ANTECEDENTES
Nun podemos averanos a Cuadonga, baxo la Cueva santa,
y tratar de describir lo qu’ellí pudo asoceder, ensin más. Fáise necesario da-y
un enfoque más xeneral, más allá de la yá entoncenes efectiva dominación
musulmana de la mayor parte de la Península Ibérica, y pa ello tenemos que
arimanos hasta la Península Arábiga, au, en La Meca, allá pel añu 622, un predicador
apasionáu, Mahoma, dexara la ciudá colos sos siguidores pa empobinase a Medina,
énte’l peligru que pa la so integridá personal suponía caltenese nella, y con
ello daba llugar a lo que se conoz como la Héxira, o l’entamu de la dómina del
conocimientu. Ye una fecha importante non sólo pa los astures, qu’entós, cien
años enantes de la batalla mítica, taben trepando colos Vándalos asdingos y colos
Suevos, a los que sedríen a caltener a raya, acordies dalgunos, o que pasaríen de llargo haza
Galicia énte la durez del territoriu, según otros.
Los eventos d’Arabia tendríen repercusiones globales,
como a estos altores tol mundiu sabe, yá que, tres la conquista de La Meca por
Mahoma y los sos secuaces, el credu nuevu, l’Islam, entra nun periodu de
conquistes territoriales descomanáu, emburriáu pola Yihad. Primero, mientres la
vida de Mahoma, y siguiendo coles ampliaciones llevaes a cabu polos primeros
califas, los Rashidum, los bien amaos. Siendo con Utman cuando s’estenderexen
pel norte d’África a la conquista de les tierres de la costa, romanizaes, y dempués del interior, dominios bereberes muncho
más xavaces y cerbunos, lo que-yos va costar casi tola segunda metá del sieglu
VII.
A primeros del sieglu VIII los bereberes yá tán
conquistaos y, ensin llegar a ser los creyentes radicalizaos y fervorosos,
ancestros del Estáu Islámicu anguaño, que van algamar sieglos más tarde la península
baxo los nomes d’Almorávides o Almohades; son esos recién islamizaos bereberes
del S. VIII, baxo la dirección d’una élite proviniente de la península arábiga,
los que presionen na redolada de l’amurallada y bien defendía ciudá de Ceuta,
esperando la so oportunidá pa compensar la derrota amargurienta que nel 718
sofrieran nes muralles de Constantinopla, y abrise pasu haza l’oeste.
Nel tiempu que mos ocupa, na Península, los asuntos del
estáu, rexíu entós por una monarquía visigoda que nun pasaba pelos sos meyores
momentos, nun tán precisamente inchentes; al contrario, la corona, entá
dependiente d’un sistema electivu arcaicu, heriedáu de los sos oríxes
xermánicos, alcuentrase nesos tiempos arratando les vidayes de Rodrigo, quien
dende’l so accesu al tronu vien desempeñándose como un bomberu rexu encargáu
d’apagar fueos casi constantemente. Cuando nun son los partidarios del
desapaecíu rei Witiza son los vascones y bagaudes los que se allevanten, o
inclusive los independientes astures tresmontanos tamién s’amuesen rebeliscos.
El rellatu románticu quier xustificar la traición del
conde don Xulián, que la so esistencia flota nel borrín de la lleenda, nun
supuestu vexame a la so fía na corte del rei Rodrigo. Pa otros supuestos
estudiosos, especialmente nel sieglu XIX, la llamada a los agarenos vendría de
parte de los conocíos como witizanos, mui asentaos na Bética, esto ye, na Andalucía
anguaño, pero, teniendo en cuenta’l sistema yihadista qu’imperaba nestos
primeros momentos de la espansión islamista, cabe pensar que fo’l propiu interés
de Musa ben Nusair, el walí responsable de les tierres de lo qu’anguaño
conocemos como Marruecos, alleicionáu dende’l califatu de Damasco, el
qu’impulsó nun primer momentu los tratos col gobernador de Ceuta, y darréu colos
resentíos witizanos.
Convien nun escaecer equí qu’en Damascu alcontrabase
en plenu apoxéu la dinastía Omeya, una familia qu’algamara’l poder con Muáwiya
pente medies una guerra civil sangrienta que finaría cola vida d’Omar, el xenru
y fíu adoptivu d’Mahoma, y que dividiría al Islam pa siempres creando l’irredentismu
de los xiites. Esta alministración, ente les más conducentes na historia musulmana,
combinaba de forma maxistral la relixón, l’alministración civil y la difusión
de la pallabra del Profeta pente medies el alfanxe. Too ello baxo la
intervención alministrativa del “Diwan”, daqué asina como un sistema contable
xeneral nel que s’especificaba les partes del botín llográu, qu’a caún, según
la so posición nel organigrama militar, y-correspondía, asina como a les viudes
y güérfanos en casu de muerte n’actu de serviciu. Un sistema que, combináu col
fervor relixosu de los conversos nuevos y les promeses d’huríes esperando nel
Paraísu, asina como la obligación pal creyente d’impulsar la relixón d’Alá,
daba como resultáu unos exércitos práuticamente invencibles que diben llograr
una espansión territorial nun tiempo perbreve como nun se conociera na historia
del mundiu. Habría qu’esperar a Xenxis Khan pa ver otra.
El casu ye que, con toles salvedaes que da la falta de
nicios históricos nidios y basándonos nes cróniques que s’escribieron abondo
tiempu dempués por parte de cristianos y mahometanos, de les que vamos citar
como más importantes o referenciaes, anque non poro en posesión de la verdá, nin
muncho menos, del lláu cristianu l’Albeldense y el Cronicón d’Alfonsu III ente
otres, y por parte musulmana Ibn Hayyan, Ibn Jaldum o Ahmad al Razi como más
conocíos; anque nun mos escaecemos del Silense, Lucas de Tuy o’l propiu
testamentu d’Alfonsu II el Castu del lláu cristianu o d’Ahmed el Mokri, Al
Kotiya o el Ajbar Machmua del lláu sarracén, podemos tar seguros qu’hebo una
batalla, metanes el 711, na que los visigodos de Rodrigo foron totalmente
derrotaos.
Tocantes esa derrota, na que la crónica/lleenda alluga
a quien va ser protagonista d’esta historia, Pelayu, debemos intentar facer
dellos apuntes, seguramente ardigosos pa dalgunos pero, énte la falta de datos
fiables, perfectamente llexítimos en cuantu que se sofiten na lóxica; y asina
entamamos por allineanos con don Claudio Sánchez-Albornoz en cuantu que,
efectivamente, la batalla tevo llugar nes orielles del riu Guadalete y non na Llaguna
de la Xanda, como dalgunos tienen indicao, pero, a partir d’ehí, convien dexar
de llau les cifres que la historia romántica nos tien apurrío; nada de docenes
de miles de contendientes, más bien unos pocos miles per un llau y otru, yá que
del costáu musulmán teníen la problemática del pasu del Estrechu, esto ye, la loxística,
por muncho que contasen con un sacu mozos rifeños ansiosos por ganar fama y
plata; y del llau visigodu, con un sistema d’exércitu señorial nel que los dux
aportaben lo qu’un par de sieglos dempués díbense llamar mesnaes medievales,
tampocu ye probable qu’algamaren los 40 mil combatientes que dalguna crónica
tien apuntao. Esto ye, tamos quiciabes énte tres o cuatro mil combatientes por
cada llau, quiciabes más pola parte de Rodrigo.
Conociendo’l tarrén y con xente avezada al combate, convien
recordar que los de Rodrigo veníen de guerriar en Pamplona, paez extrañu una
derrota tan apolmonante, y anque pueda resultar curiosa la ideya d’otorgar el
triunfu a les evoluciones maravioses de la caballería lixera musulmana, que nun
diba ser frenada hasta llegar a Poitiers, preferimos pensar que si difícil yera
tresportar infantería dende Ceuta, más lo yera’l tresporte de caballos, asina
que, nesi aspeutu, el Tariq que dempués daría nome al Peñón, debía tar en
dificultá, de cuenta que nun mos queda más remediu que pensar nuna
xustificación más penosa, y ésta atopase na traición que, acordies les
cróniques cristianes, llevaríen a cabu los siguidores del antiguu rei Witiza,
los cualos metanes l’estreldu de la llucha abandonaríen les ringleres de
Rodrigo pa pasase a les de los invasores moros, desequilibrando radicalmente la
batalla. Toa una especulación pero que, dende’l puntu de vista militar y
políticu, resulta abondo plausible.
A partir d’ehí desendolcase un esbarrumbamientu xeneral
del reinu visigodu nel que, les cróniques cristianes supongo que por vergoña pasen
a les carrenderes, ye induldabel qu’hebo un cambéu de chaqueta por parte de la
mayoría de los cuadros políticos y relixosos que facilitó la toma de tola
península en tiempu percurtiu; y llegaos equí quedaría mui bien soltar aquello
de ¿toa? Non, quedaba un apartaz pequeñu nel norte, pero non, ellí tampocu, pos
en Xixón, la ciudá cabera del norte, llegaron a cuntar con daqué paecío a un
gobernador, asina que, cabe afirmar, el reinu visigodu desapaeció como un castiellu
de naipes.
Ente las ringleres de Rodrigu, los cronistes cristianos,
interesadamente, asitiaron dalgún sieglu dempués a Pelayu como espatariu del
rei, daqué asina como pretorianu; dalgún va más alló y failu xefe de los
espatarios, quiciabes ensin dase cuenta que lu dexa en mal llugar, pos de ser
asina debiere cayer al llau del so señor nes teñies de colorao augues del riu
Guadalete, y, amás, per años, y teniendo en cuenta la espectativa vital
d’aquella dómina, habríanos aportao demasiao talludu pa lo de Cuadonga. Vamos a
pensar, por aquello de da-y esperiencia, que fuera como paxe o aprendiz noble
con dalgún de los señores veníos d’Asturies a acompañar a don Rodrigo, y pocu
más.
Dempués de la tarrecible derrota, los supervivientes
que nun cayeron nes manes de witizanos o ismaelites, debieron salir a uña de
caballu, a pie la fuyida ye casi siempres imposible o como poco complicada,
camín de Toledo, dende onde, y ehí casi toles cróniques pónense d’alcuerdu, los
más siguieron camín de la Narbonense, anguaño sur de Francia, pa ser acoyíos
polos sos parientes visigodos, y los menos siguieron haza’l norte, au ye
probable que contaran con familia y posesiones. La España visigoda dexara d’esistir.
Ye de suponer que n’Asturies, una vegada tomada polos
musulmanes y col gobernador Munuza en Xixón, la situación sedría semeyante a la
del restu del país y los otros territorios yá conquistaos polos exércitos
agarenos al Imperiu Bizantín, esto ye, los “dhimmis”, los cristianos o xente
del Llibru taríen, tres dalgún tipu d’alcuerdu
y conforme a lo señalao nel Corán, pagando los impuestos de bayura y de
capitación, no que sedría pa dalgunos “un buen pasar”, y la historia d’España
tendría sio bien estremada si nun llega a ser porque Munuza s’encapricha
d’Adosinda, la hermana d’esti Pelayu, que’l so nome tien arume asturromanu, y equí
nin les cróniques nin tampocu Sánchez Albornoz aclaren si con ánimu matrimonial
o simplemente luxuriosu, anque la novela romántica y el teatru tienen sacao bon
partíu d’esti detalle de la historia
El cuciu Munuza, preparando’l tarrén pa la so ofensiva
sobro Adosinda, únvia a Pelayu, tantu si tuviera con Rodrigo nel Guadalete como
si non, a Córdoba, en calidá de rehén[i]
o convidáu con llibertá acutada, y ellí, dicen les cróniques de casa, trescaláu
ésti énte l’atropellu que sufren los cristianos y l’acabamientu a que s’alcuentra
sometíu, decide colar y tornar p’Asturies, vamos, l’echase al monte tantes
vegaes repetío na historia patria. Tamos na primavera del 717 y el destín
d’esti paisanu empobinalu a Cuadonga.
Yá n’Asturies, tres afayar lo asocedío cola so hermana
y tres épica fuyida énte los esbirros del wali[ii]
cordobés, Al Hurr, unviaos por él, anque nun se sepa mui bien por qué, si bien
s’albidra dalguna actividá axitadora na capital omeya, empobinase haza l’oriente
asturiano, seguramente menos controláu que la zona central y au debía tener dalgúna
mena d’ascendiente sobro los astures d’aquellos valles angostos.
Pal branu del 718, dómina de collecha, o de la
seronda, tiempu d’andecha, cuando se baxen los ganaos de les mayaes de los
puertos a los valles demientres se dexa madurar el quesu nes cueves, ye
probable que tuviere llugar l’asamblea o “aconceyamientu” en Cangues d’Onís,
nel que Pelayu va ser escoyíu caudillu d’unos homes que, demientres dellos sieglos,
demostraran llevar mal el xugu impuestu, y a los que convenciera pente medies
conversaciones y apelaciones a la llibertá, probablemente, y a la fe cristiana,
menos plausible dao’l baxo nivel de cristianización nes estayes apartaes,
mientres los meses d’aquel añu que les cróniques mos escamotieyen.
Esti caudillo ye elixíu por astures, non como
continuador de la llegalidá goda, que también-yos ye ayena, y escontra la que
se allevantaran enantes, sinon como igual ent’ellos, como líder d’una legalidá
nueva que col actu asambleariu se crea, qu’entá nun ye institución, namái ye
rebelión pero que, si hai suerte, va ser l’embrión de daqué totalmente nuevo,
el reinu d’Asturies. Vaya lo anterior en rellación col nomáu neogoticísmu que
va apaecer cuando dos centuries más tarde, al desplazase’l reinu haza Lleón, la
historiografía intente convertir a los electores de Cangues en nobles godos y a
Pelayu en fíu d’un dux, Favila, imposible d’atopar nes rellaciones visigodes
del Aula Regis.
LA BATALLA
DE CUADONGA
L’entamu de la rebelión ye afortunáu. Al Hurr nun paez
esmolecese d’esos “asnos xavaces”, asina los califiquen les cróniques agarenes,
qu’asalten recaudadores d’impuestos y caltienen a la pequeña guarnición
musulmana nos sos cuarteles de Cimavilla. Córdoba ta más interesada en
progresar haza la Narbonense, y el viniente wali, Al Samah, aportáu’l 719,
preocúpase d’iguar alministrativamente’l territoriu del sur hispanu, más ricu,
y avanzar haza la Galia, u va morrer en batalla énte’l duque d’Aquitania tres
tomar Narbona nel 721. Va ser el primer revés seriu de los sarracenos.
El so sucesor, Anbasa, llega n’agostu d’esi mesmu añu
y, posiblemente pa meyorar la moral de les so tropes con una victoria fácil enantes
de retomar los asuntos galos, únvia al entamu de la primavera viniente, nel
722, a un talu Al Qama al frente d’un exércitu p’acabar colos rebeldes del
norte. Esti exércitu pequeñu, ente 1000 y 2000 individuos, probablemente a
caballu, debió entrar como casi toos pel Camín de la Mesa[iii],
que per Astorga sube direutamente pela Via de la Plata dende Córdoba, y perende
van subir los sarracenos 70 años más tarde p’afarar Uviéu enantes de ser
derrotaos en Lutos por Alfonso II, sometiendo a toos aquellos asentamientos que
los informes de Munuza indicaron como rebeldes. Avanzando pel valle del riu
Piloña, debió progresar más tarde, dende Les Arriondes, Sella arriba, hasta
Cangues d’Onís.
Pa entós Pelayu y los sos homes recoyieranse haza la
zona del monte Auseva y la Cueva Dominica (de la Señora)[iv],
qu’asina se la conocía na dómina y que ta colgada a 30 metros d’altor en medio
d’un murallón rocosu. Ellí contaben cola fortaleza del tarrén pa la defensa y
tamién, al traviés de los Picos, con una vía d’escape haza l’este. Ye probable
que se vieran a sí mesmos nes últimes.
Al Qama avanzó haza Cuadonga, yera’l 28 de mayu del
722[v],
seguramente sele pos el valle ye ampliu y escampiáu en comparanza con otros llugares
del camín. Acompañábalu, dicen les cróniques, el cativu y llaín obispu Oppas,
fíu de Witiza y yá traidor a Rodrigo, pa llegáu’l casu aldericar con Pelayu,
como asina fo, anque obviamente con resultáu negativu.
Enantes d’aportar a l’altor del monte Auseva, el valle
vase zarrando hasta convertise n’angostura, nun hai espaciu pa camudar
l’espliegue y hai que siguir nuna llarga columna ensin flanqueos protectores,
anulando el valir de la caballería, hasta que, a la vuelta d’un reconcu, atopense
baxo la cueva na que Pelayu con 300 homes –la cifra, apurría poles cróniques
cristianes, recuerda muncho a Leónidas nes Termopiles, pos la d’Alfonso III
cuantifica nunos peresaxeraos 187.000 a los atacantes - espera a los
mahometanos.
Les fleches de los arqueros reboten escontra’l
murallón rocosu y, de sópito, el gruesu de los homes del caudillu, emboscaos na
espesura del monte valle abaxo, caen metanes la columna enemiga, escachándola y
provocando la llercía de mou que la retaguardia torna grupes y fuye haza
Cangues. Ye’l momentu qu’escoye Pelayu pa cayer sobro la vanguardia u s’atopen
Al Qama y Oppas. Tamién equí españa l’allorie y los más fuyen haza’l camín de los
puertos –la carretera anguaño de los Llagos- dexando a Al Qama muertu y al
obispu prendíu.
Los fuyíos haza Cangues, diezmaos, pos ye sabío que
les poblaciones per onde pasen les tropes desbandaes suelen cebase nelles,
aportaríen a Xixón coles noticies nefastes, poniendo al escape a Munuza y la so
guarnición que tamién sedríen copaos y aniquilaos cuando intentaben ganar les
altures del Camín de la Mesa dalgunos díes dempués.
El restu de la vanguardia sarracena fo algamada polos
homes de Pelayu nel tramu conocíu aínda anguaño como la Huesera, que el so nome
trae arumes de matancia vieya. Dempués, los sobrevivientes, vagaríen ente
dificultaees apolmonantes pelos Picos pos nun cuntaben con guíes, pa llegar a
Cosgaya, na Lliebana, au dalgunes cróniques llévenlos a perecer baxo un argayu
venturiegu y otres, más lleenda que crónica, dicen que morrieron a manes de
Gaudosia, muyer de Pelayu, que se alcontraría a resguardu naquelles partes
coles muyeres y una guarnición pequeña.
Tres la victoria Pelayu yá nun ye caudillu, ye aclamáu
rei y asitia la so capital en Cangues d’Onís au va morrer tres 19 años de
reinao. Lo demás ye la historia de nueso.
[i] Yera una
prautica normal únviar notables o los sus fíos pa d’esa miente caltener
controlaos los territorios ocupaos.
[ii] Nos
primeros tiempos del dominiu musulmán entá nun esistía l’emir, muncho menos el
califa, el wali yera un gobernador delegáu del califa de Damascu, dalgo asina
como un gobernador o adelantáu.
[iii]
Dende’l tiempu de los romanos los exércitos entraron per La Mesa o pela via
Carisa construyida ésta por Publio Cariso, vencedor de los astures, y que sube
direutamente dende Lleón. Dambes descienden siguiendo un cordal dende la
cordillera hasta’l centru d’Asturies.
[iv] Ye
probable que yá esistiera dalgún tipu de cultu precristianu nel llugar.
[v] La fecha
proponla Sánchez Albornoz a partir de la fecha de la muerte en combate d’un
notable musulmán citada con claridá nes cróniques d’estos.
BIBLIOGRAFIA
Gracia Noriega, José I. Don
Pelayo. Esfera de los libros. Madrid, 2006.
Hodgson,
Marshal. The Venture of Islam. The
University of Chicago Press, Vol I. Chicago 1974.
López
García-Jove, Luciano. La batalla de
Covadonga e historia del Santuario. Editorial F.E.T. Oviedo, 1945.
Sánchez Albornoz, Claudio. Orígenes de la Nación Española. El reino de Asturias. Instituto de
Estudios Asturianos. Oviedo, 1972.
Schulten, Adolph, Cántabros
y Astures y su guerra con Roma. Espasa Calpe. Barcelona, 1962.
Suevos, Raúl. Año 718,
nacimiento del Reino de Asturias y de la epopeya de España. Revista
Ejército. Madrid, nov2018.
Suevos, Raúl. El
pensamiento radical islámico y sus ideólogos. Memorial de Infantería. Toledo,
2016.
