Na mio xeneración la fábula del billoriu y la formiga yera
una de les que más s’esplicaba na escuela. Tratábase de tresmitir el sentíu
d’aforru y, sobre too, de previsión. El billoriu cantaba y esfrutaba del branu
mientes l’aballadora formiga sudaba apurriendo provisiones pal hibiernu al so
abellugu. Nestos díes d’esmolecimientu a min vienme costantemente a la memoria
aquella vieya fábula de parvulariu.
N’España, mientres dellos años, xeneraciones yá, dediquemonos
a xugar al billoriu, autoconvenciéndomos de que somos el meyor país del mundu
pa vivir –los milenta xubilaos de toa Europa que, ente otros casos, vienen a
vivir equí son una amuesa- y que’l futuru namái pue facer la nuesa vida aínda
más maraviosa. La crisis del 2008, que la so superación déxamos nos llugares
caberos ente los vecinos de nueso, ye sólo un mal recuerdu pa la mayoría y los
qu’entá la sufren nun cuenten más que nes estadístiques.
Teníemos una sanidá de nivel peraltu qu’algamaba a tola
ciudadanía pero, el réxime autonómicu y les sos competencies mediante, anguaño
y tres años de recortes en cuasi toles rexones, recortes en plantilles, n’inversión
en medios ya infraestructures, en salarios de los profesionales, en proteición
llegal de los mesmos, llevaron a una perda nídia de capacidá de tol sistema;
nunes rexones más que notres.
Los tiempos perllargos d’espera p’atención de los
especialistes, o, aínda más, pa intervenciones quirúrxiques, daqué impensable
va dellos años, yeren y son una señal de que la nuesa sanidá yá nun respondía a
la imaxe que los políticos de nueso, unos y otros, se esforciaron en treslladanos
con una aventadura que llindaba no delictivu. Pero nós, ensin remuñar, ehí
siguimos mientres dellos años, faciendo como que nada pasaba.
En tiempos rellativamente recientes la gripe A y el SARS avisaronmos
de que cualquier día una epidemia nueva podía trespasar les nueses fronteres
pero, otra vegada, el mensax subliminal que venía d’arriba yera qu’eso nun podía
aportar nunca al nuesu país maraviosu; eses coses quédense nel tercer mundu,
como l’Ébola; pero non, esta vegada non. Y mientes nós siguíemos de sidra y
oricios.
Los tiempos d’afliximientu requieren de persones de calter,
especialmente nos dirixentes, y cuando nel puente de mandu nun tán les persones
fayaizes el riesgu de choque, cola posibilidá agrega d’afondamientu, amontase
descomanadamente. El nuesu ye un barcu, con más víes d’augua de lo que creíemos,
nel que nestos díes caberos paez que, amás, la brúxula nun furrule o, aínda
peor, que’l capitán nun sabe dirixir el barcu, y claro, yo entrúgome si’l nuesu
sistema de seleición de capitanes ye l’ afayadizu ¿El nuesu sistema permite
elexir a les persones aparentes o simplemente ye una forma de llegalizar
l’accesu al poder de determinaos personaxes o grupos? ¿Tendríemos de camudar les
riegles de eleición?
Raúl Suevos
A 21 díes vencíos de marzu de 2020
Torna en castellán en repdiv.blogspot.com
No comments:
Post a Comment