La tercera España de Salvador de Madariaga

Disertaba güei un pernomáu columnista de la prensa nacional sobro l’espaciu políticu que s’alluga ente’l PP y el PSOE y que correspondería a esa tercera España de Madariaga llamada a ser la clave de bóveda que sofitaría’l sistema políticu español, históricamente en permanente confrontación ente eses dos formes de ver l’interés nacional.

Don Salvador na so enciclopédica España esplicaba que’l fracasu de la República  naciera de los egos de los sos grandes homes políticos. Según él, esistía entoncenes un espaciu grande nel centru que venía definíu polos antis, anticlericalismu, antimilitarismu y anticomunismu. Ehí pudieren converxer xente como Azaña, Lerroux y Besteiro, inclusive parte de lo que representaba la CEDA. Quedaríen fuera d’esti espaciu Largo Caballero, Prieto y seguramente Gil Robles.

Esos antis definíen un sentir posibilista que anguaño acutaríemos ente lo que dalgunos definen como socialdemocracia y democracia-cristiana, pero los egos, fundamentalmente los d’Azaña y Lerroux, que s’aborrecien nada cordialmente, enzancaron completo la posibilidá d’articular esi espaciu políticu. Azaña cayó nos brazos del partíu socialista y les coses fueron como fueron.

Anguaño atopamosnos nuna situación paecida en cuantu a esi espaciu que podríemos llindar colos populismos d’esquierda y drecha y los nacionalismos, tamién d’esquierda y drecha. Tamién contamos colos egos; los tres líderes de los partíos principales sufren d’un narcisismu vertixinosu, el cuartu aínda peor pos al narcisismu amesta-y l’estalinismu. Paez esistir tamién un iñerizu personal nidiu, a lo menos en rellación con Rivera y Sánchez, que torga cualquier posibilidá d’averar postures y a too ello sumase una clara deriva cesarista nel sistema de gobiernu internu de los partíos, a lo menos en PP, PSOE y Podemos, puestu que l’alcontrón habíu ayeri na Executiva de Ciudadanos da cuenta de qu’ellí tovía queda daqué de pluralismu.

Tenemos un problema; el sistema políticu de nueso xira sobro los partíos políticos, asina lo establez la Constitución, y los nuesos partíos entraron nuna deriva na que la espresión discordante ye cada vegada más penalizada, hasta eliminala. ¡Ay! Aquel “el que se mueva nun sal na foto” d’Alfonso Guerra ¡Cuanto tien dao de sí! Esto ye un problema, y pergrave.

Güei los políticos sonlo de carrera, si non toos cuasi toos. Nesta carrera entamase de mozín nes xuventues de los partíos nes que se van conociendo y dominando les formes, los protocolos internos, 

el ponese de perfil, l’apuñalar nel momentu precisu o sofitar al apuñalador; queda tiempu, si se-y ven maneres al mozu, pa facer práutiques n’instituciones nacionales o estranxeres; llegáu’l casu daquien va aidar pa terminar con brillantez esos estudios a los que nun se pudo dedicar l’atención afayadiza y, pasaos unos años, si se presenta la ocasión yá tenemos un nuevu líder preparáu pa dirixir el destín de cuarenta y tantos millones d’españoles. Ésta nun ye la tercera España que dicía’l nuesu comunicador esta mañana, ésta ye l’España real na que la telexenia, los mensaxes preparaos en llaboratorios sociolóxicos o la retorica son muncho más importantes que la ideoloxía qu’anguaño se perdió pol camín de la modernidá mal entendida, de la macroeconomía, del ciudadanu veceru.

Y tampoco tien de ser consuelu’l güeyar pa la talla moral de los líderes de los nuesos pvecinos.  

En XiXón a 25 de xuno de 2019

Raúl Suevos

Llicenciáu en Ciencies Polítiques, que non politólogu

repdiv@blogspot.com

Cuba tien llei eleutoral nueva

CUBA TIEN LLEI ELEUTORAL NUEVA

El Parque Central ye a La Habana daqué asina como la Plaza d’España en Madrid. Nún de los sos llaos destaca un edificiu descomanáu, macizu y necoclásicu, encuadráu per cuatro torres y que lleva la robla de Manuel del Busto, l’arquiteutu asturianu pá, ente otres obres, del edificiu del Bancu de Xixón nesa ciudá, y tamién el maraviosu edificiu modernista que güei ocupa l’apocayá inauguráu hotel Le Moderne, o la Torre Blanca de la carbayona Uría.

Na puerta del edificiu cubanu rescampla una placa pequeña de metal agradeciendo los sofitos, suponse que monetarios, de Tinín Areces, entoncenes presidente del Principáu, pa la restauración del antiguu Centru Asturianu de La Habana, anguaño, nutríu coles obres requisaes pola Revolución, Muséu nacional de Belles artes de Cuba.

Fidel Castro nun solo-y espropió la see central al Centru, tamién dos clíniques, cuasi dos mil apartamentos d’alquiler pa los socios y una Quinta de recréu pela rodiada de la ciudá d’enorme valir naquella dómina. Como compensación cedió-yos, a lo que dende entós se llamó Federación d’entidaes asturianes, un edificiu a la entrada del históricu Paséu de Prado que yá-y espropiara a un centru social norteamericanu.

Ellí, no que güei queda del Centru asturianu, conocí a un emigrante qu’aportara a Cuba nel 58, pocu enantes del triunfu la Revolución, y ellí se quedó varáu pa siempres, como un cocu secu d’esos que se suelen ver esgargaxaos pola marea nes Playes del Este habaneres. Yá nun creía nel “home nuevu” de la Revolución y esperaba llegar a ver el fin d’ésta y la devolución de les propiedaes del Centru. Les noticies que d’allá lleguen nun paecen abarruntalo.

Depués del partu los montes que supunxo la Constitución cubana nueva, na que se consagra un sistema políticu de partíu únicu, el Partíu Comunista de Cuba de xacíu, aporta agora’l turnu de la llei eleutoral nueva, na que les instituciones del partíu, La Federación de muyeres cubanes, la Federación d’estudiantes, la Central de trabayadores, los temíos Comités de Defensa de la Revolución –dalguna voi escaecer- apurren los jnomes de los candidatos a la Comisión nacional de candidatures que se va encargar d’iguar la llista de candidatos en númberu igual a los puestos a escoyer.  

Esti sistema vase aplicar a les eleiciones a l’Asamblea nacional del Poder popular, a les asamblees provinciales y a les municipales. Namái queden fuera les presidencies del Conseyu d’estáu y de 

l’Asamblea nacional, asina como los miembros del Conseyu d’estáu, toos ellos elexíos polos diputaos de l’Asamblea nacional.

Escluyense nesti proyeutu llei les actividaes de propaganda eleutoral y cualquier otra aición que busque atraese la opinión de los eleutores ¿Pa qué? Too vien yá cocío dende la maquinaria del réxime, ye materialmente imposible que naide que nun perteneza al sistema pueda intentar siquier entrar n’él. Esta ye la Cuba nueva que Raúl Castro pretende dexar n’herencia; un heriedu bien atáu cola Constitución nueva y esti proyeutu de Llei eleutoral que como la otra tamién va acabar siendo mayoritariamente aprobada en referéndum pola mayoría de la población cubana, a la soviética.

Patria o muerte ¡Venceremos¡ Qué sarcasmu.

En Xixón a 24 de xunu de 2019

Raúl Suevos

repdiv.blogspot.com

Ormuz, ente Bagdad y Tonkín

ORMUZ, ENTE BAGDAD Y TONKIN

El golfu de Tonkín forma parte de les costes vietnamites, ellí, nel branu del 64 pocu dempués de qu’España-y ganare a la URSS la Eurocopa de futbol, un barcu de guerra norteamericanu, el Maddox, enfusó n’agues territoriales de Vietnam del norte, alegando que yeren internacionales, siendo atacáu por varies torpederes d’esi país; el resultáu foron varios muertos y ferios vietnamites. La nueche viniente’l Maddox informó d’ataques continuos de la marina vietnamita. L’incidente motivó la entrada en fuercia de los USA nel conflictu vietnamita nel qu’hasta entoncenes figuraben namái como conseyeros. El resultáu ye abondo conocíu, 60000 muertos USA y cientos de miles vietnamites, de dambos llaos. Años dempués tamién se supo que l’incidente de Tonkín foi un montaxe norteamericanu para xustificar la so entrada nel conflictu.

El 14 febreru del 2003, un mes enantes la recordada Cume les Azores, nel Conseyu de Seguridá de NNXX en Nueva York, celebróse una sesión perimportante, tratábase sobro les armes químiques que supuestamente fabricaba ya usaba Saddam Hussein y magar l’ausencia de buelgues reportada polos inspectores de la ONX. L’impautu de ver al xeneral Colin Powell, xefe del estáu mayor USA mientres la Primera guerra del Golfu y per aquel entós Secretariu d’Estáu de Bush junior, con unos cartelones amosando supuestos laboratorios químicos motorizaos sobro camiones, dibuxos, non fotografíes,entá me caltien varáu na alcordanza. Sobro’l ridículu de Powell permanez el gran discursu pola paz del ministru francés d’esteriores, Dominique de Villepin. El casu ye que, magar el chornu de tala sesión, los USA tornaron a invadir Iraq y les consecuencies aínda les paguen direutamente per aquelles tierres y per equí, de xemes en cuando,dalgún islamista radical tamién mos pasa factura.

Vien too esto a cuentu los ataques a petroleros que se tán produciendo nel estrechu d’Ormuz, per au pasa un terciu los tráficos mundiales d’ese tipu. Los USA entaináron a culpar a Irán, que seguramente tien capacidá abondo pa facelo pero que, visto lo qu’hai en xuegu, sería’l más perxudicáu, tantu si falamos d’un corte d’esa ruta como, aínda peor, si falamos d’una non deseable situación d’hostilidaes béliques. Too paez querer recordar situaciones anteriores.

Pero ¿Por qué ellí? Porque esa ye la llínea de resfregón principal de les varies que güei tán abiertes na xeopolítica mundial. Ellí ta la frontera entre chiites y sunites; colos primeros Yemen, en guerra abierta colos saudíes; Qatar, sunita pero alliniada con Irán; Iraq, con un 60% de chiites; Siria, sunita 

pero baxo’l fieru lideralgu chiita de los Al Assad y, a lo cabero, Líbano, con chiites, sunites y cristianos pero con una Hezbollah chiita, belicosa y yá transnacional. Colos segundos, Arabia, Kuwait y los Emiratos fundamentalmente, ya’l descomanáu poder económicou de toos ellos. Detrás d’estos los USA, colos otros Rusia que cuenta con una base na costa siria. Esta sería la tensión político relixosa, pero hai más.

El petróleu y el gas son la enerxía que mueve’l mundu, a lo menos hasta que nun camude’l paradigma enerxéticu, y témome que pa eso entá queda tiempu. Anguaño tenemos un corredor de gobiernos chiitas proclives a que peles sos tierres pasen los oleoductos y gasoductos que lleven hasta’l Mediterráneu la enerxía iraní y tamién rusa, dende ellí sería fácil suministrar a Europa, el gran cliente que toos busquen. Si pol contrariu, tres una tapa d’“inestabilidá”, ensin entrar nes profundidaes del significáu de tala pallabra, los gobiernos camudaren o modificaren los sos puntos de vista, entoncenes sería’l petróleu arábigu’l que suministraría a Europa per esa vía.

Ye posible que la cuestión nuclear iraní, negociada y aceutada por Obama y denunciada por Trump, tenga tamién dalguna importancia, sobre too pa los saudíes, anque los israelíes va tiempu que la tienen y naide diz un res. Too tiene la so importancia nesa parte del mundu y pa nós el petróleu de so 

ye perimportante, cuasi tantu como’l fechu que la doctrina islámica de los saudíes ye la wahabita, la más radical del Islam y esa yá, enantes que’l so petróleu, va años que mos la esporten.

A lo último, qu’esta historia muncho me recuerda a la del golfu de Tonkín.

Raúl Suevos

a 14 de xuno de 2019

repdiv.blogspot.com

¿Entá son de fiar los Estaos Xuníos?

¿ENTÁ SON DE FIAR LOS ESTAOS XUNÍOS?

El presidente Trump vien de visitar el Reinu Xuníu metanes un rumbu d’intervenciones sorprendentes que toes tienen como denominador común la faltosería política, daqué mui desavezao hasta’l so aportar a la Casa Blanca. Insultos personales al alcalde de Londres, recomendaciones de rotura radical a la premier May tocantes el Brexit, allugamientu personal per dalgún de los pretendientes a la direición del partíu Conservador, etc. tou un compendiu de metedures de pata si nun fuere porque’l mundu paez tar yá avezáu a esti comportamientu. Quiciabes non too seya casualidá, quiciabes hai una estratexa.

Cola cayída del Muru de Berlín nel 1989 Francis Fukuyama agoró “el Fin de la historia” baxo l’escud utriunfante de les democracies lliberales –lléase capitalistes- pero’l desorde, les tensiones polítiques y les guerres paecen conxuraes pa baltar les sos posibilidaes profesionales como profeta. Anguaño’l mundu ta muncho más complicáu que cuando la nomada Guerra fría apangaba los ánimos de la gobernanza mundial y los Estaos Xunios caltienen un lideralgu cada vegada más contestáu, especialmente nel llonxanu Oriente.

Balcanes, Afganistán, Ucrania, inclusive’l próximu Oriente, nun paecen tener entidá pa desestabilizar el mundu, más allá de lo que les grandes potencies consientan. La Rusia de Putin esfuerciase por estirar el pescuezu dende la fila d’atrás pa evitar que Trump y Xi, tan avalumbaos ellos, lu dexen ensin salir na foto, pero lo cierto ye que yá dende la dómina de Bush fíu, y de xacíu Obama, l’Imperiu ta pivotando estratéxicamente haza Oriente. China ye l’únicu alversariu anque paeza que, enagora, la batalla se desarrolle namái nel ciberespaciu del 5G.

N’Europa somos consumidores netos de Seguridá, con mayúscules, dende’l fin de la segunda Guerra mundial. La OTAN tien sido’l paragues que mos permitió desendolcar el nuesu estáu de bienestar ensin tener qu’endeudanos en demasía con gastos non productivos como son los exércitos; sicasí ¡bona cuenta¡ Europa dexó que los EEXX pagaran la mayor parte y dirixieran totalmente la organización. Pero los tiempos evolucionen y los caberos presidentes americanos pidieron, y Trump esixío con malos moos, que los países europeos amonten los sos gastos de defensa hasta’l 2% del so PIB. Nello, con más o menos iñerizu, tán.

Europa, nanu políticu y viérbene militar dende la dómina de la guerra en Bosnia, ye consciente de la 

so necesidá de, amás de consumidor, aportar a proveedor de seguridá y pa ello, y sofitándose nel Tratáu de la Xunión, y de la mano de l’Alta Representante Mogherini, desarrolla y aprueba la so Estratexa Global en 2016, na que dalgunos ven la basa pa la futura Defensa Europea y que va a contar con dos catalizadores terribles, el Brexit y el señor Trump, caún coles sos carauterístiques.

Hasta equí too paez un anális de xeopolítica, y verdaderamente que lo ye, pero detrás d’esto siempres s’atopen los factores económicos y nesti casu tamos falando d’un mercáu mundial d’armamentos, güei encabezáu de forma nidia polos EEXX, que val 180.000 M de dólares añales y nel que los países europeos nun son namái vendedores, tamién alquieren, fundamentalmente nos EEXX, y en dambos casos facenlo de manera individual perdiendo asina les economíes d’escala.

Amás de camudar n’esportador de seguridá, la Unión, pente medies la Política Común de Seguridá y Defensa, busca convertir esa diversificación d’industries militares en daqué más européu, más grande y más conducente, dalgo al estilu d’Airbus por poner un exemplu, capaz de competir cola industria americana de mou que los emplegos, altamente cualificaos, permanezan n’Europa y, d’alguna forma, contribuyan a torgar que los nuesos mozos titulaos nos campus universitarios tecnolóxicos tengan qu’emigrar en busca de puestos en consonancia cola so cualificación.

Dende la publicación de la Estratexa Global Europea punxeronse en marcha 17 proyeutos PESCO, nomaos asina pol acrónimu inglés correspondiente a la Cooperación reforciada en materia de defensa. Tamién un Fondu de Defensa Européu de calter pluriañal y, finalmente, el FEAP, Fondu Européu de sofitu a la Paz.Toos ellos suponen un impulsu nidiu a la Defensa Europea, que non Exércitu Européu, y si’l señor Trump algama una segunda presidencia ye posible qu’Europa se vea “obligada” a crecer más y más rápido nesti ámbitu énte la falta de confianza nel so tradicional aliáu americanu.

A 5 de xunu de 2019

Raúl Suevos

repdiv.blogspot.com