Encelada real en L'Habana

Antemana la prensa que SM el Rei va viaxar a L’Habana darréu depués les eleiciones xenerales del 10 d’avientu, con ocasión del 500 cabudañu d’esta formosa, al empar qu’escayente, ciudá iberoamericana. Escrito asina, de forma curtia, paez una bona oportunidá pal viaxe pero si lo analizamos ye difícil atopar motivos que lu xustifiquen y, pol contrario, sí qu’apaecen elementos que lu desaconseyen magar que nunca enantes visitó la islla un monarca español en viaxe d’estáu, pues el d’el rei Xuan Carlos foilo como integrante d’una cume iberoamericana qu’ellí se celebraba.

Les naciones iberoamericanes nacieron por causa sobrevenida, la invasión francesa de la España borbónica, y ello fizo que necesitaren construyir la identidá nacional de forma apresurada. L’indixenismu yera despreciáu polos criollos, los amos nuevos de la situación, asina que mientes lo pensaben sofitaronse nos próceres de la patria, los caudillos, y deconstruyeron la idea d’España que pasó a ser la esplotadora y tiránica metrópolis colonial. En Cuba, con cuasi cien años de retrasu’l procesu foi semeyante.

Ye un fechu qu’allá lo de la madre patria nun furrula; namái nes élites cultes s’asume. La masa de la población ye educada na creyencia d’una lleenda negra adaptada a cauna de les necesidaes nacionales; y Cuba nun ye la esceición. Ellí, magar la mutua almiración de Fidel Castro y Franco, les coses son abondo semeyantes. El ciñu nun ye a España, ye, como en toa Iberoamérica y gracies a la llei de nietos, dañu collateral de la llei de Memoria Histórica, al pasaporte del Reinu d’España.

Cuba ta en plenu procesu de cambeos, cosméticos, de xacíu. Nueva constitución con imperiu del partíu únicu, el partíu comunista cubanu; nueva llei d’emigración pa qu’emigre la mocedá y asina amonte’l fluxu de remeses al país al empar que mengua’l riesgu de balasmes; nueva llei eleutoral na que se caltien el control del votu y la imposibilidá de votu pasivu dende fuera'l sistema; nuevu conseyu d’estaú ensin xerontocracia militar qu’agora se enroca nel politburó del partíu comunista, autenticu dominador del sistema; nuevu presidente, el señor Díaz Canel, un gris mediocre y obediente apparátchik a les ordenes de Raúl Castro; y too ello arreglao con un aumentu de la represión de baxu nivel –detenciones arbitraries curties, somantes, retención de pasaportes, etc.- a la más qu'estrinxia oposición política y prensa independiente; de la situación económica meyor nun falar. Esta ye la maraviosa Habana que los nuesos reyes van visitar y que, en ciertu mou, van sofitar cola so presencia. Ye duldoso que’l cubanu d’a pie tenga de qué alegrase.

El rei reina pero nun gobierna, l'axenda real ye cosa del gobiernu; un gobiernu, nesti casu, en funciones qu’organiza un viaxe de tanta trascendencia ensin pensar nes  consecuencies pa la imaxe de la Corona y d’España, o quiciabes sí. Solo falta que tamién se presente per ellí, pa una foto, dalgún de los amigos de Raúl Castro, Evo Morales, Humberto Ortega o Nicolás Maduro, entós la encelada real sería perfeuta.

Raúl Suevos

A 26 d’ochobre de 2019

Más sobro Cuba en:

https://www.academia.edu/36908470/CUBA_La_Guerra_de_todo_el_pueblo_de_Fidel_Castro_Un_diseño_español
https://www.academia.edu/37532345/La_Base_de_Guantánamo
https://www.academia.edu/40414789/60_años_de_Revolución_en_Cuba
https://www.academia.edu/37551050/La_Toma_de_La_Habana_por_los_ingleses

La inmoralidá d'Evo Morales

Bolivia, como’l restu de repúbliques iberoamericanes zarapicó cola independencia de sutrucu, como causa sobrevenida a partir de la ocupación d’España polos exércitos napoleónicos y el confinamientu de los reyes en tierres franceses. Ellí l’herederu convertiríase nel deseado, pa depués y por méritos propios finar como’l rey felón.

Eses independencies aportaron de la mano de les élites criolles, esto ye, de los fios del poder español con más o menos raigañu naquelles tierres; el venezuelanu Simón Bolivar ye, quiciabes, el meyor exemplu, anque’l chilenu Bernardo O’Higgins va-y a la zaga. El casu ye qu’esi fechu, la prematura emancipación, vien-yos pasando factura a toes elles, en mayor o menor midida, y, dientro d’elles, particularmente a les poblaciones indíxenes que cola independencia perdieron la proteición de la Corona, o si se prefier de les Leyes d’Indies.

El casu de Bolivia foi vultable. A la muerte del mariscal Sucre, en circunstancies penoses como la mayoría de los próceres de la Emancipación, la oligarquía, de rancios apellíos españoles, apoderóse del poder y exerció-lu de forma decidida en beneficiu de la so clas social práuticamente hasta va bien poco; hasta-yos  re-impunxeron l’impuestu de la Mita –trabayu personal-, que la Corona eliminara, a los venti años de la independencia

A la Bolivia moderna estudiéla va unos años y el resultáu foi https://www.academia.edu/37516583/Conlictos_latentes_El_acceso_boliviano_al_Pac%C3%ADfico  pero amás tamién pude averame al fenómenu Evo Morales; un políticu salíu de los movimientos sociales indíxenes, dirixente sindical del movimientu cocaleru, cultivadores de fueya de coca, que llograría aportar a la presidencia del país en 2006 como líder del MAS, Movimientu al socialismu, y cola ayuda, más o menos esplicita, del Socialismu del sieglu XXI del Comandante Chávez, el mesmu que llevó a Venezuela a esi magníficu puntu au güei s’atopa.

Evo foi pa min el más conducente de los dirixentes iberoamericanos rellacionaos col chavismu. Él supo xugar con una retórica incendiaria digna de Fidel Castro, d’un llau, y d’un innegable sentíu práuticu no económicu que lu llevaría a aplacar les tendencies independistes de la rica y petrolera amazonÍa boliviana, con capital en Santa Cruz, con un sistema de subsidios a les capes sociales más desprotexies y, p’arreglalo too, un nacionalismu radical reflexaú na tensión constante con Chile en 

rellación cola salida al mar, yá negada  pol Tribunal de la Haya, y más tarde colos pocos acuíferos de la zona fronteriza andina.

El actual xuegu económicu d’Evo marcha sobro les promeses d’una vía férrea interoceánica, que financiaría China, y la esplotación de les inmenses reserves de litiu del Salar de Uyuni, mui goloses pa la fabricación de bateríes pero que nun cuenten con les fuentes acuíferes necesaries. Pero’l problema d’Evo ye otru.

Cuando acabó’l so segundu periodu presidencial, como otros dirixentes nel mundu, punxo en marcha una reforma constitucional, tamién con llimitación de mandatos, que pondría la cuenta a ceru y permitiría-y siguir gobernando, eleiciones mediante. Acabada esta opción, reclamó los sos drechos humanos conculcaos si nun-y dexaben  volver a postulase, a lo que’l “so” tribunal supremu-y dio razón y poro asistimos estos díes a les caberes eleiciones presidenciales en Bolivia.

Evo y Mesa, un antiguu presidente de non especial bon recuerdu, yeren los dos candidatos. Too facía abarruntar una segunda vuelta, pues nin Evo algamaba’l 50% de votos nin sacaba un 10% de ventaya a Mesa, condiciones pa la so aclamación direuta. De sópitu, paróse’l recuentu un pocoñín perriba’l 80% y cuando un día dempués volvió a entamar, colos votos rurales teóricamente favoratibles al 

presidente, les cuentes daben-y como ganador direutu.

Carlos Mesa denuncia fraude. Un periodu de disturbios paez mui probable pero lo que síye seguro que, una vegada más, cúmplese aquello de que’l poder corrompe y dexar la silla cuesta muncho. Evo Morales, un gobernante ensin dulda demagóxicu pero tamién de lo meyor que tuviera Bolivia, ta perdiendo una gran oportunidá pa salir con dignidá de la historia.

Raúl Suevos

A 22 de ochobre de 2019

Torna al castellán en repdiv.blogspot.com

Apagóse la lluz d'Alicia Alonso

El ballet clásicu, como espectáculu artísticu, foi pa min un descubrimientu cubanu. Aporté a él por una invitación namás llegar a La Habana y pue dicise qu’asistí por compromisu, pero darréu quedé apoderáu pol conxuntu d’armonía y guapura que representa. Ellí taben, pal mio prestu, el ballet nacional de Cuba, cola so prima ballerina al frente, Viengsay Valdés, una diminuta diosa de la danza casada con un asturianu, la orquesta nacional de Cuba y, presidiendo dende’l palcu central, Alicia Alonso, la prima ballerina assoluta. Nun recuerdo si yera Giselle o’l Lagu los cisnes, poco importa yá, quedé engancháu.

A la entrada del teatru entá resistíen los frescos que amosaben escenes galleges y la catedral de Santiago; a lo último la instalación yera namái una parte del Centru Gallegu de La Habana, el so dueñu y constructor hasta 1961 cuando Fidel Castro lu espropió xunto col Centru Asturianu y restu d’entidaes. La sala, abondo escayente naquel 2010, aínda llucía enriba l’escenariu l’escudu de Galicia.

Alicia Alonso, de familia acomodada cubana, anicióse nel ballet na islla pero formarase en Nueva York y Londres, y pa finales de los cincuenta yá fundara la Compañía nacional de Cuba y hasta se enfrentara a Fulgencio Batista, lo que-y daría una posición privilexada cuando Fidel se fizo col poder nel 61. El ballet sería protexíu pola Revolución y Alicia prestaríase a convertilo nuna importante ferramienta propagandística del réxime.

A finales del 2010 tuve’l privilexu de vela baillar per vez cabera, yera’l so nonaxésimu cumpleaños y malapenes foi un mediu xiru dexándose cayer nos brazos del baillarín pero l’aplausu, incluyíu’l de Raúl Castro presente na sala, foi atronador. Ciega dende diba munchos años tovía caltenía con puñu de fierro la disciplina de la compañía.

Dalgún tiempu depués algamé aportar a ún de los ensayos. Llevemos el ramu flores más grande que pudimos consiguir pues Alicia, magar la edá, siguía siendo mui receptiva a los obsequios y falagos. El casu ye que pudimos sentanos al so llau y güeyar cómo, pesie la so ceguera y col sofitu d’una ayudante de gran nivel, facíase describir les evoluciones de los baillarines ya imponía les repeticiones que ficieren falta hasta que’l movimientu se llograba.

La instalación de la Compañía atopase cabe’l Malecón, ellí u más se siente la humedá caribeña de La 

Habana. L’espectáculu d’aquellos cuerpos mozos esculpios pol trabayu d’años, empapaos de sudu, con una cierta medrana nos güeyos énte’l posible regañatu d’Alicia, ye otra de les visiones perenales d’aquella dómina.

Alicia, nel so exerciciu de direutora, dicíen que yera mui dura, dictatorial, ya inflexible na aplicadura de castigos. Tamién se comentaba que nun yera gustante de los “morenos” y per aquel entós la xente de color malapenes tenía representación ellí. Magar too, siempres había una llista llarga d’espera pa entrar y tamién una llista non menos llarga de deserciones en cauna de les sos xires pol estranxeru, de mou qu’anguaño podemos contar con baillarines cubanos en cuasi toles compañíes del mundu.

Ayeri nel so funeral, nel antepar del Gran teatru, nun había munchu xentíu, de fechu nun había alpenes personal, la so infrayable adhesión al réxime, y posiblemente la falta de tresporte en La Habana, paez que-y pasaron factura na so función cabera.

Raúl Suevos

A 20 de ochobre de 2019

Torna en castellán en repdiv.blogspot.com

La molt honorable kale borroka

LA MOLT HONORABLE KALE BORROKA

Mientres dellos años, nel País Vascu, hebo que soportar la violencia caleyera con santa sufrencia. Suponíase que yera la espresión natural de la represión sentida pola mocedá vasca –una parte d’ella-, y quienes nun comulgaben col nacionalismu independentista teníen qu’aguantase, cenciellamente.

Les coses camudaron enforma cuando se cambió la tipificación de según qué tipu d’aiciones vandáliques y pasaron éstes a considerase como terrorismu urbanu, lo que llevaba a la xurisdicción de l’Audiencia Nacional y a unes condenes d’abondo importancia, hasta 20 años creo. Nin que dicir tien que la kale borroka desapaeció d’aquelles tierres del norte español.

Na so dómina meyor yeren a apaecer desmenu y prender fueu a un autobús o a una unidá de ferrocarril. Equipabense con sudadera escura y mochila pequeña, como la de los estudiantes; uniformidá mui semeyante a la que n’Europa ficieron célebre los conocios como Black Blocks, antisistemes transnacionales que foron a reventar la cume del G-8 en Xénova, nel 2001, Berlusconi entá se recordará, y tamién la cume OTAN d’Estrasburgo, nel 2008, au amburaron l‘Aduana internacional y un hotel onde s’agospiaba la policía francesa.

Ayeri nueche la televisión metiómos na casa l’espectáculu del centru de Barcelona tomáu por…infiltraos, según el molt honorable president de la Xeneralidá de Cataluña, anque los detenios son mui mocinos y de Barcelona; si bien les imáxes recuerdemos el pasáu, sudaderes negres con capiellu y mochila pequeña nel llombu. Tamién pude güeyar nalgún vídeu una increíble facilidá, digna d’un mineru asturianu, pa desfacer les ceres y preparar proyeutiles pa llanzar a la policía ¡Qué fuercia llaboral desperdiciada¡

Güei unos piden calma y otros 155. Too hai que velo con atueldu, tamos en precampaña eleutoral, pero hai delles coses que sí se puen deducir de les imáxes d’anueche. Pa min la primera d’elles ye que’l comportamientu de la policía podría calificalo d’heroicu si nun fuere porque esi axetivu prefiero reservalo pa los nuesos soldados n’Operaciones; en too casu ficieron un trabayu esceicional metanes una inferioridá numbérica y de medios de control de mases que debe tener dalguna esplicación política, anque güei los representantes de nueso nun mos dieron denguna.

Esplicaciones tamién tendría de dar la señora Colau a los sos vecinos de Laietana y Urquinaona, zones de votu “comuneru”, esto ye, de los de so, y que se tarán entrugando qué pasa colos 300 
antidisturbios con que cuenta la policía municipal y que cobren más que la Policía nacional y muncho más que la Guardia Civil qu’estos díes reserva los sos GRS en razón de competencies policiales y, quiero pensar, como reserva cabera en casu necesariu.

El problema políticu nun se va resolver estos díes, tampocu coles eleiciones vinientes, pero l’usu de la violencia ye privativu de les instituciones del estáu y quien va escontra elles tien de ser respondiu, a lo menos, cola mesma intensidá. Lo d’ayeri nun ye aceptable y el señor Marlaska pue y tien de reforciar en personal y medios a les fuercies destacaes en Cataluña y pa ello nun hai qu’esperar a que’l molt honorable condene d’una forma nidia la violencia, que nun lo va facer.

Raúl Suevos

A 19 de ochobre de 2019

Torna en castellán en repdiv.blogspot.com

Yanqui go home

Esti yera’l glayíu que sonaba va unes décades peles cais de mediu mundu. yeren los tiempos nos que les operaciones encubiertes de la CIA facíen cayer gobiernos y los axentes de la URSS apoderabense de les ciudaes gracies a la infiltración nos coleutivos sociales. Muncho tien camudao’l mundu.

Los USA paecen batise en retirada. El presidente Obama declaró que’l so interés taba nel sureste asiáticu, ellí u China espliega la so vanguardia, anque los sos raxos económicos yá tán en tol mundu, incluyida Europa. Tres la declaración vieno la replega n’Afganistán ya n’Iraq, tamién se piesllaron bases n’Europa. Trump aínda foi más lloñe y menació direutamente si los aliaos, España ente ellos, nun amontaben los gastos de defensa. Pero naide pensó que los USA dexaren na estacada a un aliáu y esto ye lo que Trump vien de facer va unos díes coles milicies kurdes del noreste de Siria. El yanqui vase.

Los USA esplegaron en Siria cuando más emburriaba l’Estáu Islámicu; los kurdos sirios yeren los únicos que paecíen ser a soportar la folada de terror y poro recibieron equipos y asesoramientu militar. El Assad, el presidente siriu, abondo tenía con facer frente a les estremaes milicies contraries al so réxime y al propiu EI.

Al otru llau de la frontera Erdogán xugaba les sos bazes mercadeando cola suerte de millones de refuxaos y sobre’l tarrén siriu acosando al réxime coles milicies proturques. Los rusos llindarose al entamu a asesorar hasta qu’El Assad paeció peligrar, y con ello la so estratéxica base aeronaval de Tartús; dende entós l’aviación rusa implicase direutamente nes operaciones, hasta sufrir el derribu d’un Sukoi-24 per parte los turcos.

Güei too ye estremao. Putin tien demostrao ser un diplomáticu arteru y hasta-y vendió un sistema de misiles a Erdogán –Ye de suponer que eso ayude a lliberar la nuesa batería de misiles Patriot ellí esplegada- lo que debería xenerar interrogantes nel sen de la OTAN. Erdogán perdió l’alcaldía d’Estabul y los réditos del intentu de golpe d’estáu paecen escosase, poro una campaña escontra los kurdos de Siria, posible sofitu nun futuru pa los kurdos turcos del PKK, puede xenera-y réditos descomanaos a nivel internu.

A los kurdos sirios nun-yos quedó otra que negociar con El Assad y cede-y parte del tarrén qu’ocupaben p’asina evitar ser garraos ente dos frentes. Los bombardeos y les execuciones sumaries 

de les milicies proturques nes zones ocupaes erosionen la imaxe del presidente turcu. Los campos de refuxaos y prisioneros abandonaos polos kurdos suponen un refuerciu del EI, con bolses de resistencia na zona magar lo dicho porTrump nun va muncho. Tamién podemos contar con que dellos de los fuyíos d’orixe européu consigan llegar hasta les nueses ciudaes, colo qu’ello supon.

Agora los rusos patrullen como fuercia d’interposición ente sirios y turcos; bona imaxe pa Putin, y los USA, si Trump sal reelexíu, puen entamar a pensar que’l so cayente imperial tien aniciáu.

Raúl Suevos

A 17 d'ochobre de 2019

Torna en castellán en repdiv.blogspot.com

La seguridá y la defensa na España de güei

LA SEGURIDÁ Y LA DEFENSA NA ESPAÑA DE GÜEI

Seguridá y defensa son dos conceutos qu’en munches ocasiones coinciden o se xunten y quiciabes poro’l ciudadanu alcuentra dificultá en desllindalos y valoralos na so xusta midida. Estos díes caberos tuvimos varies amueses d’ello y de cómo ciudadanía y medios de comunicación reaccionen énte los sos efeutos.

En Cataluña paez evidenciase un problema de seguridá con una imaxe repetitiva d'amarradielles sangrientes na cai a plena lluz del día, como la recien de Canovelles, que lleven a la manifestación espontánea de grupos ciudadanos en busca d’una reacción de la clas dirixente. Podríemos deducir que nesti casu la ciudadanía tien nidio qu’esiste un problema de seguridá, que-y afeuta direutamente, y poro pide soluciones.

Tamién nestos díés mos enteramos que narcos rescaten nel Estrechu a guardies civiles que na su persecución acabaron nel mar, imáxes curioses pa los telediarios. Guardies civiles compañeros d’aquellos que vimos y vemos enfangase y xugase la vida en casu de catástrofes como les que recien afararon el sudeste d’España; o d’esos qu’atrapen CDR,s aprendices de terroristes. Tamién nestos casos el ciudadanu decátase que falamos de seguridá, anque nun tenga problema en desentendese tocantes la situación económica y social d’esos mesmos guardies nel conxuntu d’España y particularmente nel PaísVascu y anguaño en Cataluña. Esi calter militar lleva a que la so entrega y esfuerciu se pague menos que’l d’una policía llocal o autonómica, tamién menos que la policía nacional. ¿A quién-y importa?

Entamen a desdibuxase los contornos de la imaxe cuando los rescatadores son militares, como nel casu de la UME, y ello magar les sinceres amueses d’agradecimientu d’aquellos que reciben direutamente esa ayuda pero que nun se decaten de qu’eses ayudes van a cargu de la Defensa, con costes muncho más baratos puesto que la condición militar nun entiende d’hores estraordinaries, nin de guardies pagaes, ni de retenes. ¿Ye seguridá o ye defensa? A toos paez beneficiar y el destín na UME d’esos soldaos ye voluntariu asina que… ¿A quién-y importa?

A lo cabero toca falar del atentáu con coche bomba que va un par de díes en Mogadisciu, Somalia, cuasi fina cola vida de varios de los militares de nueso ellí esplegaos. Salvaron la vida gracies al Lince, un vehículu blindáu alquiríu depués de que nun atentáu semeyante nel Llíbanu cuatro militares 

perdieren la vida porque’l vehículu BMR, con más de 40 años de serviciu, nun fuere abondo proteición. Yeren tiempos de la ministra Carmen Chacón qu’entainó a comprar proteición en forma de vehículos nuevos pa les nueses tropes.

Como nun hebo muertos en Mogadisciu malpenes hebo cobertura mediática. Les eleiciones y la so parafernalia tolo ocupen. Nun va haber seguimientu de los feríos, nin tampocu naide nun mos va cuntar cómo se vive la tensión neses misiones nes qu’un desplazamientu cenciellu pue convertise nuna trampa mortal, como’l vídeu que circula poles redes sobro esti atentáu mos amuesa. Tampocu los nervios que se gasten nuna simple guardia no alto d’una garita au una granada d’artillería ¿enquivocada? disparada polos israelíes pue segar la to vida. O inclusive’l relaxu d’un hotel en Mali que pue camudase nuna emboscada sangrienta como asocediera l’añu caberu y nel qu’un comandante español contribuyó a torgar que la cuenta de fallecios fuere mayor. Too ello ye seguridá, too ello ye defensa.

Falamos de defensa avanzada, la que se desendolca na nuesa redolada estratéxica como ye’l Sahel o l’Oriente Mediu, zones nes que al apurrir seguridá colos nuesos militares enzancamos qu’aporten elementos que puedan poner en peligru la propia, la que valoramos nes nueses cais, la que mos 

proporcionen les Fuercies de seguridá como la Guardia Civil, esi cuerpu de calter militar que los separatistes catalanes quieren espulsar de Cataluña.

La seguridá y la defensa superponense y confundense, entrambes son necesaries, imprescindibles, pero ye necesario que daquien eduque a la ciudadanía sobro la dimensión y l’algame de cauna d’elles pa qu’asina s’atope en condición de valorales y apreciales, y eso nun ta nes capacidaes de los protagonistes sinon nes manes de la clas dirixente y de los medios de comunicación, de lo contrario cada vegada que mos llegue la noticia d’un atentáu vamos tener que siguir entrugándomos ¿A quién-y importa?

Raúl Suevos

En Xixón a 6 d’ochobre de 2019

Versión en castellán en repdiv.blogspot.com