Les estremaes lleis de memoria hestórica, de calter nacional
o rexonal, tán dando pa episodios abondo ocurrentes a lo llargo y ancho del
territoriu patriu. Situaciones nes que, apellidando a eses lleis, eliminense
escudos, vidrieres o cualquier símbolu que se pueda rellacionar col réxime del
xeneral Franco. En dellos casos l’enfotu purificador enfócase na retirada del
nome de cais, places o aveníes, col resultáu, n’ocasiones, de que se cae nel
ridículu del anacronismu, poniendo n’evidencia la falta de cultura básica de dalgunos
de los componentes de les distintes alministraciones implicaes.
Suelen ser les figures militares d’aquella dómina, les de
mayor graduación y sonadía, les que vieron con más frecuencia los sos nomes
sometíos a esta moderna damnatio memoriae
pero, a vegaes, son soldaos de graduación estremada, qu’algamaron sonadía y
honores pol valor del que ficieron amuesa nel combate, los que se ven tamién
condergaos al escaezu por estes lleis que, n’opinión d’esti escribidor, lleven
en sí mesmes una seme que nun debiera llantase nel campu del heroísmu militar,
puestu que les xestes qu’amuesen el valor nel combate son siempres un referente
positivu pa les xeneraciones vinientes.
Nestes llínees pretendemos recordar la que pensamos que ye la
batalla de montaña cabera entamada n’España. Falamos de batalla y non de
combate porque nella participaron los tres exércitos. De montaña porque los
altores, les diferencies de nivel, lo compartimentao del tarrén, y la
climatoloxía alversa asina la describen. La cabera porque mientres la guerra
incivil entá se dieron combates en tarrén de montaña, dalgunos bien duros como
los teníos nel Pallars lleridanu na redolada de la montaña de Sant Corneli, pero
ensin el valumbu de la Batalla del Mazucu, elementu clave pa la toma d’Asturies
na campaña del norte del añu 1937.
LA SITUACIÓN XENERAL EN 1937
Pasaes yá les esperances del entamu, d’un conflictu curtiu,
esi añu amosaba a España desangrándose, con dos contendientes de fuercies
semeyantes y baxo la influyencia política de les potencies que sofitaben a ún y
otru bandu, muncho más evidente y notoria nel casu del gobiernu republicanu que
güeyaba nesi periodu como, metanes mayu, yera valtáu de la presidencia del
gobiernu Largo Caballero p’allugar al más cimble, pa los intereses moscovites,
Negrín, y, darréu, tamién la salida del ministeriu de defensa d’Indalecio
Prieto, pocu dócil. No económico, la unviada de les reserves d’oru pa Moscú y
l’asaltu a les caxes blindaes de les entidaes bancaries dexara la cotización de
la peseta gubernamental pelos suelos.
Nel llau del xeneral Franco’l conflictu internu paecía
resueltu cola creación de la Falanxe española tradicionalista y de les JONS,
que al so frente colocábase’l propiu xeneral y au s’aplupinaben toles fuercies
conservadores, y un gobiernu equilibráu nel que se daba asientu a les estremaes
corrientes polítiques, incluyendo les monárquiques, añediendo una xestión
económica más racional y solvente cara al esterior, lo qu’afianzaba’l necesariu
créditu p’alimentar la guerra.
Nel planu militar el mes de marzu contempla una ofensiva
nueva sobro Madrid pol exe de Guadalaxara a cargu, sobremanera, del CTV, Corpo
di truppe volontarie italiane, nel que s’emplega per primer vegada la táctica
de romper con una formación de carros de combate siguida de tropes d’infantería
motorizada que, magar l’ésitu inicial, va vese detenida pol mal tiempu y la
reacción republicana.
Pa la fin de mes, nel norte, el xeneral Mola entama la
ofensiva p’apoderase de les provincies vasques, continuando n’abril; un mes qu’observa
tamién intentos republicanos de conquistar Huesca, nos que participa como
voluntariu internacional un entoncenes desconocíu George Orwell, de lo que mos
va dar cuenta detallada nel so Homenaxe a
Cataluña.
No político ye un mes complicáu pues la unificación por
decretu de la Falanxe y los Carlistes nun va ser ensin resistencia, y más de
milenta detenciones, incluyendo la de dalgunos de los sos líderes. Nel bandu
republicanu, especialmente en Cataluña, dalgo similar asocede colos
enfrentamientos ente comunistes y anarquistes, que van ser sangrientos en
Barcelona demientres los primeros díes de mayu.
Nel norte siguen les operaciones col avance lentu pero constante
de les fuercies de Mola, col bombardéu’l día 25 de Guernica que, al atopase na
redolada un corresponsal estranxeru, va comportar un clamor internacional
descomanáu. Va siguir mayu con distintes operaciones y el constante avance nel
norte, produciéndose la muerte de Mola n’accidente aéreu y dando pasu a un xunu
nel que, pal día 19, ocupase Bilbao ensin que los batallones del PNV efectúen
la destrucción de les instalaciones industriales que’l gobiernu republicanu
ordenara, y mientes, en Cataluña, detiénse y estermina al trosquista POUM[i]
y los sos dirixentes; una depuración de la que’l internacionalista Orwell va
escapar gracies a un guelpe de suerte.
Colos primeros díes de xunetu aniciase la batalla de Brunete
na zona centru, que va durar casi tol mes, y que nun va suponer malapenes
ganancies pa dengún de los bandos, pero sí graves pérdides d’homes y material;
y pol norte, yá controlada Vizcaya, tómase’l puertu de Somiéu ente Asturies y Llión,
como preludiu de la ofensiva final, y a la espera de qu’afloxe la presión en
Brunete.
LA SITUACIÓN NEL FRENTE
NORTE
El 14 d’agostu aniciase la ofensiva sobro Santander, que se
supón defienden los gudaris del PNV y estremaes milicies comunistes,
socialistes y anarquistes pero, pa sorpresa de toos, los peneuvistes negociaben
en secretu colos italianos dende diba tiempu y les tropes nacionalistes vasques
repliéguense sobro Santoña[ii],
au entreguen les sos armes a los italianos ensin pegar un tiru, a la par que
dexen al descubiertu les posiciones en tornu a Reinosa y l’Escudu guarnecies
polos milicianos d’esquierdes. Pal día 26 l’Exércitu del norte, a les órdenes,
tres la muerte de Mola, del xeneral Dávila, entra ensin malapenes baxes na
capital Santander.
Por parte republicana entamase una aición estratéxica nueva’l
24 d’agostu sobro’l frente de Zaragoza[iii]
cola finalidá de conquistar la ciudá y, sobre too, afloxar la presión sobro’l
norte que tres la cayida de Bilbao veíase mui amenaciao, pero, magar perder dalgo
de tarrén, les numantines defenses de Quinto y Belchite llogren parar l’avance
del xeneral Pozas, ensin necesidá de separtar fuercies del norte.
Cola fin d’agostu too ta llisto pa entamar el remate de la
campaña nel norte, una operación que, visto lo asocedío nel País Vascu y
Santander, ésperase ensin complicaciones.
EL MAZUCU
Dende’l 25 d’agostu, Belarmino Tomás, el mesmu que dirixera
la sublevación d’ochobre del 34 n’Asturies, proclama’l Conseyu soberanu
d’Asturies y Llión, “independizándose” de la República; ye’l conocíu como “el
gobernín”, en pallabres del presidente Azaña, lo que va dar un ciertu toque
folklóricu a esta fase final que va tener un entamu sangrientu col fusilamientu entainao de los 107 presos, ente ellos 80 guardia civiles alzaos en Xixón en xunetu del 36, que yeren tresalladaos dende Santander y que van finar los sos díes na sablera de La Franca el 29 d'agostu.
La llínea inicial de defensa de los asturianos, vamos
llamalos asina por aquello del “gobernín”, sofitábase nel riu Deva, que cae
estrepitosamente y permite a los homes de Dávila llegar el día 5 de septiembre
a LLanes y pensar que diba ser fácil
progresar pel interior, Cares arriba, pa ganar Cangues d’Onís y, darréu y tres
tomar Ribesella, formar una tiñaza sobro Les Arriondes, lo que, práuticamente,
daría la llave de toa Asturies.
La rápida cayida de la llínea del Deva va suponer dalgunos
fusilamientos nes files asturianes pero, pa sorpresa de Dávila, les fuercies
del Conseyu de Defensa van ser a recomponese y facese fuertes na Sierra del
Cuera.
Cuando se viaxa pela carretera de la costa n’Asturies,
anguaño A-8, ye imposible nun se decatar de la mole de la Sierra del Cuera, un
macizu que s’allarga d’este a oeste como un xigantescu cigarru habanu a menos
de 5 km de la costa, con altores de 1315 metros nel picu Turbina y 1176 metros
na Peña Blanca. Les sos fasteres, tantu al norte como al sur, son
tarreciblemente pindies y escarpaes, ensin
malapenes vexetación, puestu que se trata d’una formación calcárea que
nes sos crestes presenta tou tipu de dolines y piedres afilaes y cortantes
productu de la milenaria erosión, dalgo que va suponer un sufrimientu
descomanáu pal personal y ganáu atacante.
Llanes y el aeródromo desde Cuera. Fotografía de
Indalecio Mondejar
A dos tercios de la sierra ábrese un pasu natural, el puertu
de la Tornería, col picu Turbina y la Peña Blanca de fondu, per au sube dende
Llanes una carretera con munches revueltes. Detrás del puertu alcuentrase l’encantador
y pintorescu pueblu del Mazucu, que va dar nome a la batalla. Enfrente, casi
pegada a Llanes, atopamos una rasa llitoral, güei asientu d’un campu de golf
bien guapu y qu’entós albergaba’l campu d’aviación que diba servir de base pa les
escuadrillas de la Lexón Cóndor demientres la ofensiva. Más allá, nun Cantábricu
domináu naquel periodu pola pequeña armada del xeneral Franco, atopabase’l
cruceru Almirante Cervera en disposición de sofitar colos sos fueos los ataques
de les brigaes navarres.
Dende la posición dominante del Cuera tiènense a tiru les dos
víes que conducen haza Xixón, y la entá sitiada Uviéu. Tantu la carretera de la
costa como la que serpentexa encaxonada xuntu al riu Cares haza Arenes de Cabrales
y depués a Cangues d’Onís, nun van ser operatives hasta que nun se conquiste la
Sierra de Cuera. Hai que tomala.
Dávila espliega 4 brigaes navarres a les órdenes del xeneral
Solchaga. La I al mandu del coronel García-Valiño cuenta con unidaes como’l
reximientu América, diversos tercios de requetés y delles banderes de
falanxistes, amás de dalgunes bateríes de 70 mm y 105 mm. Yera esta unidá la
más fuerte de les esplegaes y, quiciabes poro, diba lidiar colo más duro, el
puertu de Tornería, el Mazucu.
La IV brigada navarra, al mandu del coronel Alonso Vega, diba
avanzar pola costa colos sos batallones de llínea y el so Tabor de regulares,
sofitaos por una batería de 65 mm y dos de 105 mm. Al coronel Bautista Sánchez,
cola so V brigada navarra compuesta de unidaes de llínea, requetés y regulares,
más cuatro bateríes de montaña a lomu y una de la Lexón Cóndor, correspondió-y
la dura xera de combatir nes crestes de la Sierra de Cuera y el so costáu sur, lo
qu’acabaría convirtiéndose nuna misión épica.
A la fin, la VI brigada navarra, al mandu del coronel Abriat,
debía avanzar peles Peñamelleres, a caballu del riu Cares y superando les
resistencies que’l compartimentáu tarrén ofrecía. Esti dispositivu algamaba
unos 33.000 homes que contaben col sofitu de l’aviación nacional dende Santander
y Llanes y tamién de parte de los bombardexos de la Lexón Cóndor, amás del yá
señaláu apoyu artilleru del cruceru Almirante Cervera y una batería alemana de
155mm avanzando cola VI.
Les fuercies de la República contaben al entamu na llínea
del Deva con dos divisiones –teóriques- al mandu de los tenientes coroneles
Ibarrola, un eficiente oficial de la Guardia Civil, y del teniente coronel
Francisco Galán, militante comunista, hermanu del Fermín de la sublevación de
Jaca del 31 y que, magar ser teniente retiráu de la Benemérita en xunetu del
36, ficiera fulgurante y sorprendente carrera en tan curtiu espaciu de tiempu.
Tres la cayida del Deva reorganicense y, nel exe del
Cares-Cabrales y el Cuera, van acabar por asentase tres brigaes nominales –hebo
relevos y refuercios- al mandu del comunista Manolín Álvarez, l’anarquista Higinio
Carrocera y el comunista Baldomero Fernández Ladreda; mientes que nel Mazucu
allugase una brigada vasca al mandu de Arriaga, antiguu oficial de carabineros,
y nes altures de Peñes Blanques va operar un batallón d’infantería de marina
republicanu vascu al mandu del antiguu guardia civil Benito Reola. Escasos
d’artillería cuenten, por embargu, con munches ametralladores, daqué que van
sufrir los atacantes.
El día 4 García Valiño y Alonso Vega avancen y ocupen Llanes,
y el so aeropuertu el día viniente, replegándose ordenadamente’l gruesu
republicanu haza la llínea del Sella. Al tiempu y pol sur, la 6ª brigada
navarra, tres ocupar una amburada y abandonada Potes, avanza pol intrincáu
interior pa enllazar cola fuercia que dende Riaño vien a los mandos del coronel
Muñoz Grandes.
Dende Llanes díbase aniciar el perduru asaltu al Mazucu, defendíu
na zona de les crestes del puertu de Tornería con mui bones fortificaciones que
faríen necesarios múltiples asaltos y bombardexos a les mesmes durante dellos
díes, con un gran númberu de baxes pel llau de los nacionales. Al final sedría
l’asaltu cuerpu a cuerpu’l que diba decidir la so cayida.
Subida a Tornería. Fotografía de Indalecio Mondejar
Llueve en forma’l 7 y el 8 mientes, con dalgún hostigamientu,
la unidá de Sánchez Bautista va ganando altor p'avanzar haza Llonín y Alles
peles fasteres sur de la sierra, mientes peles crestes, con apoyu aéreu
próximu, tantu que llega a producir baxes propies, avancen haza Peña Turbina
los navarros del Terciu de San Miguel. Avance llentu y penosu que va acabar
deteníu al pie del picu y que va obligar a refuercios y relevos nes unidaes de
les crestes, que nun sólo sufren les baxes del fueu de los defensores sinon
que, amás, soporten una climatoloxía inclemente y ensin suministros.
Sierra de Cuera desde
el sur. Fotografía de Raúl Cueli
El día 13 los esfuercios céntrense en llograr poner na sierra
una batería de 65 mm que en parte va tener que ser subida al llombu de los
combatientes pues producense múltiples despeñes y muertes de los mulos de
dotación y tamién de los que lleven les cocines de campaña de les unidaes, que
tienen ocasión d’esperimentar l’autenticu significáu del combate en montaña. En
sentíu inversu, los feríos que pueden facelo báxense de les artoles sanitaries a llombu de mulu pa evitar l’infernal y peligrosu descensu.
Pal día 14, con grande y sufríu trabayu de los zapadores, la
batería ta en condiciones de facer fueu, pero nun tien algame abondo, los de
tresmisiones tendieron una llínea y la intendencia algama a suministrar
suficientes raciones de previsión; con too, a 1000 metros d’altor la nueche conviertese
nuna llucha pa nun sucumbir al aterimientu. El sol d’esi día ayuda a tomar
temperatura a los cuerpos castigaos.
Nel Mazucu, mentanto, ente sangrientos y mortíferos ataques y
contraataques, los de García Valiño llogren tomar el Cabezu y depués la sierra
de Llabres, dominante sobro’l pueblu, lo que lu sentencia. Los d’Alonso Vega
avancen tamién pel flancu pa nel so momentu rebasar a los sos collacios y
afrontar l’asaltu final a Peñes Blanques. Pero Peña Turbina ainda se caltien
impertérrita en manes republicanes y tien capacidá pa contraatacar sobro les
vanguardies de los navarros causando bastantes baxes enantes de replegase a les
sos posiciones.
El Mazucu, a la derecha Llabres. Fotografía de Raúl CueliEl 15 aniciase con potente preparación artillera y bombardexu
aéreu que ye siguíu d’asaltu a les primeres posiciones del Turbina. Ye un
asaltu múltiple puestu que lo quebrao del tarrén torga unu xeneral, y esti conviertese
nuna cierta confusión de pequeños guelpes que facen retroceder a los
republicanos, con baxes en dambos bandos.
Va siguir l’avance con una preparación artillera nueva, esta
vegada a cargu de los potentes cañones del Almirante Cervera, que va llevar al
asaltu final sobro Turbina y una llarga llimpieza de la zona, pues la
compartimentación nun permite relaxase, y sobro’l propiu tarrén va haber que
pasar una nueche de tiritona nueva. Los republicanos retirense dexando sola la
posición de Peñes Blanques.
Línea de avance al Turbina. Fotografía de Indalecio MondejarEnantes de que se ponga’l sol un axorizu llega pa los nacionales
con un caza republicanu qu’en llugar de metralla llanza delles octavilles pa
los de so; octavilles que nun van llegar a les trincheres y nes que-yos piden
15 díes más de numantina resistencia, a la espera de la llegada del mal tiempu,
y con él la esperanza de paralización de les operaciones; falen tamién de dotaciones
nueves d’un armamentu inesistente. Quiciabes yá ye tarde.
Forma parte esta aición de la tradicional aición sicolóxica
en tiempos de guerra, que se centra especialmente nes retaguardies propies, y
asina podemos lleer na hemeroteca virtual del Principáu d’Asturies[i]
como nesos díes la prensa describe a la población asturiana una imaxe
esperanzadora y llonxana de la realidá. A nivel nacional atopamos nel ABC de
Madrid[ii],
y de Sevilla[iii], dos
descripciones ciertamente contrapuestes pero dambes alloñaes de la sangrienta y
real situación.
Asturianos y vascos, estos caberos con especial ardor,
queriendo quiciás borrar les imáxes de traición de los gudaris del PNV en
Santoña, defendieron muncho más allá de lo previsible les posiciones del
Turbina y del Mazucu; agora queden soles les tropes de marina vasques que
tuvieron tiempu de fortificar les tres alturas de Peñes Blanques. Va ser un
combate épicu y demoledor pa dambos contendientes.
El día 16 aníciense los asaltos, que son refugaos, siguen el
17 baxo la borrina y el llovíu con igual suerte. El 18, con apoyu aéreu y
nevada nes altures, tres ataques son espundiaos na mesma llínea de trincheres.
Siguen díes d’asaltos continuos a cargu de la VI brigada navarra con sofitu
artilleru, naval y aéreu hasta que, a la fin, el día 22 cae la posición
principal au se contabilicen más de cien cadávres ensin evacuar. La batalla del
Mazucu acabóse.
Vista norte del Cuera desde el aeródromo de LlanesLA SANGRIENTA
CONCLUSIÓN
Fontes estremaes falen de 8000 baxes nacionales, 2500
muertos; y más de 3500 republicanes, 1500 muertos. Hebo, como nun podía ser
d’otra miente, grandes amueses d’heroísmu, anque tamién de cobardía, con
fusilamientos sumarios y con xestos de valentía a cargu de distintos dirixentes,
en dambos bandos. El tiempu y el tarrén foron inclementes demientres la batalla
faciendo les operaciones entá más dures.
Esi otru tiempu que tan duramente ganaran los combatientes
republicanos nun sirvió pa casi nada. El día 21 d’ochobre caíen Xixón y Avilés, y con elles el frente
norte desapaecía. Los dirixentes del “gobernín” non foron ardizosos abondo como
pa fortificar el Sella y namái l’heroísmu d’unos pocos algamó a dar tiempu pa
que dalgunos políticos y mandos pudieren burllar el llixeru bloquéu naval y
pasar a Francia pa, darréu, dalgunos, reincorporase a Valencia o Barcelona.
Los héroes de la batalla, la tropa combatiente, por parte
nacional soldaos de quinta y voluntarios, y por parte del Conseyu soberanu
voluntarios y reclutes forciosos, nun tienen nome, nin siquier una cai los
recuerda n’Asturies pero, en rellación colos xefes sí podemos siguir les sos
trayeutories: Dávila llegaría a ser ministru del Exércitu; Solchaga algamaría
l’emplegu de teniente xeneral significándose políticamente nel manifiestu
monárquicu; Muñoz Grandes mandaría la División Azul na segunda Guerra mundial y
depués el Ministeriu del Exércitu; Bautista Sánchez tamién algamó les tres
estrelles pero la so muerte, rellacionada cola so filiación monárquica, dexó,
pa dalgunos, delles incógnites ensin resolver; García Valiño, tamién teniente
xeneral y Altu comisariu d’España en Marruecos; finalmente, Alonso Vega algamaría
la Dirección xeneral de la Guardia Civil y el ministeriu de Gobernación.
Nel llau republicanu, Ibarrola y Galán van consiguir colar
per Xixón, siguiendo les vicisitudes de la guerra’l primeru acabaría prisioneru
n’Alicante, pa depués ser condergáu y depuráu, finando nel so Güecho natal; el
segundu, en cambiu, pasaría per Rusia p’acabar en Cuba, au finaría depués de
ser instructor de los combatientes castristes.
Manolín Álvarez va consiguir tamién escapar pa reincorporase
al exércitu republicanu y acabar cayendo nos combates de la ofensiva del Ebru;
Higinio Carrocera refugase a abandonar a los sos homes y ye deteníu en Xixón pa
tres xuiciu sumariu ser fusiláu[i];
Fernández Ladreda, comunista convencíu, tírase al monte, como tantos otros,
pero, años depués distanciase del PCE y, posiblemente por una delación interna,
ye apresáu, xulgáu y axusticiáu en 1946. Belarmino Tomás, el presidente del
Conseyu soberanu, el “gobernín”, tamién llograría escapar, como yá ficiera nel
34, acabando los sos díes en México.
El Mazucu fo una batalla na que se produxeron derroches
d’heroísmu per dambes partes pero anguaño la polarización política nun paez que
seya’l meyor caldu de cultivu pa promocionar valires que son siempres
necesarios nel devenir de les naciones. Nel Mazucu nun hebo más intervinientes
que los combatientes, yera un enfrentamientu ensin malapenes poblaciones, y
estes yá se evacuaran. Españoles matándose y morriendo nun tráxicu combate de
montaña, vaya nestes llínees el mio homenaxe y respetu a toos ellos.
Raúl Suevos
Coronel de Infantería (retiráu)
BIBLIOGRAFÍA Y FUENTES
Aznar, Manuel. Historia militar de la guerra de España.tomo II. Ed. Nacional, Madrid, 1969.
Gárate Cordoba, José María. Mil días de fuego. Luis Caralt ed. Barcelona, 1972.
Madariaga, Salvador. España, ensayo de historia contemporánea. Espasa Calpe, Madrid, 1989.
Orwell, George. Homage to Catalonia. Ed Penguin modern classics, London, 2000.
VVAA. La guerra civil en Asturias. Ed Jucar, Madrid, 1986.
[i]
Carrocera, un de los combatientes asturianos de más sonadía, yera anarquista de
llarga trayeutoria y participara nos asaltos a los cuarteles de la guardia
civil demientres la revolución d’ochobre; tamién formara parte del asaltu final
al cuartel de Simancas en Xixón, acciones dambes que, posiblemente, y-ficieren tener cuentes pendientes.
[i]https://bibliotecavirtual.asturias.es/i18n/publicaciones/listar_numeros.cmd?tipo_busqueda=rangofechas&busq_idPublicacion=
[i] Partido
obrero de unificación marxista
