Beatrice Borromeo ye una moza italiana que lo tien too; guapa
enforma, pertenez a una de les families más antigues y adineraes de l’aristocracia
del país, el so pá ye’l titular del Palazzo Borromeo nuna de les islles del
mesmu nome que s’atopen metanes el Llagu Mayor y que son una de les grandes
atraiciones turístiques de la zona. La neña, amás, casóse con un de los
Grimaldi y allugóse en Montecarlo u tien creao una familia que da muncho
trabayu al papel couché. Too esto complétalo con una vultable y aplaudida
carrera periodística n’Italia.
Va un par de díes asoleyó una tribuna na que s’amuesa
espantada pol fechu de que nun hospital milanés llantaron un puntu de
clasificación d’ingresos al mou de la sanidá militar; esto ye, ordenense en función
de les posibilidaes de superar la ferida, nesti casu neumonía vírica, y
refuguense pa tratamientu aquellos ensin posibilidaes. Nel casu milanés son los
mayores de 60 años; les UCI,s tán saturaes y hai que dar prioridaes y los
mayores, al paecer, nun lo son ¿Espantoso? Nun lo sé.
En China, polo visto nes telenoticies, nun distinguíen; ellí
los mayores son la clave de la familia y de la sociedá, sedría impensable esa
clase de discriminación; ellí’l réxime totalitariu, mui conducente nestes
situaciones, aplicó una cuarentena drastica que yá entama a dar los sos frutos
cola cayída de contaxos; ellí, amás, l’individualismu occidental nun esiste y
la población sigue, con fe confuciana, les consignes del gobiernu. Ellí la llibertá
ye otra cosa.
Refugar a los mayores, realzando asina los efeutos mortales
de la epidemia, tien los sos aspeutos positivos pa la economía. Por cada mayor
que desapaez tamién lo fai con él una
pensión y un gastu importante na sanidá estatal, amás, en dellos casos, produzse
un ciertu remocicamientu de les estructures llaborales. La midida recien de
piesllar escueles va dar un emburrión a la situación yá que munchos neños,
portadores potenciales del virus, van convivir munches más hores colos sos güelos
arremangosos, potenciando asina l’efeutu multiplicador ¡Qué coses¡
Tuvimos, y perdimos, munchos díes güeyando los toros chinos,
y depués los italianos, dende la barrera, agora tócamos a nós y paez que
ciudadanía y autoridaes reaccionamos como’l restu’l mundu, con medrana, y témome
que, demientres s’alcuentren remedios farmacolóxicos que faigan frente al
virus, solo queda actuar a lo chino. Ye lo que hai.
Raúl Suevos
A 10 díes vencíos de marzu de 2020
Torna en castellán en repdiv.blogspot.com
No comments:
Post a Comment