Raúl Castro sigue firme

 

A principios de la década anterior atopábame destináu en L’Habana. Yeren tiempos de transición interna, con Fidel retiráu voluntariamente al so puestu de “soldáu de les idees” y el so hermanu Raúl tratando de vender una supuesta singladura del réxime haza estáu de la nación nuevu que nunca nun aportaría siquier a salir de puertu, por más que na Asambleya cubana s’aprobaren unos “Llineamientos pa l’actualización económica y social” que dende l’entamu provocaron escepticismu ente los cubanos, y namái xeneraron esperanza nos estranxeros afincaos na islla que, como suel asoceder, anque pretendiéremos lo contrario, nun mos enterábemos de per ú soplaba l’aire.

A Raúl Castro, per aquel entós, yá lu enterraben cada tres por cuatro, inclusive enantes qu’al so hermanu, el Comandante, qu’entá diba aguantar hasta avientu de 2016. Otorgaben-y toa mena d’enfermedaes terminales, les más d’elles rellacionaes cola inxesta del ron cubanu al que, supuestamente, debía de ser abondo aficionáu dende edá bien temprana; pero too yera inútil, y el antiguu comandante del Segundu Frente siguía ellí, impasible, viendo pasar el tiempu y camudar los presidentes del gran Satán yanqui.  Y ehí sigue.

Nos actos del Primer de mayu, coñazu al que yera regularmente invitáu, y permítome l’axetivu peyorativu n’homenax al señor Rajoy cuando yera líder de la oposición y tenía qu’acudir al desfile otoñal madrilanu, hacía gala de bona forma física aguantando estoicamente’l xusticieru sol caribeñu y la homicida humedá de L’Habana ensin malapenes pestañear, o eso me paecía a min que sufría’l castigu baxo una boina de fieltru, muncho menos adaptada que’l sombreru de guahiru baxo’l que Raúl s’abellugaba. L’apriete de manes que me sacudió nuna d’esas ocasiones refrendaba la bona salú qu’a distancia aparentaba.

No económico la so afirmación prodúxose col aportar del Periodu especial tres la salida de los rusos nel 89 y el permisu de Fidel pa que los militares fueren por llibre y, pa ello, Raúl punxo a Xulio Casas Regueiro, la so man drecha, a desendolcar un sistema económicu propiu pa les Fuercies Armaes, col xixonés d’orixe Álvaro López Miera, anguaño ministru del MINFAR, como relevu ñatural, y el so xoven xenru Luis Alberto R. López-Calleja como aprendiz y director futuru de lo que sedría col tiempu’l principal entramáu económicu del país, GAESA, el grupu alministrativu empresarial de los militares cubanos que güei controla más del 60% de la economía del país.

Un infartu inesperáu tin liquidao los planes de Raúl y por embargu, na fotografía qu’ilustra la información del funeral laicu de López-Calleja, podemos apreciar a un enorme y a la vegada intrascendente presidente Díaz Canel, un perescosáu nos sos 90 años Ramiro Valdés, un esfondáu López-Miera, y un firme y marcial xeneral d’exércitu Raúl Castro quien, magar los sos 91 años, témome que, pa desgracia de Cuba, caltien aínda tenses les riendes de Cuba anque perdiera a un gran collaborador.

Raúl Suevos

A 3 díes vencíos de xunetu de 2022

Torna en castellán en repdiv.blogspot.com