Domingu gloriosu en Xixón con sol
espléndiu y un nordestín que nin siquier trae fresco. Día pa enllenar l’arenal
de San Lorenzo y paseyar la so oriella como bandaes de flamencos mientes la
pleamar mos va arrequexando escontra’l Muru, con amnistía final concedía pola
marea de lluna nueva. Ye lo qu’hai y lo que toca, a vecinos y foriatos.
Ye día de negres alcordances yá que güei
se cumplen los 25 años del desalmáu asesinatu de Miguel Ángel Blanco a manes de
los valientes gudaris vascos. Ye poro que’l gobiernu tien llevao al Rei a dignificar
un actu recordatoriu que tien servío, más qu’otra cosa, pa poner n’evidencia les
contradicciones de la política anguaño, o meyor, destos años caberos.
La hermana del sacrificáu y l’alcalde d’entós,
artífiz principal daquel movimientu de les “manes blanques”, tiene aportao la
so voz a les principales cabeceres radiofóniques esta mañana de branu gociosu;
supongo que tamién lo tendrán fecho nes televisiones, too ello, xunto colos
espacios dedicaos estos díes caberos a recordar aquel asesinatu espantible, definitoriu
de la catadura moral d’esa banda d’asesinos y de los que dende’l silenciu o l’aplausu
los sofitaben entós y aínda anguaño los auríen, facíen pensar que Miguel Ángel
Blanco sedría’l tema de la parolada del día, el trendic topic que-y dicen los
modernos. Pero nun me paez que seya asina.
Quiciabes ye que yá son munchos años, o ye
probable que namái los que mos vimos afectaos directa o indirectamente pol
fenómenu terrorista temos entá pendientes d’aquello, nes sos facetes estremaes,
la territorial, la social, la política, la carcelaria…les víctimes, pero’l casu
ye que, tres esfrutar del bañu cantábricu vivificador, empleguéme fonderamente
nel paseyu cotidianu de la orilla playera, u ye poco menos qu’imposible,
especialmente en díes multitudinarios como’l de güei, nun oyer les parolaes
ayenes. Y Ermua nun esistía.
La gastronomía ye lo que más preocupa,
con dedicación especial a la proteína animal en forma de chuletón, y ausencia
llamativa del cachopu, seguramente más apreciao allende’l Negrón qu’equí mesmo,
y tamién con dalguna preocupación pol preciu del bonitu en xeneral y de la ventresca
en particular. El peligru de los rayos solares tamién ye tema de conversación,
y más l’Uviéu que non el Sporting ¿Sedrá que’l domingu mos invaden los
carbayones? Milenta asuntos más, triviales, pero nada d’Ermua, nin d’Ucrania.
Les naciones renuevense ca día, colos neños
que nacen y los mayores que se van, y el tiempu, que dicen que tolo cura, fai
que les preocupaciones populares corran per siendes que nun son siempre les que
políticos y prensa quieren señalanos, y ello nun sé si ye bono, o malo, pero ye
la realidá.
Raúl Suevos
A 10 díes vencíos de
xunetu de 2022
No comments:
Post a Comment