La ruindá

 

En 1980 dexé l’Academia pa dir al mio primer destín profesional; cuatro años y mediu en Pamplona; una ciudá que, per aquel entós, puxaba cola pequeña Rentería por algamar el primáu ente les poblaciones col so propiu grupu d’asesinos especializaos, que nel casu de la capital navarra yeren dirixíos por una muyer de llamatu Bitxori a la que nun paecía que-y afeutaran los problemes de machismu que tanto preocupen anguaño a les gobernantes de nueso.

Aquella escoria de la especie humana perfeccionó una carriera de 17 asesinatos polos que pagó la “descomanada” cantidá de 19 años de carcel, esto ye, poco más d’un añu por cada vida robada y cada familia esfiltrayada. Ye un balance qu’amuesa una arrogancia estatal que nun se da en dala otra parte del mundiu. En dengún llugar del planeta val tan pocu la vida humana y el dolor que la so desapaición incamentable xenera nela so redolada. Güei la Bitxori ta desapaecida de los medios de comunicación y ye posible que lleve una vida feliz rodiada de almiradores qu’en dengún momentu se faen entrugues pola so propia condición moral. Ye lo que hai.

A min aquellos años nun me dexaron buelga especial. Yera mozu y taba en bona forma física, y el cuerpu a tierra diariu pa comprobar los baxos del coche suponía malapenes un sollutu, anque los asesinos vinieren y asesinaren al tenderu del barrio¡u, por ser franquista; o descerraxasen un tiru na nuca al vieyu pá de la mio vecina, por ser guardia civil xubiláu; o ficieren lo mesmo al probe Casanova por ser militar, y magar ser un xoteru navarru terrible. Yera la ruindá de los asesinos y de la población qu’en Navarra y el País Vascu los sofitaba, y anguaño los aplaude.

No personal foi mio muyer quien más cerca los tevo. En dos ocasiones, mientes paseyaba a nuesu primer fiu, la muerte en forma de bomba y de tirotéu quiso que l’espaciu/tiempu s’axustara en minutos al so favor y güei la esperiencia sirvenos pa recordar aquellos años con muncha tristura, pero en dalu casu mos permitimos escaecer a los que cayeron y a quienes los mataron, tampocu a quienes los aplaudieron y anguaño los gasayen.

El sistema de llibertaes de nueso ye ensin dulda dalguna un de los más potentes d’Occidente, dígolo depués de vivir en dellos países del mundiu; yá entós, en plena atacadura de los terroristes lo yera, y el “Punto y hora de Euskalerría”, col amparu de la llei española, yera un de los sos voceros más señalaos, bazofia impresa pa quien esto escribe; panfletu que foi la basa profesional pa quien güei  dirixe la representación de los asesinos nel Congresu y sofita al nuesu gobiernu a cambiu d’entrar na Comisión de secretos del estáu.  

L’estáu de drechu ye imperfeutu, como toles criaciones del home, pero nel casu del de nueso, España, tengo la impresión n’ocasiones, demasiaes, qu’avanza nun camín de autodestrucción que, obviamente, nun pue conducir a dalu llugar, non a lo menos a un nel que seyamos meyores.

Raúl Suevos

A 29 díes vencíos d’abril de 2022

Torna en castellán en repdiv.blogspot.com

El feminismu de Laura

 

La invasión d’Ucrania, quiciabes pola so cercanía física y cultural, ta siendo oxetu d’una atención insólita per parte de los medios de comunicación, y ello comporta una pequeña invasión de periodistes de toa mena de soportes y tamién conexones periódiques con personal ucranianu que entá s’atopa na zona d’operaciones.

Nos díes primeros de la guerra pudimos comprobar el dominio maraviosu del castellán per parte de munchos mozos ucranianos, tres el que s’escondía una historia de branos en cases d¡acoyida españoles pa tentar tratar, en munchos casos, les dolencias derivaes de la nube radioactiva de Chernóbil cuando yeren neños. Notros casos yeren profesores d’español ucranianos los qu’ocupaben el papel de corresponsal dende les sos ciudaes. Pero col pasu del tiempu munchos d’ellos foron desapaeciendo y quiero pensar que lo ficieron porque algamaron a escapar de la trampa preparada por Vladimir Putin.

L’oficiu de corresponsal de guerra paecía tar desapaecíu nel país de nueso. Seguramente les crisis sucesives de la prensa tuvieron muncho que ver puesto que cuando llegamos a descubrir, xeneralmente per dalgún sucesu aciagu, que dalgunos de los nuesos periodistes s’atopa en zona de conflictu, la noticia vien acompañada del conocimientu de la so condición de freelance, esto ye, d’autónomu. Anguaño casi naide ta dispuestu a caltener un corresponsal en plantilla.

Los tiempos de Miguel de la Cuadra o de Pérez Reverte tienen pasao a la historia. Y dai-vos  cuenta que dexo pa segunda llínea a les Carmen Sarmiento, o Rosa María Calaf, que les hebo, abondo d’elles, y mui bones, pero que casi siempres tuvieron que lluchar, amás de con les condiciones del so trabayu, tamién cola so condición femenina, con tolo de peyorativu qu’eso siempres supunxo, yá que’l so trabayu, normalmente, desendolcábase en sociedaes más atrasaes que la de nueso y en les que la muyer cumplía un papel secundariu o inesistente.

Estos díes, y yá van munchos, vemos nuna de les cadenes xeneralistes a una corresponsal bien moza corriendo per llugares estremaos d’esi país tarreciblemente castigáu. Hay dalgunes más informando pero paez Laura la más desacobardada, ensin resuellu n’ocasiones, acorviada pol cascu y el chalecu antifragmentos; corriendo pa fuyir del bombardéu que s’avera; guetando un inesistente refuxu que la protexa a ella y al so cámara.

Ella tráemos les imáxes que nós vamos degustar cómodamente nos nuesos calefactaos fogares y quiciabes tres el so informe cotidianu, o enantes, mos aporte la visión de eses otres muyeres autoproclamaes campeones d’un pseudofeminismu nuevu que güei conformen un gobiernu al que tienen llegao ensin saber, o reconocer, que son les Laures les auténtiques feministes. Ye lo que hai.    

Raúl Suevos

A 26 díes vencíos d’abril de 2022

Torna en castellán en repdiv.blogspot.com

La utopía como faru y señal de referencia

 

La guerra d’Ucrania tanos faciendo vivir un de los periodos más aturbolinaos de los tiempos caberos. La situación afeuta muncho más allá del propiu destín d’esi país pos el resultáu de la invasión va atañir tamién al equilibriu d’Occidente. Una Rusia vencedora, más autócrata y crecida, asociada a la China de Xi Jinping sedría demoledora pal futuru de toos.

En medio de talu escuru panorama hai quien quier ver posibilidaes lluminoses, dalgunes de gran trescendencia. La primera taría nel nacimientu real d’Europa; según esti enfoque la realpolitik que representa la invasión supondría un sacalliñu descomanáu pa la criación d’esos Estaos Xuníos d’Europa; sedría daqué asina como la adrenalina del mieu promoviendo la integración rexonal. Pa esa sienda yá contaríamos cola Brúxula estratéxica del señor Borrell, anque al barcu entá-y falten munchos aspeutos nel so diseñu. Son grandes espectatives pa momentos críticos nel devenir de les naciones europees, y más pronto que tarde vamos ver si tres d’elles hai dalgo más qu’un retemblíu de llercies temporales.

Otra premonición de los optimistes atopase tres la derrota rusa y la posterior tresformación del país nun estáu verdaderamente democráticu, o lo menos averao a los estándares básicos en vigor n’Europa; esto ye, un país susceptible d’integrar la Xunión Europea. Ye ésta quiciabes la más imponente d’eses visiones futuristes, más inclusive qu’esos Estaos xuníos europeos, pos implica en sí mesma la criación d’un campeón nuevu ente les potencias mundiales, dalgo que daría llugar a una rellación de fuercies nueva nel mundiu. Una opción más utópica qu’optimista.

Son dambes visiones más buenistes que realistes. La primer, la de los Estaos

xuníos, cuenta na so escontra con una llarga historia d’egoísmos nacionales europeos, y, anque anguaño yá nun s’atope nel club el siempres ronciegu Reinu Xuníu, qu’abondo tien con caltenese xuníu, la xera paez más trabayosa de lo que los actuales campeones, Francia, potencia nuclear, y Alemaña, potencia económica, podríen llegar a maxinar. Nun digamos yá la putinista Hungría d’Orban o la hiperconservadora Polonia.

La segunda visión, la d’una Europa con Rusia dientro necesita partir de la lóxica medrana qu’impón una nación de 150 millones d’habitantes, y los proporcionales drechos de votu, que pasaría a ser ensin dulda el campeón nidiu ente les naciones europees pero, si esto podría apavoriar, qué dicir de los USA y China, que se atoparíen con daquien en condiciones de romper l’equilibriu anguaño inclusive enantes de que la India llegara a desafialo.

Son visiones utópiques seguramente pero ¿Cuántes son les utopíes que col pasar del tiempu se convierten en realidá?

Raúl Suevos

A 25 díes vencíos d’abril de 2022

Torna en castellán en repdiv.blogspot.com

L'apaciguamientu

 

El conocíu como periodu d’entreguerres, ente les dos guerres mundiales, fo un ralu de tiempu aciagu nel que la mayoría de los cuadros dirixentes del mundiu yeren conscientes de que daqué tarrecible y nefastu se taba cuayando, y pal cualu dengún d’ellos contaba con abondo preseos pa torgalo.

Too entamó colos contradictorios Trataos de Versalles, nos que’l presidente yanqui, Woodrow Wilson, impunxo les sos teoríes –los 14 puntos- sobro la resolución de conflictos y l’autodeterminación de los pueblos. Unes teoríes pa les que’l mundiu nun taba preparáu –entá anguaño nun lo ta- y que llevaríen a un desastre entovía peor que’l de la Gran Guerra.

Si tres les guerres napoleóniques entendióse que nun se debía machacar a Francia, en Versalles decidióse acabar con Alemania políticamente; pero la so potencia social, industrial y económica yera tala que, adulces, yá dende la direición d’un prematuramente desapaecíu Stresemann, los trataos roblaos en Versalles entraron n’escayencia.

En Locarno, en 1925, escomencipió’l desguace, pero sedría yá con Hitler na cancillería cuando too s’aceleró. Exactamente cola ocupación pola Wehrmacht de la Renania desmilitarizada en 1936 ensin que les potencies alzaran una ceya. Fo la señal para qu’Adolph se decatara de que la Policy of appeasement, liderada pol británicu Neville Chamberlain y bendecida pola Sociedá de Naciones, yera una carta de créditu pa facer lo que quisiera. La unificación con Austria, el Aunschluss, fízose ensin dalu pilancu; siguiría la ocupación de los Sudetes, tamién amparada pola autodeterminación de los pueblos de Wilson, y tres ella’l restu de Checoslovaquia. Pa cuando escomenzó a reclamar el pasiellu de Danzig, güei Gedansk, anque tarde, toa Europa taba rearmándose.

En 1939 invadiría Polonia, aniciando asina la Segunda Guerra Mundial y con ella un periodu tráxicu pal mundiu, y en tou esti percorríu dalgunos elementos paecen premonitoriamente coincidentes cola actuación d’un Vladimir Putin qu’algama’l poder en Rusia tres la desintegración de la URSS y el mandatu solmenáu de Yeltsin, caracterizáu pola privatización xavaz de la propiedá estatal y la falta de fundamentos democráticos nel sistema políticu.

Osetia del Sur y Transnistria foron los pasos primeros nel camín, tres la recuperación sangrienta de Chechenia en 1999, y la respuesta tebia d’Occidente y les NNXX recordaron l’apaciguamientu de los años 30. Siguió l’anexón de Crimea en 2014 y el levantamientu –inducíu- nel Dombás, respondíu por unes cuantes sanciones que nun foron a desanimalu; pela cueta, el so discursu victimista, d’arrequexamientu per parte de la OTAN, fo reforciáu, seguramente en preparación del pasu viniente, la invasión d’Ucrania.

Putin, que nun algama a ver que la gran beneficiada de too esto ye China, tien que ser derrotáu, y Rusia sancionada y caltenida nel llimbu internacional mientes él tea nel poder. Nun cabe otra posibilidá pa recuperar l’equilibriu y la paz n’Europa, de lo contrario van ser los desastres de la guerra los que mos aguarden a toos al tornar el camín.    

Raúl Suevos

A 23 díes vencíos d’abril de 2022

Torna en castellán en repdiv.blogspot.com

El ferruñu cubán

 

En 2010, cuando aporté a La Habana, escomencipiaba a falase de reformes económiques na islla, depués llegaría’l paripé puestu a furrular por Raúl Castro, pero naquel momentu los recién llegaos queríemos pensar qu’aquello yera l’aniciu de daqué. Dalgo que, en combinación col progresivu deterioru de Fidel, podía ser l’entamu de la fin del réxime, tal y como lu viven y sufren los cubanos dende va más de 60 años. Pero non, aquello namái yera una más de les táctiques de supervivencia de los Castro, no que son maestros.

La realidá, yá entós, yera que los cubanos, mayoritariamente, nun teníen munches esperances, básicamente denguna; yeren yá munches les deceiciones que’l réxime-yos diera, y el tiempu siguió dándo-yos razón. Les reformes económiques, incluyendo la reforma agraria, nun foron tales, y la desapaición de Fidel tampocu aportó un res; siguió la represión, con menos dureza nes condergues pero con más palices y detenciones. Pasaría’l vodevil d’Obama, siguíu del esperpentu de Trump, p’aportar al más de lo mesmo de Biden. Ehí tamos.

Esti añu caberu hebo daqué de nuevu. Una manifestación espontánea punxo n’apretures al réxime que respondió con mayor númberu de detenciones y llargues condergues que recuerden los meyores momentos de Fidel, y los cubanos, pueblu reprimíu ente los que sufren represión, reaccionó moviendo los pies y na frontera sur de los EEXX detuvieron 30000 d’ellos esti marzu. En Cuba anguaño namái se queda’l que nun pue colar y los xubilaos tienen que tornar a trabayar énte la falta de xente mozo.

El presupuestu cubán nútrese de tres elementos principales; el turismu, la venta de servicios sanitarios –lléase sistema de semiesclavitú de los mélicos- y les remeses de los emigraos, el más importante de los tres. Toos ellos van mal; el turismu nun se fía de Cuba y la so sanidá deplorable, y mientes Varadero amuesa un vacíu desolador nos sos hoteles, na Española, los dominicanos tienen llenos los de so. Ye lo que hai.

Les “misiones” de los mélicos nel esterior yá nun son lo que yeren, menos países los requieren y el valir de los contratos tamién se reduz, lo qu’implica menos ingresos per esa vía, de mou que casi too acaba cayendo sobro los llombos de los emigrantes cubanos ¿O deberíemos nomalos refuxaos? Ellos son los que nutren el presupuestu cubán, coles perres qu’únvien a les sos families y el 20% que direutamente se queda’l gobiernu gracies a les empreses de pagu, en manes toes elles controlaes pol Exércitu cubán.

La provincia de Ciego d’Ávila quedóse ensin trenes por falta de combustible; Los pañales pa bebé nun salen de la capital porque nun hai tresporte; Bolivia dona xiringues a Cuba énte la escasez del producto; en Matanzas averióse la central eléctrica y nun son a iguala. Too paez desmoronase na islla pero nada-y importa al so gobiernu mientes el “bloquéu” lo xustifique y los progresistes de salón occidentales lo aplaudan.  

Raúl Suevos

A 21 díes vencíos de 2022

Torna en castellán en repdiv.blogspot.com

Rusia, vasalla futura de China

 

Al personal de la mio xeneración el conocimientu sobro China quedóse-y nes imáxes daquella preciosa y tendenciosa película, 55 díes en Pekín, que contaba, a la so manera, la que foi una de tantes intervenciones sufríes pola dinastía Quing a manos de les potencies occidentales. Nesi lance pequinés, hasta nós, los españoles, tábemos presentes, anque nun algamó a pescanciar qué lleches facíemos ellí.

Enantes d’eso los chinos sufrieran les ignominioses guerres del té a manos del Imperiu británicu, que-yos llevaron a roblar unos alcuerdos comerciales absolutamente desfavoratibles pa los sos intereses. Al norte, na cuenca del riu Amur, en Siberia, foron los rusos, metanes el XIX, los qu’impusieron la fuercia de les sos armes y la so persuasión hasta qu’algamaron a face-yos roblar a los chinos un tratáu qu’en 1858 cedía-yos unos territorios descomanaos nesa rexón remota.

China nunca tien renunciao a esos territorios y en 1969 tuvieron llugar unos incidentes armaos, con un númberu de muertos chinos de difícil cálculu, que dan cuenta de que l’asuntu ehí sigue, y que entós nun llegó a mayores pol mieu de dambes potencies nucleares a que se-yos fuere de les manes.

En tiempos más recien la prensa escribió sobro la invasión pacífica china a manes de pequeños comerciantes que llegaben a esos territorios y menaciaben con una reconquista poblacional, pero la perescasa población del territoriu nun daba pa una llegada masiva de pequeños comerciantes y l’asuntu desapaeció de les páxines de la prensa.  

Agora, cola guerra d’Ucrania entá viva, y les sanciones occidentales con llarga trayeutoria per alantre, enteramonos de que les esportaciones ruses a China tienen crecío un 26% nel mes caberu, y les importaciones un 12%, y lo que te rondaré morena. Ye una situación que, conociendo les práutiques comerciales chines, con contratos draconianos nos que’l pagu en materies primes y tierres ta a la orde del día, pinta abondo mal pa la Rusia de Putin.

Depender casi d’un solu proveedor y cliente, como va ser el casu, nun augura nada bono pa quien s’atopa nesa situación, la contraria a la que representa un mercáu abiertu. China va xugar la carta de l’ambigüedá, dalgo que se-y da mui bien, calteniendo les sos rellaciones comerciales col restu del mundiu y, a la vegada, suministrado los insumos que Putin necesite a un preciu creciente, y sometiendo al so teóricu amigu ruso¡u a lo que va acabar siendo un vasallaxe económicu y, quién sabe, tamién políticu.

Dicen que los árabes son los maestros del tiempu pero, cuando nació l’Islam, China yá yera la cultura más vieya del mundiu, y ehí sigue, esperando.

Raúl Suevos

A 14 díes vencíos d’abril de 2022

Torna en castellán en repdiv.blogspot.com

L'espantu sobro l'asfaltu

 

Creyíemos que según qué otomíes nun formaben parte de la nuesa redolada. Les sacudies caberes del espantu n’Europa güeyaramosles en Bosnia, y depués en Kósovo. La masacre de les Torres xemeles va tiempu que paez quedase nun cenciellu fondu d’archivu vídeo pa ciertes noticies, y les matances y carniceríes de toa mena que de la mano del yihadismu radical islámicu mos tienen aportao a les nueses pantalles de gran formatu, na comodidá de los nuesos agradables salones familiares, a fuercia de repetíes va tiempu que dexaron de conmovenos. Amás pertenecen a un mundiu lo suficientemente alloñáu del nueso como pa nun empapizanos la comida, o la sobremesa. Pero Ucrania ta ehí al llau.

De Madrid a Kiev hai menos de 40 hores per carretera, daqué factible pa facelo d’un tirón ente dos conductores, y muncho menos tiempu de vuelu pa toes eses pareyes que sofiten les sos ilusiones paternales na maternidá subrogada qu’ellí atopa una meca pa munchos matrimonios españoles. Ucrania, dende va yá dalgún tiempu forma parte del cotidianu de nueso en forma de noticies, o emigrantes d’esi país, o de la agresora Rusia, afincaos en toa España y particularmente na mariña mediterránea.

Ye poro, quiciabes, que les imáxes de Bucha mos tienen impresionao tan fonderamente, y tamién pola normalidá que nos cuerpos yacentes nesa cai al infiernu paecía amosase entá pa tou aquel que quisiera detenese na so observación. Persones normales en medio d’una actividá normal sorprendies pol fueu intrascendente, innecesariu, inxustificable de la tripulación de un transporte acorazáu rusu del que quiciás nunca lleguemos a saber la identidá, y poro, qué mena d’insania anidaba na mente del tirador, o la del xefe que dio les órdenes.

Nesos cuerpos preservaos de la descomposición pol friu reinante podemos ver a cualquier de los nuesos vecinos; a Volodimir que tolos díes va a trabayar montáu na so bicicleta y qu’entá la caltien ente les piernes, como si tuviera a puntu de levantase y siguir pedaleando, tres quince díes muertu. Más allá podría tar Alexei, col sacu de patates al so llau, posiblemente recoyíu en casa d’un vecín que nu teniendo que salir, quién sabe, quiciabes algamó a sobrevivir. Y que me dicen d’esi Boris, a puntu de llegar a casa, col llaveru cayíu a namái un palmu de la so manu inerte; un llavero familiar, quiciás idénticu a esi que munchos de nós llevamos en bolsu.

La matanza de Bucha apavoria porque mos amuesa con abondo de claridá cómo cuando la guerra azota les nueses vides, éstes yá nun mos pertenecen n’absoluto; toos pasamos a depender del azar de la guerra, el peor de toos.

Raúl Suevos

A 6 díes vencíos d’abril de 2022

Torna en castellán en repdiv.blogspot.com

Matances en retirada

 

La guerra ye un de los cuatro xinetes del Apocalipsis, convien nun escaecelo. Nun hai guerra bona; puese discutir sobro si les hai xustes, pero nun hai denguna bona. Podemos divagar sobro los graos de maldá que nellas se pueden observar, y tamién tendremos que detenenos per un momentu na batalla de Solferino, que marcó un enantes y un depués nel enfoque humanitariu en rellación col tratu a feríos y prisioneros. Un talu Henri Dunant fo’l responsable y a él debemos el nacimientu de la Cruz Colorada.

Nos tiempos vieyos la xestión del terror yera un de los elementos básicos del arte de la guerra y nello Tamerlán, Timur Han, Timur el coxu, tien pasao a los anales del arte de la guerra como un de los más sanguinarios xestores del terror, lo que, xunto al so indudable xeniu militar, procuraría-y un gran imperiu que desaparecería a la so muerte ente lluches fratricides de los sos heriedes.

Tamerlán fizo famoses les pirámides de calaveres construyies colos cráneos de los soldaos y poblaciones vencies. Cuenten las cróniques que brillaben demientres la nueche, al paecer pol fósforu que contienen, y con ello infundíen un pavor irrefrenable a tou aquel que se veía obligáu a caminar nochirniegu ne la so redolada.

La fama de la so crueldad facía que la mayoría de ciudaes se-y rindieren ensin oponer resistencia. Yera una forma conducente d’utilizar el terror como arma de combate, y funcionó-y mui bien hasta la so muerte cuando planeaba invadir China, daqué de lo que tomó bona nota Abu Bakr al Bagdadí; efímeru califa del Estáu Islámicu que supo usar el terror de mou y manera que facia recordar enormemente a Tamerlán.

Hai otra forma de terror muncho menos ellaborada. Ye’l que se desendolca cuando los invasores se baten en retirada. N’Europa esisten abondo de exemplos mientres les retiraes de les tropes nazis en escenarios estremaos. Encuadranse en procesos de derrota nos que se ven cayer en combate, direutu o emboscaes, a munchos compañeros. Al enemigu nun se-y pue batir pues y’él el que lleva la iniciativa y la frustración y énte’l propiu temor a la derrota namái tien al algame a la población civil que tevo la desgracia d’atopase baxo’l so control o dominiu.

N’Ucrania tienen apaecío los primeros cadávres na población de Bucha, na redolada de Kiev, d’au los rusos tán replegándose, con mayor o menor orden, haza les sos posiciones de partida nel so país. Ye probable que temos nuna d’eses típiques y desgraciaes situaciones que a lo llargo de la historia tien sufrío la población civil, y ye tamién más que probable qu’esta seya namái la primera d’una serie de desgraciaes informaciones que van dir aportando.  

Raúl Suevos

A 4 de abril de 2022

Torna en castellán en repdiv.blogspot.com

Xuegu maldadosu

Que naide s’alarme, esto nun va de política, anque soi consciente que semeyante títulu, cola que ta cayendo, puede llevar inmediatamente a pensar nos asuntos de la política; la llocal, la rexonal, la nacional o inclusive la mundial; esta entrada da pa too, pero non, refiérome a una vieya canción melódica de Chris Isaak de finales de los 80, Wicked game, que güei llegó a les mio oreyes mientes diba conduciendo.

La canción de Isaak pasó ensin pena nin gloria poles llistes yanquis hasta que David Linch la incluyó na so peli “Corazón salvaxe”, con unos descomanaos Laura Dern y Willem Dafoe; y a partir d’ehí entamó un tremendu tirón mundial que la tien convertío nun clásicu; tantu que pasó a ser ampliamente versionada, nalgunos casos, y dependiendo de la opinión de caún, pa ser meyorada.

La que a min me presta ye la de HIM, la que güei escuché, y que pertenez a un grupu finlandés; sí, finlandés. Pellí enrriba, los países nórdicos, son a sacar grupos mui bonos y ésti, clasificáu dientro del subgrupu rock góticu, tien coses mui potables, como esta wicked games qu’a min m’encanta.

El ritmu abandona’l tonu melódicu d’Isaak pa entrar de lleno nuno muncho más rockeru, con un fondu broncu y constante de la batería que nun te dexa abandonate un momentu, y que recuerda al traquetéu constante d’una ceremonia d’apaches mezcaleros depués d’habese fumao unes cuantes pipes. Anque tampocu hai que pasase, nun ye AC&DC nin Metallica, falamos de rock melódicu, amable, llevaderu.

El Vocalista, con maestría nos graves, fai una transición perfeuta a los rexistros agudos cuando llega’l momentu del estribillu. Un estribillu que cuenta con unos coros, pa min una pequeña xenialidá, que son realizaos pol restu de la banda con unos tonos, más que graves, cazallosos, de bebedor nochirniegu d’oruxu con bona ración de tabacu negru, que-y dan un toque cavernario al canciu, mui afayadizu si tenemos en cuenta que’l grupu va de góticu.

La lletra, que va d’amores tóxicos, ye abondo clásica pa una balada romanticona y los de HIM dan-y el xiru camudando les referencies a la neña destructora pol mundiu, siempres más a man pa cargar coles culpes que faiga falta; pero los de HIM, como Isaak declaraba, siguen resistiéndose a cayer na trampa d’esi amor. Ye lo que hai.

Hai tamién una versión d’un grupu rock arxentín, pero nun la recomiendo; a lo menos a min nun m’aportó un res nin me fizo camudar la mio almiración pola versión finlandesa. En tou casu, siempre ye bono escuchar música ente medies de tantu ruiu.

Raúl Suevos

A 3 díes vencíos d’abril de 2022

Torna en castellán en repdiv.blogspot.com