La batalla d’Otumba desendolcóse nesi llugar mexicanu poco depués
de la penosa retirada de Cortés y la so
xente de la capital mexica, Tenochtitlán. Pocos, mal armaos y con munchos
ferios, ent’ellos el propiu Cortés, viéronse na so fuyida arrodiados pol
exércitu azteca que, con independencia de les estremaes y esaxeraes cifres que
se dieron, superábalos de ún a diez. Yera una crisis total y la muerte paecía
segura.
La sociedá azteca yera rica y arguyosa pa los cánones de la
dómina, y sentíase segura y ensin enemigos que pudieren dañalaba , tanto ye que les guerres que periódicamente llevaben a
cabu, llamaes “florales”, teníen como oxetivu la captura de cautivos pa los
sacrificios humanos a los sos simpáticos dioses. El so aisllamientu y suañu
nun-yos preparara pa la llegada d’una menacia desconocida a la que nun sabíen
tratar.
Moctezuma buscó conxurar el peligru con midides de contención
que nun dieron resultáu y la espulsión española de Tenochtitlan foi namái un
espeyismu. N’Otumba, Cortés, que paecía derrotáu, atacó direuta y personalmente
la morra del exércitu azteca, mató al xefe y apoderóse de les sos enseñes. L’exércitu
enemigu, ensin ordenes, fuxó espavoríu y los españoles foron a retirase a llugar
seguru pa un añu más tarde conquistar la capital y fundar la que güei ye la
nación mexicana.
La sociedá española anguaño recuerdame a la mexica; creyemos
que tamos seguros, que somos capaces, que poco o nada mos pue sacar del nuesu
embobamientu, de la viniente botella sidra y docena d’oricios, pero la realidá ye
que somos igual de fráxiles cuando escarecemos d’un guía, cuando mos falten delles
instrucciones. Y támoslo viendo nestos díes caberos.
Tuvieron vendiéndomos un prozac nomáu midides de contención.
Dicíenmos que l’enemigu nun yera tan belicosu y que nel so casu teníemos
recursos pa derrotalu ensin demasiaos problemes pero, como Cortés tres la Nueche
triste, los positivos del coronavirus golpiáromos na cara, especialmente en Madrid,
na capital. Pero aínda col crecimientu de les males noticies siguíemos
tranquilos y felices, entá queden oricios, hasta que la evidencia mos abrió los
güeyos. Ministros positivos, l’especialista en epidemies yá nun sal na tele, les
distintes alministraciones decretando al so aire, en dellos casos ensin tener
competencies pa ello ¿Sálvese quien pueda?
¿Y el Xeneral en xefe? El líder a la fin apaeció para tranquilizar
les tropes, y nes dos ocasiones en que lo fizo pudimos apreciar cómo nos supermercaos
producíense escenes d’acaparamientu histéricu, vamos tener memes de papel
hixiénicu p’años, y los madrilanos fuxíen haza la España vaciada. Ye la
constatación de que’l exercitú de nueso, como’l azteca, quedóse ensin direición
y que vamos ser derrotaos por Cortés, pol virus.
La epidemia va pasar, con mayor o menor coste, pero van venir
otres y la respuesta va ser semeyante porque’l nuesu problema ye sistémicu; el
nuesu sistema políticu ye deficiente y dexa tol poder en manes d’unos líderes d’unos
partidos qu’una y otra vegada mos amuesen que nun tán a l’altor de les circunstancies
pero que nun tán dispuestos a danos una autentica representación a los
ciudadanos. Güei somos más súbditos que nunca, tamién el Rey. Ye lo que hai.
Raúl Suevos
A 14 díes vencíos de marzu de 2020
Torna en
castellán en repdiv.blogspot.com
No comments:
Post a Comment