La banalización del holocaustu nuclear

 

Confieso’l mio plasmu tres la escucha de delles tertulies de calter políticu. Ún, más per edá que por conocimientos, sabe que les noticies son como’l pexe que llega a la Rula, que’l so preciu non yá depende de la calidá sinón tamién de la cantidá de la mesma especie qu’esi día aporta pa ser vendío. Coles noticies asocede daqué paecío y asina mos atopamos que los voceros, encarregaos d’ufiertanos el diariu productu informativu, gueten la manera de facénoslo más curioso, llamando la nuesa atención, que ye la forma de mercar la noticia.

Cola anuncia atapecía del señor Putin d’usar l’arma nuclear los espertos en too que nutren les tertulies radiofóniques, supongo que tamién les televisives, tienense somorguiao nel anális del conflictu nuclear como si fueren espertos políticos en trataos de desarme pa darréu, nel tiempo que cuesta cortar la frase del siguiente interviniente, pasar a camudar n’espertos n’oxives nucleares, o, a continuación, científicos conocedores del algame del llovíu radiactivu tres un españíu nuclear. Nel mesmu programa puese asistir a la visión dramática de la “destrucción mutua” y actu siguíu a facer chistes graciosos sobro’l mesmu conceutu. Ye lo qu’hai.

Ye la Rula informativa qu’obliga a enllenar el tiempu que marca la escaleta del director con productos frescos, y Putin punxo lo nuclear de moda, anque a min, que me veo asaltáu por amigos y conocíos sobro les realidaes  que s’esconden tres l’anuncia, y que me veo camudao, magar nun lo guetar, en putinólogu d’última hora,  paezme que l’holocaustu nuclear, que siempres ta ehí, nun va ser pa esti inviernu, un periodu que sí que va suponer, posiblemente, un referente temporal d’importancia máxima na guerra d’Ucrania.

La llamada a la movilización parcial, d’operatividá más que duldosa conocíes la eficacia del Exércitu rusu y la so infraestructura de defensa, ye una amuesa nidia de que Putin busca ganar tiempu. Sabe que too se va xugar non nos campos ucranianos sinón nes cancilleríes occidentales, especialmente les europees, les más golpiades pol preciu de la enerxía y les más sometíes a los sos volátiles mases votantes, como vamos ver esti domingu n’Italia. Está dispuesto a pagar el preciu del descontentu interior con tal de llegar a una mesa de negociación apadrinada pola China de Xi, l’equilibrista Erdogán, y los más débiles ente los europeos, anque non deseyada por un’alministración Biden que se ve fortalecía económica y políticamente tres el papasal de Kabul.

Pa Putin, anguaño, algamar a quedase con Crimea nun alcuerdu internacional sedría dalgo vendible en casa como un triunfu, tien gas y petróleo pa pagar indemnizaciones de guerra, y controla la comunicación interna. El tiempu y la climatoloxía invernal tienen la pallabra.  

Raúl Suevos

A 23 díes vencíos de septiembre de 2022

Torna en castellán en repdiv.blogspot.com