En 1999, recién aportáu a la presidencia de Venezuela, Hugo
Chávez entama un programa radiofónicu y televisivu semanal, en direuto, que se
tresmitía poles cadenes de titularidá estatal. Col pasu’l tiempu estes cadenes,
y pente medies la compra nunos casos y la prohibición notros, algamaríen tol
espectru comunicativu del país.
Al aniciu tratábase d’averar l’alministración a la ciudadanía
y, pa ello, el comandante Chávez abríase a les entrugues que retolicaba él
mesmu o los ministros que lu acompañaben. Col pasu’l tiempu, pocu, el programa allargóse
hasta les seis o más hores, como si quisiera emular los discursos del so ídolu,
Fidel Castro, y yá nun s’almitíen entrugues; amás, podía emitise cualquier día;
yera pura propaganda y verborrea
desatada cola que s’adormecía a los fieles y s’acoradaba a los non comprometios.
Dalgún tiempu depués llegó Rafael Correa al poder n’Ecuador y
adoptó tamién el sistema chavista con calter semanal. Dambos, l’ecuatorianu y
el venezolanu, intentaben paecese al modelu, Fidel, pero nun algamaben el so
nivel; per otra parte, en L’Habana, va años qu’usen un sistema d’adoctrinamientu
televisivu menos evidente, anque con igual oxetivu, la Mesa redonda. Un
programa nel que se presenten, analicen y discuten temes d’actualidá cubana o
internacional con una nidia vocación y sesgu gubernamental. Esta selmana mesma púdose
ver atatexar, ente la vultable inaición gubernamental, al presidente Díaz Canel
y dalgún de los sos ministros a cuenta el coranovirus. Raúl nun debió quedar
contentu de l’actuación del so pupilu, pero eso ye otra hestoria.
Nestos díes d’esmolecimientu dame la impresión de qu’el nuesu
presidente, quiciabes alleicionáu pol señor vicepresidente, tomó nota del
estilu d’Hugo Chávez, esto ye, prediques ensin munchu conteniu, o simplemente
xustificativu de les sos aiciones, con munchu de plática ideolóxica que al cabu
d’unos minutos invita a guetar rápidamente otru canal, puesto qu’equí aínda
esisten delles plataformes supuestamente non controlaes pola aición
gubernamental. O eso dicen.
Otru de los aspeutos llamativos que mos traxo’l virus, nel
país de nueso, ye la falta de contraste, a nivel de comunicación pública y, lo
que ye entá más importante, no rellativu al control del gobiernu per parte de los
nuesos representantes nes Cortes. Esto cabero xustificao nel caltenimientu la
salú de los representantes de la soberanía nacional ¿Nun hai denguna solución
telemática na dómina les tecnoloxíes de la información?
¿Y qué pensar de les entrugues periodístiques neses intervenciones
presidenciales? Espayaes convenientemente pol direutor xeneral de comunicación
ente ¿Cuántes? ¿Docenes? ¿Cientos? Poco importa, son mui poques y, amás, si la
respuesta vase pelos clásicos cerros d’Úbeda nun hai posibilidá de reiterala.
Supongo que sedrá daqué temporal puesto que’l doctor Sánchez siempres se tien
distinguío, dende qu’aportó al poder, pola so franqueza y accesibilidá a los medios
de comunicación social. Nun creo que quiera paecese a Chávez.
Raúl Suevos
A 23 díes vencíos de marzu de 2020
Torna en
castellán en repdiv.blogspot.com
No comments:
Post a Comment