Pelayu, el cántabru

 

Ye’l señor Revilla, el presidente cántabru, non el de los chorizos, un personax de llendes casi inabarcables, tantu que, per un momentu, pensé en titular esta tribuna como “les coses de Revilla” pero, como a lo último, sacantes los héroes, somos finitos, creyí más afayadizu encabezala col nombe de quien, perteneciendo a esa categoría, foi suxetu y oxetu d’una trapacería nueva del colega de Barbón y de Feijoo.

Aconceyaron los tres presidentes na vecina Liébana pa resaltar conxuntamente’l camín de Santiago norte que, convien nun esquecer, tien connotaciones grandes coles predicaciones del Beatu al rodiu la llegada del apóstol Santiago a Hispania, poco enantes de la “milagrosa” apaición de la tumba del mesmu nel Campus Stellae. Depués vendría la primera peregrinación, dende Uviéu, del monarca qu’entós gobernaba toos estos territorios como reinu d’Asturies, Alfonso II, polo que anguaño conocemos como Camín Primitivu. En fin, pura historia d’España y d’Europa.

El señor Revilla, de larguísima trayectoria política, pues entamóla nel Movimientu, aquel arbíu políticu nel que’l xeneral Franco metió a toles fuercies vixentes naquel entoncenes, dende Falanxe a los Monárquicos, carauterízase pol usu de una chistera fondera de la que suel sacar tou tipu de coneyos, o esconder cigarros puros, de mou y manera que, a lo llargo de los años, caltien a la so audiencia y posibles votantes alloriaos, esperando a ver qué sorpresa nueva-yos va ufiertar.

Nesta oportunidá descolgóse col orixe cántabru de don Pelayo, al qu’él, superando les investigaciones infructuoses de xeneraciones d’historiadores, alluga en Cosgaya; valle de la Liébana, ellí au la lleenda diz qu’un argayu acabó colos caberos sarracenos escapaos de la encerrona de Cuadonga, y otros yanten a Gaudosia, la so muyer puesta ellí a salvu xunto con otres mueyeres y dalguna tropa. Too ye posible nel borrín de los tiempos prehistóricos.

Dicen que Barbón punxo cara d’exipciu, esto ye, de perfil. Ye de suponer que nun ta’l tiempu pa más enguedeyos de los que yá tenemos, pero si Revilla tá pensando en xenerar dalgún tipu de nacionalismu con nós que nun cuente, que yá tenemos abondo colo de nueso; equí con aldericar sobro la cooficialidá yá tamos completos pa lo que queda de llexislatura; namái mos faltaba entrar tamién nel asuntu del cuadonguismu, más ranciu y típicu del izquierdismu de enantes; agora, col progresismu modernu, l’asuntu llingüísticu adaptase muncho más a les necesidaes polítiques. Si-y pusiera pluma a Pelayu yá sedría otra cosa.

Revilla bien faría en preocupase del so vecín oriental, ausente en Cosgaya aunque también tien Camín, que yá pide la declaración de nación pa ellos y Cataluña, y d’ehí a la autodeterminación de Castro Urdiales, atarraquitao de residentes vascos, hai un suspiru.

Raúl Suevos

más sobro l'asuntu en 

 https://www.academia.edu/37863760/A%C3%B1o_718_nacimiento_del_reino_de_Asturias_y_de_la_epopeya_de_Espa%C3%B1a

 A 26 díes vencíos de xunu de 2021

Empoderamientu maternu nel Muru

 

Mañana dominical rescamplante nel Muru tres díes de llovíu y tambascaes. Un sollutu, transitoriu quiciabes, nun final de primavera qu’anuncia calor braniegu nel noroeste y seca estrema en delles partes del país. Xentíu pa festexalo y, llegando a la fin, casi nel Campu Valdés, nun puedo dexar d’oyer como una madre enérxica: “Vós ya lo probaste pero sólo t’acordás de lo que querés”, con un acentu porteñu nidiu –anque verdaderamente nun distingo ente’l porteñu o l’uruguayu- sermonea a un cabezón de malpenes 80 cm, armáu de cascu y patinete, que güeya pal suelu sabiendo que lu tienen acorraláu. El pá, al llau, acierta a mediar con un “probastelo ayer pero yá no t’acuerdes”; nun asturianu amestao –l’amiestu d’asturianu y castellán que falamos la mayoría del personal n’Asturies- que recuerda un poco al lavatoriu de manes de Pilatos. Mientes los supero en direición al muelle pienso que’l culpable del llance debe ser un puestu de xelaos que la familia acababa de dexar atrás.

Esti infante pequeñín ye un ser afortunáu, anqu’él nun lo sabe entá. Tien en casa les bases pa ser políglota; y si naide lo remedia, en cuantu qu’aprobemos la cooficialidá del asturianu, va vese sometíu a una parte del currículu nesa llingua meraviosa, antigua y despreciada por dalgunos ensin conocela; anque tamién de duldosa utilidá pa la rexón nestos momentos. Esi neñu va poder presumir de plurillingüismu partiendo d’una única llingua romance, y too ello ensin controlar medianamente’l castellán. Qué futuru, Señor.

Amás, esti neñu de madre con sentíu del mandu, va poder siguir afondiando feliz nel remanamientu del patinete, puestu que, pa evita-y les presiones que supón l’esfuerciu d’aprobar asignatures, la versión cabera de la llei d’educación promovida por esa figura de dicción esmolecedora a la que tanto-y debe’l bienestar moral y mental de la mocedá de nueso, la señora Celaá, va permiti-y non sólo pasar de cursu con delles asignatures pendientes, tamién va poder presentase a la EBAU, la selectividá. Too ello, ye de suponer, pa’algamar que a la universidá aporten estudiantes d’ánimu positivu, ensin reconcomios por suspender, o con cuentes pendientes pel camín.

Que la idea ye bona amuesalo’l fechu de que, namái col so conxuru, esti añu tienense llograo records nel númberu d’aprobaos y notes algamaes nesa prueba que, en tiempos yá llonxanos, suponía l’abandonu de los estudios pa munchos estudiantes incapaces de superar esa barrera.

Quién sabe, quiciabes el nuesu infante acabe de camareru nun pub de Londres, como tantos otros antes qu’él. Ehí tamién vamos de record.

Raúl Suevos

A 20 díes vencíos de xunu de 2021

Torna en castellán en repdiv.blogspot.com

La foto del G7

 

El G7 ye l’aconceyamientu informal, de calter más o menos añal, de los 7 líderes mundiales principales. Por riegla xeneral, cuando s’axunten sube’l pan, y si nun lo facen tamién. Sicasí puese afirmar, ensin temor a enquivocase, que se trata del aconceyamientu más importante de los países occidentales, daqué que la espulsión de Rusia tres la ocupación de Crimea, en 2014, tien reafitao.

Esti añu l’eventu tevo llugar en Cornualles, Reinu Xuníu, ducáu del que’l príncipe Carlos d’Inglaterra saca los sos bayurosos ingresos –esa corona nun ye indixente- y zona turística na que Boris Johnson espera qu’esti branu se queden los sos connacionales en llugar de viaxar a les islles españoles. La ocasión bien merecía una foto, como siempres, pero amás porque la reina Isabel apaecía por primera vegada a nivel internacional tres la so recien viudez, y tamién porque Joe Biden estrenábase como presidente USA n’Europa.

Les fotos de los eventos, memoria gráfica de los mesmos, suelen tener múltiples lectures dende’l momentu mesmu de la so conceición. A mí tocóme lidiar demientres una temporada con esa responsabilidá nel Eurocuerpu, n’Estrasburgo y ello suponíame tiempu y dolores de tiesta enantes, mientes y depués. Na de Cornualles tuvimos dos a falta d’una; con y ensin reina d’Inglaterra. Y con una disposición chocante anque supongo que dalguna esplicación tendrá.

Na primer ringlera ¿Los más importantes? L’albergueru, Alemaña, Francia, Canadá y, de xacíu, los EEXX. Cola reina presente, y sentada, Trudeau tevo que dise p’atrás, au siempres atopamos a los representantes d’Europa, Comisión y Conseyu, ¿Pola so irrelevancia? Xunto con Xapón y un Draghi d’una Italia que so la so batuta suena a eficiencia y apunta a una recuperación del puestu internacional que-y correspuende.

Un puestu’l d’esta Italia, a la que según Zapatero superamos va yá años, inclusive superaríamos a Francia d’acuerdu coles pallabres d’esti gurú de les rellaciones internacionales; una puestu que debe danos esperances pal futuru, anque nin siquier formamos parte del G20, nel que participamos en calidá de simples invitaos. Tou un bañu de realidá pal que nin siquier se marca solución nel optimista Panorama 2050 que’l doctor Sánchez recién presentó al país ente trompetes y canticos de los sos corifeos.

D’esta foto de Cornualles queda’l mensax d’esperanza que dan los líderes ensin mázcara de proteición escontra’l covid; tamién la reina, cola so presencia, recuerda a toos el sentíu de serviciu que debe prevalecer neses altes funciones. Nel brexit nun paez que’l populista Johnson vaya a facilita-y les coses a Europa y bien faríen esos dos líderes ensin siella en preparar la casi segura rotura pa evitar sorpresas ulteriores.

Fotografíes, cuantu cuenten.

Raúl Suevos

A 13 de junio de 2021

Torna en castellán en repdiv.blogspot.com

Ortega, el destín d'un tiranu

 

Nicaragua ye un país del que nun se suel falar equí. Ye pequeñu, casi insignificante, y nun aguanta la comparanza colos clásicos hispanoamericanos como Méxicu, Venezuela o la Arxentina; pero Nicaragua tien una historia riquísima y la so vivencia anguaño, direuta herieda del sieglu caberu, da pa llenar munches cróniques.

Dirixe’l país un sátrapa tiránicu, asonsañu perfeutu de los que Joseph Conrad retratara en Nostromo. Daniel Ortega algamó’l poder cola Revolución sandinista, un movimientu que garraba’l nome de un auténticu héroe novelescu, Cesar Augusto Sandino, asesináu arteramente por orde d’Anastasio “Tacho” Somoza, l’home fuerte de la dómina, en 1934, el cual entamaría un llargu periodu de dictadura y llatrociniu familiar qu’acabaría abruptamente pente medies cuatro impautos de bala en 1956. 

Sedría sucedíu pol so fiu Luis demientres unos años, pa, tres la so desapaición en 1967, dar pasu al so hermanu “Tachito” Somoza, non menos lladrón y déspota que’l padre; notoriu na primer faceta por apoderase de l’ayuda internacional pa la reconstrucción de Managua tres el terremotu de 1972. Yá entoncenes el Frente Sandinista, autoproclamáu como heriede del gran Sandino, combatía’l réxime somocista al que llograría espulsar en 1979 y un año más tarde asesinar nun atentáu n’Asunción, Paraguay.

Los sandinistes entraron cargaos de promeses, anque’l repartu de finques y cases de los antiguos dirixentes ente los sos cuadros de mandu, conocíu como la piñata, dio motivos tempranos de preocupación. Tres unos años difíciles marcaos pola aición de la Contra, creada y financiada polos EEXX, y la presión internacional, el dirixente del país y del movimientu, Daniel Ortega, convocó eleiciones en 1990, siendo perdíes, pa la so sorpresa, ente Violeta Chamorro, viuda del periodista y opositor Pedro Joaquín Chamorro, asesináu polos somocistes nel 78, lo que provocó l’aceleración de la victoria sandinista un añu depués.

Esta salida del poder pente medies el votu foi un gran descubrimientu pa Daniel Ortega. Nunca más tornaría a sucede-y, prometióse, y pa cuando recuperó’l poder por aciu d’eleiciones, en 2007, instauró un sistema de cesarismu democráticu, al estilu chavista, nel que controla direutamente la xudicatura, la prensa, les fuercies armaes, y, de xacíu, el llexislativu; un sistema nel que la oposición, del tipu que seya, ye eliminada o amedranada dende’l raigañu.

Nestos años los nicaragüenses tiene asistío al lladroniciu de l’ayuda llegada de Venezuela nos años de bonanza petrolífera, a la denuncia d’abusos sexuales per parte d’una fía política d’Ortega, al anunciu, y consiguiente espropiación de tierres, d’un gran canal nicaragüense del que nunca más se supo, y lo que ye peor, a la masacre de más de 300 mozos opositores nes manifestaciones que siguieron en 2018 tres la reforma del seguru social.

Nestos díes caberos tiénse completao’l ciclu cola detención de los opositores y líderes de los estremaos partíos que pretendíen presentase nes eleiciones vinientes, ente ellos a Cristiana, la fía de Violeta Chamorro, y que, dao’l clima imperante nel país, teníen grandes posibilidaes d’acabar col so imperiu. Yá non.

Per esti camín a la tiranía Ortega foi quedándose namái cola compañía de la so muyer y cómplice Rosario Murillo, yá que los vieyos comandantes sandinistes, como’l sacerdote y poeta Ernesto Cardenal, el premiu Cervantes Sergio Ramírez o’´l so propiu hermanu, el constructor de les FAS nicaragüenses Humberto Ortega, va tiempu que renegaron d’él y el so estilu de gobiernu. Güei a Ortega sólo-y queda pensar si merez la pena acabar como los dictadores que lu precedieron.

Raúl Suevos

A 10 díes vencíos de xunu de 2021

Torna en castellán en repdiv.blogspot.com

Una raya de coca peruana

 

Ye difícil sobremanera saber l’orixe de la coca que se consume anguaño n’Asturies, los analís xenéticos entá nun aportaron a esi nivel d’eficacia, pero puense facer conxetures. Les posibilidaes nun son tantes y estos díes vase resolver si un de los mayores provisores mundiales va amontar la so producción o, pol contrario, va reducila; acabar con ella o’l so consumu ye una ilusión.

Perú tevo demientres el sieglu XX a una de les figures polítiques más importantes d’Hispanoamérica, Víctor Raúl Haya de la Torre, fundador del APRA, al que les arregladures polítiques, o cenciellamente los guelpes d’estáu, enzancaron en delles ocasiones desarrollar el so ideariu como mandatariu y con ello meyorar el país, que per munches décades tien vivío na mormeyera política.

Nos años caberos asistimos a un sainete de destituciones presidenciales por asuntos de corrupción, a manes d’un parllamentu con altísimos niveles de la mesma plaga, que llevaron a unes eleiciones nes qu’un recién llegáu marxista populista, el maestru rural Pedro Castillo, paez que va algamar la victoria, cuando s’esclaríen les impugnaciones, sobro una lliberal populista, Keiko Fujimori, fia del vieyu presidente anguaño encarceláu, y tamién ella con cuentes pendientes cola xusticia.

El casu ye que demientres la campaña enteramonos de una matanza espantible llevada a cabu por dalgunos restos del terrorismu de calter maoísta, Senderu lluminosu, liquidáu por Fujimori padre y güei reconvertíos en intermediarios ente productores de fueya de coca y los cárteles de la droga. Asocedió nel VRAEM, el valle de los ríos Apurimac, Ene y Mantaro, una rexón que, dicha asina, a casi nadie-y diz un res pero que, en realidá, tien connotaciones hispanes historiques pos ocupa parte de les rexones de Cusco, Junín, Huancavelica o Ayacucho; llugares au los españoles se batieron con meyor o peor fortuna demientres les guerres d’emancipación americana pa después ser figures de la historia d’España, como don Baldomero Espartero. Güei la guerra ye otra.

Castillo promete camudar la Constitución, como ficiera el so vecín Evo Morales, llevando con ello a Bolivia, per au sal la coca peruana p’abastecer Arxentina y Brasil enantes d’unviar el sobrante haza Europa, al tercer puestu mundial en producción d’esa droga; o como ficiera Chávez, llevando a Venezuela a la so mayor penuria social, política y económica dende que ye república, too ello con Fidel Castro como referente. Daqué pa preocupar nel casu peruvianu, hasta agora un bastión de la ortodoxia económica en comparanza col restu d’Iberoamérica.

Perú ye un gran país, con una democracia consolidada pero sometida a presiones tremendes; la mayor quiciabes desigualdaes fonderes na so sociedá que perpetúen la inestabilidá y que faen que les posibilidaes de qu’esa raya de coca tenga esi orixe amonten cada día, a midida que’l populismu marxista s’avera a la see del poder limeñu.  

Raúl Suevos

A 9 díes vencíos de xunu de 2021

Torna en castellán en repdiv.blogspot.com