Mientres dellos años escuché la romandela de que los cubanos
son xente que ta siempres mui allegre y yo, confiésolo, llegué a creyelo puesto
que nada sabía per aquel entós d’esa islla maraviosa. Va un tiempu tocóme, por
razones llaborales, “esfrutar” del país durante un triéniu y tuve oportunidá de
decatame de cuála yera la realidá cubana.
Cuba sufre un réxime fraticráticu feroz –pallabru por min
inventáu y que’l correutor de word denunciame como incorreutu- que quier dicir
que los hermanos, dos nesti casu, exercen el poder políticu de mou omnímodu.
Los hermanos Castro, Fidel y Raúl, ún yá, deo gratias, enterráu, y l’otru
ladinamente escondíu como secretariu xeneral del Partíu comunista cubanu, pero
exerciendo’l poder na rebotica, nun contínuum de yá más de 60 años nos que
caltuvieron a los sos compatriotas sometios baxo un estalinismu caribeñu al que
los intelectuales d’esquierdes, n’occidente, apadrinaron y xustificaron ensin
tener pa nada en cuenta les persones que padecíen les consecuencies d’esi xugu
fraternal.
Los cubanos d’a pie, esos que nun pertenecen al Partíu nin
tienen rellación familiar cola nomenclatura, empleguen les hores del día en
sobrevivir, en “resolvel” el problema de llevase daqué a la boca cada día, como
ellos dicen con esa la so forma de suavizar les erres. Y si pa ello hai que
sonreír al turista, o lo que faiga falta…pues faise. Y si’l turista nun ye
abondo alvertíu…o fáiselo, pues ye’l so problema.
El númberu de muyeres y homes de cierta edá que viaxen solos
a la isla ye sospechosamente altu dende que Cuba se abrió al turismo tres la
cayida del Muru de Berlín, y la compañía qu’ellí merquen recíbelos con sonrises
y allegria aparente. Unos y otros saben el tipu de contraprestación qu’hai tres
esa allegría. La mesma del camareru qu’espera una bona propina o la del taxista
que te lleva a un pisu au mercar tabacu cubanu o carey a bon preciu. Too ye
necesidá.
Nel 2016, añu caberu de la presidencia Obama, lo que paecía una
primavera política cubana y una esperanza de llibertá cortóse asprosamente y
dende entós, política y económicamente, les coses nun ficieron sinon empiorar.
Anguaño los cubanos pasen per un pequeñu periodu especial, como aquel que tres
la marcha de los rusos traxo la fame a la isla, anque daqué menos duru gracies
a les remeses de los expatriaos. Y los disidentes pasen una nueva primavera
negra d’acosu y encarcelamientos, cola mesma impunidá de los tiempos de Fidel
pero con menos repercusión n’occidente tres el cambéu de política na UE.
El coronavirus ta poniendo de rodilles a tol mundu. En toes
partes hai afogón y medrana; y tómense midies pa evitar lo peor. Non en Cuba,
ellí la direutora de mercadotecnia del Ministeriu de turismu invitaba ayeri a
siguir visitando la islla, u yá tienen varios positivos procedentes d’Italia, d’onde
siguen aportando turistes fuxendo de la cuarentena nacional. Too seya pola
divisa, anque seya a costa de la salú de la xente que nun cuenta nin coles
melicines nin coles infraestructures pa facer frente al virus, y constame que
la mayoría contempla la posibilidá de la epidemia con más medrana que si
tuvieren un gobiernu de coalición.
Y dicen que los cubanos son mui allegres.
Raúl Suevos
A 15 díes vencíos de marzu de 2020
Torna en
castellán en repdiv.blogspot.com
No comments:
Post a Comment