D'altruistes y salvapatries

D’ALTRUISTES Y SALVAPATRIES

Por fin acabóse esta campaña eleutoral llarguísima; un añu más o menos, y por fin vamos poder dedicamos a pensar notres coses ¿La Lliga del añu viniente? ¿Por qué nunca-y dan la Palma d’oro a Almodovar? ¿Va llograr Trump reventar el mundu? Les coses qu’importen, a última hora.

A min, la edá, nestes ocasiones, llévame a cavilgar. Ye de baldre, nun requier esfuerciu y nun siendo yo futboleru cuasi que nun me queda otra. Y viendo les imáxenes de los nuesos líderes –ye namái un apellativu convencional- dime cuenta d'hasta qué puntu camudaron les coses nestos 40 años caberos. Los líderes de la transición yeren individuos que llucharen na oposición silenciosa antifranquista, dalgunos inclusive dende dientro de les propies files del réxime, dende los sindicatos universitarios, dende’l propiu Movimientu, dende toes partes; dalgunos tamién na so propia casa pos yeren fios de franquistes notorios. Hubo tamién militares que lo ficieron, pero estos yeren torpes y poco silenciosos, pescaronlos, y pagaronlo, quiciabes los únicos.

Esa xeneración de políticos, la de la Transición, siempres pudo presumir de tener lluchao escontra un réxime non democráticu. Qué pena que los procuradores en Cortes-yos robaren nel últimu momentu’l triunfu cola Llei pa la Reforma Política; sicasí ellos pudieron construyir lo nuevo, lo lluminosu, per oposición a lo vieyo y casposo. Eso cuasi siempres da bonos frutos y ellí entamó a nacer el discursu del sacrificiu pol bien xeneral, pola xente, pola ciudadanía, pol pueblu. Qué curioso.

Les nueves xeneraciones, eses qu’agora aporten al poder, yá nun tienen un réxime escontra’l que lluchar, salvo unos pocos, nos estremos, que faltos d’un discursu más ellaboráu convierten la constitución del 78 en réxime y escontra él pretenden lluchar. Estos nuevos políticos, mozos pero suficientemente preparaos, siguen calteniendo’l discursu del sacrificiu pol bien xeneral; a él dicen supeditalo too, y pa ello prepararonse a concencia, son altruismu n’estáu puru. Toos, o cuasi toos, vienen de les mocedaes de los partíos; toos, o cuasi toos, cursaron estudios superiores, dalgunos con resultaos  tan brillantes y “sorprendentes” que hasta’l poder xurisdiccional punxo’l güeyu sobro los sos llogros, notros casos la prensa, plasmada, nun duldó n’airealo. Son les nueves xeneraciones.

Esti sacrificiu de los nuesos políticos ta abondo llonxano del altruismu del que facen gala otros españoles, misioneros per llugares estremaos nel mundu, especialmente n’África. Ellí asesinaron esti mes de mayu tan eleutoral a dos d’ellos, en febreru cayó otru. La prensa pasó apriesa percima de los sos cadabres; son noticies que venden poco nel mercáu informativu; son noticies que pueden aportar a facemos cayer na cuenta qu’esisten persones que dan la so vida, toa ella, na entrega a los demás, a los otros, con independencia de qu’estos seyan d’otra raza, con independencia de que nun heba réditos de dalu tipu, solo’l prestu de la entrega personal. Los sos collacios, qu’ellí siguen, manifiesten, cada vegada que pierden a ún d’ellos, qu’esi ye’l so destín, el serviciu a los que nun tienen un res, y que nello van continuar, n’África, n’América, en cualquier llugar au puedan ser d’utilidá.

Y digo yo que quiciabes temos perdiendo la gran oportunidá de desendolcu de la Marca España, que quiciabes estos homes y muyeres, ordenaos o seglares, que lleven la so misión hasta dexar la so vida n’ocasiones, y la so salú siempres, son los meyores embaxadores de nueso per esos mundos de Dios, y, si esos países quiciabes nun seyan tan interesantes como oxetivu comercial, ye posible que la so aición sirva pa que mos sintamos arguyosos de los nuesos compatriotas y podamos pensar que’l nuesu nun ye un país tan malu.

Hai otres coses más allá de la política y el futbol.

Raúl Suevos

A 26 de mayo de 2019

repdiv.blogspot.com

Rubalcaba y la obscenidá de la muerte

 

La muerte ye obscena por definición; yelo, sobre too, porque, nel meyor de los casos, camudamos n’oxetu,dexamos de ser suxetu. Nun disponemos de la nuesa non esistencia, nin siquier cuando lo dexamos too atao y bien atao. Cuando morremos, los del común, pasamos a ser una alcordanza, per tiempu llendáu, y los que son daquien pasen a ser mercadería, como-y tien pasáo a Rubalcaba; mercadería política nesti casu.El miércoles pasáu Rubalcaba sufrió un ictus, grave y tratáu tardíamente. El xueves, tres ser interveníu, díxose que s’alcontraba estremadamente grave lo que facíaalbidrar la so muerte celebral y prever, pa observadores non emocionales, que se despediría al aniciu’l fin de selmana. La mañana del xueves foi momentu de visita pa los amigos reales, l’atapecer quedó pa colegas, alversarios y camarades, como’l presidente’l gobiernu, Sánchez.

Cola so muerte tiense desendolcao  tou un aparatu propagandista que raya no obsceno. Capilla ardiente nel Congresu de diputaos cuando se suponía que yera sólo pa presidentes del gobiernu, féretru a llombos de guardies civiles y policíes pa sorrayar la entrega d’un socialista pola nación, llaureles del fin d’ETA resalvando a Rosón, Corcuera, o’l propiu Barrionuevo, o tolos que se dexaron la piel nesa llucha. Quiciabes el xuez Marlaska, instructor del casu Faisán tuviere daqué que dicir.

Güei too son eloxos, paez que’l señor Rubalcaba fo un modelu de virtues polítiques que’l so oxetivu se centraba esclusivamente nel bien d’España, y nun voi ser yo quien ponga en dulda’l fondu les sos intenciones pero dame la impresión que, sobre too, yera un home de partíu, un políticu qu’amaba España pero siempres dende l’interés del partíu. Un gran profesional de la política del que, nel so meyor momentu, dicíase, “cuidado con Rubalcaba, a la que te descuidas te la clava”, una frase qu’ensin dulda se presta a llectures estremaes.

Tamos en plena campaña eleutoral, municipales,autonómiques ya europees, depués d’unes xenerales que dexaron el campu políticu nacional cuando menos nuna situación un tantu ¿Nerviosa? ¿Sorprendida? Espectante quiciabes. La despidida oficial de Rubalcaba, nesti contestu temporal, paezme obscena y pue tener como resultao que cuando pasen estos primeros díes, los de les lluces –nos que hasta Rajoy, paganu de les bombes del 11M y perxudicáu les maniobres de Rubalcaba tuvo tiempu y pluma pa escribir un panexíricu-, como correspuende a un bon funeral, aporte’l momentu les solombres col riesgu de que dalgunos quieran cebase en quien yá nun pue defendese.

Rubalcaba dexó la política, radicalmente, siendo secretariu xeneral del PSOE y tres una gran derrota nes eleiciones europees. Él foi quien acuñó’l términu gobiernu frankestein ente la posibilidá d’un gobiernu d’esquierdes con sofitu nacionalista y nun creo que’l señor Sánchez lo tenga escaecío pero, toi seguru, el so xefe gabinete, Redondo, habrá-y amosao la conveniencia de camudar les honres fúnebres nun gran eventu eleutoral. Ye mui posible que Rubalcaba güeyare too esto como repunante, como refiertante, elementos que definen lo obsceno.  

A 11 de mayu de 2019

repdiv.blogspot.com