¿los díes caberos de Maduro?

Allá pel llonxanu 1823 en Cuba, el Capitán Xeneral Vives esbarató lo que sedría’l primer intentu d’emancipación cubana; una combalechadura nacida a partir d’una loxa masónica secreta de nome “Los Soles y rayos de Bolívar” que, ye fácil deducir, inspirabase y recibía sofitu dende la Gran Colombia que dirixía Simón Bolívar.

Como munches sociedaes secretes d’oxetivos soversivos, les sos célules, independientes por seguridá, componíense d’un cabezaleru, el sol, que captaba seis siguidores, los rayos. Aportáu’l momentu, una vegada armaes y adiestraes debíen conformar una fuercia suficiente pa facer cayer el poder de l’autoridá del Capitán Xeneral que, pa la so desgracia, yera Francisco Dionisio Vives, ensin dulda un de los meyores de los que pasaron pela islla y escontra’l que s’estrellaron tolos intentos soversivos mientres el so llargu periodu de mandu.  https://www.academia.edu/36908470/CUBA_La_Guerra_de_todo_el_pueblo_de_Fidel_Castro_Un_dise%C3%B1o_espa%C3%B1ol

Tocantes Maduro debo confesar que plantego la entruga yá que nun m’atrevo a afirmalo, pues son yá munches les ocasiones en qu’analistes estremaos, yo ente ellos, dieron por fecha la so cayída. Quiero pensar que nesta oportunidá les coses son distintes y parte de la responsabilidá débese otra vegada a “Los Soles” anque la categoría moral de los actuales ta mui lloñe de la d’aquellos criollos de 1823, que amás d’hacienda arriesgaben la so vida.

Los actuales Soles, acordies cola DEA, l’axencia de llucha escontra la droga de los Estaos Xunios, formen una asociación de cabezaleros bolivarianos, política y militar, que los so miembros más destacaos sedríen Diosdado Cabello, el númberu 2 del réxime, Vladimir Padrino, el xefe de les Fuercies Armaes, y el propiu Maduro. Ellos sedríen los responsables de los tráficos de cocaína haza los EEXX d’estos caberos años.

Nestos últimos díes tamos asistiendo a una serie de noticies que paecen indicar que daqué importante se mueve na rebotica. En Colombia entregóse a la DEA’l xeneral Cliver Alcalá, quien yá taría “cantando” nos EEXX y tres que la so declaración s’atoparía’l requerimientu llanzáu escontra Maduro. Equí n’España saltó la noticia de que’l xeneral Hugo Carvajal, el “Pollo” Carvajal, mientres años capo del serviciu d’intellixencia venezolanu y sorpresivamente desapaecíu xusto cuando diba ser deteníu en Madrid pa la so entrega a la xusticia norteamericana, ta en tratos col CNI pa la so entrega inmediata a Washington. ¿Casualidá? Dúdolo.

Pero quiciabes la más importante de toles noticias vieno ayeri de la mano de les axencies. Rosneft, la macro compañía petrolífera rusa, aquella que Putin construyera depués d’encarcelar y espropiar a toos aquellos magnates de la dómina Yeltsin que nun s’alliniaron al so llau, abandona les sos operaciones en Venezuela y pon en venta los activos qu’entá-y quedaben ellí. Ye toa una declaración de que l’últimu apoyu de Maduro, el chinu va yá tiempu que se retiró, tá a punto d’abandonar el barcu.

¿Taremos énte los díes caberos de Nicolás Maduro? ¿Van acabase los viaxes de Zapatero? ¿Y qué tará pensando Raúl Castro de too esto? Tien pa tar preocupáu.

Raúl Suevos

A 29 díes vencíos de marzu de 2020

Torna en castellán en repdiv.blogspot.com

Pruebes de virus y bolines coloraes

Otra vegada’l nuesu presidente de gobiernu agasamónos güei con un homenax a la verbolicidá de Fidel Castro, o más bien, polo vacíu, d’Hugo Chávez. De nuevo un parllotéu aburrible pa dicinos que s’enterrien les midies de confinamientu, daqué que, visto les crecientes y aciagues cifres cabía esperar yá estos díes caberos. En fin, quiciabes espere dalgún efeutu psicodélicu de les sos pallabres anque a min paezme que, magar la importancia del momentu, el resultáu averase más a la narcolepsia. Ye lo que hai.

Les nueves midies busquen amenorgar entá más el movimientu ciudadanu, averalu a lo que se produz los fines de selmana y qu’a estes altures, quiero pensar, yá-yos tendrá dao datos abondos como pa deducir que mengua l’espardimientu del virus. Lo que visto asina, y pesie les induldables repercusiones económiques qu’estes midies van tener, nun ye susceptible de ser criticáu. Too seya pola llucha escontra’l coronavirus.

¿Y por qué agora y non enantes? ¿Quiciabes tien dalgo que ver la terrible chambonada de la compra de los kits rápidos d’estos díes caberos? Una compra, por cierto, llamativa si tenemos en cuenta que la española Genomica afirma tar en disposición de suministralos dende va yá díes https://www.elmundo.es/cronica/2020/03/15/5e6be55bfdddff84b08b4586.html . Quiciabes dalgún día daquien mos lo esplique. Pero tornemos a la rellación ente les midies nueves y los kits.

Dende va díes corre na red, a partir d’un artículu de Harry Stevens nel Washington Post, una esplicación de cómo s’arrobina’l virus en rellación colo qu’ellos nomen social distancing y que se sofita nuna animación dixital na que güeyamos unes bolines azules ente les que se cuela una bolina colorada que convierte en colorada a cada azul que toca. L’animación ufierta delles opciones nes que vemos un encierru d’una parte, un bloquéu de toles azules y, a lo cabero toes en movimientu. Nin que dicir tien que nesta última produzse la más rápida tresformación de les azules. https://www.washingtonpost.com/graphics/2020/world/corona-simulator/

Los países que paez que meyor controlaron l’espardimientu de la epidemia algamáronlo a partir de la realización de pruebes con calter masivu. Eso permite detectar elementos infectaos, anque lo seyan con calter benín, y aisllalos na so casa o en llugares al efeutu, tamién a los sos familiares y allegaos. Eso son bolines coloraes que se paren y que, poro, nun infeuten a les azules. Pero pa ello fai falta contar con kits de prueba en cantidaes suficientes como pa sofitar tala política.

Nel casu de nueso estes ulteriores midies de confinamientu dan muncho que pensar pues a naide se-y escapa que van suponer un coste económicu descomanáu, güei mesmo dicíase que la industria automovilística preparábase pa la vuelta al trabayu, van tener qu’esperar, y como elles otres munches. Y a min paezme que, magar la llarga matraca del doctor Sánchez, más d’ún va decatase de que’l coste de los kits sedría nidiamente menor a lo qu’esto va suponer.   

Raúl Suevos

A 28 díes vencíos de marzu de 2020

Torna en castellán en repdiv.blogspot.com

Tornen les xuntes n'España

El 2 de mayu de 1808 españa en Madrid la Guerra d’Independencia, pero’l país yá llevaba un tiempu ensin gobiernu; los borbones abdicaren en Bayona y José Bonaparte entá tardaría n’aportar. L’Alzamientu, de calter popular, tuvo un reflexu políticu na creación de les Xuntes locales de Defensa o Gobiernu que se apiguraríen nes correspondientes provinciales y éstes na Xunta Suprema Central de Floridablanca.

N’Asturies que contaba dende sieglos enantes con esa institución de gobiernu, la Xunta Xeneral del Principáu, que’l so nome herieda’l gobiernu anguaño, declaróse amás soberana, algamando a unviar embaxadores a Inglaterra y armando a la so costa varios reximientos. Ye posible que Belarmino Tomás s’inspirare nella cuando mientres la Guerra Incivil s¡independizó y montó lo qu’Azaña nomaba’l “gobernín”. Pero eso ye otra hestoria.

 Güei invádemos el coronavirus y como entós paex que nun hai gobiernu. Llega tarde y mal a cuasi toles decisiones y escomencipiamos a decatar cómo’l texíu social, individuos, empreses, asociaciones, etc. se movilicen para tapar los furacos que dexen la falta de capacidá de quien debiera dirixir la batalla, la defensa d’España.

Unos atropen perres, otros iguen bates mélicas con plásticos d’invernaderu, aquellos fabrican máscares coles sos impresoras, otros diseñen respiradores quirúrxicos, etc. Qué dicir de los oficios de la nuesa sociedá, aquellos de formación básica y paga escasa, toos tán ehí, al pie del cañón, sofitando a los sanitarios y faciendo que’l país nun dexe de furrular. Ye la España de siempres, aquella qu’aguanta l’asediu en Baler, o la que conquista un imperiu con 400 homes. Qué bon vasallu si oviere bon señor.

El sistema político de nueso descansa nos partíos políticos, asina lo consagra la Constitución, pero estos foron conformándose como agrupaciones d’interés de los sos miembros, una especie de fraternidaes nes que s’ingresa mui ceo –xuventues- y nes que prima precisamente eso, l’interés del grupu. Ellí nacen y se desendolquen los políticos nuevos, capaces de dirixir el país en tiempos de bayura pero perfeutamente desnortaos, por falta d’auténtica formación, cuando se producen les grandes crisis.

Tenemos una alministración apinada de cargos políticos y milenta asesores en desterciu de les escales d’altos funcionarios, aquellos qu’antaño sofitaben la continuidá de l’alministración del estáu, tamién en tiempos d’afliximientu. Esta esperiencia tendría de facenos reflexonar sobro la eficacia del nuesu sistema políticu, anque nun sé si cuando aporte la campaña de la postverdá aínda mos acordaremos d’ello.

Raúl Suevos

A 27 díes vencíos de marzu de 2020

Torna en castellán en repdiv.blogspot.com

El sindiós mexicanu

Dicía Porfirio Díaz, aquel presidente infinitu que dexara’l país llistu pal románticu y destructivu periodu revolucionariu de los Villa, Zapata, etc., que México taba mui lloñe de Dios y mui cerca de los Estaos Xuníos, y nestos díes d’esmolecimientu l’afirmación, teniendo en cuenta lo que diz y aconseya l’actual mandatariu del país, paez más cierta que nunca.

Nel norte siguen, como siempres, los EEXX, con un presidente, Donald Trump, que la so egolatría pue llevar a la gran nación a perder el so papel hexemónicu global pero que tien estingarrao les rellaciones colos sos vecinos xenerando más penuria nel casu mexicanu. Pero nun son los gringos norteños el mayor afliximientu de la gran nación que fundara Hernán Cortés; güei’l problema yelo’l propiu presidente mexicanu.

Va un par d’años, ente les eleiciones presidenciales y teniendo en cuenta los antecedentes de violencia feroz y corrupción creciente qu’afaren el país, paecíame que, dende la mio inxenuidá d’observador esternu, Andrés Manuel López Obrador, AMLO, suponía una esperanza pal país; a lo último dexara un gran recuerdu como alcalde de México capital y prometía poner fin a la violencia mortífera qu’afara’l país. http://abellugunelcamin.blogspot.com/2020/03/mexico.html Ye posible que, magar que’l mio recordáu amigu Xuanxu me lo alvirtió, pecara d’optimista.

Güei AMLO ta nes noticias de tol mundu polos sos continuaos despropósitos en rellación col coronavirus: salir como siempres, querese, abrazase, besase, y protexese con una estampita relixosa unos díes o un trébole de cuatro fueyes otros. Sólo’l sentíu común de los mexicanos paez velar pola so seguridá, lo que los emburre na so mayoría a adoptar medies individuales de proteición ensin tener en cuenta al so presidente.

AMLO tien tiempu, tres esta particular imaxe, p'aiciones más esmolecedores y de llargu algame. Calderón entamó la guerra escontra’l narcotráficu ya implicó al Exércitu, Peña Nieto acompangó y nun hebo avances, y AMLO, magar les sos promeses, contempla como les muertes amonten incesantes cada día, pero impulsa la intervención del Exércitu na economía del país nun mou que debiera preocupar.

Suspendió la construcción del aeropuertu nuevu de México por otru a construyir polos inxenieros militares, tamién un ferrocarril a les sableres del Yucatán de duldosa rentabilidá y ensin aprobamientu ciudadanu; da-yos la xestión del cambéu de moneda y el control comercial de dalgunes aduanes y aeropuertos –puerta del movimientu de la droga- tresporte de fondos, y otres que recuerden demasiao  les Fuercies Armaes de Venezuela y Cuba. Peligru d’un futuru escuro.

Nel Congresu de diputaos, MORENA, el conglomeráu de partíos que lu sofita, aprovecha’l Coranovirus  p’aprobar reformes polítiques duldosamente democrátiques que nun faen sinon amontar la congoxa sobro’l futuru del país, que caltuvo siempres un sistema políticu fundamentalmente democráticu. Agora México ye sobre too un sindiós, vecín de los EEXX y rexíu por un allumáu peligrosu. 

Raúl Suevos

A 24 díes vencíos de marzu de 2020 

México

La hestoria contemporánea de México vien marcada pola Revolución. Ésta empecipiara nos años primeros del sieglu XX coles guerres pa echar fora del poder a Porfirio Díaz, el más llistu de toos pos coló pa París de siguío au morrió seliquín na cama. Tres d'él aportaron toles figures de les películes que sobro esti asuntu tienen fechu los norteamericanos, Madero, Huerta -esti yera siempres el más malu-, Pancho Villa, Emiliano Zapata, Venustiano Carranza, Marcos García Obregón y dalgunos otros que, por menos importantes, nun m'alcuerdo agora. Toos ellos, menos Huerta que finó nuna cárcel yanqui, morrieron asesinaos, porque la revolución, amás de violenta, yera muy difícil d'iguar. Yera una revolución agraria pero con problemes y enfoques estremaos nel sur y nel norte, amás yera tamién la revolución de los trabayadores manuales de les ciudaes, que los había, de los pueblos indíxenas aínda güei esperando per ella, y tamién de la pequeña y mediana burguesía. Taben amás delles xeneraciones de políticos a los que la llarga xerontocracia de Díaz había-yos torgao la posibilidá de medría. Vamos, qu'aquello yera asuntu pa un milagru y, si l'hubiere, amás, tenía que torear cola ilesia d'un llau y colos Estaos Xuníos d'otru. México tan lloñe de Dios y tan cerca de los Estaos Xuníos que dixera Díaz cuando taba pa embarcar pal esiliu nel puertu de Veracruz.

Dempués d'unos años, unos cuantos presidentes y constituciones, aporten los políticos mexicanos al gran inventu, el PRI, Partíu Revolucionariu Institucional, qu'a min paezme una contradicción absoluta pos si ye revolucionariu ye imposible que seya institucional, esto ye un oxímoron en gramática. Pol camín dalguna gran figura como’l presidente Lázaro Cárdenas que tan bien acoyera los esiliaos españoles tres de la guerra incivil.

Pal 2000 aporta a la presidencia Vicente Fox que, per primera vegada, nun yera del PRI sinón del PAN, Partíu d’Aición nacional. El dominiu del PRI dende entós acabóse, y agora tien que guerriar tamién con el PRD, Partíu de la Revolución Democrática, y con AMLO.

Ésti caberu nun ye un partíu políticu, ye’l acrónimu d’Andrés Manuel López Obrador, que fora gobernador del Distritu Federal  y alcalde de la capital con mui bonos resultaos al paecer, y enantes presidente del PRD, que fundara él mesmu y Cuautémoc Cárdenas, el fiu de Lázaro Cárdenas al que fai poco vímoslu apadrinar la comedia de la desapaición d’eta –níegome a da-y mayúscules- nel sur de Francia. Nel 2006 presentóse a les eleiciones presidenciales y too apunta a que-y ficieron un pucherazu de los d’antoloxía. El sistema tenía-y mieu por, supuestamente, ser comunista –dalgunos mentaben a Fidel Castro p’acoyonar- y sacó p’alantre a Felipe Calderón, como Fox del PAN, que queda na hestoria como’l qu’anició la guerra escontra’l narcotráficu ensin que, pel momentu y dempués d’una pila muertos, paeza que la tea ganando’l gobiernu.  

Nel 2012 tornó AMLO a presentase y esta vegada ganóles el PRI con Peña Nieto y tamién con acusaciones de compra de votos y otres trampes. El casu ye que pal 2018, en xunetu, tenemoslu otra vegada na engarradiella eleitoral, en tiesta de MORENA, Movimientu pa la Reforma Nacional, y de nuevo López Obrador marcha en tiesta de toles encuestes con muncha diferencia sobro los otros. Con MORENA van tamién en coalición el PT, Partíu del trabayu, y el PES, un partíu evanxelista. Paez nidio abondo que México necesita un cambiu radical, l’estáu mexicanu vien amosando que tien una resistencia grande pero la guerra escontra los carteles de la droga y tamién escontra la corrupción tienenlu frayáu. México precisa d’otra revolución, esta vegada pacífica, que de la mano de la llei y de profundes reformes sociales tire p’alantre un país xigantescu, descomanáu, enllenu de contrastes y con una pergrande población de xóvenes que necesiten una esperanza pa un futuru meyor. Esta esperanza pue venir de la mano de AMLO, o non. Vamos ver que ye lo que pasa’l primeru de xunetu.  

Raúl Suevos

Xixón a 14 de mayu de 2018 

Torna en castellán en repdiv.blogspot.com