 

Tamos en plena precampaña, basta con güeyar los telediarios, informativos radiofónicos y primeres páxines de los diarios escritos pa tomar concencia d’ello, quien nun lo ficiera. Vaya esta introducción como xustificación de la imparable y creciente presencia de los nuesos políticos nos medios de comunicación pública. Ye lo qu’hai.

L’asuntu, pa munchos, fáise más penosu, puestu que malapenes mos recuperamos de la galdidura provocada poles recientísimas eleiciones municipales y autonómiques, y yá tamos metíos nuna nueva engarradiella que, amás, píllamos ente tormentes primaverales tardiegues y calores estives sofocantes ; y lo que mos queda.

A dalgunos dáse-yos meyor qu’a otros eso del aprovechamientu mediáticu, especialmente si continúen nesa profesión honrosa, una de les menos apreciaes polos españoles acordies encuestes estremaes, como ye’l casu de la señora ministra del ramu xusticieru, missing in action, pero muy recordada por quien acude a los xulgaos y s’atopa cola fuelga de funcionarios. Pero pa compensar tenemos a la veraneante candasina y titular de Defensa.

Esta selmana cobró titulares col so plante al conseyu de ministros de la OTAN, según paez porque nel alcuentru subsiguiente cola industria de defensa europea nun s’invitó a dalu representante español. Faltaría más, qu’ella ye mui de so defendiendo los intereses patrios, como bona representante del gobiernu del doctor Sánchez. Y hasta’l Secretariu xeneral de la organización debió salir a dar esplicadures. Vaya con doña Margarita.

Son puntos positivos debió pensar la susodicha, que la cosa eleutoral va mui apretada, pero, la prensa, que ye mui llaina, siguió escargatando nel asuntu y poco dempués supimos que la reunión armamentística tenía como oxetivu la guerra d’Ucrania y el sofitu a esi país, centrándose nes municiones artilleres, obuses y misiles,  cañones de llargu algame y drones de combate; árees nes qu’España, que cuenta con una base industrial aceutable nel área de la defensa, nun tien presencia dalguna.

Nun taben presentes tampocu empreses perpotentes d’otres especialidaes y países, pa les que tan previstas reuniones futures, anque estos aspeutos paez ser que los escaeció doña Margarita cuando salió con ánimu combativo, por aquello de la see otaniana, a dar cuenta de la so espantayada de la reunión del día viniente.

Tien oficiu la señora, yá secretaria d’estáu, con rangu ministerial, nos tiempos azarientos del gobiernu caberu de Felipe González y el fuyíu director de la Guardia Civil, Roldán –hai que ver qué mal yos-salen los directores de la Benemérita- y qu’agora, otra vegada, va nes llistes socialistes. Y el sábadi manifestación salarial de soldaos énte’l Congresu. ¿Qué va dicir?

Raúl Suevos

A 19 díes vencíos de xunu de 2023

Torna en castellán en repdiv.blogspot.com

Ciao, Silvio

 

N’España siempres se lu vio cola deformación que da la distancia, especialmente tocantes los asuntos italianos, a los que, por dalguna razón incomprensible seguramente rellacionada cola nuesa historia común, vemos siempres con un ciertu desdeñu, inclusive superioridá moral. Y ye que la inorancia da pa creese les ficciones más increyíbles, si non que-y lo digan al entoncenes presidente Zapatero, cuando afirmaba que superaremos a Italia económicamente. Qué coses.

La realidá italiana llegóme demientres los tres años que viví en Florencia, del 96 al 99, con Silvio Berlusconi al frente del gobiernu. Yá yera abondo conocíu pa nós, gracies al Milán de Van Basten, Gullit y Rijkaard, y tamién pente medies les Mamma Ciccio de la 5. Pero n’Italia representaba la post revolución que supunxo’l movimientu Manes Llimpies, que valtó de sopito les estructures de la república xurdía de la Segunda Guerra Mundial sobro una fonderada de corrupción xeneralizada.

Con Manes llimpies cayeron tolos vieyos partíos, tamién el Partíu Socialista, al que l’empresariu Berlusconi s’arrimara p’algamar la necesaria cobertura política, imprescindible n’Italia. Un partíu lideráu por Bettino Craxi, yá entós fuyíu a Túnez, u diba morrer dalgunos años más tarde y que dexaría al encantador Silvio a los pies de los procuradores –xueces instructores- de Milán.

Il cavaliere yá tenía abiertos casi cien sumarios en llugares estremaos d’Italia, dalgunos rellacionaos cola mafia y qu’acabaríen condergando a dalgún de los sos lugartenientes, nunca a él. Y ye que la particularidá del sistema xudicial italianu consiste na inesorabilidá del tiempu, que nun para anque yá haya un sumariu abierti, y que lleva a que, si hai abogaos y cuartos pa pagalos, los procesos s’eternicen y faigan que “il fatto non sussiste piu”, esto ye, que prescriben.

Ensin Craxi, y pa cubrise con un bon aforamientu, que tamién los hai ellí, Silvio llanzóse a la política esperando sacar colos sus centros d’opinión Forza Italia, a proposito tresformaos en Partíu políticu nel 93, dellos escaños, pero, pa la so sorpresa, fo’l partíu más votáu al añu viniente, lo que lu llevaría a presidir el gobierno per primer vegada.

Dende aquel éxito aporteósicu asistimos los europeos, pero sobremanera los italianos, a un constante sainete cola vida política, económica, xudicial, matrimonial y sesual de Silvio Berlusconi, que dende aquella instrumental tendencia socialista de los primeros tiempos fo evolucionando haza’l centru drecha qu’anguaño representa nel gobiernu Meloni.

Quédamos agora’l drama de les herencies; la económica, descomanada pero quiciabes non abondo pa tantos fíos, y la política, menor, pero fundamental na Italia anguaño. Ye lo qu’hai.

Raúl Suevos

A 13 díes vencíos de xunu de 2023

Torna en castellán en repdiv.blogspot.com

La fuercia del mantra

 

Diz la RAE qu’un mantra, conceutu del hinduismu y del budismu, ye una pallabra o frase que se recita y repite demientres el cultu pa invocar a la divinidá, dalgo que yera abondo común nes casi de nueso nun va munchos años, gracies a los acólitos d’una secta qu’a toos sorprendía col so cánticu del Hare Krishna, y qu’anguaño, polo que creo, tien desapaecío. Nel nuesu catolicismu, heriedáu del xudaísmu, tenemos la lletanía, tamién pa invocar, a Xesús, la Virxen, o lo que correspuenda, y que tien al Kirie Eleyson como la más conocía, anque güei, témome, son pocos los que la usen.

En política, nun sé si de la mano del conceutu relixosu o de la inventiva de dalgún spin doctor norteamericanu –d’ellí vienen siempres les innovaciones en mercadotecnia política- suelse utilizar el lema, especialmente pa les campañes, anque tengo les mio duldes si eso funciona pos nun algamo a recordar dengún de los usaos a lo cabero, nin siquier los de les recientes municipales, enterraes de sopito pol doctor Sánchez.

Son más afortunaes les frases o pallabres con ánimu de felpa, como aquel “váyase señor González” que-y fizo la metá del trabayu al opositor Aznar y que l’autor-y solmenaba como pieslle d’intervención ca vegada que garraba’l micru nel Congresu. Otres, estudiaes o espontánees, tienen menos perecorríu, anque faen efeutu demientres dalgún tiempu, sobre manera si cuenten col favor de los medios de comunicación pa la so espansión.

Estos tiempos caberos podemos güeyar dos intentos por parte de los nuesos partíos principales. El gobiernu y el partíu que lu sofita anden desataos cola letanía de “la fola reaccionaria”, a la qu’añaden el mantra del fascismu, y agora tamién paez querer agregar lo de “drecha estrema y estrema drecha”, ideariu fonderu de quien lu preside. Un pocu dispersu me paez l’asuntu, pero ye lo qu’hai.

Nel llau opositor tengo pa min que tuvieron más finos, nun sé si ellos solinos o con ayuda de dalgún mentor. Too lo llenden o centren nel “sanchismu” como demonio a unviar a lo más fonderu del infiernu. Un mantra col que ciñen y personalicen al so alversariu, tresmitiendo al votante contrariu la necesidá de preservar al partíu a cuenta de deshacese de quien anguaño lu lidera, y que, según ellos, conduzlu, xunto col país, al desastre más absolutu.  

Ye un mantra, lletanía, o dardu verbal que me paez que pue da-yos munchos beneficios, pos amás de fidelizar a los propios, dalgo siempres fundamental, pue llevar la dulda a les papeletes de dellos votantes del centru esquierda, a los que, ensin dubia, va ayudar la fecha de la votación.

Raúl Suevos

A 5 díes vencíos de xunu de 2023

Torna en castellán en repdiv.blogspot.com

Arxentina, otra vegada nel diván

 

Ye’l diván, al que d’antiguo se conocía como chaise longue nes cases de postín, un mueble que se ve de cutiu nes comedies americanes, munches d’elles en plan psicodrama, nes que faen pasar pol sicólogu, o’l siquiatra, a dalgún de los protagonistes, según lo vaya esixendo’l guión.

El casu arxentín tien muncho de psicodrama colectivu, quiciabes poro, al nun algamar primaos mundiales más que nel futbol, y d’aquelles maneres, lleven años liderando les cifres de producción y esportación, non de vinos, que los faen escelentes na histórica Mendoza, base de partida de San Martín pa la so cabalgada andina, sinon de sicólogos. Ye’l país, con Buenos Aires a la morra, el mayor centru de producción de mecánicos de meninxes qu’esiste nel mundiu. Y nun ye pa menos.

Si pa la entruga de cuándo se xingó’l Perú la respuesta nun acaba de tar nidia, nel casu arxentín too paez apuntar a la presidencia d’Hipólito Irigoyen, particularmente a la segunda, entamada nel 1928, xusto enantes del crack del 29, qu’acabaría de sopitu con un guelpe militar, empencipiador d’una serie dramáticamente llarga.

Irigoyen inculcó nel país la doctrina nacionalista-populista, una receta conducente pa ganar eleiciones  a curtiu, y destruyir naciones a mediu plazu. Tres él, los gobiernos militares, de los que Perón, y el peronismu, ficieron base, foron la tónica continuista nel país que por un tiempu esllumó al mundiu. Los Kirchner foron, son, el retueyu caberu.

Anguaño torna a falase d’inflación desbocada nel país, con amenaces renovaes d’impagu de la delda. Está la cosa tan xingada que nengún de los dos presidentes caberos, Fernández, l’exerciente, y Macri, l’anterior, quieren presentase a la eleición que va tener llugar l’ochobre viniente. Agues ideales pa un pescador con bona caña.

Y equí ye cuando apaez Javier Milei, un economista, de mediocre trayectoria docente y nula nel ámbitu productivu, que dende les plataformes y foros televisivos –¿suénavos?­- algamó a dase a conocer con una propuesta económica llibertaria, que non lliberal, que lu llevó a ganar un curul de diputáu, y agora a pretender la presidencia.

Propón una lliberalización total de la economía, baxaes radicales d’impuestos, llibertá d’armes, eutanasia, matrimonios llibres de tou tipu, mercáu d’órganos, y dalgunes otres del mesmu calter que lu lleven a dominar les encuestes güei, lo que paez asegura-y el pase a la segunda ronda electoral.

Milei ye un indicador del estáu deplorable del alma arxentina, que namái paez reaccionar, quiciabes poro, énte los asuntos futbolísticos. Y muncho me temo que, visto como va’l restu d’Iberoamérica, va a haber visitas al diván tovía demientres dellos años. Ye lo qu’hai.

Raúl Suevos

A 3 díes vencíos de xunu de 2023

Traducción en castellán en repdiv.blogspot.com

Les municipales de 1931

 

Aínda nun se cumplió’l sieglu dend’aquella xornada pernomada, anque l’ambiente políticu taba abondo complicao, seguramente un pocoñín más qu’anguaño. El resultáu fue una gran victoria de les esquierdes nes grandes capitales, y, ensin esperar a los resultaos xenerales, y, anque aquellos güei son puestos en dulda por dalgunes investigaciones, el casu ye que se desendolcó un clamor xeneral, especialmente en Madrid, que dio como consecuencia l’abandonu del país por parte del rei Alfonsu XIII, y la proclamación de la república. Too un cambéu de dómina.

Lo d’ayeri nin de lloñe es comparable a lo del 31, pero, pa munchos, tamos tamién énte un cambéu descomanáu, fonderu, enorme, de significáu nacional. Y tamién tenemos una reacción inmediata de quien dirixe la nación, nesti casu’l doctor Sánchez, el nuesu presidente de gobiernu, conocíu como tahúr o killer, según a quien-y toque describir el so desenvolvimientu político, que nesta oportunidá otra vegada saca un as de la manga nel momento caberu y dexa descolocaos al restu de xugadores sentaos a la mesa.

L’as, nesta ocasión, fue la convocatoria d’eleiciones pal 23 de xunetu, evitando un esgaste más fonderu hasta la fin d’añu, según dalgunos; galvanizando l’apulmonamientu de la derrota anguaño pa motivar el votu de esquierdes, según otros; guetando la desmotivación de los veraneantes de dreches metanes les vacaciones, según los malpensaos; como seya, yá nun se fala de la derrota d’esti fin de selmana sinon de la precampaña na que de sópitu mos atopamos. Puntu pal doctor.

Magar l’allorie provocáu nun cabe dulda que dalguna conclusión pue y debe sacase; y a min llámame l’atención la victoria arolladora de Madrid, liderada por una Ayuso que basculó nidiamente a la drecha demientres la campaña, más aínda de lo habitual nella, confrontando directamente col presidente Sánchez, y qu’agora, como yá asocedió con Casado, pon un pocu a remolque al so presidente de partíu, el señor Feijoo, que va tener que decidir, y llueu, qu’actitú toma na “so” campaña.

Va ser el centrismu su referencia, una vegada desapaecíu Ciudadanos, que los sos votos paez habese yá cobrao, o va ser una derechización que, amás, y-devuelva parte de los sufraxos que se fueron a Vox, y qu’Ayuso, ensin dulda, recuperó en gran parte. Ésta, creo, Ye la primer incógnita a resolver na drecha española.

Na esquierda paez nidio que, visto la casi desapaición de Podemos, l’aspiración de Sánchez, más allá del rearme de los sos votantes, va tar na recuperación de los votos qu’Iglesias nel so día y-robó, y qu’agora, una escoloría Díaz, tamién va querer cobrase. Anque quiciabes seya’l sanchismu’l problema. Ye lo qu’hai.

Raúl Suevos

A 29 díes vencíos de mayu de 2023

Torna en castellán en repdiv.blogspot.com