“Los españoles merecen un gobiernu que nun-yos mienta” ye una
frase cortante y con una carga política descomanada que, pronunciada por
Rubalcaba na víspora de les eleiciones tres los atentaos del 11M, consiguió dar
la vuelta a les encuestes previes, retrasando la llegada de Rajoy per ocho
años, y llevando al poder a Zapatero pa que rompiere los alcuerdos implícitos
de la nomada Transición y de nuevo España se dividiere en dos mitaes machadianes.
Zapatero xeneró cambeos nel so primer gobiernu, especialmente
no social. Sofitóse na boyante economía que heriedara pero, cuala chicharra
lleonesa, dedicóse a esfrutar de la so aparente popularidá y desdexó les
alertes económiques. Nel so segundu mandatu la crisis amenaciaba de manera
nidia pero prefirió facese’l sordu y caltuvo al país, xunto col so ministru
Solbes, na creyencia de que nós tábemos meyor preparaos que toos.
La crisis, una crisis global, aportó tamién equí, como agora
un pocu tiempu más tarde, pero ainda asina nun mos prepararemos. El resultáu
foi una convocatoria d’eleiciones antemanada y una derrota gravísima pal partíu
socialista, y un partíu popular con una mayoría absoluta que nun supo xestionar,
y que namái sirvió pa sacanos de la crisis de una forma llarga y penosa que dalgunos
entá esperecen.
Agora atopamonos con un casu abondo semeyante. La crisis nun yera
económica, yera sanitaria y tamién avisaba con tiempu. Y tampoco nesta
oportunidá s’aprovecharon los plazos, tampoco nesta ocasión el gobiernu
socialista supo sacar partíu de lo qu’otros facíen, China, Singapur, Hong Kong,
etc. Otra vegada se preferió xugar la carta de la tranquilidá y el sosiegu
“Tenemos un de los meyores sistemes sanitarios del mundu”, “Nun ye necesario
alarmase” mos dicíen. Agora yá nun hai tiempu pa la “contención”
Güei’l señor presidente salió a dar la cara, ensin
periodistes que pregunten, pa treslladanos un rosariu de midides económiques
que puen dar alliviu a dalgunos pero que nun paez que sirvan como
tranquilizante pa la población qu’entama a angustiase al ver que vecinos como
Italia, a la que va poco tachabase d’alarmista, apliquen midides drástiques en
tol territoriu mientes equí descargamos responsabilidaes en téunicos y
gobiernos autonómicos. Échase en falta daquien que mande.
El dineru, que ye mui cobarde, tanos diciendo nes Bolses qu’esta
crisis ye muncho mayor que la del 2008. Esta crisis mata a les persones y a la
economía.
Los españoles nun merecen un gobiernu que-yos mienta.
Raúl Suevos
En Xixón a 12 díes vencíos de marzu
de 2020
Torna en castellán en repdiv.blogspot.com
No comments:
Post a Comment