La trescendencia histórica

 

La trescendencia histórica algamase cuando los fechos llevaos a cabu por una persona o colectivu continúen o caltienen los sos efeutos, o conocimientu, col pasu del tiempu; ye lo qu’asocede coles obres lliterarias de dalgunos autores, como Cervantes, o colos fechos notorios de dalgunes figures históriques, como Cortés. Y uso estos personaxes por nun pertenecer a la realeza, que yera lo habitual pa llograr la trescendencia en tiempos pretéritos.

Vien esto a cuentu porque anueche pude oyer de boca del señor Huerta, percurtiu ministro del históricu doctor Sánchez, que nela atristada ocasión de la so despidida, l’inquilín inefable de la Moncloa malapenes-y dexó falar; too foi un entrugase cómo-y diba tratar la historia, a él, ensin dulda un ególatra contrastáu. Probablemente un momentu d’indecisión presidencial previu al desahuciu del muertu más vivu d’España de la so monumental tumba granítica, pos nun va muncho declaró que con ello pasara a la historia. Ye lo qu’hai.

Nun tengo nidio que la trescendencia guetada alcance resultaos, y menos nestos tiempos, especialmente na política, que se distingue pola falta de figures d’altu nivel, non sólo n’España sinon, podríemos afirmar, en tou Occidente. Dalgo que podemos ver nalgunos detalles, como la eleición ensin llucha, por falta de candidatos, del nuesu presidente de gobiernu pa presidir la Internacional Socialista, una organización que nun ye más que la solombra de lo que yera al entamu del sieglu XX.

Esisten, por embargu, dellos personaxes, que paecen, magar ser católicos, tocaos pol fervor calvinista de la escelencia profesional, magar tener edá y caudales pa esfrutar d’un retiru prestosu y soleyeru na so tierra natal. Ye’l casu de Mario Draghi, al que’l públicu en xeneral tevo oportunidá de conocer mientres el so combativu periodu al frente del Bancu Central Européu, dende onde, según dalgunos, non sólo salvó al Euru, sinon a toa la Xunión Europea, tres lo cualo, aínda tevo valor p’acudir a la llamada de la so patria, siempres tarrén difícil, y sacar a Italia de la agonía política na que s’atopaba, al frente d’un gobiernu por él presidío.

Agora aporten noticies de que la Xunión Europea búscalu pa que se faiga cargu del Global Gateway, un proyectu d’infraestructures de tou tipu pa facer frente a China y la so Nueva ruta de la seda, asina como al Collar de perles marítimu. Un diseñu de 300 mil millones de euros en cuatro años; un plan d’auténtica trescendencia histórica mundial pal que se busca a daquien que seya a trescender verdaderamente percima de les ideoloxíes.

Raúl Suevos

A 31 díes vencíos de xineru de 2023

Torna en castellán en repdiv.blogspot.com

Revisitando Rusia dende'l club de Roma

 

Siempres me prestaron les conferencies. Suelo tar al día de les programaes na mio ciudá y poro apename tomar conciencia de la mio condición provinciana, porque la realidá española ye que, como en casi tolos órdenes, ta lo de Madrid y lo de provincies.

Pertenezo a esi grupu de bichos raros que, llibreta en mano, toma notes nes conferencies. Nel mio casu porque la mi memoria de mosquitu obligame, y dempués, colos repasos d’eses llínees, intento afondar nel asuntu, si ye que merez la pena, y dir un pocu más lloñe. Acumulo yá, cuestión d’edá, varies llibretines cargaes d’escritura apretada que namái’l so propietariu podría descifrar.

Esta mañana quien manda na casa entrugóme si podía tirar una d’elles, y al repasar lo qu’ellí había, pa min un tesorín, atopeme coles notes d’una conferencia nel Club de Roma de Madrid, un 15 d’avientu de 2014, que’l so títulu yera “el nuevu (des)orden mundial”, y ente les notes que tomé, les tocantes al señor Martín Ortega Carcelen, entoncenes lletráu y profesor universitariu y anguaño analista principal del Real Institutu Elcano amás de lo anterior, apuntaba en rellación a Rusia, cola ocupación de Crimea reciente, y los restos del avión de KLM derribáu polos rusos sobro’l Dombás recién aportaos a los Paises Baxos pal so estudiu, que: “Rusia tien cuatro problemes, demografía, esperanza vital de 60 años, educación probe-meyor cola URSS, economía de mono-productu y estructura oligárquica, líder fuerte y hai qu’atopar una salida honorable pa Putin”, unes sintétiques marruques que dan pa pensar ocho años dempués, o a lo menos pa repasar.

Tocantes la demografía y la esperanza vital, tenemos qu’añader al problema perenne del alcoholismu, la bomba demográfica que representa la muerte de más de cien mil mozos nos frentes de guerra, a los qu’hai qu’amestar el millón calculáu de mozos n’edá militar y con formación universitaria, especialmente los de les nueves tecnoloxíes, que, tres fuxir de Rusia, amás de facer baxar asperamente esa esperanza vital, van a emprobecer el texíu cultural-económicu de la nación. En rellación al monoproductu económicu, a la vista ta, puestu que los europeos sofrimoslo cola situación anguaño de suministros y precios de los productos enerxéticos pero pa Rusia, lloñe de meyorar, agora vense espulsaos d’un mercáu llibre y abiertu, como yera enantes de febreru de 2022, p’atopase nes manes de unos pocos veceros, especialmente China y la India, en condiciones d’esixir unos precios mui desfavorables pa Rusia.

Quédamos la cuestión Putin, al que ca vegada veo más acorraláu y con menos posibilidaes p’alcontrar la salida honorable que suxería Ortega Carcelen. Y les fieres acorralaes son mui peligroses.

Raúl Suevos

A 30 díes vencíos de xineru de 2023

Torna en castellán en repdiv.blogspot.com

Estación central de Milán

Güei tenemos comida familiar y namái mos dexen unes hores llibres pa facer un percorríu rápidu pel urbanismu milanés, ensin paraes, o namái les obligaes; y pa ello tomamos el metru al llau de casa, en San Siro, xunto al renomáu estadiu, arrodiáu per una gran esplanada-aparcamientu que-y da la posibilidà d’alendar y llucir impresionante inclusive nuna mañana desapacible como la de güei. Puedo maxiname l’impactu visual nuna nueche de derby ente’l Milan y l’Inter.

Tres la nuesa temporal mutación en topos urbanos alúmbranos el día nel marcu incomparable de la Estación central de Milán, y ríanse vustedes de la de Nueva York. Golpia la vista dende’l primer instante y quiero entamar a esplorala pero obliguenme a tomar un ristretto cola cremina, un chute de cafeína, enantes de somorguianos na obra magnífica. Con escaleres descomanaes y toa ella n’estilu neoclásicu llámame l’atención la falta de símbolos de los Saboya, anque nel gran salón descubro un mosaicu bien grande col toru y la corona de fierru. Sobrestantes a les grandes puertes descubro unos frescos (¿) espectaculares con vistes de les grandes ciudaes italianes, toes elles reconocibles; y más allá la playa de víes cubierta por unes bóvedes de fierru y cristal escomunales. Impresionante y guapo a la vegada.

Salimos pa catar la fachada, tres la que s’amazcara una zona acutada a la familia real con pasadizu d’escape incluyíu y que, al paecer, nun ye visitable, pero, nós tenemos que retroceder munchos metros pa algamar un bon encuadre y ye entós cuando columbro nel frontis la fecha de 1931, periodu fascista por escelencia, razón pola cuala l’edificiu ta tan guérfanu de simboloxía. Una pena porque los adornos de la ilesia de San Antonio de Pádova de Zaragoza son barbáros.

Dend’ellí tomamos una diagonal p’averanos a una de les zones urbanes nueves que tien como polu d’atracción el conocíu “bosco verticale”, un edificio doble, anguaño de sonadía mundial, que se diseñó para soportar terraces individuales arbolaes y que, magar ser hibiernu, caltien un indudable encantu que se suma a los parques y permodernos edificios de la zona de Porta Garibaldi. Y siguen construyendo, y siguen creciendo los precios.

Dende la Porta tomamos haza Chinatown, per Paolo Sarpi, que l’atraviesa toa agalanada pos tamos en víesperes del Añu nuevu chinu y l’actividá ye febril ente los munchos ítalo-chinos y los curiosos, foriatos o non, que pululamos pela zona. Y más allá aportamos a l’área de Tre Torri, lo más nuevo ente lo nuevo de Milán. Tres edificios descomanaos, un d’ellos de nidies connotaciones fáliques, en qué taría pensando l'arquitectu, que s’abren en semicírculu pa enfrentase a una zona de parque que se pieslla con una serie d’apartamentos, dalgunos aínda en construcción, col preciu por metru cuadráu más altu d’Italia, y con propietarios, como Clara Ferragni, ente los influencer más importantes del mundu. Lo más de lo más.

Corremos al metru pa nun llegar tarde. Va siguirá.

Raúl Suevos

A 29 díes vencíos de xineru de 2023

I ('ve) got you, babe

 

Creo que debía andar yo per primero o segundo de bachiller, nel colexu Politécnicu de los Campos, va tanto que me cuesta recordar, pero sí tengo nidio que yá entoncenes me gustaba dar el cante, y en llugar de coleicionar cromos de futbolistas como la mayoría, yo dedicábame a los de cantantes y similares; y “Sony and Cher” yeren lo máximo, xunto a “The mamas and the papas”. Yeren los tiempos de la música hippie, de la que supongo que ye herieder eso qu’agora llaman Indie, anque nun toi seguru de esto último.

L’asuntu viénome porque va un par de nueches, güeyando una serie de eses yanquis que per ca momentu “guay” dante tres pa dir al diván del psiquiatra, “This is us” ye’l so títulu, punxeron un canciu que darréu me llevó a los mio cromos, nos que la incombustible Cher taba aínda al natural, fresca, ensin pasar por ciruxía, con un flequillu espantible. Yera “I (‘ve) got you, babe”.

Una canción de 1965 que ye un canticu al amor, a la entrega, a la certidume de que teniendo al llau a la to pareya too va ser más fácil, y los díes más rescamplantes. Merez la pena lleer la lletra, pos los sos versos sirven para facer comparances odioses colo que los lletristas modernos mos ofrecen. El so ritmu sele, melódicu y tranquilu, paez querer recordamos qu’amar nun tien por qué ser complicao, al contrario, Cher, que lleva la voz cantante, como-y pasaba a Tina con Ike, consigue da-y, sofitada nuna lletra bárbara, unos tonos de tenrura que convierten a esta canción nun auténticu himnu al amor, al amor pacible, al amor pa toa una vida; al amor de pareya nel que caun se da al otru.

James Brown tien tamién un canciu con esti mesmu títulu pero él da-y, aparte del ritmu rockeru y rompedor que namái él llograba algamar, un tonu muncho más carnal al asuntu, paez más un canticu d’alegría por tener garráu “cachu” cola moza tres un más o menos llargu asediu; ye un canticu de victoria masculina, nada que ver cola complicidá de Sony y Cher, quienes, a éstes, divorciáronse unos años depués. Ye lo qu’hai.

Nel llau de los “Mamas and the Papas” la cosa nun fo muncho meyor; la so “California dreamin”, coetánea del “I got you”, fo tamién un ésitu epocal que sigue sonando anguaño, anque ellos separáronse poco depués, pero queda lo importante, el mensaxe d’esperanza y d’amor qu’a min prestaríame tresmitir a les pareyes que, nestos tiempos d’obsolescencia programada, siguen pensando que merez la pena embarcase en viaxes ensin final aseguráu.

Raúl Suevos

A 27 díes vencíos de xineru de 2023

Torna en castellán en repdiv.blogspot.com

Margarita ta a la defensiva

 

La nuesa ministra de defensa ye perra vieya, dicho esto con ánimu cervantín, por aquello de que “yo soi perru vieyu, y conmigo nun hai tus tus”, y non con connotaciones misóxines. Va dicho teniendo en cuenta la so llarga trayectoria como maxistrada n’exerciciu, y, sobremanera, como política con trienios, pos, a lo último, yá exerció de pseudo-ministra cuando Belloch, nel gobiernu caberu de González desempeñábase de superministru de xusticia ya interior, y a la nuesa simpática Margarita toco-y trepar, como cabecera d’Interior, col apresamientu del pernomáu Roldán tres el so escape y fuga. Quiciabes d’ehí-y venga la so tensión anguaño col so colega Marlaska, quién sabe. 

Margarita lleva tiempu toreando col asuntu de les unviades d’armamentu a Ucrania, dalgo que, hast’agora, resolviera col espediente de llamar a la confidencialidá y la seguridá pa d’esta forma nun soltar prenda. Daqué de positivu pos asina evitaba dar cuenta de la fraxilidá de la nuesa ayuda; meyor dexar que la carga de la prueba cayera sobro Alemaña, anque ésta fuere la segunda proveedora en valir de lo unviao, namái detrás de los EEXX.

Pero too, o casi too, acaba por tener un final, y nesta cuestión de los sofitos armamentísticos a Ucrania asina tien asocedío. Culpa de los Leopard. Dichosu Zelensky que nun dexa de pidir por esa boca y va acabar por metenos a toos nun líu. Líu d’imaxe d’unos y d’otros, pero d’unos más que d’otros.

Que la defensa europea tea fecha unos zorros yá se sabía. Hasta’l impresentable de Donald Trump tevo ocasión de saca-y los colores a la entoncenes todopoderosa Angela Merkel a cuenta de la poca inversión en defensa. Pero Alemaña, y tamién otros países, tienen industria y superávit estructural como pa revertir la situación en tiempos curtios. Nun ye’l nuesu casu.

La selmana pasada Margarita nun asistió a la cume de la OTAN; yera una reunión técnica, ensin importancia, dixo; anque presidiera el Secretariu xeneral y participaran los sos colegas, inclusive’l secretariu de defensa USA; tratábase de caltener un perfil baxu pa casa, au los sos socios de gobiernu llamen cínicamente a la desescalada y la diplomacia, por nun nomalo apaciguamientu, de vieyes y aparaxaes connotaciones. Nun hai que confrontiar, non hasta que l’históricu doctor Sánchez lo decida teniendo en mente’l calendariu electoral. Ye lo qu’hai.

Pero agora hay que moyase; vamos a unviar los Leopard, los que nun tenemos, o tenemos semidesmontaos, o pa chatarra. Carros que van requerir tiempu ya inversiones pa la so recuperación previa dende’l so estáu actual y que van servir, sobre too a nivel internu, pa que se fale, muncho, demasiao, del estáu llamentable de la Defensa de nueso, ca vegada menos solvente si tenemos en cuenta les inversiones del nuesu vecín del sur.

Y Margarita pónse a la defensiva cuando fala con la prensa.

Raúl Suevos

A 27 díes vencíos de xineru de 2023

Torna en castellán en repdiv.blogspot.com

Milán n'hibiernu (III)

 

Na vieya oposición d’ingresu a l’Academia Xeneral Militar de Zaragoza, pervieya, los opositores entrábemos diariamente pel imponente paséu arboláu que va finar na parte trasera del patiu d’armes, col mástil y la bandiera, y, haza’l paséu transversal, escenariu de los desfiles de la vetusta casa, cola maxestosa estatua ecuestre del xeneral Franco, fundador de la institución, y retirada va yá dellos años.

La tradición nun escrita dicía que trayía mal fariu mirar los xenitales del xigantescu animal, y, pa la mio desgracia, o quicías posterior xustificación, el primer añu nu pude nun echa-y una gÜeyada curtia, colos efeutos consiguientes que la superstición marcaba. El casu ye que, dende entós caltengo una rellación estraña con esa parte anatómica de los broncíneos corceles. Qué se-y va facer, ye lo qu’hai.

Tres el paséu peles Galeríes, nu quedó otra que tornar al espaciu abiertu, esta vegada con un sol blacuciu y na perguapa plaza del Duomu, que enfrente de la so fachada s’atopa’l monumentu a Vittorio Emanuele II, y nun pude evitar echar una güeyada. Y, oigan, nun hai color, magar l’aire guerreru y combativu con que l’escultor reflexó’l momentu del rei y el so animal, posiblemente pensando nel fragor del combate en San Martino de la Battaglia, na so vista de retaguardia esponía una gran poquedá d’atributos; nada comparable a los del del nuesu damnatio Xeneral, nin muncho menos colos pernomaos del burru del xeneral Espartero en Logroño. Pero’l conxuntu, aínda asina, ye formosu.

L’horariu, dende ellí, namái mos permitió yá dar un paséu hasta l’averáu Palazzo Sforzesco, fortaleza palacio imponente construyida polos Visconti y aguapecida polos Sforza, sobremanera por Ludovico il Moro, que traxo, ente otros, a Leonardo da Vinci, pa trabayar los frescos de dalgunes sales. Enantes, nuna plaza, acosáu polos tranvías, atopamos a Garibaldi, tamién a caballu pero en posición estática, y a quien, conociendo los atributos del personaxe, “l’héroe de dambos mundios”, evito l’agraviu d’investigar el so rocín.

Cruzamos el complexu palaciegu pa ver la Puerta de la Paz y el Parque Sempione, vieya Plaza d’Armes, per u entraron na ciudá Vittorio Emanuele y Napoleón III tres la victoria de Maxenta, pa dar media vuelta y a pasu rápidu tratar de llegar en tiempu a onde acutáramos pa homenaxanos nós mesmos.

El Nerino Dieci ye una trattoria que s’atopa au’l so propiu nome indica, mui apreciada, hai qu’acutar siempres, y namái voi dicir que’l gnoccu fritu al carbón vexetal, con lardu de pata negra, miel a la trufa y nueces tostaes taba exuberante.

Va siguir.

Raúl Suevos

A 26 díes vencíos de xineru de 2023

Torna en castellán en repdiv.blogspot.com

Cantó sigue cantando

 

Paez que yá nun tien partíu que lu acueya, y eso que lo tien intentao con unos cuantos, anque nun sé si ye que escoyía a aquellos a puntu d’amorrentar o yera él el que espoxaba la sienda aciar de la organización na que se inxertaba. Ye lo qu’hai.

El casu ye qu’esti inefable actor valencianu tornó a la so tierra tres el pieslle ¿llegó a abrir? del Institutu del español que la presidenta madrilana-y montara pa compensar la so cabera, publicitada y fallía espantada dende Ciudadanos a la llista rexonal del PP; fallía porque nin siquier taba empadronáu na capital y, magar intentalo, la Xunta electoral nun tragó. Una pena.

El proyectu profesional nuevu col qu’anunció la so despidida de la ciudá de los Austrias, paez ser, consiste nun progama televisivu nuna televisión rexonal valenciana nel que desendolca monólogos de calter políticu y social ¿sabrá esti homín que’l monólogu ye la pieza xenuina dende va dellos sieglos del teatru costumbrista asturianu? En castellán y en bable. Posiblemente non, poro, probablemente, tiense despachao diciendo babayaes que, nun siendo yá políticu, debió pensar que yeren gayasperes.

Cantó, faciendo la gracia, diz que n’Asturies tán inventado’l bable, esto ye, la mesma matraca que los indocumentaos vienen usando dende siempres. En qué falaríen los nuesos antepasaos ¿pasaríen del llatín al castellán, ensin más? ¿tendrá oyío falar del Fueru d’Avilés esti individuu? ¿Y ú tán esos millones d’euros que según él se tán invirtiendo nel bable? Ye tan penosa la so intervención, precisamente nuna rexón que ta permitiendo que Cataluña-y robe la cartera llingüística, que hasta da desdexamientu escribir estes llínees.

El remate de la so fadía actuación monologuista vieno a cuenta de la vistimienta del presidente rexonal, señor Barbón, que les sos polítiques rexonales, na mio opinión y con independencia del resultáu de les eleiciones vinientes, nun creo que dexen dala alcordanza cuando, nel sieglu viniente, tengan acabao les obres de la Variante, pero montar una actuación cómica sobro la vistimienta de daquien que representa a una rexón ayena a la de so paezme una mazcayada barata.

El bable, la Llingua, ye una llengua española, minoritaria y minorizada, esto ye, que ye la menos falada na so zona d’influyencia, y, amás, sufre la presión de la mayoritaria, que nesti casu ye’l castellán. Ye una llengua, vieya y formosa, que va tener el futuru que los asturianos, mayoritariamente, queramos da-y, anguaño pente medies de los preseos que la Llei d’Usu mos permita, y nel futuru, quién sabe.

Nun dé’l cante señor Cantó.

Raúl Suevos

A 25 díes vencíos de xineru de 2023

Torna en castellán en repdiv.blogspot.com

Milán n'hibiernu (II)

 

Col pancerotto a medio consumir doblamos la esquina pa baxar otra vegada haza’l Duomu, anque nun podemos evitar aselanos nuna tienda lluxosa, de materiales de Ferrari: bolsos, zapatos, cinturones, y redingotes de cueru; nun hai nin llaveros nin imanes de frigoríferu, too paez diseñu esclusivu pa propietarios de la “machina del cavallino rampante”, y, sicasí, nun hai dalu preciu a la vista, de mou que, con un xestu d’abandonu, siguimos el nuesu camín.

Cien metros más abaxo tamos yá na zona de la Catedral y ocurresemos probar a ver si hai posibilidá de tomar un café cola cremina, una variante del tradicional italianu, na Rinascente, que s’alluga a mandrecha de la plaza; quiciabes la cadena más importante del país y que tien nesti llugar particular un exemplar dedicáu esclusivamente a les marques, pero tamién una terraza con restaurante na so planta cabera qu’ofrez unes vistes maravioses sobro la Catedral milanesa.

Subimos peles escaleres mecániques esforciándonos por resistir el retientu. Yo mesmu toi al puntu de cayer cuando columbro nun llateral de la planta de caballeros la tienda de Hogan, pero pienso na cuesta de xineru y resisto estoicamente. Na siguiente planta la muyer sal disparada haza una diabólica esposición de ropa de neñu y bebé de Versace. Ella, probina, ta en plenu estáu de bona esperanza güelil, anque nun esista esta definición, y cuestanos arrancala, pa siguir hasta la terraza, au mos despachen por tener yá l’espaciu aparexáu pa la comida. Otra vegada será.

Quedenmos les Galeríes de Vittorio Emanuele II, pasaxe impresionante diseñáu en 1861, malapenes un par d’años depués de la victoria de Solferino y la anexón al reinu de Sardeña, ya imaxe milanesa por escelencia xunto al Duomu. Nun hai posibilidá dalguna pa los zaragozanos de comparales col Ciclón, que tien el so encantu pero nun ye lo mesmo, tampocu coles parisines; namái les d’Umberto I en Nápoles son semeyantes pola so dimensión y guapura.  

Ellí, nes galeríes, ta la pastelería Marchesi, siempre con impresionantes coles que gÜei, gracies al fríu punxante, ta a la nuesa disposición pa tomanos unos capuchinos ensin siquier esperar un minutu, coles meses altes sobro’l cruce de la Galería a la nuesa disposición, dominando l’almirable escudu del toru de los Saboya y el restu d’adornos del impresionante suelu.

Col sabor del capuchín entá en boca salimos haza la plaza del teatru de la Scala, anque nun podemos evitar paranos a güeyar una novia perguapa, modelu, que resiste como pue’l fríu reinante mientes-y faen el reportaxe.

Va siguir.

Raúl Suevos

A 24 díes vencíos de xineru de 2023

Torna en castellán en repdiv.blogspot.com

Contratu con España

 

A naide se-y escapa que tamos yá en campaña eleutoral, y asina debe güeyase l’actu que güei tevo llugar nel oratoriu gaditanu de San Felipe Neri, see circunstancial de les Cortes constituyentes de Cadiz, aquelles de la Constitución de 1812, la Pepa, y que’l so discursu introductoriu a cargu del asturianu don Agustín Argüelles sigue siendo anguaño una amuesa mayúscula de lo que yera la oratoria política española d’antaño.

El señor Feijoo, al que les encuestes caberes paecen allugar como presidente futuru del gobiernu d’España, cola ayuda valiosa del inquilín actual de la Moncloa, debió tomar como referente al señor Newt Gingrich, vieyu presidente de la Cámara de representantes de los EEXX quien, en 1994, coles encuestes al so favor, avanzó pa la so campaña presidencial un “Contratu con América” nel que definía una serie de midíes que diba tomar en cuantu que algamase la presidencia; anque, infelizmente pa él, nunca llegó a sabese si caltendría la pallabra pos nun algamó a ganar les eleiciones.

El xestu, en cuantu midía de comunicación pública, tien la so enxundia, y, naturalmente, güei ye la noticia d’apertura de tolos medios de comunicación. Nel so contratu, el señor Feijoo, prometenos básicamente tornar la mayoría de les midíes tomaes pol gobiernu Frankestein, según memorable calificativu que la so paternidá pertenez al fallecíu Rubalcaba. Daqué que ta mui bien pero nun ta nidio que seya abondo.

Un de los elementos que tien enxendrao más interés de la prensa foi la propuesta pa camudar la llei eleutoral de forma que gobierne’l partíu más votáu, pa lo que se reservaría un premiu de representantes, al mou como yá se fai en dalgunos países non sólo a nivel municipal sinon tamién al rexonal y al nacional. Hasta ehí nun tien aportao Feijoo.

Ye nel cambéu de la llei eleutoral, xunto cola independencia del poder xudicial, au s’atopa la clave pa una rexeneración de la calidá democrática del país de nueso. Con ello, de forma sucesiva y automática diríense resolviendo los problemes y tares qu’anguaño mos tiñacen. Bastaría una llei eleutoral con sistema mistu, lo cualo caltendría la proporcionalidá y representatividá del sistema, daqué que nun s’algamaría con un premiu de representantes pal ganador, que namái serviría pa arrequexar a los estremos, esquierda y drecha, dexando en cambiu la posibilidá de que los partíos separatistes, en según qué situación, pudieran siguir xantaxando al partíu de gobiernu.

Si los programes eleutorales nun tienen valir contractual col votante paez mui difícil llegar a pensar qu’esti Contratu vaya más allá de un simple xestu eleutoral, eso sí, mui bien montáu.

Raúl Suevos

A 23 díes vencíos de xineru de 2023

Traducción en castellán en repdiv.blogspot.com

Milán n'hibiernu

 

Ye una ciudá que lleva dellos sieglos trepando cola sonadía de ser la más rica d’Italia. Agora dicen-y capital económica del país pero, pa la nuesa historia, queda aquello que dicía l’emperador Carlos: “Francisco, el rei de Francia, y yo, namái mos ponemos d’alcuerdu nuna cosa, dambos queremos Milán”, y ye que yá entós, tres el pasu de families de nombradía a la tiesta del ducáu, como los Visconti, o los Sforza, la ciudá, capital de la Lombardía, tenía fama de xenerar muncha bayura. Anguaño sigue asina.

Col programa Erasmus y los viaxes de baxu coste, la qu’enantes yera destín d’executivos al socaire de les estremaes y abundoses industries qu’ellí residen, agora ye un formigueru de xentes de pelaxe diversu, y, sicasí, variada raza, que verbenen per toes partes con atracción especial pela plaza del Duomu, la catedral, y la so redoma, lo que fai que, en munchos casos, la visita a la ciudá acabe siendo pa escaecer.

A nós, en visita familiar na ciudá, garrarónmos los rabotazos caberos de la penúltima borrasca, que yá nun recuerdo si llegó a ser bautizada. El casu ye que, el miércoles pasáu, con nevada lixera na ciudá hasta les diez de la mañana, decidimos aventuranos nel centru, en plan a ver qué pasa. Y pasó que taba perfeuta.

Baxamos en metro hasta Lima, en plenu Corsu Buenos Aires, un pocu enantes de la ablucante doble Porta Venezia, coles sos tiendes de grandes firmes y la so xente guapa cargando bolses de nombradía, anque col fríu reinante namái algamamos a ver una pareya de xaponeses? Chinos? Ca día ye más difícil estremalos. Ellos mesmos yeren un espectáculu de moda, ensin necesidá de la compra recién fecha. Nun escaparate lucíen unos texanos estratéxicamente rotos combinaos con un minianorak mariellu doráu, anque pa nun asustar nun poníen el preciu. Enfrente, l’edificiu d’Armani suxería a los mortales güeyar pa otru llau.

La cai, amás de moda, tien una coleición d’edificios neoclásicos que quita l’hipu, anque tou paez d’acordies cola redolada, inclusive los tranvías modelu vieyu de los que la ciudá caltien un gran númberu. A la fin torcemos a la drecha, y anque se divisa yá l’ábside catedraliciu, güei en parte n’obres y ocultu por una superpantalla publicitaria, nós guetamos otru tesoru, non siempres al algame del personal debío a les coles descomanaes, casi como les del Duomu. Trátase del pancerotto de la panadería Luini que, fechu con pasta de pizza y rellenu, nel nuesu casu con mozarella y tomate, vamonos comiendo pela cai ensin tener qu’esperar gracies al fríu del día.

Va siguir.   

Raúl Suevos

A 22 díes vencíos de xineru de 2023

Torna en castellán en repdiv.blogspot.com

Aguardando per l'Alemaña

Como la mayoría de la mio xeneración crecí con una imaxe definida de la potencia guerrera alemana; una idea sofitada nes páxines d’historia que diben dende la derrota ocasionda a les lexones romanes na viesca de Teotoburgo hasta les campañes de la Wehrmacht na Segunda Guerra Mundial, ensin escaecer, sicasí, les bayonetes de Federico de Prusia o del canciller Bismarck.

Cuando nel 2004 m’atopé al mandu del Batallón multinacional del Eurocuerpu, n’Estrasburgu, guipé un continxente alemán nutríu que los sos medios y personal dieronme, mientres los dos años que tevi al frente, la oportunidá d’adquirir un conocimientu real y averáu sobro la freba del Exércitu alemán, y nun yera coincidente cola imaxe que tenía previamente.

Alemaña, tres el final clamorosu de la Contienda mundial, adoptó una posición ultrapacifista y antimilitarista que la tien llevao a dexar la so defensa, dende la nacencia de la Republica Federal, nes manes de los Aliaos primer, dempués de la OTAN, y siempres de los Estaos Xuníos, anque faciéndolo compatible col desendolcu d’una potentísima industria de defensa que rinde beneficios descomanaos al país coles sos esportaciones a munchos países.

La guerra d’Ucrania vieno a facer saltar tolos equilibrios; a nivel mundial y tamién européu. Y Alemaña, por boca del so canciller, paecía dar un pasu alantre al prometer, a pocu del entamu de la invasión, colosales inversiones en Defensa col oxetivu de ponese al frente d’esa siempres esperada defensa europea. Daqué que foi recibío con alegranza por tolos socios europeos, inclusive Francia.

Pasaos los meses aquello foi descaleciendo, hasta’l puntu de que los sofitos alemanes a Ucrania nun brillaben lo esperao, y el presupuestu de defensa alemán tien sufrío esti añu recortes nuevos. Agora, cuando munchos países europeos, ente ellos España, s’amuesen dispuestos a unviar los Leopard de patente alemana, el canciller Scholz ponse ronciegu pa llevantar el so vetu, y mañana, en Ramstein, la xigantesca base norteamericana nel sur d’Alemaña, el so ministru de defensa nuevu, con tres díes d’exerciciu, va sofrir les presiones de los sos colegas de la OTAN. 

Quiciabes seya la oportunidá cabera pal liderazgu européu d’Alemaña, y nun hai dulda que tantu Europa como Ucrania necesiten una Alemaña fuerte y asertiva. Ye lo qu’hai.

Raúl Suevos

A 19 díes vencíos de xineru de 2023

Torna en castellán en repdiv.blogspot.com

Italia Nostra

 

Demientres los primer díes de la nuesa vida familiar en Florencia, ne la seronda del 96, más allá de les pequeñes sorpreses que l’adautación a una cultura nueva te da ca día, y que n’Italia son más de les que los españoles piensen, pa nós yera especialmente sorprendente l’apartu de sirenes, helicópteros, furgones, motoristes, etc. que dos vegaes al día pasaba delantre de la nuesa terraza nel Lungarnu del Tempiu.

Yera la caravana que tolos díes llevaba a Totó Riina, el capo de la Cosa Nostra siciliana, al macroxuiciu que se desarrollaba na vieya cárcel florentina, convertía en fortaleza inatacable pa la ocasión, pol atentáu terrorista lleváu a cabu unos años enantes escontra la Galería de los Uffizi, con una furgoneta cargada con 280 kilos d’explosivos y que costara la vida de cinco desaventuraos, ente ellos dos neños.

Riina, el monarca mafiosu entoncenes nel tronu, tuviera “latitante”, en busca y captura, mientres 23 años, hasta que los Carabinieri echaron-y el guante. A él asocediólu Roberto Provenzano, latítante mientres 40 años y cazáu tamién po los homes del Beneméritu Corpu. Dambos morrieron tres los barrotes.

El so sucesor, y como ellos responsable de los más sangrientos  atentaos de la mafia siciliana, Mateo Messina Denaro, taba en fuga y condergáu a la perpetua dende diben 23 años. Munchu tiempu, demasiao, y ayeri acabóse la so historia.

Ayeri pela tarde, yá en plena escuridá invernal, aterrizamos en Milán en visita familiar, y, de camín a casa, paramos p’avituallamientu nun conocíu centru comercial; un chianti, unes birres, unos tacos de parmixanu, unos taralli picantes, y los imprescindibles tomates y mozarella afumicatta. Un plan perfeutu pa una cena ensin teyera y de ellaboración rápida, anque yá na cola de la caxa pudimos comprobar que yera una xornada diversable; morriera la Lollobrigida. La Lollo, pronúnciese Lol-lo.

Yá nel confort de la vivienda comprobamos que la noticia, mui perriba de la desapaición de Gina de muerte natural a los 95 años, yera Messina, atrapáu polos Carabinieri cuando esperaba la so sesión de quimioterapia tres intervención quirurxica con una identidá falsa. Recordamos, de la mano del telegiornale, qu’él tuviera detrás del asesinatu del xeneral Carlo Alberto de la Chiesa, creador del ROS ,el Riparto Operativo Speciale homólogu de la nuesa UCO y responsable del so apresamientu; tamién del estrangulamientu y posterior disolución n’ácidu del neñu/fiu del arrepentíu Di Mateo, pero, sobremanera, foi elementu decisorio del asesinatu con bomba de los maxistraos Falcone y Borsellino. Va morrer na cárcel, como Riina, como Provenzano, y munchos, anque la mafia nun tea derrotada, vanse alegrar.

La cena resultó estraordinariamente sabrosa y prestosa. Hasta mos tomamos una grappa barricatta p’acabar, y a la salú de los Carabinieri.

Raúl Suevos 

A 17 díes vencíos de xineru de 2023

Autoestima y feminicidios

 

Entamamos mal l’añu, mui mal. La tacada inicial de feminicidios tien sío terrible y da pa rustrigase si se piensa que tol añu va ser asina. Pero non, las series anualizaes qu’amuesa la páxina del institutu de la muyer enseñenmos que l’enclín ye a meguar, anque’l 2022, que les so cifres entá nun tán cargaes, se despida con 50, dos más que les de 2021. Demasiaes sicasí.

El mundiu de les cifres, o de les estadístiques si se prefier, ye friu, y nun mos cuenta los drames qu’esisten tres eses tables, anque sí que mos dan una idea del esfuerciu nacional, de calter políticu, social y cultural que sofita una tendencia positiva como ye la de nueso nos años caberos. N’España hai conciencia ciudadana nidia del problema, dolencia, o enfermedá social que representa, anque nun tengamos nidio cuála ye la solución.

Nel cómo lo enfocamos, témome, entra en xuegu’l nuesu problema tradicional de  l’autoestima que mos lleva a pensar que somos inferiores a los nuesos conciudadanos europeos. Y, nel caso que mos ocupa, la falta d’información sobro lo qu’asocede al otru llau de los Pirineos fai que mos reviciemos na nuesa autoflaxelación. Y ellí asoceden coses, anque nun se sepa.

En Francia, au inclusive tienen un observatoriu del feminicidiu, tán acabantes el 2022 con 110 muyeres asesinaes, si bien namái cuenten aquelles a manes de la pareya o ex. Si mos vamos pa Italia atopamos la cifra de 114 pal añu 2021, anque ellí namái cuenten aquelles masacraes na rodiada familiar-afectivu, esto ye, qu’aquelles que caen, por poner un exemplu, a la salida de la disco, quédense fuera de cómputu. Nel casu alemán l’asuntu complicase pos la llei torga’l facer un siguimientu claru y lo más aproximao son los informes policiales federales que se llenden tamién a la rodiada familiar-afectivo y dan pal añu 2020, últimu asoleyáu, la cifra de 139. Y 111 foron les britániques ultimaes nel Reinu Xuníu, tamién con un sistema de contéu restrictivu.

A guelpe de vista simple, tres dar una güeyada a les cifres de población, y arredondiando los datos groseramente, sálme que n’España, metanes el remolín políticu que tien fecho bandiera de la violencia de xéneru, tenemos un feminicidiu por millón d’habitantes, mientes que los vecinos de nueso, con recuentos más relaxaos, algamen o s’averen a los dos feminicidios por millón.

¿No sedría tiempu de meyorar la nuesa autoestima y gritar que somos campeones europeos na proteición de la muyer en llugar de tiranos ceniza encima y arrancanos el pelo? Nun atapecen les cifres de tresplantes de tou tipu de muérganos, no que somos campeones mundiales dend’acuantayá, y de lo que mos sentimos argullosos añu tres añu.

Que les bandieres polítiques nun mos enzanquen ver lo que somos.

Raúl Suevos

A 11 díes vencíos de xineru de 2023

Torna en castellán en abellugunelcamin.blogspot.

Guelpe en Brasilia

 

Atopamonos n’España ocupaos nuna guerrilla política costante que se reflexa especialmente nes engarriaes pol control del Poder xudicial, nos sos formatos estremaos de Conseyu, Tribunal Supremu o Tribunal Constitucional, y la llexislación que desuca del Conseyu de ministros y depués aprueben les Cortes.

Güei tuvimos ocasión de güeyar, pente medies telediarios, la Toma de posesión de los dos miembros nuevos del Constitucional, y, casi al mesmu tiempu, nes pantalles tamién podíemos mirar les imáxes del asaltu a les sees de los poderes del estáu brasileiru, Asambleya, Tribunal Supremu y Palaciu de gobiernu, lleváu a cabu por enxames de xente, o babayos, como se prefiera, de partidarios del presidente saliente Jair Bolsonaro. Unas sees, yá que tal, faltes de los sos estremaos ocupantes nel momentu del asaltu.

Les compararances colo asocedío dos años atrás en Washington yeren inevitables, y en dalgunos casos paecíen interesaes, porque escaecíen el detalle de qu’ellí, nos USA, taba’l Congresu en sesión pa ratificar la victoria de Biden sobro Trump; aición que los asaltantes pretendíen torgar p’asína paralizar el cursu de la llexítima sucesión política naquel país. Los feríos y muertos sedríen un añedío a l’aición principal, enzancar l’aición llexislativa.  

En Brasilia yá tol pescao taba vendío, col gobiernu nuevu n’usu plenu de los sos poderes y el presidente Lula de viaxe pel país; lo que facía del asaltu a les sees del poder del estáu un simple casu de desordes públicos, a lo menos cola nueva y boyante llexislación sacada adelantre pol nuesu gobiernu y la mayoría que lu sofita nes Cortes. Ye lo qu’hai.  

Llama poro l’atención que distintos voceros de los partíos que sofiten y formen el gobiernu salieran a sollertar sobro una ultradrecha española, a la que la mayoría se cuida d’identificar pero que lleva la imaxe de Santiago Abascal, que dende la so apaición tien fecho llamamientos costantes al respetu de les lleis, al contrariu de la segunda fuercia del gobiernu, inventora del escrache y a la que-y falta tiempu pa llamar a la ocupación de les cais ca vegada que-y solmenen una derrota nes urnes, daqué ca vegada más frecuente. Alvertencies, por cierto, que tamién dirixen al señor Feijoo, polo que pueda venir.

Creo que ye un exerciciu d’hipocresía política interesáu y descomanáu llamar a lo de Brasilia intentu de guelpe d’estáu. Nun se sostien énte la evidencia de les imáxes y la situación naquel país, pero danos un avisu nidiu de cómo d’indefensos mos atopamos énte la situación nueva, tres l’abolición de la sedición y la so sustitución pol delitu de desordes públicos. Al loru.

Raúl Suevos

A 9 díes vencíos de xineru de 2023

Torna en bable en repdiv.blogspot.com

El méritu del asturianu

 

Nes coses de la Llingua, el Bable pa la mayoría, va tiempu que tengo unes cuantes idees nidies, pa min. Nun ta’l país pa la cooficialidá, entá, por más que dalgunos quieran tomar esti atayu pa recuperar la llingua tradicional d’Asturies, que non propia. Nun se fai lo necesario por parte de l’alministración, el Principáu, para sacar la Llingua del estáu preterminal nel que s’atopa. Da vergoña lo poco que se sofita a l’Academia. Ye cosa d’indocumentaos dicir que ye una llingua inventada, y, agora tamién, sofitase nun estudiu del INE que nun incluyía al bable na tabla d’entrugues. Y dalgunes más qu’agora nun me vienen.

Que nun hubiera un informativu en llingua asturiana na televisión rexonal, a estos altores, paecíame una desdexación política rayana na desidia, o cagar la berza, daqué de lo que tampocu hai que chocase si tenemos en cuenta el nivel de la clas política rexonal y nacional, anque cabe recordar que, nel so momentu, el direutor de la RTPA xustificóse énte la falta de personal cualificao pa desendolcar tala programación. Anguaño paez aclariase’l camín.

Tiense convocao un concursu/oposición pa cubrir vacantes na RTPA nel que se va valorar, según escala de puntuación, los conocimientos de la Llingua y tamién d’otres llingues foriates. Y dalgunos subiéronse a la parra, o a la figar, o a nun sé onde, porque paez-yos discriminatoriu lo del asturianu, que diba penalizar a los que nun contaran con esa conocencia.

Qué quieren que-yos diga. Creo que van desenfocaos. Trátase d’un méritu, sobro’l que podrá discutise l’algame de la so valoración, como’l de les llingues extranxeres, pero que ye inatacable conceptualmente, sobremanera si tenemos en cuenta que ye daqué previsto na Llei d’Usu dende va dellos años. Otra cosa ye la oposición frontal, porque sí, al bable, ensin argumentos, más allá de los prexuicios que son, en munchos casos, los mesmos que presenten los que quieren apremiar la cooficialidá por decretu, ensin esperar a qu’esista una base consistente de falantes na rexón. Ye lo qu’hai.

Yo voi siguir escribiendo n’asturianu, anque pocu m’asoleyen; ye la mio humildosa aportación a la supervivencia de la Llingua, y quiero pensar qu’esti pasu modestu, de valorar como méritu’l so conocimientu nuna oposición del Principáu, ye un avance trescendente, pos va na direición cristiana, sobremanera si a ello sigue la programación, pa emtamar, d’un informativu na televisión rexonal.

N’añu electoral va ser la racionalidá lo que se valore, non les salides intempestivss. Nun lo escaecer.

Raúl Suevos

A 5 de enero de 2023

Torna en castellán en repdiv.blogspot.com

Toi de Tamara y la má hasta los onievas

 

Vamos pel tercer añu del Covid y el mundiu ta fechu unos zorros. La invasión d’Ucrania, a cargu del xinete de la guerra nel so caballu alazán, namái representa un campu más, anque más averao de lo avezao, de los que suel golpiar colos so cascos esa caballería, que tien últimamente a les tierres africanes, el Sahel, como tarrén preferente. Unos territorios sobro los que tamién s’emplega –suel siguilo- el xinete del caballu negru, la fame.

El caballu bayu, el de la muerte, siempres ta presente, ye imposible resalvar la so carga engafetada, y en tiempos yera la peste la guadaña qu’emplegaba como preséu más rápidu y conducente, anque agora, ye un suponer, la so representación gráfica vamos tener qu’asociala a la gran epidemia del Covid, que estos díes caberos paez emplegase con especial dedicación nes tierres chines, por más que los sos dirixentes traten por tolos medios de “controlar” el fluxu d’información al respective, como yá asocediera, por otra parte, al entamu de la llaceria.

Con too esto pretendo significar qu’anque los anicios d’añu suelen ser un periodu de pensamientos positivos, nésti qu’entamamos, nu ta la situación como pa dexase llevar de la euforia, nin muncho menos. Y ello ensin entrar nes fechures económiques de la situación de nueso, o, inclusive, la d’Europa, que ve como l’área del Pacíficu y los Estaos Xuníos tánse quedando cola tostada mientes nós pasamos de dides, o güeyando pa otru llau, sobro los problemes de la Delda, con mayúscules, les Pensiones, tamién con mayúscules, o l’Aveyamientu de la población, de nuevu con mayúscules. Ye lo qu’hai.

Y equí, n’España, dexando de llau los artículos y reportaxes sobro loteríes y regalos de Reyes, vemos, lleemos o oyemos una riega d’informaciones sobro lo acaecío nuna familia que tien como principal fonte d’ingresos, dende que’l cantante salió de les so vides, la conocía como “prensa rosa” o del corazu, eufemismu baxo’l que s’escabilden los bilordios de siempre, alimentu de probes d’espíritu o consuelu de famientos mundanos que, como dicía la güela d’una bona amiga, qu’aínda se declara impactada por la crudeza de les pallabres, “comer colo qu’ellos rutien”.

Declárome contentu del escape del nobel, a quien siempres almiré como escritor, y al que supongo escosu pol fluxu costante de dengues sentimentales qu’esa familia ye a producir y que namái tien un pase si unu piensa que coles sos historietes son a separtar durante un tiempu al personal de la cruda realidá que mos arrodia; y ye que la inorancia, nun lo hai qu’escaecer, ye un camín más fácil haza la felicidá.

Raúl Suevos

A 6 díes vencíos de xineru de 2023

Torna en castellán en repdiv.blogspot.com